Винстон, бизә Аллаһы ахтармағындан даныша биләрсән?

Мән Австралијанын Квинсленд шәһәриндә, уҹгар бир фермада бөјүмүшәм. Аиләм диндар дејилди. Уҹгар әразидә јашадығымыза ҝөрә аилә үзвләримдән башга, демәк олар ки, һеч кимлә әлагәм јох иди. Тәхминән 12 јашларымда Аллаһы ахтармаға башладым. Дуа едәрәк јалварырдым ки, мәнә Өзү һаггында һәгигәти ачсын. Нәһајәтдә, ферманы тәрк етдим вә Ҹәнуби Австралијада, Аделаида шәһәриндә ишә дүзәлдим. 21 јашым оланда Сиднејә мәзунијјәтә ҝетмишдим. Орада Пам илә таныш олдум. О мәнә Англо-Исраил дини һәрәкаты барәдә данышды. Һәрәкатчылар һесаб едир ки, инҝилисләр Исраилин итмиш гәбиләләриндән, ерамыздан әввәл VIII әсрдә әсир апарылмыш шимал падшаһлығынын он гәбиләсиндән төрәјибләр. Аделаидаја гајыданда бу барәдә Јеһованын Шаһидләри илә Мүгәддәс Китабы өјрәнән иш јолдашыма данышдым. Бир нечә саат чәкән сөһбәт әснасында Јеһованын Шаһидләринин нәјә инандыгларыны өјрәндим вә баша дүшдүм ки, бу мәним ушаглыгда етдијим дуаларын ҹавабы иди. Ешитдикләрим Јараданым вә Онун Падшаһлығы һагда һәгигәтләр иди! Мән «чох гијмәтли бир мирвари» тапмышдым (Мәт. 13:45, 46).

Пам, сән дә бу мирварини ушаг јашларындан ахтармаға башламысан. Ону неҹә тапдын?

Јени Ҹәнуби Уелс штатынын Кофс-Һарбор шәһәриндә диндар аиләдә бөјүмүшәм. Валидејнләримлә нәнә-бабам Англо-Исраил һәрәкатынын тәлимләрини гәбул етмишди. Баҹымла гардашым, еләҹә дә халаушаглары вә дајыушаглары илә мән Аллаһын инҝилис әсилли инсанлары даһа чох севдији дүшүнҹәси илә бөјүмүшүк. Амма мән бу фикирлә разы дејилдим вә руһани  ҹәһәтдән аҹ идим. 14 јашым оланда Англикан, Баптист, Једдинҹи ҝүнүн адвентистләри килсәсини, еләҹә дә әразимиздәки диҝәр килсәләри зијарәт етдим. Амма бу килсәләрин һеч бири Аллаһы танымағыма көмәк етмәди.

Бир мүддәт сонра аиләмиз Винстонла таныш олдуғум Сиднеј шәһәринә көчдү. Винстонун гејд етдији кими, онунла дини мөвзуда апардығымыз сөһбәт онун Јеһованын Шаһидләри илә Мүгәддәс Китабы арашдырмасына ҝәтириб чыхарды. Бундан сонра ондан алдығым мәктублар ајәләрлә долу олурду. Дүзүнү дејим, әввәл-әввәл бу мәнә хош ҝәлмирди, һәтта аҹығым тутурду. Лакин јаваш-јаваш ҝөрдүм ки, онун јаздыглары Аллаһ һаггында һәгигәтә охшајыр.

1962-ҹи илдә Винстона даһа јахын олмаг үчүн Аделаидаја көчдүм. О мәни Јеһованын Шаһидләри олан Томас Сломан вә Ҹанис Сломан адлы бир әр-арвадын евиндә јерләшдирди. Папуа-Јени Гвинејада хүсуси тәјинатлы мүждәчи кими хидмәт едән бу әр-арвад мәнә елә бөјүк хејирхаһлыг ҝөстәрди ки! О вахт ҹәми 18 јашым вар иди, онларын руһани аддым атмағымда зәһмәти бөјүкдүр. Беләҹә, мән дә Аллаһын Кәламыны өјрәнмәјә башладым вә чох кечмәмиш һәгигәти тапдығыма әмин олдум. Винстонла евләндикдән дәрһал сонра мүкафатларла долу һәјата, Јеһоваја хидмәтә башладыг. Бу хидмәт сынаглара бахмајараг, тапдығымыз мирварини һәр ҝүн даһа чох гијмәтләндирмәјимизә көмәк етди.

