1. Бу ҝүн чохларынын фикри-зикри нәдәдир?

 ДИГГӘТ јетирмисиниз, бу ҝүн инсанларын чохунун фикри-зикри анҹаг өзүндәдир. Мәсәлән, бәзиләри сосиал шәбәкәләрдә диггәт мәркәзиндә олмаг вә наилијјәтләри илә өјүнмәк үчүн һәр шејә әл атырлар. Лакин чох аз инсан тапылар ки, Јеһова Аллаһа шәрәф версин. Бу мәгаләдә Јеһоваја шәрәф вермәјин нә демәк олдуғуну вә буну етмәјә бизи нәләрин тәшвиг етдијини өјрәнәҹәјик. Һәмчинин ҝөрәҹәјик ки, Јеһоваја лајиг олдуғу шәрәфи неҹә верә биләрик вә јахын ҝәләҹәкдә Јеһова Өзү адыны неҹә шәрәфләндирәҹәк.

ЈЕҺОВАЈА ШӘРӘФ ВЕРМӘК НӘ ДЕМӘКДИР?

 2. Јеһова Сина дағында нә етди? (Һәмчинин шәклә бахын.)

² Мүгәддәс Китабдан ҝөрүрүк ки, Јеһова әзәмәтли Аллаһдыр. О, Исраил халгыны Мисирдән азад едәндән чох кечмәмиш һејрәтамиз шәкилдә Өз ҹалалыны ҝөстәрди. Белә бир сәһнәни тәсәввүр един: милјонларла исраилли Сина дағынын әтәјиндә Аллаһын һүзуруна ҝәлиб. Дағын башыны галын булуд алыр. Гәфләтән шиддәтли зәлзәлә башлајыр, ҝөрүнүр, бу, вулканик фәалијјәтлә јанашы баш верир. Халгын ајагларынын алтында јер титрәјир, ҝөј ҝурулдајыр, илдырым чахыр, һәр јаны гулагбатыран шејпур сәси бүрүјүр (Чых. 19:16—18; 24:17; Зәб. 68:8). Јеһованын ҹалалыны ҝөрән исраиллиләрин неҹә һејрәтә ҝәлдијини бир тәсәввүр един!

 3. Јеһоваја неҹә шәрәф верә биләрик?

³ Бәли, Јеһова әзәмәтли Аллаһдыр. Бәс инсанлара Онун ҹалалыны ҝөрмәјә неҹә көмәк едә биләрик? Бунун бир јолу Онун һејрәтамиз ҝүҹү вә нәҹиб хүсусијјәтләри барәдә данышмагдыр. Диҝәр јолу һәр шејә Јеһованын вердији ҝүҹ сајәсиндә наил олдуғумузу гәбул етмәкдир (Әшј. 26:12).  Бу саһәдә ән ҝөзәл нүмунәләрдән бири Давуд падшаһ иди; о, һәр заман Јеһоваја шәрәф верирди. Исраил иҹмасы гаршысында етдији дуада о белә демишди: «Еј Јеһова, әзәмәт, гүдрәт, ҹаһ-ҹалал, шан-шөһрәт, һәшәмәт Сәниндир, јердә вә ҝөјдә нә варса, һәр шеј Сәниндир». Давуд дуасыны битирәндән сонра «бүтүн иҹма... Јеһоваја алгыш охуду» (1 Салн. 29:11, 20).

 4. Иса Јеһоваја неҹә шәрәф верди?

⁴ Иса јер үзүндә оларкән һәр заман Јеһоваја шәрәф верирди. Мәсәлән, ҝөстәрдији мөҹүзәләри Јеһованын сајәсиндә етдијини дејирди (Марк 5:18—20). Бундан әлавә, инсанлара Атасы һагда данышырды, онларла ҝөзәл рәфтар едирди. Бир дәфә Иса синагогда вәз едирди. Орада ичинә ҹин ҝирмиш бир гадын вар иди. Дүз 18 ил иди ки, ҹин бу гадына әзаб верирди. Ҹин ону елә һала салмышды ки, бели тамам бүкүлмүшдү вә дикәлмирди. Јазыг гадын! Иса онун һалына аҹыды, она јахынлашыб нәвазишлә белә деди: «Баҹым, хәстәлијиндән гуртулдун». Сонра Иса әлләрини онун үзәринә гојду. Гадын һәмин андаҹа дикәлди вә сағалдығына ҝөрә «Аллаһа алгыш охумаға башлады» (Лука 13:10—13). Бу гадын кими бизим дә Јеһоваја шәрәф вермәк үчүн чох сәбәбимиз вар.

