1. Тарих боју Јеһованын хидмәтчиләриндә һансы ҝөзәл дүшүнҹә олуб?

 ЈЕҺОВАНЫ чох истәјирсиниз? Буна шүбһә јохдур. Елә гәдим дөврдән бу јана сизин кими Јеһова илә мүнасибәтләрини гијмәтләндирән чох адам олуб (Зәб. 104:33, 34). Бәзиләри Јеһоваја ибадәт етмәкдән өтрү гурбанлар вериб. Гәдим Исраилдә јашамыш нәзириләри буна мисал чәкмәк олар. Бәс онлар кимләр иди вә онларын нүмунәсиндән нә өјрәнә биләрик?

2. а) Нәзириләр кимләр иди? (Сајлар 6:1, 2). б) Нәјә ҝөрә бәзи исраиллиләр нәзири әһди верирди?

² Нәзири «сечилмиш», «ајрылмыш», «һәср олунмуш» мәнасыны верән ибрани сөзүндән јараныб. Нәзириләр Јеһоваја хүсуси шәкилдә хидмәт етмәк үчүн мүәјјән гурбанлар верән исраиллиләр иди. Мусанын ганунуна әсасән киши дә, гадын да Јеһова илә хүсуси әһд бағлајыб бир мүддәт нәзири кими јашамағы сечә биләрди a. (Сајлар 6:1, 2 ајәләрини охујун.) Бу әһди верәнләр диҝәр исраиллиләрдән тәләб олунмајан гајдалара әмәл етмәли иди. Бәс онлары белә бир әһд вермәјә нә тәшвиг едирди? Ҝөрүнүр, онлар буну Јеһоваја мәһәббәтдән ирәли ҝәләрәк едирдиләр, вердији бол немәтләрә ҝөрә Она миннәтдарлыгларыны билдирмәк истәјирдиләр (Ган. 6:5; 16:17).

3. Бу ҝүн Јеһованын халгы нәзириләрә неҹә бәнзәјир?

³ Мусанын гануну «Мәсиһин гануну» илә әвәз олунандан  сонра нәзирилијә сон гојулду (Гал. 6:2; Ром. 10:4). Бунунла белә, бу ҝүн Јеһованын халгы гәдимдәки нәзириләр кими бүтүн гәлбләри, варлыглары, ағыллары вә вар ҝүҹләри илә Она хидмәт етмәк истәјир (Марк 12:30). Биз өзүмүзү Јеһоваја һәср едәндә Онунла әһд бағлајыб бу ҹүр давранаҹағымыза сөз веририк. Вердијимиз әһдә ујғун јашамаг үчүн Јеһованын ирадәсини јеринә јетирмәли вә мүәјјән гурбанлар вермәлијик. Ҝәлин ҝөрәк нәзириләр әһдләринә ујғун јашамаг үчүн нә едирдиләр вә биз онлардан өз әһдимизә ујғун јашамагла бағлы нә өјрәнә биләрик b (Мәт. 16:24).

ГУРБАНЛАР ВЕРМӘЈӘ ҺАЗЫР ОЛУН

4. Сајлар 6:3, 4 ајәләринә әсасән нәзириләр һансы гурбаны вермәли иди?

⁴ Сајлар 6:3, 4 ајәләрини охујун. Нәзириләр дилләринә кефләндириҹи ички вурмамалы, еләҹә дә мејнәнин мәһсулу олан үзүм, кишмиш вә саирә шејләр јемәмәли идиләр. Диҝәр исраиллиләр шәраб да ичирди, үзүмүн бәһрәсини дә јејирди. Бурада гәбаһәт бир шеј јох иди. Мүгәддәс Китабда јазылыб ки, шәраб Аллаһын бәхшишидир вә о, инсанын үрәјини шәнләндирир (Зәб. 104:14, 15). Амма нәзириләр өзләрини бу тәамлардан көнүллү мәһрум едирдиләр c.

5. Мадиан вә Марсела һансы гурбанлары вермәк гәрарына ҝәлди вә нәјә ҝөрә?

⁵ Нәзириләр кими бу ҝүн биз дә Јеһоваја даһа чох хидмәт етмәк үчүн мүәјјән гурбанлар веририк. Мәсәлән, ҝөтүрәк Мадианла Марсела адлы әр-арвады d. Онларын чох комфортлу һәјаты вар иди. Мадиан јахшы ишдә ишләјирди, онлар ҝөзәл мәнзилдә јашајырдылар. Амма Мадианла Марсела Јеһованын јолунда даһа чох иш ҝөрмәк истәјирди. Бу мәгсәдә чатмаг үчүн һәјатларында бәзи шејләри дәјишдиләр. Онлар дејир: «Биз хәрҹләримизи азалтдыг, машынымызы сатдыг вә даһа кичик бир мәнзилә көчдүк». Мадианла Марселадан бу ҹүр гурбанлар вермәк тәләб олунмурду. Амма онлар хидмәтләрини ҝенишләндирмәк истәдикләри үчүн белә бир аддым атдылар. Онлар вердикләри бу гәрара ҝөрә  өзләрини чох мәмнун вә хошбәхт һисс едирләр.