Винстон, Јеһоваја хидмәт етмәјә башладығын илләрдән даныша биләрсән?

Памла евләнәндән бир мүддәт сонра Јеһова гаршымызда бөјүк фәалијјәт гапыларындан бирини ачды (1 Кор. 16:9). Илк гапыја Ҹек Портер гардаш јөнәлтди. О, рајон нәзарәтчиси олараг кичик јығынҹағымызы зијарәт етмишди. (Һал-һазырда о, мәнимлә бирҝә Австаласија филиалында комитә үзвүдүр.) Ҹек вә һәјат јолдашы Розлин бизи өнҹүл олмаға тәшвиг етдиләр вә беш ил бу ҝөзәл хидмәти даддыг. 29 јашым оланда Памла мәни сонрадан Фиҹи филиалынын нәздинә кечән Сакит океанын ҹәнуб һиссәсиндәки адалара рајон хидмәтинә тәјин етдиләр. Бу адалар Американын Самоа адалары, Самоа, Кирибати, Науру, Ниуе, Токелау, Тонга, Тувалу вә Вануату иди.

Һәмин вахтлар уҹгар адаларын бәзиләринин сакинләри Јеһованын Шаһидләриндән еһтијат едирди. Буна ҝөрә дә биз еһтијатлы вә тәдбирли олмалы идик (Мәт. 10:16). Јығынҹағымыз кичик иди вә бәзиләри бизи евләринә дәвәт едә билмирди. Буна ҝөрә дә галмаға јер тапмаг үчүн кәнд сакинләринә мүраҹиәт етмәли олурдуг. Онлар һәмишә хејирхаһлыг едирдиләр.

Винстон, тәрҹүмә ишинә олан хүсуси марағын һарадан гајнагланыр?

Һәмин вахт Тонга дөвләтинә аид адада јашајан баҹы-гардашларда Полинезија дил групуна аид Тонга дилиндә ҹәми бир нечә буклет вә брошүр вар иди. Хидмәтдә онлар инҝилисҹә «Әбәди һәјата апаран һәгигәт» адлы тәлим вәсаитиндән истифадә едирдиләр. Ағсаггаллар үчүн олан дөрдһәфтәлик мәктәб заманы инҝилис дилини зәиф билән үч ағсаггал бу китабы Тонга дилинә тәрҹүмә етмәјә разылашды. Пам тәрҹүмә олунмуш мәтни јазы макинасында јығды вә биз тәрҹүмәни Бирләшмиш Штатлардакы филиала чапа ҝөндәрдик. Бу лајиһә үмумиликдә сәккиз һәфтәјә баша ҝәлди. Тәрҹүмәнин кејфијјәти елә дә јахшы олмаса да, бу нәшр Тонга дилиндә данышан бир чох инсанын һәгигәти өјрәнмәсинә көмәк еләди. Памла мән тәрҹүмәчи дејилик, амма бу һадисә тәрҹүмә ишинә марағымызы артырды.

Пам, адалардакы јашајыш Австралијадакы јашајышдан нә илә фәргләнир?

Чох шејлә! Ајры-ајры әразиләрдә ҹүрбәҹүр проблемләрлә үзләширдик, ағҹаганад сүрүләри, кәскин исти вә нәмишлик, сичанлар вә хәстәликләрлә мүбаризә апарырдыг, бәзән дә јемәјимиз чатмырды. Биз Самоа дилиндә фале адланан диварсыз вә саман дамлы типик Полинезија евиндә јашајырдыг. Һәр ахшам фалемиздән океана бахыб динҹәлмәк нәјә десәниз  дәјәрди. Ајлы ҝеҹәләрдә палма ағаҹларынын силуети, океанын үстүндә ајын әкси ҝөрүнүрдү. Белә ҝөзәл анлар бизи дүшүндүрүр, дуаја сәсләјирди, мәнфи фикирләри атыб позитив дүшүнмәјә көмәк едирди.

Бурадакы шән ушаглары чох севдик, бизим кими ағдәрили әҹнәбиләр онлара чох мараглы ҝәлирди. Ниуе адасында оланда бир оғлан ушағы Винстонун голунун түкләринә тохунуб демишди: «Нә гәшәнҝ ләләкләрин вар». Ҝөрүнүр, о һеч вахт бу гәдәр түклү голлар ҝөрмәмишди вә билмәјиб буна неҹә ад версин!

