1. Јагубун аиләси һаггында нә демәк олар?

 ИСАНЫН гардашы Јагуб руһани ҹәһәтдән мөһкәм бир аиләдә бөјүмүшдү *. Онун валидејнләри Јусифлә Мәрјәм Јеһованы чох севирди вә Она ибадәтдә әлләриндән ҝәләни едирди. Үстәлик, онун бөјүк гардашы вәд олунмуш Мәсиһ олаҹагды. Јагуб бәхтәвәр инсан иди ки, белә бир аиләдә бөјүмүшдү.

2. Бөјүк гардашына рәғбәт бәсләмәк үчүн Јагубун һансы сәбәбләри вар иди?

² Јагубун бөјүк гардашына рәғбәт бәсләмәк үчүн бир чох сәбәби вар иди (Мәт. 13:55). Мәсәлән, Иса Төвраты о гәдәр јахшы билирди ки, һәтта он ики јашы оланда Јерусәлимдә савадлы мүәллимләри һејрәтә ҝәтирмишди (Лука 2:46, 47). Јагуб Иса илә бирликдә дүлҝәрлик ишиндә дә чалышмыш ола биләрди. Әҝәр белә идисә, онун гардашыны даһа јахындан танымаг имканы олмушду. Нејтан Норр гардашын белә сөзү вар иди: «Инсаны онунла ишләјәндә таныјырсан» *. Һәмчинин Јагуб өз ҝөзү илә ҝөрүрдү, Иса неҹә «бөјүјүр, һикмәтлә долур, Аллаһын вә инсанларын һүсн-рәғбәтини газанырды» (Лука 2:52). Јәгин елә дүшүнүрсүнүз ки, Јагуб Исанын илк шаҝирдләриндән бири олду. Әфсус ки, јох.

3. Иса хидмәтә башлајанда Јагуб она неҹә јанашырды?

³ Иса јер үзүндә хидмәт едәркән Јагуб онун шаҝирди олмады  (Јәһ. 7:3—5). Бәлкә дә, Јагуб, диҝәр гоһумлары кими, Исанын ағлыны итирдијини дүшүнүрдү (Марк 3:21). Һәмчинин һеч бир јердә јазылмајыб ки, Иса ишҝәнҹә дирәјиндә едам олунанда Јагуб Мәрјәмлә бирликдә орада олуб (Јәһ. 19:25—27).

4. Бу мәгаләдә нәләри арашдыраҹағыг?

⁴ Сонралар Јагуб Мәсиһә иман ҝәтирди вә јығынҹагда сајылыб-сечилән гардаш олду. Бу мәгаләдә Јагубдан данышаҹағыг. Онун бизә нүмунә гојдуғу ики саһәни арашдыраҹағыг: 1) Нәјә ҝөрә даима тәвазөкар олмалыјыг? 2) Сәриштәли мүәллим олмаг үчүн нә едә биләрик?

5. Јагуба Исанын дириләндән сонра она ҝөрүнмәси неҹә тәсир етмишди?

⁵ Јагуб Исанын садиг давамчысы нә вахт олду? Иса дириләндә «Јагуба, сонра исә һәвариләрин һамысына ҝөрүндү» (1 Кор. 15:7). Бу ҝөрүш Јагубун һәјатында дөнүш нөгтәси олду. Һәвариләр Јерусәлимдә јухары отагда јығышдыглары ҝүн мүгәддәс руһ аланда Јагуб да орада иди (Һәв. 1:13, 14). Даһа сонра Јагуб биринҹи әсрдәки рәһбәрлик шурасында хидмәт етмишди (Һәв. 15:6, 13—22; Гал. 2:9). Һәмчинин ерамызын 62-ҹи илиндән әввәл Јагуб Аллаһын илһамы илә мәсһ олунмуш мәсиһиләрә мәктуб јазмышды. Ҝөјдә вә ја јердә јашамаға үмид етмәјимиздән асылы олмајараг, бу мәктуб бизим үчүн дә фајдалыдыр (Јаг. 1:1). Биринҹи әср тарихчиси Иосифин јаздыгларына ҝөрә, Јагуб јәһуди баш каһининин, Һәнна оғлу Һәнәнјанын әмри илә едам едилди. О, сона гәдәр садиг галараг јерүзү һәјатыны баша вурду.

6. Јагуб дөврүнүн дин хадимләриндән нә илә фәргләнирди?

