ТӘЛИМ МӘГАЛӘСИ 2
НӘҒМӘ 132 Нәһајәт, бир бәдәник
Әрләр, арвадыныза һөрмәт ҝөстәрин
«Еј әрләр,... она [арвадыныза] һөрмәт гојун» (1 БУТ. 3:7).
ӘСАС ФИКИР
Ҝөрәк әр арвадына сөздә вә әмәлдә неҹә һөрмәт ҝөстәрә биләр.
1. Јеһованын никаһ гурулушуну тәсис етмәсинин сәбәбләриндән бири һансыдыр?
ЈЕҺОВА «хошбәхт Аллаһ»дыр. О бизим дә хошбәхт олмағымызы истәјир (1 Тим. 1:11). Өмрүмүзүн хош кечмәси үчүн О бизә чохлу немәтләр бәхш едиб (Јаг. 1:17). Бу немәтләрдән бири дә никаһ әнамыдыр. Киши илә гадын аилә гуранда бир-бирини севәҹәјинә, һөрмәт едәҹәјинә вә дәјәр верәҹәјинә анд ичир. Араларындакы бағы мөһкәм сахламаг һәр икисинә севинҹ ҝәтирир (Мәс. 5:18).
2. Бу ҝүн әксәр аиләләрдә вәзијјәт нә јердәдир?
2 Тәәссүфләр олсун ки, бу ҝүн чох инсан тој ҝүнүндә вердији сөзү унудур. Елә буна ҝөрә дә онлар хошбәхтлик дујмурлар. Үмумдүнја Сәһијјә Тәшкилатынын бу јахынларда вердији һесабата әсасән әксәр кишиләр арвадларыны дөјүр, тәһгир едир вә ја онлара емосионал јара вурурлар. Белә әр, ола билсин, башгаларынын јанында арвады илә һөрмәтлә давраныр, амма евдә онун ҝүнүнү гара едир. Чох аиләләрдә әрләрин порнографијаја a бахмасы да мүнасибәтләри ҝәрҝинләшдирир.
3. Нәјә ҝөрә бәзи кишиләр арвадлары илә пис рәфтар едир?
3 Нәјә ҝөрә бәзи кишиләр арвадлары илә пис рәфтар едир? Ола билсин, онларын аталары гәзәбли инсан олуб вә буна ҝөрә дә арвадла пис рәфтар етмәјин нормал бир шеј олдуғуну дүшүнүрләр. Диҝәрләринин олдуғу мәдәнијјәтдә белә бир јанлыш дүшүнҹә вар ки, «әсл киши» голунун ҝүҹү илә арвада јерини ҝөстәрмәлидир. Бир башгаларына һиссләрини, о ҹүмләдән гәзәбини ҹиловламағы өјрәтмәјибләр, бәзиләри исә мүнтәзәм порнографијаја бахдыгларына ҝөрә гадына вә ҹинси мүнасибәтә даир бахышлары тәһриф олунуб. Үстәлик, һесабатлара әсасән COVID-19 пандемијасы да бүтүн бу проблемләрин артмасына ҝәтириб чыхарыб. Әлбәттә ки, бу амилләрин һеч бири кишиләрин гадынла пис рәфтарына һагг вермир.
4. Мәсиһи әрләр һансы саһәдә еһтијатлы олмалыдырлар вә нәјә ҝөрә?
4 Мәсиһи әрләр бу дүнјанын гадынлара јанлыш мүнасибәтини мәнимсәмәмәк үчүн еһтијатлы олмалыдырлар b. Нәјә ҝөрә? Чүнки инсанын дүшүнҹәси онун давранышына тәсир едир. Һәвари Булус Ромадакы мәсһ олунмуш мәсиһиләри бу зәманәјә ујғунлашмамаға сәсләјирди (Ром. 12:1, 2). О, ромалылара мәктубуну јазанда һәмин јығынҹаг артыг нечә вахт иди ки, мөвҹуд иди. Булусун бу сөзләри демәси ҝөстәрир ки, бәзиләри һәлә дә бу дүнјанын дүшүнҹәсинин, адәт-әнәнәләринин тәсири алтында иди. Елә буна ҝөрә дә Булус онлары дүшүнҹә вә давранышларыны дәјишмәјә тәшвиг едирди. Ејни мәсләһәт бу ҝүн мәсиһи әрләрә дә аиддир. Әфсуслар олсун ки, бу дүнјанын дүшүнҹә тәрзи бәзи мәсиһи әрләрә дә тәсир едиб, һәтта онлар арвадларына гаршы шиддәтә әл атыблар c. Бәс Јеһова әрләрин арвадлары илә неҹә рәфтар етмәсини истәјир? Ҹаваб бу мәгаләнин әсас ајәсиндә јазылыб.
