1. Бүтүн мәсһ олунмушлар нә заман ҝөјә галхаҹаг?

 УЗУН илләр әввәл Аллаһын халгыны бир суал дүшүндүрүрдү: «Ҝөрәсән, мәсһ олунмушларын ахырынҹысы ҝөјә нә вахт апарылаҹаг?» Әввәлләр елә дүшүнүрдүк ки, Армаҝеддон мүһарибәсиндән сонра онлардан бәзиләри бир мүддәт бизимлә бирликдә Ҹәннәтдә јашајаҹаг. Амма «Ҝөзәтчи гүлләси»нин 2013-ҹү ил 15 ијул сајында бу мәсәләјә ајдынлыг ҝәтирилди. Орада дејилирди ки, Армаҝеддон мүһарибәси башламаздан әввәл јер үзүндә галан мәсһ олунмушларын һамысы ҝөјә галдырылаҹаг (Мәт. 24:31).

2. Биздә һансы суал јарана биләр вә бу мәгаләдә нә һагда данышаҹағыг?

² Бунунла белә, бәзиләримиздә белә бир суал јараныр: «Бәс “бөјүк мүсибәт” вахты Јеһоваја сәдагәтлә хидмәт едән Мәсиһин “башга гојунлары” илә нә баш верәҹәк?» (Јәһ. 10:16; Мәт. 24:21). Бу ҝүн бәзи диндашларымыз нараһатдыр ки, мәсһ олунмуш әзиз диндашлары ҝөјә галдырыландан сонра онлар өзләрини тәрк едилмиш һисс едәҹәкләр. Бәлкә дә онларын бу ҹүр дүшүнмәјинә сәбәб Мүгәддәс Китабда олан ики һадисәдир. Ҝәлин һәмин һадисәләри арашдыраг. Сонра исә мүзакирә едәк ҝөрәк горхмамаг үчүн һансы сәбәбләримиз вар.

НӘ БАШ ВЕРМӘЈӘҸӘК?

3, 4. Бәзиләриндә һансы горху вар вә нәјә ҝөрә?

³ Бәзиләри горхур ки, Рәһбәрлик Шурасынын үзвләри артыг олмаса, башга гојунлар Јеһовадан узаглашаҹаг. Бәлкә дә онлар Мүгәддәс Китабдакы бәзи һадисәләрә ҝөрә белә дүшүнүрләр. Ҝәлин бу һадисәләрдән икисинә нәзәр салаг. Биринҹи һадисә баш каһин Јәһјадајла бағлыдыр. О, чох иманлы инсан иди. Арвады Јәһусәбатла бирҝә Јуәс адлы оғланы горумушду,  она јахшы, сәдагәтли падшаһ олмаға көмәк етмишди. Нә гәдәр ки Јәһјадај сағ иди, Јуәс дә јахшы иди. Јәһјадајын өлүмүндән сонра исә Јуәс корланды. О, пис Јәһуда әмирләринә гошулду вә Јеһовадан узаглашды (2 Салн. 24:2, 15—19).

⁴ Нөвбәти һадисә икинҹи әсрдәки мәсиһиләрлә бағлыдыр. Јәһја сағ галан ахырынҹы һәвари иди. О, мәсиһиләрә Јеһоваја садиг галмаға көмәк едирди (3 Јәһ. 4). Исанын диҝәр садиг һәвариләри кими, о да узун илләр дөнүклүјә гаршы мүбаризә апармышды (1 Јәһ. 2:18; 2 Салон. 2:7). Амма Јәһја өләндән сонра дөнүклүк мешә јанғыны кими јајылды. Нөвбәти илләр әрзиндә мәсиһи јығынҹағы јалан тәлимләрлә тамамилә зәһәрләнди.

5. Арашдырдығымыз ики һадисәдән һансы гәнаәтә ҝәлмәмәлијик?

⁵ Мүгәддәс Китабдакы бу һадисәләр о демәкдирми ки, мәсһ олунмушлар ҝөјә галдырыландан сонра Исанын башга гојунлары Јуәс кими пис ишләр ҝөрмәјә башлајаҹаг, јахуд икинҹи әсрдәки әксәр мәсиһиләр кими дөнүк олаҹаг? Хејр. Бу, гәтијјән белә олмајаҹаг! Әмин ола биләрик ки, мәсһ олунмушлар артыг јер үзүндә олмајанда башга гојунлар јенә дә Аллаһа мәгбул шәкилдә ибадәт едәҹәк вә Јеһованын гајғысыны дујаҹаглар. Буна нәјә ҝөрә әмин ола биләрик?