⁶ Јагуб тәвазөкар иди. Нәјә әсасән белә дејә биләрик? Ҝәлин Мәсиһи гәбул етмәклә бағлы Јагуб вә дин хадимләри арасындакы фәргә бахаг. Јагуб Исанын Аллаһын Оғлу олдуғуна даир данылмаз сүбуту ҝөрәндә буну тәвазөкарлыгла гәбул етди. Амма Јерусәлимдәки бөјүк каһинләр һаггында ејни шеји демәк олмаз. Мәсәлән, Исанын Илазәри дирилтдији ҝөз габағында иди. Онлар буну инкар едә билмәздиләр. Амма онлар Исанын Аллаһын елчиси олдуғуну гәбул етмәк әвәзинә, һәм ону, һәм дә Илазәри өлдүрмәјә чалышырдылар  (Јәһ. 11:53; 12:9—11). Иса дирилдикдән сонра исә онлар буну инсанлардан ҝизләтмәк үчүн тәдбир ҝөрдүләр (Мәт. 28:11—15). Јәһуди дин хадимләринин гүруру имкан вермәди ки, онлар Мәсиһи гәбул етсин.

7. Нә үчүн гүрурлу олмамалыјыг?

⁷ Нә өјрәнирик? Гүрурлу олмамалы вә өјрәнмәјә һазыр олмалыјыг. Хәстәлик уҹбатындан үрәјин артерија диварынын галынлашмасы үрәјин нормал шәкилдә дөјүнмәсинә мане олдуғу кими, гүрур да мәҹази үрәјимизи сәртләшдирир вә Јеһованын ҝөстәришләринә риајәт етмәјимизә мане олур. Фәрисиләрин үрәји о гәдәр сәртләшмишди ки, онлар Аллаһын руһунун вердији сүбутлары ачыг-ајдын ҝөрсәләр дә, буну гәбул етмирдиләр (Јәһ. 12:37—40). Бу, чох тәһлүкәли иди. Чүнки бу ҹүр әһвали-руһијјә онларын әбәди һәјатдан мәһрум олмасына ҝәтириб чыхарды (Мәт. 23:13, 33). Доғрудан да, чох ваҹибдир ки, Аллаһын Кәламы бизи формалашдырсын, дүшүнҹәләримизә вә гәрарларымыза тәсир етсин! (Јаг. 3:17). Јагуб тәвазөкар олдуғу үчүн һәр заман Јеһовадан өјрәнмәјә һазыр иди. Ҝөрәҹәјимиз кими, мәһз тәвазөкарлығын сајәсиндә о, баҹарыглы мүәллим олду.

8. Нәјин сајәсиндә јахшы мүәллим ола биләрик?

⁸ Дин хадимләри Бутрус вә Јәһјаја «савадсыз, садә» адамлар кими бахырдылар. Јагубун хүсуси тәһсили олмадығы үчүн, шүбһәсиз, она да белә јанашырдылар (Һәв. 4:13). Амма Јагуб јахшы мүәллим олмағы өјрәнди. Онун јаздығы мәктубдан буну ајдын ҝөрмәк олар. Ола биләр, Јагуб кими бизим дә әлавә тәһсилимиз јохдур. Буна бахмајараг, Јеһованын руһу вә Онун тәшкилатындан алдығымыз тәлим сајәсиндә биз дә мәһарәтлә өјрәтмәји баҹара биләрик. Ҝәлин ҝөрәк бу саһәдә Јагубдан нә өјрәнә биләрик.

9. Јагубун өјрәтмәк тәрзини тәсвир един.

⁹ Јагуб гәлиз данышмырды, садә шәкилдә өјрәдирди. Бунун сајәсиндә динләјиҹиләр нә етмәли олдугларыны вә буну неҹә едәҹәкләрини  асанлыгла анлајырдылар. Мәсәлән, ҝөрүн Јагуб мәсиһиләрә инҹик галмадан әдаләтсизлијә дөзмәји неҹә садә шәкилдә өјрәтмишди. О демишди: «Биз ахырадәк дөзәнләри хошбәхт сајырыг. Сиз Әјјубун дөзүмү һаггында ешитмисиниз вә Јеһовадан ҝәлән нәтиҹәни ҝөрмүсүнүз. Јеһова чох меһрибан вә мәрһәмәтлидир» (Јаг. 5:11). Фикир верин ки, Јагуб өјрәдәркән Аллаһын Кәламына әсасланырды. О, Кәлам васитәсилә динләјиҹиләрини өјрәдирди ки, Јеһова һәмишә Әјјуб кими садиг хидмәтчиләрини мүкафатландырыр. Јагуб бу фикри изаһ етмәк үчүн мәнтигли шәкилдә вә садә сөзләрдән истифадә етмишди. Бунунла да о, диггәти өзүнә јох, Јеһоваја јөнәлтмишди.

10. Дәрс кечәркән Јагубдан неҹә нүмунә ҝөтүрә биләрик?