ЈЕҺОВАЈА ШӘРӘФ ВЕРМӘЈӘ БИЗИ НӘ ТӘШВИГ ЕДИР?

 5. Јеһоваја еһтирам бәсләмәк үчүн һансы сәбәбләримиз вар?

⁵ Биз Јеһоваја дәрин еһтирам бәсләдијимиз үчүн Ону шәрәфләндиририк. Јеһоваја еһтирам бәсләмәк үчүн чох сәбәбимиз вар. О, гадир Аллаһдыр, һәдсиз ҝүҹә маликдир (Зәб. 96:4—7). Хәлг етдији һәр бир шеј Онун һикмәтинин бөјүклүјүндән хәбәр верир. О бизә һәјат вериб, јашамағымыз үчүн һәр шејлә тәмин едир (Вәһј 4:11). О, сәдагәтлидир (Вәһј 15:4). Нијјәт етдији һәр шејә мүвәффәг олур вә вердији вәдләрә һәр заман садиг галыр (Јуш. 23:14). Елә буна ҝөрә Әрәмја пејғәмбәр Јеһова һагда демишди: «Бүтүн дүнја сәлтәнәтләринин мүдрикләри арасында Сәнә тај јохдур» (Әрм. 10:6, 7). Сөзсүз, сәмави Атамыза еһтирам бәсләмәк үчүн сәбәбимиз чохдур. Амма Јеһова тәкҹә еһтирама јох, севилмәјә дә лајиг Аллаһдыр.

 6. Биз нәјә ҝөрә Јеһованы севирик?

⁶ Биз Јеһованы үрәкдән севдијимиз үчүн Ону шәрәфләндиририк. Јеһованын о гәдәр ҝөзәл хүсусијјәтләри вар ки, Ону севмәјә билмәрик. О, мәрһәмәт вә шәфгәт саһибидир (Зәб. 103:8, 13; Әшј. 49:15). Дәрдимизә шәрикдир, биз әзаб чәкәндә О да әзаб чәкир (Зәк. 2:8). Јеһова Онунла дост олмағымыз үчүн бизә көмәк едир (Зәб. 25:14; Һәв. 17:27). О бизә лүтф ҝөстәрир; «әјилиб ҝөјә бахыр, јерә бахыр, мәзлуму тоз-торпагдан галдырыр» (Зәб. 113:6, 7). Бу ҹүр Аллаһы мәдһ етмәмәк олар?! (Зәб. 86:12).

 7. Һәр биримизин гаршысында һансы хүсуси имкан вар?

⁷ Инсанларын Јеһованы танымасыны истәдијимиз үчүн Ону шәрәфләндиририк. Чох адам Јеһованын әслиндә неҹә ҝөзәл Аллаһ олдуғуну билмир. Чүнки Шејтан Онун һаггында дәһшәтли јаланлар јајараг инсанларын зеһнини кор едир (2 Кор. 4:4). О, инсанлары инандырыб ки, Аллаһ гисас аландыр, бизим нәләр чәкдијимиз Она мараглы дејил вә дүнјадакы әзабларын сәбәбкары Одур. Амма биз Јеһованын белә Аллаһ олмадығыны билирик. Јеһова һагда јајылан јаланларын әсассыз олдуғуну, Онун неҹә ҝөзәл Аллаһ олдуғуну инсанлара демәк имканымыз вар (Әшј. 43:10). 96-ҹы  мәзмур бизи Јеһоваја шәрәф вермәјә тәшвиг едир. Инди бу мәзмурдакы бәзи фикирләри арашдыраҹағыг. Бу заман дүшүнүн ҝөрүн Јеһоваја лајиг олдуғу шәрәфи неҹә верә биләрсиниз.

