1. Иса Мәсиһин өлүмүнү анма мәрасиминдә һәр ил иштирак етмәјин бизә һансы фајдасы вар?

 ФИДЈӘ тајы-бәрабәри олмајан бир һәдијјәдир! (2 Кор. 9:15). Иса Мәсиһин өз һәјатыны гурбан вермәси сајәсиндә биз Јеһова илә јахын дост ола билирик. Үстәлик, әбәди јашамаг үмидимиз дә јараныб. Јеһова бизә фидјәни мәһәббәтиндән ирәли ҝәләрәк вериб. Буна ҝөрә Она нә гәдәр миннәтдар олсаг, аздыр (Ром. 5:8). Иса Мәсиһ бу фидјәни унутмағымызы, она ади јанашмағымызы истәмир. Елә буна ҝөрә дә һәр ил онун өлүмүнү анмағымыз үчүн бир мәрасим тәсис едиб (Лука 22:19, 20).

 2. Бу мәгаләдә нә һагда данышаҹағыг?

² 2025-ҹи илдә анма мәрасими апрелин 12-си, шәнбә ҝүнү кечириләҹәк. Сөз јох ки, һәр биримиз бу мәрасимдә иштирак етмәји планлашдырырыг. Јахшы олар ки, анма мәрасиминдән әввәлки вә сонракы һәфтәләр әрзиндә Јеһованын вә Оғлунун бизим үчүн етдикләри барәдә дәриндән дүшүнәк. Бу мәгаләдә фидјәнин Јеһова вә Иса барәдә бизә нәләри өјрәтдијини арашдыраҹағыг. Нөвбәти мәгаләдә исә фидјә сајәсиндә алдығымыз немәтләрдән вә миннәтдарлығымызы ҝөстәрмәјин јолларындан данышаҹағыг.

 ФИДЈӘДӘН ЈЕҺОВА ҺАГДА НӘ ӨЈРӘНИРИК?

 3. Бир нәфәрин өлүмү милјонларла инсана неҹә азадлыг бәхш едә биләр? (Һәмчинин шәклә бахын.)

³ Фидјәдән Јеһованын әдаләтли олдуғуну өјрәнирик (Ган. 32:4). Неҹә? Бир дүшүнүн: Адәмин итаәтсизлији уҹбатындан ҝүнаһ вә өлүм ондан бизә кечди (Ром. 5:12). Јеһова Иса Мәсиһи јер үзүнә ҝөндәрди ки, өз ҹаныны гурбан вериб бизи ҝүнаһ вә өлүмдән азад етсин. Бәс бир камил инсанын өлүмү милјонларла инсаны неҹә азад едә биләрди? Һәвари Булус буну белә изаһ едир: «Бир нәфәрин [Адәмин] итаәтсизлији чохлу инсаны ҝүнаһлы етдији кими, бир шәхсин [Исанын] итаәти дә чохлу инсаны салеһ едәҹәк» (Ром. 5:19; 1 Тим. 2:6). Башга сөзлә, бир камил инсанын итаәтсизлији уҹбатындан биз ҝүнаһын вә өлүмүн көләси олдуг. Ејнилә бир камил инсанын итаәти сајәсиндә азадлыға говушаҹағыг.

 4. Нәјә ҝөрә Аллаһ Адәмин нәслиндән олан дүзүрәкли инсанлара садәҹә әбәди јашамаға изин вермәди?

⁴ Бәс бизи азад етмәк үчүн Исанын өлмәси шәрт иди? Олмазды ки, Аллаһ Адәмин нәслиндән олан дүзүрәкли инсанлара садәҹә әбәди јашамаға изин версин? Гејри-камил инсанын фикринҹә бу, јахшы чыхыш јолу оларды. Амма Јеһова үчүн бу, әдаләтли давраныш олмазды. Белә чыхарды ки, санки Адәм һеч бир ҹидди ҝүнаһ етмәјиб вә өвладларына да ҝүнаһы өтүрмәјиб. Ахы бу белә дејил.

 5. Аллаһын һәр заман әдаләтлә давранаҹағына нәјә ҝөрә әминик?

⁵ Бәс әҝәр Јеһова фидјә вермәсәјди вә әдаләти бир кәнара гојуб Адәмин гејри-камил өвладларынын әбәди јашамасына изин версәјди, неҹә оларды? Онда инсанларда белә фикир јаранарды ки, Аллаһ бу ҝүн әдаләтсизлијә ҝөз јумубса, сабаһ да јумар. Мәсәлән, вердији һансыса вәди јеринә јетирмәз. Амма инди буна ҝөрә нараһат олмағымыза ҝәрәк јохдур. Јеһова Она нә гәдәр баһа баша ҝәлсә дә, Өз әзиз Оғлуну гурбан вермәли олса да, һагг-әдаләти позмады. Бу бизи әмин едир ки, О, һәр заман әдаләтлә давранаҹаг.