¹⁰ Нә өјрәнирик? Садә шәкилдә вә Аллаһын Кәламындан өјрәтмәлијик. Мәгсәдимиз шаҝирди өз билијимизлә тәәҹҹүбләндирмәк олмамалыдыр. Әксинә, диггәти Јеһованын һикмәтинә вә мәһәббәтинә јөнәлтмәлијик (Ром. 11:33). Бу мәгсәдә наил олмаг үчүн өјрәтдијимиз һәр шеј Мүгәддәс Китаба әсасланмалыдыр. Мәсәлән, дәрс кечдијимиз инсана «сәнин јеринә олсајдым, белә едәрдим» демәкдәнсә, она Мүгәддәс Китабда јазыланлар үзәриндә дүшүнмәјә, үзләшдији мәсәләјә Јеһованын неҹә бахдығыны анламаға көмәк едә биләрик. Онда шаҝирд бизи јох, Јеһованы разы салмаг истәјәҹәк.

11. Јагубун дөврүндә бәзи мәсиһиләрин һансы проблемләри вар иди вә Јагуб онлара һансы мәсләһәтләри вермишди? (Јагуб 5:13—15).

¹¹ Јагуб вәзијјәтә реал бахырды. Јагубун мәктубундан ҝөрүрүк ки, о, диндашларынын проблемләриндән аҝаһ иди вә бунларын өһдәсиндән ҝәлмәләри үчүн онлара ајдын ҝөстәриш верирди. Мәсәлән, бәзи мәсиһиләр верилән мәсләһәтләрә әмәл етмирдиләр (Јаг. 1:22). Бир башгалары ајры-сечкилик едиб, варлылара даһа чох һөрмәт ҝөстәрирди (Јаг. 2:1—3). Еләләри дә вар иди ки, дилләрини ҹиловлаја билмирдиләр (Јаг. 3:8—10). Бунлар ҹидди мәсәләләр иди, амма Јагуб онлардан әлини үзмүрдү. О, мүлајим, ејни заманда ачыг шәкилдә онлара мәсләһәт верди вә онлары тәшвиг етди ки, дәјишмәк үчүн ағсаггаллардан көмәк истәсинләр. (Јагуб 5:13—15 ајәләрини охујун.)

12. Дәрс кечдијимиз инсанлара неҹә јанашмалыјыг?

¹² Нә өјрәнирик? Вәзијјәтә реал бахмагла јанашы, инсанларда мүсбәт шејләрә фикир вермәлијик. Дәрс кечдијимиз әксәр инсанлар Мүгәддәс Китабдакы мәсләһәтләри тәтбиг етмәкдә чәтинлик чәкир (Јаг. 4:1—4). Пис вәрдишләри тәрҝитмәк вә мәсиһи хүсусијјәтләринә јијәләнмәк үчүн бир аз вахт лазым ола биләр. Јагуб кими, биз дә шаҝирдимизә нәләрин үзәриндә ишләмәли олдуғуну демәјә чәкинмәмәлијик. Мүсбәт әһвали-руһијјәни горујараг әмин олмалыјыг ки, Јеһова һәлим гәлбли инсанлары Өзүнә ҹәлб едәҹәк вә онлара дәјишиклик етмәјә ҝүҹ верәҹәк (Јаг. 4:10).

13. Јагуб 3:2 ајәсиндә ҝөстәрилдији кими, Јагуб нәји баша дүшүрдү?

¹³ Јагуб өзү һагда јүксәк фикирдә дејилди. Јагуб Исанын гардашы олдуғу үчүн вә ја алдығы тәјинатлара ҝөрә өзүнү баҹы-гардашлардан үстүн тутмурду. О, диндашларыны «әзиз гардашларым» адландырырды (Јаг. 1:16, 19; 2:5). О өзүнү елә апармырды ки, санки гүсурсуздур. Јагуб «һәр биримиз дәфәләрлә сәһв едирик» демәклә өзүнү дә бура аид етмишди. (Јагуб 3:2 ајәсини охујун.)

14. Нәјә ҝөрә гүсурсуз олмадығымызы демәјә чәкинмәмәлијик?

 ¹⁴ Нә өјрәнирик? Унутмамалыјыг ки, һамымыз ҝүнаһлыјыг. Дәрс кечдијимиз инсанлардан үстүн олдуғумузу дүшүнмәмәлијик. Нәјә ҝөрә? Әҝәр шаҝирдимиздә гүсурсуз олдуғумуз тәәссүраты јаратсаг, о дүшүнә биләр ки, һеч вахт Аллаһын тәләбләринә риајәт едә билмәјәҹәк. Амма Мүгәддәс Китаб принсипләринә риајәт етмәјин бизә дә бәзән чәтин олдуғуну вә Јеһованын бизә көмәк етдијини сәмими шәкилдә бөлүшсәк, шаҝирдимиздә Јеһоваја хидмәт едә биләҹәјинә әминлик јаранаҹаг.