Бурадакы һәјат шәраитинин нә гәдәр ашағы олдуғуну, инсанларын нә гәдәр касыб олдуғуну ҝөрәндә үрәјимиз ағрыјырды. Әтраф аләм олдугҹа ҝөзәл иди, лакин тибби хидмәт саһәси ашағы иди вә ичмәли су гытлығы вар иди. Амма баҹы-гардашлар бунлара ҝөрә нараһат олмурдулар. Бу шәраит онлара нормал ҝәлирди. Онлар хошбәхт идиләр ки, аиләләри јанындадыр, ибадәт евләри вар вә Јеһованын адыны уҹалтмаг имканлары вар. Онларын нүмунәси бизә диггәтимизи даһа ваҹиб олан шејләрә јөнәлтмәјә вә садә һәјат сүрмәјә көмәк етди.

Пам, бәзән сәнә су ҝәтирмәк вә јемәји тамамилә фәргли шәраитдә биширмәк лазым ҝәлиб. Бүтүн бунларын өһдәсиндән неҹә ҝәлирдин?

Бунлара ҝөрә атама миннәтдарам. О мәнә чох шеј өјрәдиб, мәсәлән, оҹаг галајыб үстүндә јемәк биширмәји, әлиндә олан бир-ики шејлә доланмағы. Бир дәфә Кирибатидә оланда саман дамы, мәрҹан дөшәмәси вә бамбукдан диварлары олан кичик бир евдә галдыг. Јемәк биширмәк үчүн дөшәмәдә дәлик ачыб оҹаг галамаға јер һазырлајыр, јанаҹаг әвәзинә какос габыгларыны истифадә едирдим. Су ҝәтирмәк үчүн гадынларла гујунун гаршысында нөвбәјә дајандым. Онлар су чыхармаг үчүн бир уҹуна кәндир бағланмыш тәхминән ики метр узунлуғунда олан чубугдан истифадә едирдиләр, тилова охшајырды. Амма кәндирин уҹуна гармаг әвәзинә ведрә асылырды. Һәрә нөвбә илә өз кәндирини гујуја атырды. Гадынлар биләкләрини мәгамында елә дөндәрирдиләр ки, ведрә бөјрү үстә дүшүрдү вә су илә долурду. Кәнардан асан ҝөрүнүрдү. Амма сыра мәнә чатанда ҝөрдүм ки, һеч дә белә дејилмиш. Кәндирими бир нечә дәфә гујуја атдым, амма һәр дәфә ведрә суја дәјиб үстүндәҹә галды! Һамы ҝүлүб гуртарандан сонра бир гадын мәнә көмәк әли узатды. Онлар һәмишә јардымсевәр вә меһрибан давранырдылар.

Адалардакы хидмәтиниздән ағыздолусу данышырсыныз. Хүсусилә јадынызда галан һадисәләри бизимлә бөлүшәрсиниз?

Винстон: Бурадакы бәзи адәтләри анламагда чәтинлик чәкирдик. Мисал үчүн, баҹы-гардашлар бизи гонаг дәвәт едәндә олан јемәкләринин һамысыны габағымыза гојурдулар. Әввәл-әввәл билмирдик ки, онлара да нә исә сахламалыјыг. Она ҝөрә дә гаршымыза гојулан һәр шеји јејирдик! Әлбәттә, вәзијјәтдән аҝаһ оландан сонра онлара да јемәк сахламаға башладыг. Сәһвләримизә бахмајараг, онлар чох анлајышла давранырдылар. Рајон хидмәтимиз әрзиндә тәхминән һәр алты ајдан бир онлары зијарәт едәндә чох шад олурдулар. О вахтлар онларын өз јығынҹагларындакы баҹы-гардашлардан савајы, таныдыглары јеҝанә Јеһованын Шаһидләри биз идик.

Зијарәтимиз һәмин әразидәки инсанлар үчүн дә ҝөзәл шаһидлик иди. Кәнд сакинләринин чоху елә билирди ки, бу дин јерли баҹы-гардашларын ујдурмасыдыр. Она ҝөрә дә диндашларыны зијарәт етмәјә ҝәлән әҹнәби әр-арвады ҝөрәндә онлар баша дүшүрдүләр ки, бу, реал тәшкилатдыр вә мәәттәл галырдылар.

Пам: Ән әзиз хатирәләримдән бири Кирибати илә бағлыдыр. Орада бир нечә тәблиғчиси олан бир јығынҹаг вар иди. Јығынҹағын тәк ағсаггалы олан Итинаки Матера адлы гардаш бизим үчүн әлиндән ҝәләни едирди. Бир ҝүн ҝөрдүм ки, о, ичиндә бирҹә дәнә јумурта олан сәбәтлә ҝәлир. Мәнә деди: «Бу, сизин үчүндүр». Һәмин вахт тојуг јумуртасы бизим үчүн надир тапынты иди. Бу кичик, лакин сәхавәтли жест үрәјимизи риггәтә ҝәтирди.

