ТӘЛИМ МӘГАЛӘСИ 3
НӘҒМӘ 35 Даһа ваҹиб шејләри ајырд едәк
Јеһоваја хош ҝедән гәрарлар верин
«Јеһовадан горхмагдыр һикмәтин башы, Мүгәддәс Аллаһын елми дәрракә верир» (МӘС. 9:10).
ӘСАС ФИКИР
Билик, дәрракә вә бәсирәт бизә мүдрик гәрарлар вермәјә көмәк едир.
1. Бәзән бизә нә чәтин ҝәлә биләр?
ҺӘР ҜҮН гәрарлар вермәли олуруг. Бәзиләри садә гәрарлар олур; сәһәр јемәјинә нә јејәк, нә вахт јатаг, нә вахт дураг. Бәзи мәсәләләрлә бағлы гәрар вермәк исә даһа чәтиндир. Елә гәрарлар вар ки, бизим сәһһәтимизә, хошбәхтлијимизә, јахынларымыза вә ја ибадәтимизә тәсир едә биләр. Истәјирик ки, вердијимиз гәрарлар һәм бизә, һәм дә аиләмизә фајда ҝәтирсин. Ән әсасы исә чалышмалыјыг ки, вердијимиз гәрарлар Јеһованы разы салсын (Ром. 12:1, 2).
2. Мүдрик гәрарлар вермәјә сизә һансы аддымлар көмәк едә биләр?
2 Нөвбәти аддымлар мүдрик гәрарлар вермәјинизә көмәк едә биләр: 1) тәфсилатлары өјрәнмәк, 2) Јеһованын мәсәләјә мүнасибәтини өјрәнмәк, 3) вариантлары һәртәрәфли өлчүб-бичмәк. Мәгаләдә бу аддымлары мүзакирә едәҹәјик. Бу бизә даһа да бәсирәтли олмаға көмәк едәҹәк (Мәс. 2:11).
ТӘФСИЛАТЛАРЫ ӨЈРӘНИН
3. Нәјә ҝөрә гәрар вермәздән әввәл тәфсилатлары өјрәнмәлисиниз? Нүмунә чәкин.
3 Дүзҝүн гәрар вермәк үчүн илк аддым тәфсилатлары өјрәнмәкдир. Бу нәјә ҝөрә ваҹибдир? Белә бир вәзијјәти тәсәввүр един: сағламлығында ҹидди проблеми олан бир нәфәр һәким гәбулуна ҝәлир. Сизҹә, һәким она суаллар вермәдән, илкин мүајинәдән кечирмәдән мүалиҹә јазар? Тәбии ки, јох. Ејнилә сиз дә дүзҝүн гәрарлар вермәк үчүн, илк нөвбәдә, тәфсилатлары өјрәнмәлисиниз. Буну неҹә едә биләрсиниз?
4. Мәсәлләр 18:13 ајәсиндәки мәсләһәтә әмәл едәрәк тәфсилатлары неҹә өјрәнә биләрсиниз? (Һәмчинин шәклә бахын.)
4 Әксәр һалларда тәфсилатлары суаллар вермәклә өјрәнә биләрсиниз. Тәсәввүр един ки, сизи гонаглыға дәвәт едибләр. Ҝедиб-ҝетмәмәклә бағлы гәрар вермәлисиниз. Әҝәр бу гонаглығын нә мәгсәдлә вә ким тәрәфиндән тәшкил олундуғуну билмирсинизсә, онда нөвбәти суаллары сорушмағыныз јахшы оларды: «Гонаглыг һарада вә нә вахт кечириләҹәк? Нә гәдәр адам олаҹаг? Гонаглыгда һәр шејә ҹавабдеһ кимдир? Кимләр иштирак едәҹәк? Орада нә едәҹәјик? Спиртли ички олаҹаг?» Бу суалларын ҹавабыны билмәјиниз мүдрик гәрар вермәјинизә көмәк едәҹәк. (Мәсәлләр 18:13 ајәсини охујун.)
Суаллар верәрәк тәфсилатлары өјрәнин (4-ҹү абзаса бахын) a
5. Тәфсилатлары өјрәнәндән сонра нә етмәлисиниз?