5. 1 Бутрус 3:7 ајәсинә әсасән әр арвады илә неҹә давранмалыдыр?
5 1 Бутрус 3:7 ајәсини охујун. Јеһова әрләрә арвадларына һөрмәт гојмағы бујурур. Арвадына һөрмәт гојан әр онунла меһрибан вә мәһәббәтлә давранаҹаг. Бу мәгаләдән өјрәнәҹәјик ки, әр арвадына һөрмәт гојдуғуну неҹә ҝөстәрә биләр. Амма илк нөвбәдә ҝәлин ҝөрәк нә ҹүр давраныш гадынларын ләјагәтини алчалдыр.
АРВАДЫНЫЗЫН ЛӘЈАГӘТИНИ АЛЧАЛДАН ДАВРАНЫШДАН УЗАГ ОЛУН
6. Арвадына гаршы физики зоракылыг едән әрә Јеһова неҹә јанашыр? (Колослулара 3:19).
6 Физики зоракылыға јол вермәјин. Јеһова зоракылыг едәнләрә нифрәт едир (Зәб. 11:5). О әсас да арвадлары илә рәһмсиз давранан әрләрдән наразыдыр (Мәл. 2:16; Колослулара 3:19 ајәсини охујун). Мәгаләнин әсас ајәси олан 1 Бутрус 3:7 ајәсинә әсасән әр арвады илә пис рәфтар едирсә, Аллаһла мүнасибәтләри корланаҹаг. Јеһова һәтта бу инсанын дуаларыны динләмәјә биләр.
7. Ефеслиләрә 4:31, 32 ајәләринә әсасән әр арвады илә неҹә данышмамалыдыр? (Һәмчинин «Бәзи ифадәләрин изаһы»на бахын.)
7 Тәһгирамиз данышмајын. Бәзи әрләр арвадлары илә гәзәблә данышыр, онун гәлбини јаралајан сөзләр дејир. Амма Јеһова «һирси, гәзәби, гышгырығы, тәһгири» севмир d. (Ефеслиләрә 4:31, 32 ајәләрини охујун.) О бу ҹүр данышыға нифрәт едир. Јеһова данышдығымыз һәр шеји ешидир. Әрин арвады илә һәтта евин ичиндә неҹә данышмасы Јеһованын нәзәриндән јајынмыр. Арвады илә кобуд данышан әр тәкҹә онунла јох, Јеһова илә дә мүнасибәтини корлајыр (Јаг. 1:26).
8. Јеһова порнографијаја неҹә јанашыр вә нәјә ҝөрә?
8 Порнографијаја бахмајын. Јеһова порнографијаја неҹә јанашыр? О буна нифрәт едир. Буна ҝөрә дә позғун, натәмиз сәһнәләрә бахан киши һәм Јеһова илә мүнасибәтлини корлајыр, һәм дә арвадыны алчалдыр e. Јеһова әрләрин тәкҹә әмәлдә јох, дүшүнҹәдә дә арвадына садиг галмасыны истәјир. Иса демишди ки, өзҝә гадына шәһвәтлә бахан киши артыг «үрәјиндә» онунла зина етмиш олур f (Мәт. 5:28, 29).
9. Нәјә ҝөрә Јеһова әрин ҹинси мүнасибәт заманы арвады илә алчалдыҹы давранмасына нифрәт едир?
9 Ҹинси мүнасибәт заманы арвадынызла алчалдыҹы давранмајын. Бәзи әрләрин ҹинси мүнасибәт заманы тәләб етдији һәрәкәтләр гадыны алчалмыш, натәмиз вә дәјәрсиз һисс етдирир. Јеһова гадына гаршы бу ҹүр худбин вә лагејд мүнасибәтә нифрәт едир. О истәјир ки, әр арвадыны севсин, онунла нәвазишлә даврансын, һиссләринә һөрмәт етсин (Ефес. 5:28, 29). Бәс әҝәр мәсиһи әр артыг өз һәрәкәтләри илә арвадынын ләјагәтини алчалдыр, онунла кобуд рәфтар едир вә ја порнографијаја бахырса, онда неҹә? О, дүшүнҹәсини вә давранышыны неҹә дәјишә биләр?