15. Јагубун чәкдији нүмунәләр барәдә нә демәк олар? (Јагуб 3:2—6, 10—12).

¹⁵ Јагуб үрәјә тәсир едән нүмунәләрдән истифадә едирди. Шүбһәсиз, о, буну мүгәддәс руһун көмәји илә едирди. Һәмчинин о, бөјүк гардашы Исанын чәкдији нүмунәләрдән дә чох шеј өјрәнмиш ола биләрди. Јагубун мәктубундакы нүмунәләр садә вә баша дүшүләндир. (Јагуб 3:2—6, 10—12 ајәләрини охујун.)

16. Нәјә ҝөрә еффектив нүмунәләрдән истифадә етмәлијик?

¹⁶ Нә өјрәнирик? Еффектив нүмунәләр чәкәк. Јахшы нүмунәләрдән истифадә едәркән санки гулаглары ҝөзә чевирирсиниз. Елә бил, инсанларын ағлында шәкил чәкирсиниз. Бу шәкилләр динләјиҹиләрә Мүгәддәс Китабын әсас һәгигәтләрини баша дүшмәјә көмәк едир. Иса нүмунәләрдән мәһарәтлә истифадә едирди. Гардашы Јагуб да ондан нүмунә ҝөтүрмүшдү. Ҝәлин Јагубун чәкдији нүмунәләрдән бирини арашдыраг вә бу нүмунәнин нәјә ҝөрә еффектив олдуғу үзәриндә дүшүнәк.

17. Јагуб 1:22—25 ајәләриндәки нүмунә нә үчүн еффективдир?

¹⁷ Јагуб 1:22—25 ајәләрини охујун. Бир чох сәбәбә ҝөрә демәк олар ки, Јагубун ҝүзҝү илә бағлы нүмунәси еффективдир. Бу нүмунәни чәкәркән онун чатдырмаг истәдији бир фикир вар иди: Аллаһын Кәламыны садәҹә охумамалыјыг, һәм дә охудугларымыза әмәл етмәлијик. Јагуб динләјиҹиләринин асанлыгла баша дүшәҹәји бир нүмунә сечмишди: ҝүзҝүјә бахан бир адам. Јагуб нәји изаһ етмәк истәјирди?  Бир инсанын ҝүзҝүјә бахмасы вә гүсуруну ҝөрүб, ону дүзәлтмәмәси ағылсызлыг олар. Ејнилә бизим дә Аллаһын Кәламыны охујаркән хасијјәтимиздә дәјишмәли олдуғумуз шеји ҝөрүб, һеч бир дәјишиклик етмәмәјимиз ағылсызлыг олар.

18. Нүмунә чәкәркән һансы үч шеји нәзәрә алмалыјыг?

¹⁸ Нүмунә чәкмәкдә Јагубдан үч шеј өјрәнә биләрик: 1) Чәкдијимиз нүмунә изаһ етмәк истәдијимиз фикирлә әлагәли олмалыдыр. 2) Динләјиҹиләрин асанлыгла баша дүшә биләҹәји нүмунәләрдән истифадә етмәлијик. 3) Нүмунәнин мәгсәдини ајдын ҝөстәрмәлијик. Әҝәр јахшы нүмунә тапмагда чәтинлик чәкирсинизсә, «Ҝөзәтчи Гүлләси нәшрләринин индекси»нә (рус.) бахын. Орада «Нүмунәләр» башлығы алтында чохлу нүмунәләр вар. Нүмунәләри микрофона бәнзәтмәк олар. Онлар вурғуламаг истәдијимиз фикри ҝүҹләндирир. Буна ҝөрә дә әсас фикирләрә аид нүмунәләр чәкин. Әлбәттә ки, мүәллимлик габилијјәтимизи јахшылашдырмаг истәмәјимизин башлыҹа сәбәби диггәти өзүмүзә чәкмәк јох, даһа чох инсана Јеһованын аиләсинә гошулмаға көмәк етмәк олмалыдыр.

19. Руһани аиләмизи гијмәтләндирдијимизи неҹә ҝөстәрә биләрик?

¹⁹ Дүздүр, Јагубдан фәргли олараг, бизим камил гардашымыз јохдур. Амма руһани баҹы-гардашларымыздан ибарәт бөјүк бир аиләмиз вар. Онлара севҝимизи онларла бирҝә вахт кечирәрәк, онлардан өјрәнәрәк вә тәблиғ-тәлим ишиндә бирликдә әмәкдашлыг едәрәк ҝөстәририк. Дүшүнҹәмиздә, давранышымызда вә тәлим вермәк үсулумузда Јагубдан нүмунә ҝөтүрәрәк Јеһованы шәрәфләндиририк вә сәмими гәлбли инсанларын Она јахынлашмасына көмәк едирик.