Мүгәддәс Китабда Јеһованын ҝәләҹәји габагҹадан сөјләјә билдији ајдын јазылыб (Әшј. 45:21). Бәс Јеһова буну неҹә вә нә заман едир? О, ҝәләҹәклә бағлы нә гәдәр мәлуматы билмәк гәрарына ҝәлир? Мүгәддәс Китабда бу барәдә әтрафлы јазылмајыб. Она ҝөрә дә биз Јеһованын ҝәләҹәји сөјләмәк габилијјәти барәдә конкрет бир шеј дејә билмәрик. Бунунла белә, ҝәлин бир нечә амилә нәзәр салаг.

Јеһова истәдији һәр шеји етмәјә гадирдир, амма бәзән Өзүнә мәһдудијјәт гојур. Һикмәти сонсуз олдуғу үчүн О, истәдији шеј барәдә габагҹадан мәлумат верә биләр (Ром. 11:33). Лакин Јеһовада мүкәммәл тәрздә өзүнә һаким олмаг хүсусијјәти дә вар. Буна ҝөрә дә О, гәрара ҝәлә биләр ки, һадисәнин нә илә нәтиҹәләнәҹәјини өјрәнмәсин. (Әшија 42:14 ајәси илә әлагәләндирин.)

Јеһова нијјәтинин иҹра олунмасына сәбәб олур. Бу амил Јеһованын ҝәләҹәји габагҹадан демәк габилијјәти илә неҹә әлагәлидир? Әшија 46:10 ајәси буну белә изаһ едир: «Ахыры әввәлдән, баш вермәмиш һадисәләри әзәлдән хәбәр верирәм. Дејирәм: “Мәним һөкмүм дәјишмәјәҹәк, нијјәтимдә олан һәр шеји едәҹәјәм”».

Демәли, нәјә ҝөрә Јеһова ҝәләҹәји габагҹадан дејә билир? Сәбәбләрдән бири одур ки, О, һадисәләри ҝерчәкләшдирмәјә гадирдир. Јеһова ҝәләҹәкдә нәјин баш верәҹәјини билмәк үчүн һадисәләри видео кими габаға чәкмәјә еһтијаҹ дујмур. Онда елә чыхарды ки, санки ҝәләҹәкдәки бүтүн һадисәләр мүәјјән формада артыг баш вериб вә Јеһова садәҹә бунлара габагҹадан нәзәр салыр. Хејр, бу белә дејил. Јеһова лазым ҝәләрсә, гәрар верә биләр ки, филан вахтда филан шеј олсун, сонра да вахты чатанда ону ҝерчәкләшдирә биләр (Чых. 9:5, 6; Мәт. 24:36; Һәв. 17:31).

Елә бу сәбәбдән Мүгәддәс Китабда Јеһованын ҝәләҹәкдә ҝөрәҹәји ишләрдән сөһбәт ҝедәндә «һазырламышам», «нијјәт етдим» кими ифадәләр истифадә олунур (2 Пад. 19:25; Әшј. 46:11). Орижинал дилдән тәрҹүмә олунан бу ифадәләр «дулусчу» мәнасыны верән сөзлә әлагәлидир (Әрм. 18:2—4). Неҹә ки мәһарәтли дулусчу ҝил парчасындан истәдији формада ҝөзәл бир габ дүзәлдир, ејнилә Јеһова да нијјәтини јеринә јетирмәк үчүн һадисәләри истәдији формаја салыр, башга сөзлә, истәдији сәмтә апарыр (Ефес. 1:11).

Јеһова ирадә азадлығы әнамына һөрмәт едир. Аллаһ ајры-ајрылыгда һәр бир инсанын һәјатыны габагҹадан јазмыр, јахуд да јахшы инсанларын пис ишләр ҝөрүб мәһв олмасына сәбәб олмур. Јеһова һәр кәсә өз истәдији һәјат јолуну сечмәјә имкан верир, ејни заманда онлары дүзҝүн јолу сечмәјә тәшвиг едир.

Ҝәлин ики һадисәјә бахаг. Биринҹи һадисә нејнәвалыларла бағлыдыр. Јеһова демишди ки, Нејнәва шәһәри халгын шәр әмәлләринә ҝөрә мәһв олаҹаг. Амма оранын ҹамааты төвбә едәндә Јеһова «фикриндән дашынды вә дедији бәланы онларын башына ҝәтирмәди» (Јун. 3:1—10). О, габагҹадан дедији һадисә илә бағлы фикрини дәјишди, чүнки нејнәвалылар ирадә азадлыгларындан истифадә едәрәк Јеһованын хәбәрдарлығына гулаг асдылар вә төвбә етдиләр.

Икинҹи һадисә Куруш адлы сәркәрдә һагда дејилмиш пејғәмбәрликдир. О, јәһудиләри әсирликдән азад етмәли вә Јеһованын мәбәдинин јенидән тикилмәси үчүн фәрман вермәли иди (Әшј. 44:26—45:4). Бу пејғәмбәрлик Фарс шаһы Курушун үзәриндә јеринә јетди (Үзр. 1:1—4). Амма Куруш Јеһоваја ибадәт етмирди. Јеһова Курушун азад ибадәт етмәк һүгугуна мүдахилә етмәдән онун васитәсилә бу пејғәмбәрлији јеринә јетирди (Мәс. 21:1).

Әлбәттә, бунлар Јеһованын ҝәләҹәји габагҹадан дејәркән нәзәрә алдығы амилләрдән јалныз бәзиләридир. Әслинә галса, һеч бир инсан Јеһованын јолларыны там дәрк едә билмәз (Әшј. 55:8, 9). Амма Јеһова һагда билдикләримиз Онун һәр шеји һәмишә доғру етдијинә иманымызы мөһкәмләндирир. Бура Онун ҝәләҹәји габагҹадан демәси дә дахилдир.