1, 2. Вәфтиздән сонра инсан һансы немәтләри алыр?

 ВӘФТИЗ олунуб Јеһованын аиләсинин бир үзвү олмаг инсана бөјүк севинҹ бәхш едир. Јеһовајла бу ҹүр јахын мүнасибәтләр гурмаг бизим үчүн шәрәфдир. Мәзмурчу Давудун бу сөзләринә биз дә шәрикик: «[Јеһова,] һәјәтиндә јашамаг үчүн сечдијин, Өзүнә јахынлашдырдығын инсан нә хошбәхтдир» (Зәб. 65:4).

² Јеһова һеч дә һамыны һәјәтиндә јашамаг үчүн сечмир. Әввәлки мәгаләдә дә арашдырдығымыз кими, Јеһова Она јахынлашмаг истәјән инсанлары Өзүнә ҹәлб едир (Јаг. 4:8). Өзүнүзү Јеһоваја һәср едиб вәфтиз олунанда Она хүсуси шәкилдә јахынлашмыш олурсунуз. Әмин ола биләрсиниз ки, вәфтиздән сонра Јеһова башыныздан бол немәт төкәҹәк (Мәл. 3:10; Әрм. 17:7, 8).

3. Өзүнү Јеһоваја һәср едиб, вәфтиз олунан кәсләр һансы ҹидди мәсулијјәти дашыјыр? (Ваиз 5:4, 5).

³ Әлбәттә, вәфтиз садәҹә башланғыҹдыр. Вәфтиздән сонра да сизи ҝүнаһа тәһрик едән шејләрлә, јахуд иман сынағы илә үзләшсәниз, әлиниздән ҝәләни едиб һәсролунма әһдинизә ујғун јашамаға чалышаҹагсыныз. (Ваиз 5:4, 5 ајәләрини охујун.) Һәмчинин Иса Мәсиһин шаҝирди кими, онун изи илә ҝедәҹәк вә әмрләринә бағлы галаҹагсыныз (Мәт. 28:19, 20; 1 Бут. 2:21). Мәгалә бу саһәдә сизә көмәк едәҹәк.

ҜҮНАҺА МЕЈИЛ ЈАРАНАНДА ВӘ СЫНАГЛА ҮЗЛӘШӘНДӘ ДӘ ИСАНЫН АРДЫНҸА ҜЕДИН

4. Исанын шаҝирдләри һансы мәнада ишҝәнҹә дирәјини дашыјыр? (Лука 9:23).

⁴ Дүшүнмәјин ки, вәфтиздән сонра һәјатыныз проблемсиз өтүшәҹәк. Ахы Иса ајдын шәкилдә демишди ки, шаҝирдләри  «ишҝәнҹә дирәјини» дашымалы олаҹаг, онлар һәтта буну «ҝүнбәҝүн» едәҹәкләр. (Лука 9:23 ајәсини охујун.) Бәс Иса давамчыларынын һәмишә әзијјәт чәкәҹәјини нәзәрдә тутурду? Хејр. Онун сөзүнүн ҹаны о иди ки, давамчылары чохлу немәтләр алмагла јанашы, чәтинликләрлә дә үзләшәҹәкләр. Һәтта бу чәтинликләрин бәзиләри даһа шиддәтли ола биләр (2 Тим. 3:12).

5. Иса Мәсиһин вәдинә әсасән гурбан верәнләр һансы немәтләри алаҹаг?

⁵ Ола билсин, сиз артыг аилә үзвләринизин тәгиби илә үзләшмисиниз, јахуд Јеһованын ишини биринҹи јерә гојмаг үчүн мүәјјән мадди гурбанлар вермисиниз (Мәт. 6:33). Әмин олун ки, имандан ирәли ҝәләрәк етдикләриниз Јеһованын нәзәриндән јајынмыр (Ибр. 6:10). Чох јәгин ки, Исанын нөвбәти сөзләринин доғрулуғуна өз тәҹрүбәниздә әмин олмусунуз: «Мәним јолумда вә мүждә уғрунда евини, баҹы-гардашыны, анасыны, атасыны, ушагларыны, јахуд тарлаларыны гојуб ҝәлән мүтләг бу дөврдә тәгибләрлә јанашы јүзгат артыг ев, гардаш, баҹы, ана, ушаг вә тарла, ҝәләҹәкдә исә әбәди һәјат алаҹаг» (Марк 10:29, 30). Бәли, алдығыныз немәтләр вердијиниз истәнилән гурбандан гат-гат дәјәрлидир (Зәб. 37:4).

