1. Јеһованын бәзи садиг хидмәтчиләриндә һансы һиссләр ола биләр?

 ЈЕҺОВАНЫН Өз халгындан разы олдуғуну билмәк неҹә дә хошдур. Мүгәддәс Китабда дејилир: «Јеһова халгындан зөвг алыр» (Зәб. 149:4). Бунунла белә, һәрдән бәзиләриндә бу ҹүр нараһатлыг олур: «Ҝөрәсән, Јеһова шәхсән мәндән разыдыр?» Мүгәддәс Китабда ады чәкилән бир чох мөмин инсанда да бәзән бу ҹүр нараһатлыглар баш галдырырды (1 Ишм. 1:6—10; Әјј. 29:2, 4; Зәб. 51:11).

2. Кимләр Јеһованын разылығыны газана биләр?

² Аллаһын Кәламында ајдын шәкилдә ҝөстәрилир ки, гејри-камил инсанлар Онун разылығыны газана биләр. Бунун үчүн Иса Мәсиһә иман етмәк вә вәфтиз олунмаг лазымдыр (Јәһ. 3:16). Беләҹә, һамы ҝөрәҹәк ки, биз ҝүнаһларымыздан төвбә етмишик вә Јеһоваја Онун ирадәсини јеринә јетирәҹәјимизә даир сөз вермишик (Һәв. 2:38; 3:19). Јеһова илә дост олмаг үчүн бу аддымлары атанда Онун гәлбини севиндиририк. Һәср олунма әһдимизә ујғун јашамаг үчүн әлимиздән ҝәләни едәндә Јеһова биздән разы галыр вә бизи Өзүнә јахын дост һесаб едир (Зәб. 25:14).

3. Һансы үч суалы мүзакирә едәҹәјик?

³ Бәс нәјә ҝөрә һәрдән бәзиләри дүшүнүр ки, Аллаһ онлардан наразыдыр? Јеһова биздән разы галдығыны неҹә ҝөстәрир? Һәр бир мәсиһи Јеһованын ондан разы галдығына неҹә әмин ола биләр? Ҝәлин бахаг.

НӘЈӘ ҜӨРӘ БӘЗИЛӘРИ ЈЕҺОВАНЫН ОНЛАРДАН НАРАЗЫ ОЛДУҒУНУ ДҮШҮНҮР?

4, 5. Өзүмүзү дәјәрсиз һисс етсәк дә, нәјә әмин ола биләрик?

⁴ Бир чохларымыз ушаглыгдан дәјәрсизлик һисси илә бөјүмүшүк (Зәб. 88:15). Адриан адлы гардаш дејир: «Һәмишә өзүмү  дәјәрсиз һисс етмишәм. Јадымдадыр, ушаг вахты һәмишә дуа едирдим ки, аиләм Ҹәннәтә кечсин. Амма өзүмү орада олмаға лајиг ҝөрмүрдүм». Јеһованын Шаһиди олмајан бир аиләдә бөјүјән Тони исә дејир: «Валидејнләрим һеч вахт мәни севдикләрини, мәнимлә фәхр етдикләрини демәзди. Дүшүнүрдүм ки, нә етсәм дә, хејри јохдур, онлары разы сала билмәрәм».

⁵ Әҝәр биз дә һәрдән дәјәрсизлик һисси илә мүбаризә апарырыгса, онда Јеһованын бизи Өзүнә неҹә ҹәлб етдији барәдә дүшүнә биләрик (Јәһ. 6:44). О бизим өзүмүздә ҝөрмәдијимиз јахшы ҹәһәтләримизи ҝөрүр, үрәјимиздәкиләри билир (1 Ишм. 16:7; 2 Салн. 6:30). Она ҝөрә дә Јеһованын «сиз дәјәрлисиниз» сөзүнә инанмалыјыг (1 Јәһ. 3:19, 20).

6. Һәвари Булус кечмишдә етдији ҝүнаһлара ҝөрә һансы һиссләри кечирирди?