5 Демәли, тәфсилатлары өјрәндиниз. Инди исә вәзијјәти бүтөвлүклә ҝөрмәјә чалышын. Мисал үчүн, билдиниз ки, гонаглыға Мүгәддәс Китаб принсипләри илә јашамајан инсанлар да ҝәләҹәк вә ја ички лимитсиз олаҹаг, нәзарәт едән олмајаҹаг. Неҹә дүшүнүрсүнүз, бу гонаглыг кеф мәҹлисинә чеврилә биләр? (1 Бут. 4:3). Гонаглыгла ибадәт ҝөрүшүнүн вахты кәсишир, јахуд хидмәтдән галмајаҹагсыныз? Вәзијјәти бүтөвлүклә тәһлил едәндән сонра дүзҝүн гәрара доғру бир аддым да јахынлашаҹагсыныз. Амма атмалы олдуғунуз башга аддым да вар. Сиз артыг мүәјјән бир фикрә ҝәлмисиниз, бәс Јеһова һансы фикирдәдир? (Мәс. 2:6).
ЈЕҺОВАНЫН МӘСӘЛӘЈӘ МҮНАСИБӘТИ
6. Јагуб 1:5 ајәсинә әсасән нәјә ҝөрә Јеһовадан көмәк истәмәлијик?
6 Јеһованын мәсәләјә мүнасибәтини өјрәнмәк үчүн Ондан көмәк истәјин. Јеһова сөз верир ки, Онун гәлбини шад едәҹәк гәрарлары мүәјјән етмәк үчүн бизә һикмәт верәҹәк. О бу һикмәти «сәхавәтлә вә гынамадан» верир. (Јагуб 1:5 ајәсини охујун.)
7. Јеһованын мәсәләјә мүнасибәтини неҹә өјрәнә биләрсиниз? Нүмунә чәкин.
7 Јеһовадан сизә јол ҝөстәрмәсини диләдикдән сонра Онун ҹавабына диггәт кәсилин. Тутаг ки, һараса сәјаһәтә ҝетмисиниз вә јолу итирмисиниз. Бу заман әразијә јахшы бәләд олан бириндән көмәк истәјирсиниз. О сизә јолу ҝөстәрмәмиш, бир шеј демәмиш чыхыб ҝедәрсиниз? Әлбәттә ки, јох. Сиз она диггәтлә гулаг асарсыныз. Ејнилә Јеһовадан һикмәт диләјәндән сонра Онун ҹавабыны өјрәнмәјә чалышын. Буну Мүгәддәс Китабдан вәзијјәтинизә ујғун ганун вә принсипләр тапмагла едә биләрсиниз. Мәсәлән, гајыдаг гонаглыгла бағлы нүмунәјә. Ҝедиб-ҝетмәмәклә бағлы гәрар верәндә Мүгәддәс Китабдан бәзи принсипләри нәзәрдән кечирә биләрсиниз. Бахын ҝөрүн Мүгәддәс Китабда кеф мәҹлисләри, пис достлар вә Падшаһлыг ишини шәхси истәкләримиздән үстүн тутмагла бағлы нә дејилир (Мәт. 6:33; Ром. 13:13; 1 Кор. 15:33).
8. Вәзијјәтинизә ујғун мәлуматы неҹә әлдә едә биләрсиниз? (Һәмчинин шәклә бахын.)
8 Бәзән вәзијјәтинизә ујғун мәлумат тапмаг сизә чәтин ҝәлә биләр. Јеткин баҹы-гардашлар сизә мүәјјән ганун вә принсипләр тапмаға көмәк едә биләр. Амма бунунла јанашы, өзүнүз дә ахтарыш апарын. Мәсәлән, «Јеһованын Шаһидләринин нәшрләри үзрә ахтарыш» вә «Һәјат бәләдчимиз олан ајәләр» кими тәлим вәсаитләримиз карыныза чата биләр. Унутмајын, мәгсәд Јеһованы разы салан гәрар вермәкдир.
Јеһованын мәсәләјә мүнасибәтини өјрәнин (8-ҹи абзаса бахын) b
9. Вердијимиз гәрарын Јеһованы разы салыб-салмадығына неҹә әмин ола биләрик? (Ефеслиләрә 5:17).