6. Нәјә ҝөрә вәфтиздән сонра да ҹисмани истәкләрлә мүбаризә апармалы олаҹагсыныз?

⁶ Вәфтиздән сонра да ҹисмани истәкләрлә мүбаризә апармалы олаҹагсыныз (1 Јәһ. 2:16). Чүнки биз улу валидејнимиз Адәмдән ҝүнаһы мирас алмышыг. Һәрдән сиздә дә һәвари Булусун кечирдији һиссләр баш галдыра биләр. О јазмышды: «Дахили варлығымла Аллаһын ганунундан һәзз алырам. Амма ҹисмимдә ағлымын гануну илә дөјүшән башга бир ганун ҝөрүрәм. О, мәни ҹисмимдә јашајан ҝүнаһ ганунунун әсири едир» (Ром. 7:22, 23). Ола билсин, ҝүнаһа мејлинизлә мүбаризә апармалы олдуғунуз үчүн руһдан дүшәсиниз. Лакин өзүнүзү Јеһоваја һәср едәркән вердијиниз вәди хатырламаг, сизә бу мүбаризәни давам етдирмәјә ҝүҹ верәҹәк. Бәли, һәсролунма әһдиниз ҝүнаһа апаран вәзијјәтләрлә үзләшәндә дүзҝүн давранмағыныза көмәк едәҹәк. Ҝәлин ҝөрәк неҹә.

7. Һәјатынызы Јеһоваја һәср етмәјиниз Она садиг галмагда сизә неҹә көмәк едир?

⁷ Јеһоваја һәср олунанда сиз өзүнүзү инкар етмиш олурсунуз. Бу о демәкдир ки, сиз Јеһованы наразы салаҹаг арзу вә истәкләринизә јох дејирсиниз (Мәт. 16:24). Јәни һансыса бир сынагла үзләшәндә, «нә едим?», «неҹә едим?» дејиб, баш сындырмалы олмајаҹагсыныз. Чүнки сиз гәрарынызы бәри башдан вермисиниз — Јеһоваја садиг галмағы сечмисиниз. Буна ҝөрә дә, Ону разы салмаға гәтијјәтли олаҹагсыныз. Бунунла да бир нөв Әјјуб пејғәмбәр кими давранаҹагсыныз. О, чох ҝүҹлү сынагларла үзләшсә дә, гәтијјәтлә демишди: «Мән сон нәфәсимәдәк садиг галаҹағам!» (Әјј. 27:5).

8. Һәсролунма вәдиниз барәдә дүшүнмәк ҹисмани истәкләрә гаршы дурмаға неҹә көмәк едир?

⁸ Һәсролунма вәдиниз үзәриндә дүшүнәндә нәфсинизи сынајан вәзијјәтләрә гаршы дурмаг әзминиз мөһкәмләнәҹәк. Мәсәлән, киминсә һәјат јолдашы илә флирт едәрдиниз? Әлбәттә, јох! Чүнки сиз артыг Јеһоваја сөз вермисиниз ки, һеч вахт белә шејләрә јол вермәјәҹәксиниз. Әҝәр бәри башдан үрәјиниздә бу ҹүр һиссләрин көк атмасына јол вермәсәниз, сонра онлары чыхарыб атмаг лазым ҝәлмәјәҹәк. Јолунузу дәјишиб, «шәр адамларын јолуна ајаг» басмајаҹагсыныз (Мәс. 4:14, 15).