ПАК ИБАДӘТ ЛӘКӘЛӘНМӘЈӘҸӘК

6. Һансы үч вахт кәсијиндән данышаҹағыг?

⁶ Нәјә ҝөрә әмин ола биләрик ки, һәтта гаршыдакы чәтин вахтларда да пак ибадәт ләкәләнмәјәҹәк? Мүгәддәс Китабдан јашадығымыз дөврлә бағлы өјрәндикләримиз бу ҹүр дүшүнмәјә әсас верир. Индики дөврлә гәдим исраиллиләрин вә икинҹи әсрдәки мәсиһиләрин јашадығы вахт арасында бөјүк фәрг вар. Ҝәлин бу үч вахт кәсији һаггында әтрафлы данышаг: 1) гәдимдә исраиллиләрин јашадығы вахт, 2) һәвариләрин өлүмүндән сонракы вахт, 3) бизим јашадығымыз вахт, јәни «һәр шејин бәрпа едиләҹәји вахт» (Һәв. 3:21).

7. Гәдим Исраилдә падшаһлар вә халг шәр ишләр ҝөрәндә нәјә ҝөрә садиг инсанлар руһдан дүшмәди?

⁷ Гәдимдә исраиллиләрин јашадығы вахт. Муса пејғәмбәр өлүмүндән бир аз әввәл исраиллиләрә белә демишди: «Билирәм ки, мән өләндән сонра азғынлашаҹаг, сизә бујурдуғум јолдан дөнәҹәксиниз» (Ган. 31:29). Муса һәм дә халга хәбәрдарлыг етмишди ки, үсјан етсәләр, әсирлијә апарылаҹаглар (Ган. 28:35, 36). Онун дедији кими дә олду. Әсрләр әрзиндә падшаһларын чоху Аллаһын бәјәнмәдији кими давраныб халгы да јолдан чыхарырдылар. Нәтиҹәдә, Јеһова шәр иш ҝөрәнләри ҹәзаландырды вә исраилли падшаһлара даһа һакимијјәт сүрмәјә изин вермәди (Һизг. 21:25—27). Аллаһа садиг олан исраиллиләр исә Јеһованын дедикләринин јеринә јетдијини ҝөрәндә үрәкләнирдиләр (Әшј. 55:10, 11).

8. Нәјә ҝөрә икинҹи әсрдәки мәсиһиләрин ибадәтинин ләкәләнмәси бизи тәәҹҹүбләндирмир? Изаһ един.

⁸ Һәвариләрин өлүмүндән сонракы вахт. Икинҹи әсрдәки мәсиһиләрин дә ибадәтләринин ләкәләнмәси бизи тәәҹҹүбләндирмир. Чүнки дөнүклүјүн баш галдыраҹағыны Иса габагҹадан демишди (Мәт. 7:21—23; 13:24—30, 36—43). Һәвари Булус, Бутрус вә Јәһја Исанын пејғәмбәрлијинин ерамызын биринҹи әсриндә артыг јеринә јетмәјә башладығыны тәсдиг етмишдиләр (2 Салон. 2:3, 7; 2 Бут. 2:1—3, 17—19; 1 Јәһ. 2:18). Икинҹи әсрдә мәсиһи јығынҹағы ләкәләнди. Ахырынҹы һәваринин өлүмүндән чох кечмәмиш дөнүк мәсиһиләр јалан динин дүнја империјасы олан Бөјүк Бабилин бир  һиссәсинә чеврилдиләр. Һәр шеј јенә дә дејилдији кими олду.

9. Бизим јашадығымыз вахт гәдим исраиллиләрин јашадығы вә икинҹи әсрдә дөнүклүјүн баш галдырдығы вахтдан нә илә фәргләнир?