6. Бу ҝүн мәсиһиләр нәјә ҝөрә гурбанлар верир? (Һәмчинин шәклә бахын.)

⁶ Мәсиһиләрә тәшкилатын ишләриндә даһа чох иштирак етмәк үчүн гурбанлар вермәк хошдур (1 Кор. 9:3—6). Әслиндә, Јеһова биздән бу ҹүр гурбанлар вермәји тәләб етмир вә ваз кечдијимиз шејләр дә өз-өзлүјүндә пис бир шеј дејил. Бәзиләри бундан өтрү севдикләри ишдән, ев, һејван саһиби олмаг имканындан кечиб. Чохлары бир мүддәт субај галмаг вә ја дәрһал ушаг саһиби олмамаг гәрарына ҝәлиб. Еләләри дә вар ки, аиләләриндән вә достларындан узаг олса да тәләбат олан әразијә көчүб. Биз бу гурбанлары көнүллү веририк, чүнки Јеһова үчүн һәр шејин ән јахшысыны етмәк истәјирик. Әмин олун ки, Јеһова бөјүк вә кичик олмасындан асылы олмајараг, Онун јолунда вердијиниз һәр бир гурбаны гијмәтләндирир (Ибр. 6:10).

ФӘРГЛӘНМӘЈӘ ҺАЗЫР ОЛУН

7. Әһдинә бағлы галмаг нәзиријә нәјә ҝөрә чәтин ола биләрди? (Сајлар 6:5). (Һәмчинин шәклә бахын.)

⁷ Сајлар 6:5 ајәсини охујун. Нәзириләр сачларыны кәсмәмәли идиләр. Бунунла Јеһоваја там табе олдугларыны ҝөстәрирдиләр. Исраилли хејли вахтдыр нәзирилик едирдисә, артыг сачлары узанырды вә онун узун сачы башгаларынын диггәтиндән јајынмырды. Әҝәр әтрафындакы инсанлар нәзирини әһдинә садиг галмаға тәшвиг едирдисә, нәзири олдуғунун билинмәси она чәтинлик јаратмырды. Амма тәәссүф ки, Исраил тарихиндә елә дөврләр олмушду ки, нәзириләрә дәјәр верилмирди, онлар дәстәк ҝөрмүрдү. Мәсәлән, Амус пејғәмбәрин дөврүндә дөнүк исраиллиләр «нәзириләрә шәраб [ичирдирдиләр]» (Амс. 2:12). Ҝөрүнүр, онлар истәјирдиләр ки, нәзириләр шәрабдан узаг дураҹагларына даир әһдләрини позсунлар. Бәзән әһдләринә бағлы галмаг вә башгаларындан фәргләнмәк үчүн нәзириләрә бөјүк ҹәсарәт лазым олурду.

8. Бенҹаминин һадисәси сизи неҹә руһландырыр?

⁸ Јеһованын көмәји илә биз дә өзүмүздә башгаларындан фәргләнмәјә ҹәсарәт тапа биләрик, һәтта тәбиәтҹә утанҹаг олсаг да. Мәсәлән, Норвечдә јашајан он јашлы Бенҹамин адлы бир Јеһованын Шаһидинин һадисәсинә бахаг. Украјнада ҝедән мүһарибәјә ҝөрә онун мәктәбиндә украјналылара дәстәк тәдбири кечирилирди. Шаҝирдләр Украјна бајрағынын рәнҝләриндә палтар ҝејинмәли вә маһны охумалы идиләр. Бенҹамин бу тәдбирдә иштирак  етмәк истәмирди, она ҝөрә дә тәдбирин кечирилдији јердән бир аз узагда дајанмышды. Амма мүәллимәси ону ҝөрүр вә уҹадан чағырыб дејир: «Ҝәл бура. Һамы сәни ҝөзләјир». Бенҹамин ҹәсарәтлә мүәллимәсинә јахынлашыб белә дејир: «Мән битәрәфәм вә сијаси нүмајишләрдә иштирак етмирәм. Амма билин ки, нә гәдәр Јеһованын Шаһиди мүһарибәдә иштирак етмәдији үчүн һәбсдәдир». Мүәллимә онун изаһына анлајышла јанашыр вә тәдбирдә иштирак етмәмәјә иҹазә верир. Бунунла белә, синиф јолдашлары ондан нәјә ҝөрә иштирак етмәдијини сорушурлар. Бенҹамин о гәдәр һәјәҹанланыр ки, аз галыр ағласын. Лакин мүәллимәсинә дедикләрини ҹәсарәтлә бүтүн синфин гаршысында тәкрарлајыр. Бенҹамин даһа сонра валидејнләринә демишди ки, һәмин вахт Јеһованын она иманыны мүдафиә етмәјә көмәк етдијини һисс едиб.