9. Һәсролунма вәдиниз барәдә дүшүнмәк руһани ишләри биринҹи јерә гојмаға неҹә көмәк едир?

 ⁹ Јығынҹагда мүнтәзәм иштиракыныза мане олаҹаг бир иш тәклифи алсаныз, нә едәҹәксиниз? Верәҹәјиниз гәрар артыг бәллидир. Чүнки сиз белә бир тәклиф алмаздан габаг артыг гәрар вермисиниз ки, јығынҹаға ҝетмәјинизә мане олаҹаг иш тәклифләринә «јох» дејәсиниз. Беләҹә, белә бир иш тәклифини гәбул едиб, сонра да Јеһованы һәр шејдән үстүн тутмаг үчүн әлләшиб-вурушмајаҹагсыныз. Иса Мәсиһин нүмунәси үзәриндә дүшүнмәк бизә бу саһәдә көмәк едә биләр. О, Атасыны разы салмаға гәтијјәтли иди. Иса Мәсиһ кими сиз дә һәјатынызы һәср етдијиниз Аллаһы наразы салаҹаг истәнилән тәклифи ҹәлд вә гәти шәкилдә рәдд един (Мәт. 4:10; Јәһ. 8:29).

10. Јеһова вәфтиздән сонра да Исанын ардынҹа ҝетмәјинизә неҹә көмәк едәҹәк?

¹⁰ Әслиндә, үзләшдијимиз чәтинликләр, сынаглар даима Исанын ардынҹа ҝетмәјә гәтијјәтли олдуғумузу сүбут етмәк үчүн имкан јарадыр. Әмин ола биләрсиниз ки, Јеһова бу јолда сизә көмәк едәҹәк. Мүгәддәс Китабда дејилир: «Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара мәруз галасыныз. Сынаг вахты дөзә биләсиниз дејә, сизә чыхыш јолу да ҝөстәрәҹәк» (1 Кор. 10:13).

ДАИМА ИСАНЫН АРДЫНҸА ҜЕТМӘК ҮЧҮН НӘ ЕДӘ БИЛӘРИК?

11. Исанын ардынҹа ҝетмәјин ән јахшы јолларындан бири һансыдыр? (Һәмчинин шәклә бахын.)

¹¹ Иса Јеһоваја бүтүн гәлби илә хидмәт едирди вә дуа едәрәк Јеһова илә мүнасибәтләрини горујурду (Лука 6:12). Бәс вәфтиздән сонра да Исанын ардынҹа ҝетмәк үчүн нә етмәлијик? Бунун бир јолу бизи Јеһоваја јахынлашдыраҹаг ишләр ҝөрмәјә давам етмәкдир. Мүгәддәс Китабда  дејилир: «Һансы сәвијјәјә чатмышыгса чатаг, ҝәлин бундан сонра да ејни ҹүр ирәлиләјәк» (Филип. 3:16). Заман-заман Јеһованын јолунда чох иш ҝөрмәјә гәтијјәтли олан баҹы-гардашларын һәјат һекајәләрини ешидәҹәксиниз. Ола билсин, онлар Падшаһлыг Мүждәчиләри Мәктәбиндә охујублар, јахуд тәблиғчиләрә тәләбат олан әразијә көчүбләр. Әҝәр белә бир мәгсәд гојмаға шәраитиниз јол верирсә, тәрәддүд етмәјин. Јеһованын халгы Она даһа чох хидмәт едә билмәк үчүн һәр бир фүрсәти дәјәрләндирир (Һәв. 16:9). Бәс әҝәр һал-һазырда вәзијјәтиниз буна јол вермирсә, онда неҹә? Дүшүнмәјин ки, сиз буну едәнләрдән дәјәрсизсиниз. Әсас ахыра кими дөзүм ҝөстәрмәкдир (Мәт. 10:22). Јеһова етдијиниз хидмәти чох дәјәрләндирир. Одур ки, өз баҹарығыныз вә шәраитиниз чәрчивәсиндә Јеһованын јолунда етдијиниз хидмәти һечә сајмајын. Бу, вәфтиздән сонра да Исанын ардынҹа ҝетмәјин ваҹиб үсулудур (Зәб. 26:1).