9 Вердијимиз гәрарын Јеһованы разы салыб-салмадығына неҹә әмин ола биләрик? Әввәла, биз Јеһованы јахшы танымалыјыг. Аллаһын Кәламында дејилир ки, «Мүгәддәс Аллаһын елми дәрракә верир» (Мәс. 9:10). Бәли, әсл дәрракә Јеһованын хүсусијјәтләрини, Онун нијјәтини, нәји севдијини, нәјә нифрәт етдијини билмәкдән гајнагланыр. Өзүнүздән сорушун: «Јеһова һаггында билдикләримә әсасән һансы гәрары версәм, О мәндән разы галар?» (Ефеслиләрә 5:17 ајәсини охујун.)
10. Нәјә ҝөрә Мүгәддәс Китаб принсипләри аиләнин вә јерли әразинин адәт-әнәнәләриндән даһа ваҹибдир?
10 Јеһованы разы салан гәрарлар верәндә һәрдән елә олур ки, јахынларымыз наразы галыр. Бәзи валидејнләр јахшы нијјәтдән ирәли ҝәләрәк гызларынын чох имканлы, варлы-һаллы оғлана әрә ҝетмәсини истәјирләр. Һәтта оғланын руһани ҹәһәтдән зәиф олмасына өнәм вермирләр. Еләҹә дә бәзи өлкәләрдә оғлан тәрәф гыз тәрәфдән чохлу ҹеһиз тәләб едир. Гызын руһани вәзијјәтинә фикир вермирләр. Белә вәзијјәтдә оғлан вә гыз өзләриндән сорушмалыдыр: «Мән бу инсанла аилә гурсам, Јеһова илә мүнасибәтләрим мөһкәмләнәҹәк, ја зәифләјәҹәк?» Јеһова бу мәсәлә илә бағлы нә дејир? Ҹавабы Мәтта 6:33 ајәсиндән тапа биләрик. Бу ајәдә мәсиһиләрин Падшаһлыг ишини һәр шејдән үстүн тутмалы олдуглары дејилир. Дүздүр, биз валидејнләримизә вә әтрафымыздакы инсанлара һөрмәт едирик, амма бизим әсас мәгсәдимиз Јеһованы разы салмагдыр.
ҺӘРТӘРӘФЛИ ӨЛЧҮБ-БИЧИН
11. Мәсәлләр 2:11 ајәсиндәки һансы хүсусијјәт сизә вариантлары ҝөтүр-гој етмәјә көмәк едәҹәк?
11 Демәли, гәрар верәркән Мүгәддәс Китаб принсипләрини нәзәрдән кечирдиниз, инди исә әлиниздәки вариантлары өлчүб-бичин. (Мәсәлләр 2:11 ајәсини охујун.) Бәсирәт сизә һәр вариантын нәтиҹәсини габагҹадан тәхмин етмәјә көмәк едәҹәк. Бәзи гәрарлары вермәк асандыр, амма елә гәрарлар вар ки, онларын дүзҝүн олуб-олмадығыны илк дәфәдән мүәјјән етмәк олмур. Бәсирәт һәтта гәлиз мәсәләләрдә дә мүдрик гәрар вермәјинизә көмәк едәҹәк.
12, 13. Бәсирәтли олмаг бизә иш сечиминдә дүзҝүн гәрар гәбул етмәјә неҹә көмәк едир?
12 Белә бир вәзијјәти тәсәввүр един: аиләнизин гајғысына галмаг үчүн иш ахтарырсыныз. Сизә ики иш тәклиф олунур. Бүтүн тәфсилатлары, мәсәлән, ишин нөвүнү, иш саатларыны, јола сәрф едәҹәјиниз вахты вә башга нүанслары ҝөтүр-гој едирсиниз. Һәр ики иш дә Мүгәддәс Китаба зидд ҝетмир. Ола билсин, бу ишләрдән бири даһа чох үрәјинизә јатыр, јахуд маашы даһа јүксәкдир. Она ҝөрә дә сиз она үстүнлүк верирсиниз, амма гәрар вермәздән әввәл нәзәрә алмалы олдуғунуз башга амилләр дә вар.
13 Мәсәлән, бу ишләрдән һансыса јығынҹаглары бурахмағыныза сәбәб олмајаҹаг? Аиләнизин емосионал вә руһани еһтијаҹларыны өдәмәк үчүн вахт ајырмағыныза әнҝәл олмајаҹаг? Бу кими суаллар вермәк сизә даһа ваҹиб шејләри ајырд етмәјә, јәни ибадәтинизи вә аиләнизин еһтијаҹларыны мадди шејләрдән үстүн тутмаға көмәк едәҹәк (Филип. 1:10а). Онда Јеһованы разы салан гәрар верәҹәксиниз.