ӘР ЛӘЈАГӘТСИЗ ДАВРАНЫШЫНА НЕҸӘ СОН ГОЈА БИЛӘР?
10. Исанын нүмунәси әрләрә неҹә көмәк едә биләр?
10 Әрә алчалдыҹы вә кобуд давранышыны дәјишмәјә нә көмәк едә биләр? О, Иса Мәсиһин нүмунәсини изләмәјә чалышмалыдыр. Бахмајараг ки, Иса һеч вахт аилә гурмамышды, онун шаҝирдләри илә рәфтары әрләр үчүн ҝөзәл нүмунәдир (Ефес. 5:25). Ҝөрәк әрләр Исанын һәвариләри илә рәфтарындан вә данышығындан нә өјрәнә биләрләр.
11. Иса һәвариләри илә неҹә рәфтар едирди?
11 Иса һәвариләри илә мүлајим давранырды. Онларын ләјагәтинә һөрмәт едирди. О һеч вахт кобудлуг етмирди, онлара јухарыдан ашағы бахмырды. Иса Аға вә Устад олса да, ҝүҹүнү нүмајиш етдириб онлар үзәриндә сәлаһијјәтә саһиб олдуғуну ҝөстәрмирди. О, тәвазөкарлыгла шаҝирдләринә хидмәт едирди (Јәһ. 13:12—17). Иса онлара демишди: «Мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мәт. 11:28—30). Иса һәлим иди. Һәлим олмаг зәиф олмаг демәк дејил. Әксинә, белә инсан дахилән о гәдәр ҝүҹлүдүр ки, өзүнә һаким ола билир. Кимсә ону өзүндән чыхармаға чалышанда тәмкинини горујур, һиссләрини әлә алырды.
12. Иса башгалары илә неҹә данышырды?
12 Иса сөзләри илә инсанлара тәсәлли верирди, онлары руһландырырды. О, давамчылары илә сәрт данышмырды (Лука 8:47, 48). Һәтта дүшмәнләри ону тәһгир етсә дә, гәзәбләндирсә дә, онлара «тәһгирлә ҹаваб вермирди» (1 Бут. 2:21—23). Бәзән исә һеч нә демирди, садәҹә сусурду (Мәт. 27:12—14). Бу, мәсиһи әрләр үчүн неҹә дә ҝөзәл нүмунәдир!
13. Әр арвадына бағландығыны неҹә ҝөстәрир? (Мәтта 19:4—6; һәмчинин шәклә бахын.)
13 Иса әрләрә һәјат јолдашларына садиг галмағы әмр етмишди. О, Атасынын сөзләрини ситат ҝәтирәрәк демишди ки, әр арвадына бағланмалыдыр. (Мәтта 19:4—6 ајәләрини охујун.) Бу ајәдә «бағланмаг» кими тәрҹүмә едилән јунан феили һәрфән «јапышганла јапышмаг» мәнасыны верир. Буна ҝөрә дә әрлә арвад арасындакы никаһ телләри елә мөһкәм олмалыдыр ки, елә бил онлары јапышганла јапышдырыблар. Әҝәр онлардан бири бу бағы гопармаға чалышарса, бундан һәр икиси зәрәр ҝөрәҹәк. Арвадыны дәрин мәһәббәтлә севән әр һәр нөв порнографијадан узаг дураҹаг. О, ҝөзүнү «пуч шејләр»дән дәрһал чәкәҹәк (Зәб. 119:37). Әјјуб кими арвадындан савајы һеч бир гадына шәһвәтлә бахмамаг үчүн бир нөв ҝөзләри илә әһд бағлајаҹаг (Әјј. 31:1).
Арвадына садиг олан әр порнографијаја бахмыр (13-ҹү абзаса бахын) h
14. Әр арвады илә вә Јеһова илә мүнасибәтини јахшылашдырмаг үчүн һансы аддымлары атмалыдыр?