⁶ Бәзиләримиз һәгигәти өјрәнмәздән әввәл етдијимиз сәһвләрә ҝөрә һәлә дә өзүмүзү ҝүнаһкар һисс едирик (1 Бут. 4:3). Һәтта Јеһоваја сәдагәтлә хидмәт едән мәсиһиләрин арасында да зәифликләри илә мүбаризә апаранлар вар. Бәс сизин дә үрәјиниз нәјәсә ҝөрә сизи гынајыр? Әҝәр еләдирсә, билин ки, Јеһованын диҝәр садиг бәндәләри дә охшар һиссләр кечириб. Мәсәлән, һәвари Булус зәифликләри барәдә дүшүнәндә өзүнү гынајырды (Ром. 7:24). Тәбии ки, о, ҝүнаһларындан төвбә етмишди вә вәфтиз олунмушду. Бунунла белә, јенә дә өзүнү «һәвариләрин ән кичији» вә «ҝүнаһ саһибләриндән ән бетәри» адландырмышды (1 Кор. 15:9; 1 Тим. 1:15).

7. Кечмишдә етдијимиз ҝүнаһларла бағлы нәји јадда сахламалыјыг?

⁷ Сәмави Атамыз сөз вериб ки, төвбә етсәк, бизи бағышлајаҹаг (Зәб. 86:5). Она ҝөрә дә етдијимиз ҝүнаһлара ҝөрә һәгигәтән дә пешман олсаг, Јеһованын вердији бу сөзү тутаҹағына әмин ола биләрик. О бизи бағышлајаҹаг (Кол. 2:13).

8, 9. «Јеһованы һеч вахт там разы сала билмәрик» дүшүнҹәсинә неҹә үстүн ҝәлә биләрик?

⁸ Һәр биримиз Јеһоваја баҹардығымыз гәдәр чох хидмәт етмәк истәјирик. Бунунла белә, бәзиләримиз дүшүнә биләрик ки, һеч вахт Јеһованы разы салаҹаг гәдәр хидмәт едә билмәрик. Аманда адлы бир баҹы дејир: «Әввәлләр дүшүнүрдүм ки, Јеһова үчүн әлиндән ҝәләни етмәк истәјирсәнсә, даима даһа артығыны етмәлисән. Өзүмдән чох шеј ҝөзләјирдим. Ҝүҹүмдән артығыны еләмәјә чалышырдым. Баҹармајанда исә дүшүнүрдүм ки, мәним кими Јеһова да мәндән наразыдыр».

⁹ «Јеһованы һеч вахт там разы сала билмәрик» дүшүнҹәсинә неҹә үстүн ҝәлә биләрик? Унутмајын ки, Јеһова сәрт вә тәләбкар Аллаһ дејил. О, һеч вахт биздән ҝүҹүмүздән артығыны тәләб етмир. О, әлимиздән ҝәләни етмәјимизи гијмәтләндирир. Һәмчинин Мүгәддәс Китабдан Јеһоваја бүтүн гәлби илә хидмәт едән кәсләрин нүмунәсини арашдырын. Мәсәлән, Булусу јадыныза салын. О, узун илләр боју хидмәтә ҹан јандырмышды. Минләрлә километр мәсафә гәт етмиш вә јығынҹаглар тәсис етмишди. Бәс вәзијјәти дәјишдијинә ҝөрә даһа чох хидмәт едә билмәјәндә Булус Аллаһын разылығыны итирди? Тәбии ки, јох. О, әлиндән ҝәләни етмәјә давам етди, Јеһова да она бол немәт верди (Һәв. 28:30, 31). Ејнилә, бизим дә Јеһованын јолунда етдикләримиз заман-заман дәјишә биләр. Амма ән ваҹиби Она һансы нијјәтлә хидмәт етмәјимиздир. Ҝәлин ҝөрәк Јеһова биздән разы галдығыны һансы јолларла ҝөстәрир.

 ЈЕҺОВА БИЗДӘН РАЗЫ ГАЛДЫҒЫНЫ НЕҸӘ ҜӨСТӘРИР?

10. Јеһованын биздән разы галдығыны неҹә «ешидә» биләрик? (Јәһја 16:27).

