1, 2. Иса Мәсиһ нә үчүн ҝүҹлү нараһатлыг кечирирди?

ИСА МӘСИҺ јерүзү һәјатынын сонунҹу ҝүнүндә ҝәрҝинлик кечирирди. Тезликлә о, ганун билмәјән адамларын әли илә гәддарҹасына өлдүрүләҹәкди. Амма Иса Мәсиһ тәкҹә өләҹәјинә ҝөрә нараһатлыг кечирмирди. О, Атасыны үрәкдән севир вә Ону разы салмаг истәјирди. Иса билирди ки, бу чәтин сынагдан башыуҹа чыхса, Аллаһын адына бәраәт газандыра биләҹәк. Иса һәмчинин инсанлары да севирди вә билирди ки, онларын әбәди јашамаг үмиди онун јер үзүндәки һәјатыны уғурла баша вурмасындан асылыдыр.

² Амма белә бир ҝәрҝинлик кечирмәсинә бахмајараг, Исанын үрәјиндә сүлһ вар иди. О, һәвариләринә демишди: «Өз сүлһүмү сизә бағышлајырам» (Јәһ. 14:27). Бу, Аллаһын сүлһү, јәни Јеһова илә сых мүнасибәтләрдән доған дахили сакитлик, гәлб раһатлығы иди. Аллаһын сүлһү Иса Мәсиһин дүшүнҹәсинә вә үрәјинә динҹлик, раһатлыг бәхш едирди (Филип. 4:6, 7).

3. Бу мәгаләдә нәји арашдыраҹағыг?

³ Биз һеч вахт Иса Мәсиһин үзләшдији ағыр сынагларла үзләшмәјәҹәјик. Бунунла белә, һәр биримизин сынаглары олаҹаг (Мәт. 16:24, 25; Јәһ. 15:20). Онун кими, биз дә бәзән ҝәрҝинлик кечирәҹәјик. Бәс һәддиндән артыг нараһат олмамаг вә гәлб раһатлығыны горумаг үчүн нә едә биләрик? Ҝәлин Иса Мәсиһин јер үзүндәки хидмәти боју етдији үч шејә нәзәр салаг вә сынагларла үзләшән заман ондан өрнәк алмағын јолуну арашдыраг.

4. 1 Салоникилиләрә 5:17 ајәсини нәзәрә алараг, Иса Мәсиһин јер үзүндәки һәјатынын сонунҹу ҝүнү дәфәләрлә дуа етдијинә даир нүмунәләр чәкин.

⁴ 1 Салоникилиләрә 5:17 ајәсини охујун. Јер үзүндәки һәјатынын сонунҹу ҝүнү Иса дәфәләрлә дуа етмишди. Мәсәлән, өлүмүнү анма мәрасимини тәсис едәндә о, чөрәк вә шәрабы ҝөтүрүб дуа етмишди (1 Кор. 11:23—25). Пасханы гејд етдикләри отагдан чыхмаздан өнҹә дә шаҝирдләри илә бирҝә Аллаһа дуада мүраҹиәт етмишди (Јәһ. 17:1—26). Һәмин ҝеҹә шаҝирдләри илә Зејтун дағында оланда бир нечә дәфә дуа етмишди (Мәт. 26:36—39, 42, 44). Иса Мәсиһин ишҝәнҹә дирәјиндә ҹан верәркән дедији сонунҹу сөзләр дә дуа иди (Лука 23:46). О, дуасында һәмин ҝүн баш верәнләри Јеһоваја әрз етмишди.

5. Һәвариләрин ҹәсарәти нә үчүн зәифләмишди?

⁵ Иса Мәсиһин сынаглара таб ҝәтирә билмәсинин сәбәбләриндән бири дурмадан дуа едиб Аллаһдан дөзүм истәмәси иди. Лакин һәвариләр һәмин ҝеҹә онун кими ојаг галыб дуа етмәк әвәзинә, јухуја ҝетмишдиләр. Одур ки, сынагла үзләшәндә ҹәсарәтли ола билмәдиләр (Мәт. 26:40, 41, 43, 45, 56). Ејнилә, биз дә сынагларла үзләшәндә Иса Мәсиһин нүмунәсини изләјәрәк даима дуа етмәклә сәдагәтли гала биләрик. Бәс нә һагда дуа етмәк олар?

6. Иман гәлб раһатлығыны горумаға неҹә көмәк едир?