14 Арвадына гаршы физики зоракылыг едән вә онунла тәһгирамиз данышан әр Јеһова илә вә јолдашы илә мүнасибәтләрини јахшылашдырмаг үчүн бир сыра аддымлар атмалыдыр. Һансы аддымлары? Биринҹиси, о, баша дүшмәлидир ки, бу саһәдә ҹидди проблеми вар вә буну Јеһовадан ҝизләдә билмәз (Зәб. 44:21; Ваиз 12:14; Ибр. 4:13). Икинҹиси, о, арвады илә алчалдыҹы рәфтарына сон гојмалы вә давранышыны дәјишмәлидир (Мәс. 28:13). Үчүнҹүсү, о, арвадындан вә Јеһовадан үзр истәјиб әфв диләмәлидир (Һәв. 3:19). Һәмчинин әр Јеһоваја јалвармалыдыр ки, үрәјиндә дәјишмәк үчүн истәк јаратсын вә она фикирләринә, сөзләринә, һәрәкәтләринә нәзарәт етмәсинә көмәк етсин (Зәб. 51:10—12; 2 Кор. 10:5; Филип. 2:13). Дөрдүнҹүсү, о, дуасына ујғун давранараг һәр ҹүр зоракылыға вә тәһгирамиз данышыға нифрәт етмәји өјрәнмәлидир (Зәб. 97:10). Бешинҹиси, әр дәрһал јығынҹағындакы ағсаггаллардан көмәк истәмәлидир (Јаг. 5:14—16). Алтынҹысы, ҝәләҹәкдә ејни давранышы тәкрарламамаг үчүн тәдбир ҝөрмәлидир. Порнографијаја бахан әр дә ејни аддымлары атмалыдыр. Јеһова ҝөрәндә ки, әр дәјишмәјә чалышыр, мүтләг она көмәк едәҹәк (Зәб. 37:5). Амма әрин арвадынын ләјагәтини алчалдан һәрәкәтләрә сон гојмасы кифајәт дејил. О, арвадына һөрмәт етмәји дә өјрәнмәлидир. Бәс буну неҹә едә биләр?
АРВАДЫНЫЗА НЕҸӘ ҺӨРМӘТ ГОЈА БИЛӘРСИНИЗ?
15. Әр арвадыны севдијини неҹә ҝөстәрә биләр?
15 Севҝи ҝөстәрин. Аилә һәјатында хошбәхт олан бәзи гардашлар чалышырлар ки, һәр ҝүн нәләрсә едиб һәјат јолдашларына севҝиләрини ҝөстәрсинләр (1 Јәһ. 3:18). Әр арвадына севҝисини кичик јолларла, мәсәлән, әлиндән тутмагла, јахуд ону гуҹагламагла да ҝөстәрә биләр. О, арвадына месаж јазыб белә дејә биләр: «Сәнин үчүн дарыхырам», јахуд соруша биләр: «Нә едирсән, кефин-әһвалын неҹәдир?» Һәрдән исә о, ачыгҹа јазараг арвадыны нә гәдәр севдијини ҝөзәл сөзләрлә ифадә едә биләр вә ја ҝүл һәдијјә едә биләр. Әр бу кими шејләри едәндә арвадыны севдијини, она һөрмәт гојдуғуну ҝөстәрир вә аилә бағларыны мөһкәмләндирир.
16. Нәјә ҝөрә әр арвадыны тәрифләмәлидир?
16 Миннәтдарлығынызы билдирин. Арвадына һөрмәт гојан әр она дәјәр вердијини билдирир вә сөзләри илә она гол-ганад верир. Мәсәлән, арвадынын вердији дәстәјә ҝөрә әр она миннәтдар олдуғуну дејә биләр (Кол. 3:15). Әр арвадыны үрәкдән тәрифләјәндә бу, гадынын үрәјинә јағ кими јајылыр. Бу заман гадын өзүнү ҝүвәндә һисс едир, әринин севҝисини, һөрмәтини дујур (Мәс. 31:28).
17. Әр арвадына һөрмәт етдијини неҹә ҝөстәрә биләр?