 6. Фидјә Јеһованын бизи севдијини неҹә ҝөстәрир? (1 Јәһја 4:9, 10).

⁶ Јеһованын фидјәни вермәси тәкҹә әдаләтли олдуғуну јох, мәһәббәтинин бөјүклүјүнү дә ҝөстәрир (Јәһ. 3:16; 1 Јәһја 4:9, 10 ајәләрини охујун). Јеһова фидјәни нәинки бизим әбәди јашамағымыз үчүн, һәмчинин Онун аиләсинин бир үзвү олмағымыз үчүн вериб. Нәјә ҝөрә белә демәк олар? Адәм ҝүнаһ ишләјәндә  Јеһова ону Өз аиләсиндән чыхартды. Буна ҝөрә дә биз Јеһованын аиләсиндән кәнарда дүнјаја ҝәлирик. Амма фидјә сајәсиндә Јеһова бизим ҝүнаһларымызы бағышлајыр. Она иман ҝәтирән вә итаәт едән бүтүн инсанлар бир ҝүн Онун аиләсинин үзвү олаҹаглар. Һәтта индинин өзүндә дә бизим һәм Јеһова илә, һәм дә диндашларымызла сых достлуг мүнасибәти гурмаг имканымыз вар. Бәли, Јеһова һәгигәтән дә бизи чох севир! (Ром. 5:10, 11).

 7. Исанын әзаб чәкәрәк өлмәси Јеһованын бизә олан севҝиси һагда нә дејир?

⁷ Јеһованын бизи нә гәдәр чох севдијини анламаг үчүн фидјәнин Она неҹә баһа баша ҝәлдији һагда дүшүнә биләрик. Шејтан иддиа етмишди ки, Аллаһын һеч бир хидмәтчиси чәтин сынаг гаршысында Она садиг галмајаҹаг. Јеһова бу иддианын јалан олдуғуну ҝөстәрмәк үчүн Оғлунун өлмәздән әввәл әзаб чәкмәсинә изин верди (Әјј. 2:1—5; 1 Бут. 2:21). Дүшмәнләрин Исаны әлә салмасы, әсҝәрләрин ону гамчыламасы вә дирәјә мыхламасы Јеһованын ҝөзү гаршысында баш верирди. О, әзиз Оғлунун неҹә әзаб чәкәрәк өлдүјүнү изләјирди (Мәт. 27:28—31, 39). Јеһова истәнилән анда бүтүн бунлара сон гоја биләрди. Мәсәлән, инсанлар «әҝәр Аллаһа әзиздирсә, гој Аллаһ ону хилас еләсин» дејәндә Јеһова белә дә едә биләрди (Мәт. 27:42, 43). Амма О буну етсәјди, онда фидјә өдәнилмәјәҹәкди, бизим исә һеч бир үмидимиз олмајаҹагды. Мәһз буна ҝөрә Јеһова Исанын сон нәфәсинә гәдәр әзаб чәкмәсинә дөздү.

 8. Исанын ишҝәнҹәләрини ҝөрмәк Јеһованын үрәјини ағрыдырды? Изаһ един. (Һәмчинин шәклә бахын.)

⁸ Дүшүнмәмәлијик ки, Јеһова Гадир Аллаһдырса, демәли, һеч бир һисси, дујғусу јохдур. О, инсанлары Өз бәнзәриндә јарадыб, буна ҝөрә дә инсанлара вердији һисс, дујғу Онун Өзүндә дә вар. Мәсәлән, Мүгәддәс Китабда Јеһованын кәдәр һисси кечирдији дејилир (Зәб. 78:40, 41). Онун нә гәдәр кәдәрләндијини тәсәввүр етмәк үчүн Ибраһим пејғәмбәрлә Исһагын һадисәсини јадымыза салаг. Билдијимиз кими Јеһова Ибраһимә јеҝанә оғлуну гурбан вермәји әмр етмишди (Јар. 22:9—12; Ибр. 11:17—19). Тәсәввүр етмәк олар, Ибраһим пејғәмбәр оғлуну өлдүрмәјә һазырлашанда неҹә гарышыг һиссләр кечирмишди. О, оғлуну бир бычаг зәрбәси илә гурбан ҝәтирәҹәкди. Иса Мәсиһи исә аллаһсыз инсанлар гәддарҹасына ишҝәнҹә вериб өлдүрмүшдү. Инди ҝөрүн Јеһова нә гәдәр аҹы чәкмишди! (jw.org сајтында «Иман өрнәкләри. Ибраһим (II һиссә)» адлы видеоја бахын.)

 9. Ромалылара 8:32, 38, 39 ајәләриндән Јеһованын мәһәббәти барәдә нә өјрәнирсиниз?