⁶ Јеһоваја иманымызы артырмасы үчүн дуа едә биләрик (Лука 17:5; Јәһ. 14:1). Шејтан Мәсиһин бүтүн давамчыларыны сынаға чәкәҹәк, одур ки, мөһкәм имана еһтијаҹымыз вар (Лука 22:31). Бәс  ард-арда чәтинликләрлә үзләшдијимиз заман иман гәлб раһатлығыны горумаға неҹә көмәк едир? Чәтинлији дәф етмәк үчүн әлимиздән ҝәләни едәндән сонра, иман бизи тәшвиг едәҹәк ки, мәсәләни Јеһованын үзәринә гојаг. Јеһова мәсәләни биздән даһа јахшы һәлл едә биләр. Буну билмәк бизә гәлб раһатлығы бәхш едир (1 Бут. 5:6, 7).

7. Роберт гардашын сөзләриндән һансы нәтиҹәјә ҝәлирик?

⁷ Дуа истәнилән чәтинлик гаршысында гәлб раһатлығыны горумаға көмәк едир. Һал-һазырда 80 јашларында олан Роберт адлы ағсаггал дејир: «Филиппилиләрә 4:6, 7 ајәләриндәки мәсләһәт һәјатда үзләшдијим бир чох чәтинликләрә дөзмәјимә көмәк едиб. Мадди сыхынтыларым олуб, бир мүддәтлик ағсаггал кими хидмәт етмәк тәјинатымы итирмишәм». Роберт гәлб раһатлығыны нәјин сајәсиндә горуја билиб? О дејир: «Үрәјимдә нараһатлыг јаранан кими дуа едирәм. Билирәм ки, нә гәдәр чох, нә гәдәр һәрарәтлә дуа етсәм, үрәјим бир о гәдәр раһат олаҹаг».

8. Јәһја 8:29 ајәсинә әсасән, даһа нәјин сајәсиндә Иса Мәсиһин гәлбиндә раһатлыг вар иди?

⁸ Јәһја 8:29 ајәсини охујун. Һәтта тәгибләрлә үзләшән заман да Иса Мәсиһин гәлбиндә раһатлыг вар иди. Чүнки билирди ки, онун сәдагәти Атасынын үрәјини севиндирир. Мәсиһ она чәтин олан анларда белә итаәткарлыг ҝөстәрирди. О, Јеһованы севирди вә бүтүн һәјатыны Она хидмәтә һәср етмишди. Јер үзүнә ҝәлмәздән өнҹә о, Атасынын һүзурунда «уста кими чалышырды» (Мәс. 8:30). Јер үзүнә ҝәләндән сонра исә Иса дурмадан инсанлара Атасы һагда данышырды (Мәт. 6:9; Јәһ. 5:17). Бүтүн бунлар она бөјүк хошбәхтлик бәхш едирди (Јәһ. 4:34—36).

9. Өзүмүзү тәблиғ ишинә һәср етмәк гәлб раһатлығымызы итирмәмәјә неҹә көмәк едир?

 ⁹ Биз «һәмишә Рәббин ишиндә» чалышмагла вә Она итаәт етмәклә Иса Мәсиһдән өрнәк ала биләрик (1 Кор. 15:58). Бүтүн вахтымызы тәблиғ ишинә һәср етмәјин сајәсиндә проблемләрә дүзҝүн јанашмағы баҹарырыг (Һәв. 18:5). Мисал үчүн, хидмәтдә растлашдығымыз инсанларын проблемләри чох вахт бизимкиндән даһа бетәр олур. Амма онлар Јеһованы севиб, Онун әмрләринә әмәл етмәјә башлајанда һәјатлары јахшылыға доғру дәјишир вә даһа хошбәхт олурлар. Һәр дәфә бу кими шејләрин шаһиди оланда Јеһованын гајғымыза галаҹағына бир даһа әмин олуруг. Бу әминлик гәлб раһатлығымызы итирмәмәјә көмәк едир. Һәјаты боју депрессијадан вә дәјәрсизлик һиссиндән әзијјәт чәкән бир баҹы бунун фајдасыны өз тәҹрүбәсиндә ҝөрүб. О дејир: «Тәблиғә чох вахт ајыранда емосионал ҹәһәтдән даһа сабит олурам вә даһа чох хошбәхтлик дујурам. Мәнҹә, она ҝөрә ки, тәблиғдә оланда өзүмү Јеһоваја даһа јахын һисс едирәм».