¹⁰ Мүгәддәс Китаб васитәсилә. Халгына онлары севдијини, онлардан мәмнун галдығыны билдирмәк Јеһоваја хошдур. Мүгәддәс Китабдан ҝөрүрүк ки, Јеһова ики дәфә Исаны «севимли Оғлум» адландырмышды вә ондан разы галдығыны демишди (Мәт. 3:17; 17:5). Јеһованын сиздән дә разы галдығыны ешитмәк истәјәрдиниз? О бизимлә бирбаша данышмаса да, Өз Кәламы васитәсилә һиссләрини билдирир. Исанын мүждәләрдә јазылмыш сөзләрини охујанда, санки Јеһованын бизә дедији сөзләри «ешидирик». (Јәһја 16:27 ајәсини охујун.) Иса Атасынын хүсусијјәтләрини мүкәммәл шәкилдә әкс етдирирди. Буна ҝөрә дә онун гејри-камил, лакин сәдагәтли давамчыларына дедији разылыг сөзләрини охујаркән тәсәввүр едә биләрик ки, Јеһова бу сөзләри бизә дејир (Јәһ. 15:9, 15).

11. Нәјә әсасән дејә биләрик ки, үзләшдијимиз чәтинликләр Јеһованын биздән наразы галдығыны ҝөстәрмир? (Јагуб 1:12).

¹¹ Әмәлләри илә. Јеһова бизә көмәк етмәјә һәмишә һазырдыр. Мәсәлән, О бизим мадди тәләбатларымызын гајғысына галыр. Јеһова һәрдән чәтинликләрлә үзләшмәјимизә јол верә биләр. Неҹә ки, бу, садиг бәндәси Әјјубла да баш вермишди (Әјј. 1:8—11). Чәтинликләрлә үзләшмәјимиз о демәк дејил ки, биз Јеһованын разылығыны итирмишик. Әксинә, бу бизә Јеһованы дәрин мәһәббәтлә севдијимизи, Она етибар етдијимизи сүбут етмәк үчүн имкан јарадыр. (Јагуб 1:12 ајәсини охујун.) Јеһова бизә дөзмәјә көмәк етдикҹә, биз Онун гајғысыны, дәстәјини дујуруг.

12. Дмитринин һадисәсиндән нә өјрәнирик?

¹² Асијада јашајан Дмитри адлы гардашын һадисәсинә бахаг. О, ишини итирмишди вә ајлардыр иш тапа билмирди. Буна ҝөрә дә гардаш хидмәтини ҝенишләндирмәк гәрарына ҝәлир. Бунунла да Јеһоваја етибар етдијини ҝөстәрир. Ајлар кечир, Дмитри һәлә дә иш тапа билмир. Сонра онун сәһһәтиндә ҹидди проблемләр јараныр. Вәзијјәт о һәддә ҝәлир ки, Дмитри јатагдан галха билмир. О, јахшы әр, јахшы ата ола билмәдијини вә Јеһованын разылығыны итирдијини дүшүнмәјә башлајыр. Бир ахшам гызы Әшија 30:15 ајәсиндә јазылан бу сөзләри вәрәгдә чап едир: «Сакитлик вә етибар сизин ҝүҹүнүз  [олаҹаг]». Сонра вәрәги Дмитринин чарпајысынын јанына гојуб дејир: «Ата, өзүнү пис һисс едәндә бу ајәни јадына сал». Дмитри баша дүшүр ки, Јеһова онун аиләсинин зәрури еһтијаҹларыны өдәјир, јәни онларын јемәји, ҝејими, галмаға јерләри вар. О дејир: «Мәнә садәҹә сакитлијими горумаг вә Јеһоваја етибар етмәк галыр». Әҝәр сиз дә охшар вәзијјәтдәсинизсә, әмин олун, Јеһова сизин гајғыныза галыр вә сизә дөзә билмәјиниз үчүн көмәк едәҹәк.

13. Јеһова кимләрин васитәсилә биздән разы олдуғуну ҝөстәрир вә неҹә?