9. Јеһованын гәлбини неҹә севиндирә биләрик?

⁹ Биз Јеһованын ирадәсинә ујғун јашадығымыз үчүн бу дүнјадакы инсанлардан фәргләнирик. Ишдә вә ја мәктәбдә Јеһованын Шаһиди олдуғумузу демәк үчүн бизә ҹәсарәт лазымдыр. Бу дүнјанын дүшүнҹәси вә давранышы ҝетдикҹә корланыр. Буна ҝөрә дә Мүгәддәс Китаб принсипләринә ујғун јашамаг вә мүждәни инсанлара данышмаг чәтинләшир (2 Тим. 1:8; 3:13). Бунунла белә, унутмајын ки, биз ҹәсарәтли давраныб Јеһоваја хидмәт етмәјән инсанлардан фәргләнәндә Онун гәлбини севиндиририк (Мәс. 27:11; Мәл. 3:18).

СИЗИН ҮЧҮН ӘН ВАҸИБ ЈЕҺОВА ОЛСУН

10. Сајлар 6:6, 7 ајәләриндә јазылан әмрә ујғун давранмаг нәзириләрә нәјә ҝөрә чәтин ола биләрди?

¹⁰ Сајлар 6:6, 7 ајәләрини охујун. Нәзириләр һеч бир өлүјә јахын ҝетмәмәли идиләр. Һәмин дөврдә инсанын јахын гоһуму өләндә бу әмрә табе олмаг олдугҹа чәтин иди. Чүнки дәфн адәтләрини иҹра етмәк үчүн ҹәсәдин јанында олмаг лазым иди (Јәһ. 19:39, 40; Һәв. 9:36—40). Нәзири әһди верән инсан исә бу ҹүр адәтләрдә иштирак едә билмәзди. Һәтта аилә үзвләрини итирмиш олсалар белә, онлар бу јаслы ҝүнләриндә әһдләринә ујғун давраныб бөјүк иман ҝөстәрирдиләр. Сөзсүз ки, Јеһова бу садиг хидмәтчиләринә үзләшдикләри бу ҹүр чәтин вәзијјәтләрә дөзмәјә ҝүҹ верирди.

11. Аилә мәсәләләриндә гәрар верәркән мәсиһи нә етмәјә гәтијјәтли олмалыдыр? (Һәмчинин шәклә бахын.)

 ¹¹ Биз мәсиһиләр Јеһоваја һәср олунма әһдимизә ҹидди јанашырыг. Бу, аилә мәсәләләри илә бағлы вердијимиз гәрарлара вә давранышларымыза да тәсир едир. Дүздүр, биз аилә мәсулијјәтләримизи ҹанла-башла јеринә јетиририк. Амма аиләмизин истәкләрини һеч вахт Јеһованын тәләбләриндән үстүн тутмуруг (Мәт. 10:35—37; 1 Тим. 5:8). Јеһованы разы салмагдан өтрү бәзән гоһумларымызын хошуна ҝәлмәјәҹәк гәрарлар вермәји ҝөзә алырыг.

12. Александрунун аиләсиндә чәтин вәзијјәт јарананда о нә етди вә нә етмәди?

¹² Александру илә арвады Доринанын һадисәсинә бахаг. Онлар Мүгәддәс Китабы өјрәнмәјә башлајандан бир ил сонра Дорина дәрсләри дајандырмаг гәрарына ҝәлир вә Александрунун да дајандырмасыны истәјир. Амма Александру сакит вә нәзакәтли шәкилдә она билдирир ки, дәрсләрә давам едәҹәк. Бу, Доринанын хошуна ҝәлмир вә о, јолдашына мане олмаг үчүн әлиндән ҝәләни едир. Александру јолдашынын нәјә ҝөрә белә даврандығына анлајыш ҝөстәрмәјә чалышырды, амма бу һеч дә асан олмурду. Дорина ону тәнгид етдији, сәрт ҹаваб вердији үчүн бәзән Александру тәслим олмаг истәјирди. Бунунла белә, о јенә дә Јеһованын фикрини үстүн тутурду, ејни заманда арвадына мәһәббәт вә һөрмәт ҝөстәрирди. Нәһајәтдә, арвады онун ҝөзәл давранышларыны ҝөрүб дәрси бәрпа етмәк гәрарына ҝәлди вә даһа сонра вәфтиз олунду. (jw.org сајтында «Һәгигәт һәјатлары дәјишир» рубрикасында «Александру вә Дорина Вакар: “Мәһәббәт сәбирли вә хејирхаһдыр”» адлы видеоја бахын.)