ЈЕҺОВАЈА ЛАЈИГ ОЛДУҒУ ШӘРӘФИ НЕҸӘ ВЕРӘ БИЛӘРИК?

 8. Јеһованы шәрәфләндирмәјин бир јолу һансыдыр? (Зәбур 96:1—3).

⁸ Зәбур 96:1—3 ајәләрини охујун. Јеһова һаггында данышмагла Ону шәрәфләндиририк. Бу ајәләр Јеһованын халгыны Онун «шәнинә нәғмә» охумаға, «адыны тәрәннүм» етмәјә, «вердији гуртулушу» мүждәләмәјә, «халглара шан-шөһрәтини» бәјан етмәјә сәсләјир. Биз бүтүн бу үсулларла сәмави Атамызы шәрәфләндирә биләрик. Садиг јәһудиләр вә биринҹи әсрдәки мәсиһиләр тәрәддүд етмәдән инсанлара Јеһованын ҝөрдүјү јахшы ишләр барәдә данышырды вә Онун адыны мүдафиә едирди (Дән. 3:16—18; Һәв. 4:29). Ејни шеји биз неҹә едә биләрик?

9, 10. Анҹелинанын һадисәсиндән нә өјрәнирик? (Һәмчинин шәклә бахын.)

⁹ Бирләшмиш Штатларда јашајан Анҹелина a адлы бир баҹынын һадисәсинә бахаг. О, ишләдији ширкәтдә Јеһованын адыны ҹәсарәтлә мүдафиә етмишди. Анҹелина тәзә ишә дүзәләндә диҝәр јени ишчиләрлә бирликдә бир ҝөрүшә дәвәт олунмушду. Ҝөрүшдә һәр кәс өзү һагда мәлумат вермәли иди. Анҹелина Јеһованын Шаһиди кими хошбәхт һәјат сүрдүјүнү ҝөстәрмәк үчүн слајд-шоу һазырламышды. Онун нөвбәси чатана јахын бир әмәкдашы өзүнү тәгдим едиб деди ки, ушаглыгдан Јеһованын Шаһиди кими тәрбијә олунуб. Сонра о, инанҹларымыз һагда лағлағы илә данышмаға башлады. Анҹелина дејир: «Үрәјим һәјәҹандан чырпынырды. Амма өз-өзүмә дүшүндүм: “Инди отуруб бу јаланлара гулаг асаҹағам, јохса Јеһованы мүдафиә едәҹәјәм?”»

¹⁰ Әмәкдашы сөзүнү битирәндән сонра Анҹелина үрәјиндә гысаҹа дуа етди. Сонра үзүнү она тутуб мүлајим шәкилдә деди: «Кечмишимиз бир аз охшајыр. Мән дә Јеһованын Шаһиди кими бөјүмүшәм вә индијә кими дә Јеһованын Шаһидијәм». Аб-һава ҝәрҝин олса да, Анҹелина тәмкинини горуду вә достлары илә бирликдә руһани  тәдбирләрдә чәкдирдији ҝөзәл шәкилләри ҝөстәрди. Һәмчинин нәзакәтли шәкилдә етигадыны мүдафиә етди (1 Бут. 3:15). Бәс нәтиҹә нә олду? Анҹелина тәгдиматы битирәнә јахын һәмин инсан јумшалды. Һәтта бојнуна алды ки, онун да Јеһованын Шаһиди кими бөјүдүјү илләрдән хош хатирәләри вар. Анҹелина дејир: «Јеһованын адыны мүдафиә етмәлијик. О буна лајигдир. Онун неҹә ҝөзәл Аллаһ олдуғу һагда данышмаг шәрәфдир». Белә бир шәрәф бизә дә нәсиб олуб. Инсанлар Јеһоваја һөрмәтсизлик едәндә биз дә Онун адыны уҹалда биләрик.

11. Јеһованын хидмәтчиләри тарих боју Зәбур 96:8 ајәсиндә јазылан принсипә неҹә әмәл едибләр?