17 Мүлајим вә һөрмәтҹил олун. Арвадыны севән әр ону ҝөзү үстә сахлајыр, она дәјәр верир вә Јеһованын вердији гијмәтли бир һәдијјә кими бахыр (Мәс. 18:22; 31:10). Елә буна ҝөрә дә онунла мүлајим, һөрмәтҹил давраныр. Һәтта буну ән мәһрәм мүнасибәтләриндә дә нәзәрә алыр. О, арвады илә ҹинси мүнасибәт заманы она хош ҝетмәјән, ону алчалдан вә виҹданыны нараһат едән һәрәкәтләр етмәсини тәләб етмир g. Әр өзү дә бу заман Јеһованын гаршысында виҹданыны тәмиз сахламаға чалышыр (Һәв. 24:16).
18. Әрләр нә етмәјә әзмли олмалыдырлар? (Һәмчинин « Арвадыныза һөрмәт ҝөстәрмәјин дөрд јолу» адлы чәрчивәјә бахын.)
18 Әзиз әрләр, әмин ола биләрсиниз ки, һәјатынызын һәр саһәсиндә јолдашыныза һөрмәт гојмаға чалышдығынызы Јеһова ҝөрүр вә гијмәтләндирир. Одур ки, гаршыныза мәгсәд гојун ки, арвадынызын ләјагәтини алчалдан һеч бир һәрәкәтә јол вермәјәсиниз. Онунла мүлајим, һөрмәтҹил вә мәһәббәтлә давранасыныз. Белә етсәниз, ону севдијинизи вә она дәјәр вердијинизи ҝөстәрәҹәксиниз. Әзиз әрләр, арвадыныза һөрмәт гојун, онда ән дәјәрли мүнасибәтинизи — Јеһова илә достлуғунузу горумуш олаҹагсыныз (Зәб. 25:14).
НӘҒМӘ 131 «Аллаһын бирләшдирдијини инсан ајырмасын»
a «Порнографија» инсанда ҹинси еһтирас ојатмаг мәгсәдилә һазырланан сексуал характерли видеолар, шәкилләр, мәтнләр вә аудиојазылардыр.
b Јахшы олар ки, әрләр «Ҝөзәтчи гүлләси»нин 2024-ҹү ил јанвар сајында јерләшән «Гадынларла рәфтарда Јеһовадан өрнәк алын» адлы мәгаләни охусунлар.
c Әҝәр сиз мәишәт зоракылығынын гурбанысынызса, «Аиләдахили зоракылыг гурбанларына көмәк» адлы мәгаләни охуја биләрсиниз. Бу мәгаләни jw.org сајтында вә «JW Library®» тәтбигиндә «Әлавә мөвзулар» адлы силсилә мәгаләләрин ичиндән тапа биләрсиниз.
d БӘЗИ ИФАДӘЛӘРИН ИЗАҺЫ. «Тәһгирамиз данышыға» инсаны алчалдыҹы адла чағырмаг, дурмадан ону кобуд шәкилдә тәнгид етмәк дахилдир. Аҹылајыҹы, ләјагәти алчалдан истәнилән сөз тәһгирамиз данышыг сајылыр.
e jw.org сајтында вә «JW Library» тәтбигиндә «Аиләләрә көмәк» адлы силсилә мәгаләләрин ичиндән «Порнографија аиләнизи дағыда биләр» адлы мәгаләјә бахын.
f Әриниз порнографијаја бахырса, «Ҝөзәтчи гүлләси»нин 2023-ҹү ил август сајындакы «Һәјат јолдашыныз порнографијаја бахыр?» адлы мәгалә сизә көмәк едә биләр.
g Мүгәддәс Китабда әр-арвад арасында ҹинси мүнасибәт заманы һансы һәрәкәтин тәмиз вә ја натәмиз сајылдығы илә бағлы тәфсилатлар јазылмајыб. Һәр бир мәсиһи бу мәсәләдә елә бир гәрар вермәлидир ки, Јеһоваја шәрәф ҝәтирсин, бир-биринә хош олсун вә тәмиз виҹданыны горусун. Үмуми принсип беләдир: әрлә арвад никаһларынын бу мәһрәм тәрәфини башгалары илә мүзакирә етмәмәлидир.
h ШӘКЛИН ИЗАҺЫ. Бир гардашын Јеһованын Шаһиди олмајан иш јолдашлары ону порнографик журнала бахмаға тәһрик едир.