¹³ Диндашларымыз васитәсилә. Јеһова баҹы-гардашларымыз васитәсилә биздән разы галдығыны ҝөстәрир. Мәсәлән, О, кимләрисә тәшвиг едә биләр ки, еһтијаҹ дујдуғумуз анда бизи үрәкләндирсинләр. Асијада јашајан бир баҹы ҝүҹлү стрес кечирдији вахт бунун шаһиди олмушду. О, ишини итирмишди вә ҹидди хәстәлијә тутулмушду. Даһа сонра исә әри ҝүнаһ етмишди вә ағсаггал тәјинаты дајандырылмышды. Баҹы дејир: «Нә баш вердијини баша дүшә билмирдим. Фикирләширдим, јәгин нәсә сәһв етмишәм вә Јеһова мәндән наразыдыр». О јалварараг Јеһоваја дејир ки, һәлә дә ондан разыдырса, буну ҝөстәрсин. Бәс Јеһова бу дуаја неҹә ҹаваб верир? Баҹы дејир: «Јығынҹагдакы ағсаггаллар мәнимлә сөһбәт етдиләр вә мәни әмин етдиләр ки, Јеһова һәлә дә мәни севир». Бир мүддәт сонра о јенә бу барәдә Јеһоваја дуа едир. Баҹы сөзүнә әлавә едир: «Елә һәмин ҝүн јығынҹагдакы бир нечә баҹы-гардашдан бир мәктуб алдым. Онларын јаздығы тәсәлли сөзләри Јеһованын дуама вердији ҹаваб иди». Бәли, Јеһова биздән разы галдығыны башгаларынын руһландырыҹы сөзләри васитәсилә тез-тез ҝөстәрир (Зәб. 10:17).

14. Јеһова башга һансы јолла биздән разы галдығыны билдирир?

 ¹⁴ Јеһова биздән разы галдығыны, һәмчинин диндашларымыз васитәсилә бизә мәсләһәт вермәклә дә ҝөстәрир. Мәсәлән, биринҹи әсрдә һәвари Булусун Јеһованын илһамы илә диндашларына јаздығы 14 мәктуб буна сүбутдур. Бу мәктубларда һәвари Булус диндашларына мәһәббәтдән ирәли ҝәлән, амма ејни заманда конкрет мәсләһәт вермишди. Бәс Јеһова нәјә ҝөрә Булусу белә бир мәсләһәт вермәјә илһамландырмышды? Чүнки Јеһова јахшы Атадыр вә өвладларыны севдији үчүн онлары тәрбијә едир (Мәс. 3:11, 12). Она ҝөрә дә кимсә бизә Мүгәддәс Китаба әсасланан мәсләһәт верәндә бу, Јеһованын биздән наразы олдуғуну ҝөстәрмир. Әксинә, бу о демәкдир ки, Јеһова һәлә дә бизи севир (Ибр. 12:6). Јеһованын разылығыны газандығымыз башга нәләрдән ҝөрүнүр?

ЈЕҺОВАНЫН РАЗЫЛЫҒЫНЫ ГАЗАНДЫҒЫМЫЗЫ ҜӨСТӘРӘН ДИҜӘР СҮБУТЛАР

15. Јеһова кимләрә мүгәддәс руһ верир вә бу бизә һансы әминлији верир?

¹⁵ Јеһова разы галдығы кәсләрә мүгәддәс руһ верир (Мәт. 12:18). Бу суалын үзәриндә дүшүнүн: «Руһун бәһрәсинә аид олан һансыса хүсусијјәтләри тәзаһүр етдирирәм?» Сизҹә, Јеһованы танымаздан әввәл даһа сәбирли идиниз, јохса инди? Руһун бәһрәсинә аид олан хүсусијјәтләри өзүнүздә нә гәдәр чох инкишаф етдирсәниз, Јеһованын сиздән разы галдығына бир о гәдәр чох әмин олаҹагсыныз. (« Руһун бәһрәси» адлы чәрчивәјә бахын.)