¹¹ Зәбур 96:8 ајәсини охујун. Биз мадди вәсаитимизлә Јеһованы шәрәфләндирә биләрик. Јеһованын хидмәтчиләри һәмишә Она бу јолла шәрәф верибләр (Мәс. 3:9). Мәсәлән, исраиллиләр мәбәдин тикинтисини вә гуллуғуну мадди вәсаитләри илә дәстәкләјирдиләр (2 Пад. 12:4, 5; 1 Салн. 29:3—9). Исанын шаҝирдләриндән бәзиләри она вә һәвариләринә гуллуг едирдиләр, «нәләри вардыса онларла бөлүшүрдүләр» (Лука 8:1—3). Һәмчинин биринҹи әсрдә мәсиһиләр аҹлыгдан әзијјәт чәкән диндашларына јардым ҝөндәрмишдиләр (Һәв. 11:27—29). Бу ҝүн биз дә ианәләримизлә Јеһоваја шәрәф верә биләрик.

12. Ианәләримиз Јеһоваја неҹә шәрәф ҝәтирә биләр? (Һәмчинин шәклә бахын.)

¹² Ианәләримизин Јеһоваја шәрәф ҝәтирдијини ҝөстәрән бир һадисәјә бахаг. 2020-ҹи илин һесабатында Зимбабведә узун сүрән гураглығын фәсадлары ачыгланмышды. Милјонларла инсан аҹлыгдан өлмәк тәһлүкәси илә үз-үзә иди. Бу инсанлардан бири дә Приска адлы баҹымыз иди. Гураглыға бахмајараг, Приска һәтта шум вахты да, һәр чәршәнбә вә ҹүмә ҝүнләри тәблиғ едирди. Гоншулары онун тарлада ишләмәк әвәзинә тәблиғә ҝетдијинә ҝөрә лағ едиб дејирди: «Белә ҝетсә, аҹындан өләҹәксән». Приска исә әминликлә белә ҹаваб верирди: «Јеһова һеч вахт Өз хидмәтчиләрини атмыр». Чох кечмәмиш о, тәшкилатымыздан әрзаг јардымы алды. Бу јардым һәр биримизин етдији ианәләр сајәсиндә мүмкүн олмушду. Присканын гоншулары буна мәәттәл галыб демишдиләр: «Доғрудан да, Аллаһын сәни атмады. Биз дә Ону јахындан танымаг истәјирик». Баҹымызын једди  гоншусу ибадәт ҝөрүшләримизә гатылмаға башлады.

13. Давранышымызла Јеһоваја неҹә шәрәф ҝәтирә биләрик? (Зәбур 96:9).

¹³ Зәбур 96:9 ајәсини охујун. Биз өз давранышымызла Јеһованы шәрәфләндирә биләрик. Мүгәддәс чадырда вә Јеһованын мәбәдиндә хидмәт едән каһинләрин бәдәни, әјин-башы тәмиз олмалы иди (Чых. 40:30—32). Биз дә тәмизлијимизә диггәт јетирмәлијик, амма бундан даһа өнәмлиси тәмиз әмәл саһиби олмагдыр (Зәб. 24:3, 4; 1 Бут. 1:15, 16). Биз вар ҝүҹүмүзлә чалышыб «көһнә шәхсијјәти», јәни натәмиз дүшүнҹә вә әмәлләри әјнимиздән чыхармалыјыг. Онун јеринә «јени шәхсијјәти» ҝејинмәлијик, бу исә о демәкдир ки, дүшүнҹәмиздән вә давранышымыздан Јеһованын уҹа сифәтләрини әкс етдирдијимиз ҝөрүнмәлидир (Кол. 3:9, 10). Јеһованын көмәји илә һәтта ән мәнфур ишләр ҝөрән инсан дәјишиб јени шәхсијјәти ҝејинә биләр.

14. Ҹекин һадисәсиндән нә өјрәндиниз? (Һәмчинин шәклә бахын.)