⁹ «Һәр шејин бәрпа едиләҹәји вахт». Бизим јашадығымыз вахт гәдим исраиллиләрин јашадығы вә икинҹи әсрдә дөнүклүјүн баш галдырдығы вахтдан хејли фәргләнир. Бәс бизим јашадығымыз дөвр неҹә адланыр? Адәтән биз бу дөврү «ахырзаман» адландырырыг (2 Тим. 3:1). Амма Мүгәддәс Китабда дејилир ки, ахырзаманла јанашы даһа узун, даһа әламәтдар бир дөвр дә башлады. Бу дөвр «һәр шејин бәрпа едиләҹәји вахт» адланыр (Һәв. 3:21). О, 1914-ҹү илдән башлајыб Аллаһын Падшаһлығынын бәшәријјәти камиллијә чатдыраҹағы вә јер үзүнү ҹәннәтә чевирәҹәји вахта гәдәр давам едәҹәк. Бәс бу вахт кәсији башлајандан нәләр бәрпа олунуб? Иса Мәсиһ ҝөјдә Падшаһ тәјин олунуб. Беләҹә, јенә Давудун нәслиндән Јеһованы тәмсил едән бир падшаһ вар. Амма Јеһова тәкҹә бу падшаһлығы бәрпа етмәјиб. Бундан дәрһал сонра Јеһова пак ибадәти дә дирчәлтмәјә башлады (Әшј. 2:2—4; Һизг. 11:17—20). Бәс пак ибадәт јенидән ләкәләнәҹәк?

10. а) Мүгәддәс Китабда бизим дөврүмүздәки пак ибадәтлә бағлы габагҹадан нә дејилмишди? (Әшија 54:17). б) Нәјә ҝөрә бу ҹүр пејғәмбәрликләр бизә сакитлик верир?

¹⁰ Әшија 54:17 ајәсини охујун. Бу пејғәмбәрлик һагда бир дүшүнүн: «Сәнә гаршы дүзәлдилән һеч бир силаһ кара ҝәлмәјәҹәк». Аллаһын илһамы илә јазылмыш бу сөзләр һал-һазырда јеринә јетир. Бизим дөврүмүзә аид башга үрәкачан пејғәмбәрлик дә вар: «Бүтүн оғулларын Јеһовадан елм алаҹаг, оғулларынын әмин-аманлығы битиб-түкәнмәјәҹәк. Салеһликдә бәргәрар олаҹагсан... Горху, дәһшәт үчүн бир сәбәб олмајаҹаг, онлар артыг сәнә јахын ҝәлмәјәҹәк» (Әшј. 54:13, 14). Һәтта «бу дөврүн аллаһы» Шејтан Јеһованын халгынын апардығы тәлим ишини дајандыра билмәз. О бунун гаршысында аҹиздир (2 Кор. 4:4). Пак ибадәт бәрпа олунуб вә бир даһа ләкәләнмәјәҹәк, о, әбәдилик галаҹаг. Она гаршы дүзәлдилән һеч бир силаһ кара ҝәлмәјәҹәк!

НӘ БАШ ВЕРӘҸӘК?

11. Мәсһ олунмушлар ҝөјә галханда бөјүк издиһамын башсыз галмајаҹағыны нәјә әсасән демәк олар?

¹¹ Мәсһ олмушлар ҝөјә галхандан сонра нә баш верәҹәк? Унутмајын ки, бизим Чобанымыз  Исадыр. Јығынҹағын башы одур. О өзү дә ајдын шәкилдә демишди: «Бир Рәһбәриниз вар, о да Мәсиһдир» (Мәт. 23:10). Һал-һазырда һакимијјәт сүрән Падшаһымыз Иса Мәсиһ өз ишини бундан сонра да лајигинҹә јеринә јетирәҹәк. Бизим Рәһбәримиз Мәсиһ олдуғу үчүн горхмаға һеч бир әсасымыз олмајаҹаг. Дүздүр, һәмин вахт Мәсиһин өз давамчыларына неҹә рәһбәрлик едәҹәји илә бағлы бүтүн тәфәррүатлары билмирик. Амма Мүгәддәс Китабдакы бәзи һадисәләр биздә мүәјјән тәсәввүр јарада биләр.

12. а) Јеһова Муса пејғәмбәр өләндән сонра халгынын гејдинә неҹә галмышды? б) Илјас пејғәмбәр јени тәјинат аландан сонра Јеһова халгынын гејдинә неҹә галмышды? (Һәмчинин шәклә бахын.)