 ⁹ Фидјә бизә өјрәдир ки, һеч кәс, һәтта ән јахын гоһумумуз вә ја достумуз бизи Јеһова гәдәр севә билмәз. (Ромалылара 8:32, 38, 39 ајәләрини охујун.) Јеһова бизи биздән дә чох севир. Буна шүбһә јери јохдур. Сиз әбәди јашамаг истәјирсиниз? Јеһова әбәди јашамағынызы сиздән дә чох истәјир. Ҝүнаһларынызын бағышланмасыны истәјирсиниз? Јеһова ҝүнаһынызы бағышламағы сиздән дә чох истәјир. Јеһованын биздән бирҹә хаһиши вар: вердији дәјәрли һәдијјәјә миннәтдар олаг. Буну Она иман етмәклә вә итаәткар олмагла ҝөстәрә биләрик. Бәли, фидјә Јеһованын бизә олан севҝисинин ән бариз сүбутудур. Јени дүнјада Јеһованын мәһәббәти барәдә һәлә чох шеј өјрәнәҹәјик (Ваиз 3:11).

ФИДЈӘДӘН ИСА ҺАГДА НӘ ӨЈРӘНИРИК?

10. а) Исаны едамы илә бағлы ән чох нә нараһат едирди? б) Иса Јеһованын адына неҹә бәраәт газандырды? (Һәмчинин « Иса сәдагәти илә Јеһованын адына бәраәт газандырды» адлы чәрчивәјә бахын.)

¹⁰ Атасынын адына ләкә ҝәлмәмәси Иса үчүн ваҹиб мәсәләдир (Јәһ. 14:31). Иса Аллаһын адына күфр едән вә ҹинајәт ишләдән бири кими өләҹәји үчүн чох кәдәрли иди. Елә буна ҝөрә дә Аллаһа белә дуа етмишди: «Ата, әҝәр мүмкүнсә, бу ҹамы мәндән кәнар ет» (Мәт. 26:39). Бунунла белә, Иса өләнә гәдәр садиг галды вә беләҹә, Атасынын адына там бәраәт газандырды.

11. Иса инсанлара дәрин севҝи бәсләдијини неҹә ҝөстәрди? (Јәһја 13:1).

¹¹ Фидјәдән өјрәнирик ки, Иса, давамчылары башда олмагла, инсанлары чох севир (Мәс. 8:31; Јәһја 13:1 ајәсини охујун). Мәсәлән, о билирди ки, јер үзүндәки  хидмәти чох чәтин олаҹаг, үстәлик, әзаблы шәкилдә өлдүрүләҹәк. Бунунла белә, Иса јер үзүндәки тәјинатыны механики олараг јох, инсанлары севдији үчүн едирди. О, тәблиғ едәркән, тәлим верәркән вә инсанлара хидмәт едәркән ҹан гојурду. Һәтта өлүмүндән әввәлки ҝеҹә о, вахт ајырыб һәвариләринин ајағыны јуду, онлара сон нәсиһәтини верди вә руһландырды (Јәһ. 13:12—15). Дирәкдә ҹан верә-верә јанындакы ҹинајәткара үмид бәхш етди, һәмчинин анасыны Јәһјаја тапшырды (Лука 23:42, 43; Јәһ. 19:26, 27). Бәли, Иса инсанлара олан севҝисини тәкҹә өлүмү илә јох, јер үзүндәки хидмәти бојунҹа ҝөстәрди.

12. Иса индијәдәк бизим уғрумузда һансы гурбанлары вериб?

¹² Иса бир дәфә өлдү, амма о, индијәдәк биздән өтрү гурбан вермәјә давам едир (Ром. 6:10). Нәјә ҝөрә белә демәк олар? Фидјә сајәсиндә мүмкүн олан немәтләри алмағымыз үчүн Иса ҝүҹүнү вә вахтыны сәрф етмәјә давам едир. О, һал-һазырда һансы ишләри ҝөрүр? О, Падшаһымыз, баш каһинимиз вә јығынҹағын башы кими хидмәт едир (1 Кор. 15:25; Ефес. 5:23; Ибр. 2:17). Мәсһ олунмушларын вә бөјүк издиһамын топланмасы ишинә о, рәһбәрлик едир вә бу иш бөјүк мүсибәт сона чатмаздан әввәл тамамланаҹаг (Мәт. 25:32; Марк 13:27). Һәмчинин Иса бу ахырзаманда садиг хидмәтчиләринин руһани ҹәһәтдән јахшы гидаланмасынын гајғысына галыр (Мәт. 24:45). Миниллик һакимијјәти әрзиндә дә о бизим рифаһымыз үчүн чалышмаға давам едәҹәк. Доғрудан да, Јеһова Исаны бүтүнлүклә бизим үчүн фәда едиб!