10. Бренда баҹынын сөзләриндән һансы гәнаәтә ҝәлирик?

¹⁰ Ҝәлин һәмчинин Бренда адлы бир баҹынын һәјатына нәзәр салаг. Онун өзү дә, гызы да сәпәләнмиш склероз хәстәлијиндән әзијјәт чәкир. Әлил арабасына мәһкум олан Бренда баҹы тагәтдән дүшүб. О, һәрдәнбир ев-ев тәблиғдә иштирак етсә дә, әсасән мәктуб јазмагла тәблиғ едир. Баҹы дејир: «Баша дүшәндә ки, бу дүнјада хәстәлијимә чарә тапылмајаҹаг, бүтүн диггәтими хидмәтә ҹәмләдим. Тәблиғ едәндә өз дәрдим барәдә дүшүнмүрәм, фикрими тәблиғ етдијим инсанлара көмәк етмәјә ҹәмләјирәм. Үстәлик, тәблиғ иши һәр дәфә мәнә ҝәләҹәјә олан үмидими хатырладыр».

11—13. а) Һәвариләр вә диҝәрләри Исанын әсл досту олдугларыны неҹә ҝөстәрмишдиләр? б) Достлары Исаја неҹә тәсир едирди?

¹¹ Иса Мәсиһин јер үзүндәки хидмәти боју садиг һәвариләри онун әсл достлары олдугларыны ҝөстәрдиләр. Онлар Мәсәлләр китабында јазылмыш «дост вар, гардашдан јахындыр» сөзләринин ҹанлы нүмунәси идиләр (Мәс. 18:24). Достлары Иса үчүн чох әзиз иди. Јер үзүндәки хидмәти әрзиндә доғма гардашларындан һеч бири она иман ҝәтирмәмишди (Јәһ. 7:3—5). Һәтта елә олмушду ки, гоһумлары онун ағлыны итирдијини дејирди (Марк 3:21). Амма сәдагәтли һәвариләри әсл дост идиләр. Өлүмүндән өнҹәки ҝеҹә Иса онлар барәдә демишди: «Бүтүн сынагларым боју мәним јанымда сиз олмусунуз» (Лука 22:28).

¹² Һәвариләри бәзән Исаны мәјус едирдиләр, лакин о, диггәтини онларын сәһвләринә јох, она олан иманларына ҹәмләјирди (Мәт. 26:40; Марк 10:13, 14; Јәһ. 6:66—69). Едамындан өнҹә, бу садиг кишиләрлә кечирдији сонунҹу ҝеҹә онлара демишди: «Мән сизә дост дејирәм, чүнки Атамдан ешитдијим һәр шеји сизә билдирдим» (Јәһ. 15:15). Шүбһәсиз, достлары Исаны чох руһландырырды. Хидмәтдә она дәстәк олмалары Исанын үрәјини ҹуша ҝәтирирди (Лука 10:17, 21).

¹³ Исанын һәвариләрдән әлавә, хидмәтдә  вә диҝәр саһәләрдә она дәстәк олан башга достлары да вар иди. Бәзиләри она евинин гапысыны ачыр, јемәјә дәвәт едирди (Лука 10:38—42; Јәһ. 12:1, 2). Диҝәрләри Исаја јол јолдашы олуб, нәләри вар идисә онунла бөлүшүрдү (Лука 8:3). Иса јахшы дост олдуғуна ҝөрә јахшы да достлары вар иди. О, достлары үчүн чох шеј едирди вә онлардан баҹардыгларындан артығыны ҝөзләмирди. Иса камил иди, лакин гејри-камил достларынын дәстәјини чох гијмәтләндирирди. Вә сөзсүз ки, достлары она гәлб раһатлығыны горумаға көмәк едирди.

14, 15. Јахшы достлар газанмаг үчүн нә едә биләрик вә онлар бизә неҹә көмәк едир?