¹² Исраиллиләр Вәд едилмиш дијара дахил олмаздан әввәл Муса пејғәмбәр өлүр. Бәс Аллаһын халгы илә нә баш верир? Артыг Муса олмадығы үчүн онлар башсыз галырлар? Әлбәттә ки, јох. Нә гәдәр ки онлар садиг идиләр, Јеһова онларын гејдинә галырды. Муса өлмәздән әввәл Јеһова она тапшырмышды ки, халга рәһбәрлик етмәк үчүн Јушәни тәјин етсин. Муса Јушәјә узун илләр тәлим вермишди (Чых. 33:11; Ган. 34:9). Бундан әлавә, һәр мин, јүз, әлли вә он нәфәрин үзәриндә халга башчылыг едән баҹарыглы кишиләр вар иди (Ган. 1:15). Аллаһын халгы гајғы илә әһатә олмушду. Диҝәр һадисә исә Илјас пејғәмбәрлә бағлыдыр. О, исраиллиләрин Аллаһа пак шәкилдә ибадәт етмәси үчүн узун илләр әрзиндә чох чалышмышды. Амма бир мүддәт сонра Јеһова она башга тәјинат верир — ону Јәһуданын ҹәнубуна ҝөндәрир (2 Пад. 2:1; 2 Салн. 21:12). Бәс он гәбиләли Исраил падшаһлығындакы садиг инсанлар башсыз галыр? Јох. Илјас узун илләр Әлјәсәјә тәлим кечмишди. Һәмчинин орада «пејғәмбәр оғуллары» да вар иди. Ҝөрүнүр, онлар мәктәб кими бир јердә тәлим алан инсанлар иди (2 Пад. 2:7). Демәли, Аллаһын халгына рәһбәрлик етмәјә көмәк едәҹәк чохлу садиг кишиләр вар иди. Јеһова садиг хидмәтчиләринин гејдинә галмагла бу нијјәтини јеринә јетирмәјә давам едирди.

13. Ибраниләрә 13:5б ајәсиндә Јеһова бизи нәјә архајын едир? (Һәмчинин шәклә бахын.)

¹³ Бу нүмунәләри нәзәрә алараг неҹә дүшүнүрсүнүз, јер үзүндәки ән ахырынҹы мәсһ олунмуш ҝөјә галхандан сонра нә баш верәҹәк? Ҹавабы чох дүшүнмәјә еһтијаҹ јохдур. Мүгәддәс Китабда чох садә, ајдын бир һәгигәт јазылыб: Јеһова јер үзүндәки хидмәтчиләрини һеч вахт  тәрк етмәјәҹәк. (Ибраниләрә 13:5б ајәсини охујун.) Муса илә Илјас кими бу ҝүн дә рәһбәрлик едән мәсһ олунмуш гардашлар баша дүшүрләр ки, башгаларына тәлим вермәк лазымдыр. Рәһбәрлик Шурасы узун илләрдир Аллаһын халгынын гејдинә галмалары үчүн бөјүк издиһамдан олан гардашлара тәлим верир. Мәсәлән, онлар ағсаггалларын, сәјјар нәзарәтчиләрин, филиал комитәси үзвләринин, Бејтелдәки нәзарәтчиләрин, хүсуси тәјинатлы мүждәчиләрин вә диҝәрләринин тәлим алмасы үчүн чохлу мәктәбләр тәшкил едирләр. Бундан әлавә, Рәһбәрлик Шурасы шәхсән Шуранын мүхтәлиф комитәләринин көмәкчиләринә тәлим верир. Бу көмәкчиләр артыг индидән тәшкилатда бөјүк мәсулијјәт јүкү дашыјыр. Онлар мәсһ олунмушлар ҝөјә галхандан сонра да Мәсиһин давамчыларынын гејдинә галмаға там һазырдырлар.

14. Мүзакирәмизин мәғзи нәдир?

¹⁴ Демәли, мүзакирәмизин мәғзи будур: бөјүк мүсибәтин сонуна јахын мәсһ олмушларын сонунҹусу ҝөјә галхандан сонра Аллаһын хидмәтчиләри јенә дә Она пак шәкилдә ибадәт едәҹәкләр. Бу, Рәһбәримиз Иса Мәсиһин сајәсиндә олаҹаг. Дүздүр, һәмин вахт милләтләр бирлији олан Мәҹуҹ өлкәсиндән Јәҹуҹ Аллаһын халгына һүҹум едәҹәк (Һизг. 38:18—20). Амма бу гыса вә уғурсуз һүҹум олаҹаг. О, бөјүк издиһама Аллаһа ибадәт етмәјә мане ола билмәјәҹәк. Јеһова халгыны хилас едәҹәк! Һәвари Јәһја ҝөрүнтүдә Мәсиһин давамчыларындан ибарәт «бөјүк бир издиһам» ҝөрмүшдү вә она дејилмишди ки, бу издиһам «бөјүк мүсибәтдән чыханлардыр» (Вәһј 7:9, 14). Бәли, Јеһова халгыны горујаҹаг!