14. Бәсирәтли вә мәһәббәт долу олмағымыз башгаларыны бүдрәтмәмәјә неҹә көмәк едир?
14 Һәмчинин бәсирәтли олмаг гәрарымызын башгаларына тәсири барәдә дүшүнмәјә тәшвиг едир. Биз һеч кәси бүдрәтмәк истәмәрик (Филип. 1:10б). Буна, хүсусилә дә шәхси мәсәләләрлә бағлы гәрар верәркән диггәт јетирмәлијик. Мәсәлән, ҝејим вә хариҹи ҝөркәм мәсәләсиндә. Ола билсин, мүәјјән тәрздә ҝејиниб-кечинмәк хошунуза ҝәлир. Бәс әҝәр бу, јығынҹагдакылар тәрәфиндән, јахуд башга инсанлар тәрәфиндән хош гаршыланмырса, онда неҹә? Онларын һиссләринә һөрмәтлә јанашмагла бәсирәтли олдуғумузу ҝөстәрәҹәјик. Мәһәббәт бизи тәшвиг едәҹәк ки, башгаларынын хејрини дүшүнәк вә ләјагәтлә ҝејинәк (1 Кор. 10:23, 24, 32; 1 Тим. 2:9, 10). Онда мәһәббәтимиз вә һөрмәтимиз вердијимиз гәрарда әкс олунаҹаг.
15. Ваҹиб гәрарлары һәјата кечирмәздән әввәл нә етмәлисиниз?
15 Әҝәр бөјүк гәрар гаршысында галмысынызса, мүтләг онун нәтиҹәләри барәдә дүшүнүн. Иса демишди ки, биз әввәлҹәдән отуруб мәсрәфләри һесабламалыјыг (Лука 14:28). Гәрарынызы һәјата кечирмәк үчүн вахтынызы, вәсаитләринизи вә ҝүҹүнүзү нәзәрә алмалысыныз. Бәзи гәрарлары һәјата кечирмәздән әввәл ону аиләнизлә мүзакирә едә биләрсиниз. Беләҹә, аиләнин һәр бир үзвү гәрарын уғурлу олмасы үчүн үзәринә дүшән мәсулијјәти биләҹәк. Бу ҹүр давранмағыныз нәјә ҝөрә ваҹибдир? Ола билсин, гәрарынызда дәјишмәли олдуғунуз мәгамлар үзә чыхаҹаг, јахуд да тамамилә фәргли вә даһа јахшы вариант тәклиф олунаҹаг. Гәрар верәркән аилә үзвләринизлә мәсләһәтләшсәниз, онларын тәклифинә гулаг ассаныз, гәрарларынызын уғурлу олмасы үчүн онлар сизә көмәк етмәјә бешәлли һазыр олаҹаглар (Мәс. 15:22).
ДОҒРУ ГӘРАРЛАРА ДОҒРУ
16. Һансы аддымлар сизә доғру гәрарлара доғру аддымламаға көмәк едәҹәк? (Һәмчинин « Мүдрик гәрарлар верин» адлы чәрчивәјә бахын.)
16 Јухарыда мүзакирә етдијимиз бүтүн бу аддымлар сизи доғру гәрарлара доғру апараҹаг. Бүтүн тәфсилатлары өјрәнин вә Јеһоваја хош ҝедән гәрарлар вермәк үчүн Мүгәддәс Китаб принсипләрини арашдырын. Бундан сонра Јеһовадан гәрарыныза бәрәкәт вермәсини диләјә биләрсиниз.
17. Доғру гәрарлар вермәјин сирри нәдир?
17 Ола билсин, вахтилә чохлу дүзҝүн гәрарлар вермисиниз. Амма унутмајын, доғру гәрарлар вермәјин сирри өз ағлыныза, тәҹрүбәнизә ҝүвәнмәк јох, Јеһовадан ҝәлән һикмәтә архаланмагдыр. Сизә һикмәтин ваҹиб јөнләри олан билији, дәрракәни, бәсирәти верән јалныз Одур (Мәс. 2:1—5). Јеһова сизә Онун гәлбини шад едән гәрарлар вермәјә көмәк едәҹәк (Зәб. 23:2, 3).
НӘҒМӘ 28 Јеһованын досту олаг