¹⁴ Јахшы достлар бизә Јеһоваја садиг галмаға көмәк едир. Јахшы дост газанмаг үчүн исә илк нөвбәдә өзүмүз јахшы дост олмалыјыг (Мәт. 7:12). Мисал үчүн, Мүгәддәс Китаб тәшвиг едир ки, вахтымызы вә ҝүҹүмүзү әсирҝәмәдән һәр кәсә, хүсусилә дә «корлуг чәкән» инсанлара көмәк едәк (Ефес. 4:28). Дүшүнүн ҝөрүн, јығынҹағынызда кимә көмәк едә биләрсиниз. Евдән чыха билмәјән диндашыныз үчүн базарлыг едә биләрсиниз? Мадди вәзијјәти јахшы олмајан аиләни јемәјә дәвәт едә биләрсиниз? Әҝәр jw.org

^® сајтындан вә «JW Либрарј^®» тәтбигетмәсиндән истифадә етмәји баҹарырсынызса, јығынҹаг үзвләринизә онлардан там јарарланмағы өјрәдә биләрсиниз? Ҝүҹүмүзү башгаларына көмәк етмәјә сәрф етмәк бизә хошбәхтлик ҝәтирәҹәк (Һәв. 20:35).

¹⁵ Газандығымыз достлар сынагларла үзләшәндә бизә дајаг олаҹаг вә гәлб раһатлығыны  итирмәмәјә көмәк едәҹәк. Әјјуб пејғәмбәр сынагларындан данышан заман Әлиһу ону динләдији кими, бизим дә достларымыз дәрдимизи бөлүшәндә сәбирлә динләјир (Әјј. 32:4). Достларымызын бизим әвәзимизә гәрар верәҹәјини ҝөзләмәмәлијик, амма онларын Мүгәддәс Китаба әсасланан мәсләһәтинә гулаг ассаг, һикмәтли давранмыш оларыг (Мәс. 15:22). Һәмчинин Давуд падшаһ кими, еһтијаҹ дујан заман достларымызын көмәјини тәвазөкарлыгла гәбул етмәлијик, јол вермәмәлијик ки, гүрур көмәји гәбул етмәјимизә мане олсун (2 Ишм. 17:27—29). Һәгигәтән дә, бу ҹүр јахшы достлар Јеһовадан һәдијјәдир (Јаг. 1:17).

16. Филиппилиләрә 4:6, 7 ајәләринә әсасән, үрәјимиздә сүлһүн олмасынын јеҝанә јолу һансыдыр? Изаһ един.

¹⁶ Филиппилиләрә 4:6, 7 ајәләрини охујун. Нәјә ҝөрә Јеһова сүлһү «Мәсиһ Иса васитәсилә» ала биләҹәјимизи дејир? Чүнки фикирләримиздә вә үрәјимиздә даими сүлһү јалныз Иса Мәсиһә иман едәндә вә онун Јеһованын нијјәтиндәки ролуну анлајанда газана биләрик. Мәсәлән, Мәсиһин фидјә гурбанлығы сајәсиндә бүтүн ҝүнаһларымыз бағышланыр (1 Јәһ. 2:12). Буну билмәк бизә әсл гәлб раһатлығы бәхш едир! Аллаһын Падшаһлығынын Падшаһы олараг Иса Шејтанын вә онун дүнјасынын бизә вурдуғу бүтүн зәрәри арадан галдыраҹаг (Әшј. 65:17; 1 Јәһ. 3:8; Вәһј 21:3, 4). Бу, бизә мөһтәшәм үмид бәхш едир! Исанын бизә тапшырдығы иш чәтин олса да, о, бу дөврүн јекунуна кими бизимлә олаҹағына, бизә дајаг олаҹағына сөз вериб (Мәт. 28:19, 20). Бу биздә әсл ҹәсарәт һасил едир! Үрәјимиздәки сүлһ гәлб раһатлығы, үмид вә ҹәсарәт кими тәмәл дашлары үзәриндә гурулур.

17. а) Мәсиһиләр гәлб раһатлығыны неҹә горуја биләр? б) Јәһја 16:33 ајәсинә әсасән, биз нәјә мүвәффәг олаҹағыг?

¹⁷ Ҹидди сынаглара мәруз галан заман гәлб раһатлығыны неҹә горумаг олар? Иса Мәсиһдән өрнәк алмагла. Биринҹиси, дурмадан дуа един. Икинҹиси, һәтта чәтин олса белә, Јеһоваја итаәт един вә ҹанла-башла тәблиғ един. Вә үчүнҹүсү, сизә дајаг олаҹаг достларыныза бел бағлајын. Бунлары етсәниз, Аллаһын сүлһү үрәјинизи вә фикирләринизи горујаҹаг. Онда Иса Мәсиһ кими, сиз дә истәнилән сынаг үзәриндә зәфәр чалаҹагсыныз! (Јәһја 16:33 ајәсини охујун.)