15, 16. Вәһј 17:14 ајәсинә әсасән Армаҝеддон мүһарибәси заманы Мәсиһин мәсһ олунмуш гардашлары нә едәҹәк вә нәјә ҝөрә буну билмәк бизи руһландырыр?

¹⁵ Амма јенә дә кимсә дүшүнә биләр: «Бәс мәсһ олунмушлар неҹә? Онлар ҝөјә галхандан сонра нә едәҹәкләр?» Мүгәддәс Китаб бу суала конкрет ҹаваб верир. Орада дејилир ки, бу дүнјанын сијаси гүввәләри «Гузу илә вурушаҹаглар». Амма  тәбии ки, галиб ҝәлә билмәјәҹәкләр. Мүгәддәс Китабдан охујуруг: «Гузу... онлары мәғлуб едәҹәк». Бәс Гузуја кимсә көмәк едәҹәк? Бәли. Ајәдә дејилир ки, «чағырылмышлар, сечилмишләр вә садигләр» онун јанында олаҹаглар. (Вәһј 17:14 ајәсини охујун.) Онлар кимләрдир? Дирилмиш мәсһ олунмуш мәсиһиләр. Демәли, бөјүк мүсибәтин сонуна јахын онлардан ахырынҹысы да ҝөјә галханда алаҹаглары илк тапшырыг дөјүшмәк олаҹаг. Бу неҹә дә фәргли тапшырыгдыр! Бәзи мәсһ олунмуш мәсиһиләр Јеһованын Шаһиди олмаздан әввәл дөјүшкән олуб, һәтта еләләри дә вар ки, ордуда хидмәт едиб. Амма сонрадан онлар әсл мәсиһи олдулар вә башгалары илә сүлһ ичиндә јашамағы өјрәндиләр (Гал. 5:22; 2 Салон. 3:16). Һәмчинин мүһарибәләри дәстәкләмәјә сон гојдулар. Бунунла белә, мәсһ олунмуш мәсиһиләр ҝөјә галхандан сонра Мәсиһлә вә онун мүгәддәс мәләкләри илә бирликдә Аллаһын дүшмәнләринә гаршы сонунҹу мүһарибәдә дөјүшәҹәкләр.

¹⁶ Бир дүшүнүн: Јер үзүндә јашајан мәсһ олунмушларын бәзиләри чох јашлыдыр, тагәтдән дүшүб. Амма ҝөјдә јашамаг үчүн дириләндә онлар гүдрәтли, өлмәз руһани варлыглар олаҹаглар, Ҹәнҝавәр Падшаһ Иса Мәсиһлә бирликдә вурушаҹаглар. Армаҝеддон мүһарибәси битәндән сонра исә Иса илә чијин-чијинә хидмәт едиб инсанлара камилләшмәјә көмәк едәҹәкләр. Онлар ҝөјдә оланда дәјәрли баҹы-гардашларына јер үзүндә олдуглары вахтдан гат-гат даһа чох көмәк едә биләҹәкләр.

17. Аллаһын Армаҝеддон мүһарибәси заманы хидмәтчиләрини горујаҹағыны һарадан билирик?

¹⁷ Сиз јер үзүндә јашамаға үмид едирсиниз? Еләдирсә, һәлледиҹи Армаҝеддон мүһарибәси башлајанда сизә нә етмәк лазым ҝәләҹәк? Чох садә бир шеј — Јеһоваја ҝүвәниб Онун дедикләрини етмәк. Мәсәлән, бу нә ола биләр? Мүгәддәс Китабда бизә гәлб раһатлығы верән нөвбәти сөзләр јазылыб: «Ичәри отагларыныза ҝирин, арханызҹа гапылары бағлајын. Гәзәб кечәнәҹән, гыса мүддәтә ҝизләнин» (Әшј. 26:20). Һәмин вахт Јеһова һәм ҝөјдәки, һәм дә јер үзүндәки садиг хидмәтчиләрини горујаҹаг. Һәвари Булус кими биз дә әминик ки, «нә һакимијјәтләр, нә индики шејләр, нә ҝәләҹәк шејләр» бизи «Аллаһын мәһәббәтиндән ајыра билмәз» (Ром. 8:38, 39). Бу фикри гулағыныза сырға един: Јеһова сизи севир вә О сизи һеч вахт атмаз!