16. Јеһова хош хәбәри тәблиғ етмәји кимләрә һәвалә едиб вә бу, сиздә һансы һиссләри ојадыр? (1 Салоникилиләрә 2:4).

¹⁶ Јеһова разы галдығы кәсләрә хош хәбәри тәблиғ етмәк ишини һәвалә едиб. (1 Салоникилиләрә 2:4 ајәсини охујун.) Ҝөрүн Ҹозелин адлы бир баҹы тәблиғ етмәјин һансы фајдасыны ҝөрүб. Бир ҝүн Ҹозелин јухудан чох кефсиз ојаныр. О дејир: «Тагәтим јох иди. Өзүмү јарарсыз һисс едирдим. Амма өнҹүл олдуғума ҝөрә һәмин ҝүн хидмәтә ҝетмәли идим. Беләҹә, дуа едиб евдән чыхдым». Һәмин сәһәр Ҹозелин Мери адлы меһрибан бир гадынла сөһбәт едир. Гадын Мүгәддәс Китабы өјрәнмәјә разылашыр. Бир нечә ај сонра Мери билдирир ки, Ҹозелин онун гапысыны дөјән ҝүн о, Аллаһа дуа едиб көмәк истәјирмиш. Ҹозелин бу һадисәдән  нә өјрәнди? О дејир: «Санки Јеһова мәнимлә данышыб дејирди: “Сәндән разыјам”». Әлбәттә бу о демәк дејил ки, тәблиғ едәндә һамы бизә гулаг асаҹаг. Лакин әмин ола биләрик ки, хош хәбәри инсанларла бөлүшмәк үчүн әлимиздән ҝәләни едириксә, Јеһова биздән разы галыр.

17. Викинин фидјә барәдә дедикләриндән нә өјрәнирсиниз? (Зәбур 5:12).

¹⁷ Јеһова фидјә гурбанлығы әсасында разы галдығы кәсләрин ҝүнаһларыны бағышлајыр (1 Тим. 2:5, 6). Ола билсин, фидјәјә инанырсыныз вә вәфтиз олунмусунуз, амма јенә дә үрәјиниздә Јеһованын сиздән разы галдығына шүбһә едирсиниз. Унутмајын ки, өз һиссләримизә һәмишә етибар едә билмәсәк дә, Јеһоваја һәмишә етибар едә биләрик. Јеһова фидјәјә иман едән кәсләри салеһ сајыр вә онлары мүбарәк гылаҹағына сөз верир (Зәбур 5:12 ајәсини охујун; Ром. 3:26). Фидјә барәдә дүшүнмәк Вики баҹыја да көмәк етмишди. Бир ҝүн фидјә һагда дәрин дүшүнәндән сонра о бу гәнаәтә ҝәлир: «Јеһова ҝөр нечә илләрдир ки, мәнә сәбир едиб... Мән исә Она санки белә демишәм: “Сәнин мәһәббәтин мәни ағушуна алмаға гадир дејил. Сәнин Оғлунун гурбанлығы мәним ҝүнаһларымы өртә билмәз”». Вики баҹы фидјә әнамы барәдә дүшүндүкҹә Јеһованын мәһәббәтини дујду. Биз дә фидјә һагда дүшүнсәк, Јеһованын мәһәббәтини дујаҹағыг вә Онун биздән разы галдығына әмин олаҹағыг.

18. Сәмави Атамызы даима севсәк, нәјә әмин ола биләрик?

¹⁸ Ола билсин, јухарыда садаланан мәсләһәтләрә әмәл етмәк сизә чәтин ҝәлсин. Заман-заман руһдан дүшә, Јеһованын сиздән разы галмадығыны дүшүнә биләрсиниз. Бу вахт јадда сахлајын ки, Јеһова Ону севән кәсләрдән разыдыр (Јаг. 1:12). Одур ки, Јеһоваја јахынлашмаға давам един вә Онун сиздән разы галдығыны ҝөстәрән бүтүн јоллары ҝөрмәјә чалышын. Еләҹә дә бир шеји һеч вахт унутмајын: Јеһова «һеч биримиздән узаг дејил» (Һәв. 17:27).