13. Јеһоваја вә аиләмизә севҝимизи неҹә ҝөстәрә биләрик?

¹³ Аилә гурулушуну Јеһова тәсис едиб вә О, аиләмизин хошбәхт олмағыны истәјир (Ефес. 3:14, 15). Әҝәр һәгигәтән дә хошбәхт олмаг истәјириксә, һәр шеји Јеһованын бујурдуғу тәрздә етмәлијик. Әмин олун ки, Јеһова Она хидмәт етмәк үчүн вердијиниз гурбанлары, ејни заманда аиләнизин гајғысына галыб онлара мәһәббәт вә һөрмәт ҝөстәрмәјинизи чох гијмәтләндирир (Ром. 12:10).

БИР-БИРИНИЗИ НӘЗИРИЛӘР КИМИ ОЛМАҒА ТӘШВИГ ЕДИН

14. Хүсусилә кимләри сөзләримизлә үрәкләндирмәлијик?

¹⁴ Јеһоваја хидмәт етмәјә гәрар верән һәр бир инсан Она севҝидән ирәли ҝәләрәк гурбанлар вермәјә һазыр олмалыдыр.  Бу, бәзән елә дә асан олмур. Бәс онда белә давранмаға бир-биримизә неҹә көмәк едә биләрик? Руһландырыҹы сөзләримизлә (Әјј. 16:5). Јығынҹағынызда еләләри вармы ки, теократик ишләрдә даһа чох иштирак етмәк үчүн һәјатларыны садәләшдирмәјә чалышырлар? Елә ҝәнҹләр таныјырсыныз ки, онлара нә гәдәр чәтин олса да, ҹәсарәт ҝөстәриб мәктәбдә башгаларындан фәргләнирләр? Бәс аиләдәки тәгибләрә бахмајараг, садиг галмаға чалышан диндашларыныз вә ја Мүгәддәс Китаб шаҝирдләри вар? Фүрсәт дүшән кими бу әзиз баҹы-гардашлары руһландырын. Онларын ҹәсарәтинә валеһ олдуғунузу, Јеһованын јолунда вердији гурбанлары гијмәтләндирдијинизи билдирин (Флм. 4, 5, 7).

15. Бәзиләри тамвахтлы хидмәтдә оланлара неҹә дәстәк олур?

¹⁵ Бәзән исә тамвахтлы хидмәтдә олан диндашларымыза әл тута биләрик (Мәс. 19:17; Ибр. 13:16). Бу, Шри-Ланкада јашајан јашлы бир баҹынын да үрәјиндән кечирди. Онун тәгаүдүнү артырмышдылар вә о, өнҹүл кими хидмәт едән ики ҝәнҹ баҹыја мадди сыхынтыларына бахмајараг, хидмәтләрини давам етдирмәјә көмәк етмәк истәјирди. Буна ҝөрә дә онларын телефон хәрҹләрини гаршыламаг үчүн бу јашлы баҹымыз һәр ај мүәјјән мәбләғдә пул ајырмаг гәрарына ҝәлир. Онун неҹә дә ҝөзәл үрәји вар!

16. Гәдимдәки нәзири әһдиндән нә өјрәнирик?

¹⁶ Ҝөрдүјүмүз кими гәдимдә јашајан нәзириләр бизим үчүн ҝөзәл нүмунәдирләр. Бунунла белә, нәзирилик әһдиндән Јеһова барәдә дә чох шеј өјрәнмәк олар. Мәсәлән, Јеһова әминдир ки, биз Ону разы салмағы үрәкдән истәјирик вә һәср олунма әһдимизә ујғун јашамаг үчүн гурбанлар вермәјә һазырыг. Үстәлик, Јеһова Она олан севҝимизи ҝөстәрмәјә имкан јаратмагла һәр биримизә һөрмәт ҝөстәрир (Мәс. 23:15, 16; Марк 10:28—30; 1 Јәһ. 4:19). Нәзирилик әһдиндән ҝөрмәк олар ки, Јеһова Онун јолунда вердијимиз гурбанлары ҝөрүр вә гијмәтләндирир. Одур ки, ҝәлин Јеһоваја бундан сонра да хидмәт етмәјә әзмли олаг вә ҹан-дилдән Онун јолунда һәр шејин ән јахшысыны верәк.