¹⁴ Ҹек адлы бир нәфәрин һадисәсинә бахаг. О, чох гәддар вә тәһлүкәли инсан иди. Һәтта она «Иблис» ләгәби верилмишди. Төрәтдији ҹинајәтләрә ҝөрә она өлүм һөкмү кәсилмишди. Едамыны ҝөзләдији мүддәтдә Ҹек һәбсханаја ҝәлән бир гардашын онунла Мүгәддәс Китаб дәрси кечмәсинә разылашыр. Кечмиш әмәлләринә бахмајараг, Ҹек көһнә шәхсијјәти әјниндән чыхарыр вә бир мүддәт сонра вәфтиз олунур. Ҹек о дәрәҹәдә дәјишилмишди ки, һәтта едам ҝүнү һәбсхана мүһафизәчиләриндән бәзиләри онунла ҝөз јашлары ичиндә сағоллашдылар. Орада ишләјән бир сержант демишди: «Әввәлләр Ҹек бурадакы ән бетәр мәһбус иди, инди исә ән јахшылардан биридир». Һәр һәфтә һәбсханада ибадәт ҝөрүшү кечирмәјә ҝәлән гардашлар Ҹекин едамындан сонра ҝөрүшдә илк дәфә иштирак едән бир мәһбус ҝөрүрләр. Ҝөрәсән, ибадәт ҝөрүшүнә гошулмаға ону нә тәшвиг етмишди? О, Ҹекин бу дәрәҹәдә дәјишмәсинә мәәттәл галмышды. Буна ҝөрә дә билмәк истәјирди ки, Јеһоваја ибадәт етмәк үчүн о нә етмәлидир. Бәли, бизим давранышымыз сәмави Атамыза шәрәф ҝәтирә биләр (1 Бут. 2:12).

 ЈАХЫН ҜӘЛӘҸӘКДӘ ЈЕҺОВА ӨЗ АДЫНЫ НЕҸӘ ШӘРӘФЛӘНДИРӘҸӘК?

15. Јеһова јахын ҝәләҹәкдә адыны там шәкилдә неҹә шәрәфләндирәҹәк? (Зәбур 96:10—13).

¹⁵ Зәбур 96:10—13 ајәләрини охујун. 96-ҹы мәзмурун сонунҹу ајәләриндә Јеһованын адил Һаким вә Падшаһ олдуғундан бәһс олунур. Јахын ҝәләҹәкдә Јеһова Өз адыны неҹә шәрәфләндирәҹәк? Өз адил һөкмләри илә. Бөјүк Бабил Јеһованын мүгәддәс адына ләкә ҝәтирдији үчүн тезликлә Јеһова онун үзәриндә һөкмүнү иҹра едәҹәк (Вәһј 17:5, 16; 19:1, 2). Бөјүк Бабилин мәһв олундуғуну ҝөрән инсанлардан бәзиләри, ола билсин, бизә гошулуб Јеһоваја ибадәт едәҹәк. Сонда, Армаҝеддон мүһарибәсиндә Јеһова Шејтанын шәр дүнјасыны тамамилә мәһв едәҹәк. Һәмин вахт О Она гаршы чыхан вә адына күфр едән бүтүн инсанлары јох едәҹәк. Ону севән, Она итаәт едән, Онун адыны уҹалтмағы өзүнә шәрәф билән инсанлара исә гуртулуш верәҹәк (Марк 8:38; 2 Салон. 1:6—10). Мәсиһин миниллик һакимијјәти битәндә инсанлар сонунҹу дәфә сынанандан сонра Јеһова адынын мүгәддәслијини там шәкилдә сүбута јетирәҹәк (Вәһј 20:7—10). О заман «сулар дәнизи долдурдуғу кими, дүнја башдан-баша Јеһованын әзәмәти барәдә биликлә долаҹаг» (Һәб. 2:14).

16. Сиз нә етмәјә әзмлисиниз? (Һәмчинин шәклә бахын.)

¹⁶ Ҝәләҹәкдә һәр кәсин Јеһоваја адына лајиг шәрәф вердијини ҝөрмәк мөһтәшәм олаҹаг! Амма о вахт ҝәләнә гәдәр биз әлимиздә олан бүтүн имканлардан истифадә едиб Јеһованы шәрәфләндирә биләрик. Рәһбәрлик Шурасы бунун ваҹиблијини ҝөстәрмәк үчүн Зәбур 96:8 ајәсини 2025-ҹи илин ајәси олараг сечиб: «Јеһоваја адына лајиг шәрәф верин!»