ДАИМА ЈЕНИ ШЕЈЛӘР ӨЈРӘНИН

13. Јеһованын вә Иса Мәсиһин бизә ҝөстәрдији мәһәббәт барәдә даһа чох неҹә өјрәнә биләрсиниз?

¹³ Јеһова Аллаһын вә Мәсиһ Исанын сиздән өтрү нәләр етдији һагда даима дүшүнүн. Онда онларын сизә ҝөстәрдији мәһәббәт барәдә јени шејләр өјрәнәҹәксиниз. Бу ил анма мәрасими дөврүндә Мүждәләрдән бирини вә ја бир нечәсини охумағы гаршыныза мәгсәд гоја биләрсиниз. Бир дәфәјә чох фәсил охумаға ҹәһд етмәјин. Онданса, арамла охујун, Јеһованы вә Иса Мәсиһи севмәк үчүн әлавә сәбәбләр тапмаға чалышын. Әлбәттә ки, өјрәндикләринизи башгалары илә дә бөлүшүн.

14. Зәбур 119:97 ајәсинә әсасән арашдырма апармаг фидјә вә диҝәр тәлимләр барәдә даима јени шејләр өјрәнмәјә неҹә көмәк едир? (Һәмчинин шәклә бахын.)

¹⁴ Ола билсин, узун илләрдир һәгигәтдәсиниз вә дүшүнүрсүнүз ки, Аллаһын әдаләти, мәһәббәти вә фидјә кими әзбәр билдијимиз мөвзулар барәдә јени нә өјрәнә биләрик  ки? Әслинә галса, бу кими мөвзуларда јени шејләр өјрәнмәјин һәдди јохдур. Бәс буну неҹә етмәк олар? Нәшрләримиздәки мәлумат боллуғундан там јарарланын. Баша дүшмәдијиниз ајәјә раст ҝәләндә ахтарыш апарын. Сонра исә һәмин ҝүн әрзиндә тапдығыныз мәлумат барәдә дүшүнүн. Ҝөрүн бу мәлуматдан Јеһова, Онун Оғлу вә онларын сизә олан мәһәббәти барәдә нә өјрәнирсиниз. (Зәбур 119:97 ајәсини охујун.)

15. Нәјә ҝөрә Мүгәддәс Китабдан инҹиләр ахтармаға давам етмәк ваҹибдир?

¹⁵ Ола билсин, отуруб мүталиә едәндә вә ахтарыш апаранда һәр дәфә јени, мараглы шејләр тапмајасыныз. Буна ҝөрә руһдан дүшмәјин. Сиз бир нөв гызылахтарана бәнзәјирсиниз. Адәтән гызылахтаранлар ән балаҹа гызыл парчасыны да тапмаг үчүн саатларла, ҝүнләрлә ахтарыш едир. Онлар тәслим олмадан сәбирлә ахтарырлар, чүнки һәр бир гызыл парчасы кичик дә олса, онлар үчүн дәјәрлидир. Ҝөрүн инди Мүгәддәс Китабда тапдығымыз һәр бир инҹи нә гәдәр дәјәрлидир! (Зәб. 119:127; Мәс. 8:10). Буна ҝөрә дә сәбирли олун вә мүталиә ҹәдвәлинизә бағлы галын (Зәб. 1:2).

16. Јеһованын вә Исанын нүмунәсини неҹә изләјә биләрик?

¹⁶ Мүталиә едәркән өјрәндикләринизи тәтбиг етмәјин јоллары барәдә дүшүнүн. Мәсәлән, Јеһованын әдаләтини өрнәк алыб башгалары арасында ајры-сечкилик етмәјин. Исанын Јеһоваја вә инсанлара мәһәббәтиндән өрнәк алыб Јеһованын ады наминә вә диндашларыныз уғрунда әзијјәтләрә гатлашмаға һазыр олун. Һәмчинин Исадан нүмунә ҝөтүрәрәк инсанлара шаһидлик верин. Беләҹә, онларын да Јеһованын гијмәтли һәдијјәси барәдә өјрәнмәк вә Она иман ҝәтирмәк имканы олаҹаг.

17. Нөвбәти мәгаләдә нә һагда данышаҹағыг?

¹⁷ Фидјә һаггында нә гәдәр чох өјрәнсәк, Јеһованы вә Иса Мәсиһи бир о гәдәр чох севәҹәјик. Беләҹә, онларын да бизә севҝиси артаҹаг (Јәһ. 14:21; Јаг. 4:8). Буна ҝөрә дә фидјә һагда өјрәнмәјә давам един. Бунун үчүн Јеһованын тәгдим етдији бүтүн вәсаитләрдән истифадә един. Нөвбәти мәгаләдә фидјә сајәсиндә алдығымыз немәтләрдән данышаҹағыг вә Јеһованын мәһәббәтинә миннәтдарлығымызы ҝөстәрмәјин јолларыны өјрәнәҹәјик.