 Пам, бәтниндәки көрпәни итирәндә сәнә дөзмәјә нә көмәк етди?

1973-ҹү илдә Сакит океанын ҹәнуб һиссәсиндә оланда һамилә галмышдым. Австралијаја гајытмаг гәрарына ҝәлдик. Дөрд ајдан сонра ушағымызы итирдик. Тәбии ки, бу, Винстона да пис тәсир етмишди, ахы онун да өвлады иди. Үрәјимдәки ағры заманла азалырды, амма тамамилә кечиб ҝетмирди, та ки 2009-ҹу илин 15 апрел сајлы «Ҝөзәтчи гүлләси» журналыны охујана гәдәр. «Охуҹуларын суаллары» мәгаләсиндә суал вар иди: «Ана бәтниндә өлән ушаг үчүн дирилмәјә үмид вармы?» Бу мәгалә бизи әмин етди ки, буна Јеһова гәрар верәҹәк вә О, һәмишә дүзҝүн оланы едир. Јеһова Оғлуна «Иблисин ишләрини» дағытмағы тапшырараг, бу пис системдә алдығымыз бир чох јаралара шәфа верәҹәк (1 Јәһ. 3:8). Бу мәгалә һәмчинин Јеһованын халгы олараг саһиб олдуғумуз мирварини даһа да дәјәрләндирмәјә көмәк етди. Доғрудан да, Падшаһлыг үмиди олмасајды, нејләјәрдик?!

Ушағымызы итирәндән сонра таммүддәтли хидмәти бәрпа етдик. Бир нечә ај Австралија Бејтелиндә хидмәт етдикдән сонра јенидән рајон хидмәтинә башладыг. Јени Ҹәнуби Уелсин вә Сиднејин кәнд әразисиндә дөрд ил хидмәт етдикдән сонра, 1981-ҹи илдә о вахтлар Австралија адланан филиала дәвәт алдыг вә о вахтдан бәри орада хидмәт едирик.

Винстон, Австраласиада филиал комитәси кими ҝөрдүјүн ишләрдә Сакит океанын ҹәнуб һиссәсиндәки хидмәт илләриндә газандығын тәҹрүбәнин фајдасыны ҝөрүрсән?

Әлбәттә, өзү дә бир чох саһәләрдә. Әввәлҹә, Австралија филиалына Американын Самоа адаларынын вә Самоа әразисинин тәблиғ ишинә нәзарәт етмәк тапшырылды. Сонра Јени Зеландија филиалы илә Австралија филиалы бирләшдирилди вә Австраласиа филиалы адланды. Һал-һазырда бу филиалын әразисинә Австралија, Американын Самоа адалары, Самоа, Кук адалары, Јени Зеландија, Ниуе, Тимор-Лесте, Токелау вә Тонга әразиләри дахилдир. Бу әразиләрдән әксәријјәтини филиал нүмајәндәси олараг зијарәт етмишәм. Инди филиалдан бу садиг баҹы-гардашлара хидмәт едәркән онлары зијарәт едән вахт газандығым тәҹрүбә чох көмәјимә чатыр.

Сонда өз тәҹрүбәмиздән ирәли ҝәләрәк гејд едим ки, Аллаһы ахтаран тәкҹә бөјүкләр дејил. Кичикләр дә «чох гијмәтли бир мирвари»јә саһиб олмаг истәјирләр, һәтта аиләнин диҝәр үзвләри мараг ҝөстәрмәсә дә (2 Пад. 5:2, 3; 2 Салн. 34:1—3). Шүбһәсиз, мәһәббәтли Аллаһымыз Јеһова кичикдән тутмуш, бөјүјә кими һәр бир кәсин әбәди һәјаты газанмасыны истәјир!

Тәхминән 50 ил бундан өнҹә Памла мән Аллаһы ахтармаға башлајанда, һеч билмирдик ки, ахтарышымыз Падшаһлыг һагда һәгигәти — һеч бир гијмәтә ҝәлмәјән мирварини тапмағымызла нәтиҹәләнәҹәк! Биз бу дәјәрли мирварини вар ҝүҹүмүзлә горујуб-сахламаға гәти гәрарлыјыг!