12, 13. Јеһоваја хидмәтдә шөвгүнүз азалыбса, нә едә биләрсиниз? (1 Коринфлиләрә 9:16, 17). (Һәмчинин « Јарышы тамамлајын» адлы чәрчивәјә бахын.)

¹² Ола билсин, дуаларынызын әввәлки кими үрәкдән ҝәлмәдијини вә ја тәблиғдән даһа севинҹ дујмадығынызы дүшүнүрсүнүз. Јахуд Мүгәддәс Китабы әввәлки һәвәслә охумурсунуз. Вәфтиздән сонра бу ҹүр һиссләр кечирирсинизсә, дүшүнмәјин ки, Јеһова мүгәддәс руһуну сиздән ҝөтүрүб. Гејри-камил инсанын һәрдән бу ҹүр һиссләрә гапылмасы нормалдыр. Ҝөрсәниз ки, шөвгүнүз јаваш-јаваш азалыр, һәвари Булусун нүмунәси үзәриндә дүшүнүн. Дүздүр, о, Исадан өрнәк ҝөтүрмәјә чалышырды. Амма баша дүшүрдү ки, һәрдән ејни шөвглә хидмәт едә билмәјәҹәк. (1 Коринфлиләрә 9:16, 17  ајәләрини охујун.) Булус демишди: «Көнүлсүз етсәм дә, мәнә һәвалә едилмиш нөкәрбашы вәзифәсини јеринә јетирирәм». Башга сөзлә, Булус һәмин ан һансы һиссләр кечирмәсинә бахмајараг, хидмәтини јеринә јетирмәјә гәтијјәтли иди.

¹³ Ејнилә, сиз дә тәкҹә һиссләриниз әсасында гәрар вермәјин. Кечирдијиниз һиссләрә бахмајараг, дүзҝүн оланы етмәјә гәтијјәтли олун. Мүәјјән вахтдан сонра һәрәкәтләриниз һиссләринизә тәсир едәҹәк. О вахта гәдәр исә, руһани ишләрдә мүнтәзәмлији горумаг сизә Исанын ардынҹа ҝетмәјә көмәк едәҹәк вә баҹы-гардашлар әзминизи ҝөрүб һәрәкәтә тәшвиг олунаҹаглар (1 Салон. 5:11).

«ЈОХЛАЈЫН, ӨЗҮНҮЗҮ СЫНАЈЫН»

14. Нәји мүнтәзәм олараг јохламалысыныз вә нәјә ҝөрә? (2 Коринфлиләрә 13:5).

¹⁴ Јахшы олар ки, вәфтиздән сонра да өзүнүзү мүнтәзәм јохлајасыныз. (2 Коринфлиләрә 13:5 ајәсини охујун.) Ара-сыра һәјатынызы вә мүәјјән вәрдишләринизи нәзәрдән кечирин. Ҝөрүн, һәр ҝүн дуа едирсиниз? Мүгәддәс Китабы охујуб арашдырырсыныз? Јығынҹаг ҝөрүшләриндә, хидмәтдә иштирак едирсиниз? Ибадәтинизин бу саһәләриндән даһа чох зөвг дујмаг, даһа чох фајда әлдә етмәк үчүн јоллар ахтарын. Мәсәлән, бу суалларын үзәриндә дүшүнүн: «Мүгәддәс Китабын әсас тәлимләрини башгаларына изаһ едә билирәм? Хидмәтдән даһа чох зөвг алмаг үчүн нә едә биләрәм? Дуаларым нә дәрәҹәдә конкретдир? Дуаларымдан Јеһоваја там етибар етдијим ҝөрсәнир? Јығынҹагларда мүнтәзәм иштирак едирәм? Диггәтими јығынҹаға ҹәмләмәк вә даһа јахшы иштирак етмәк үчүн нә едә биләрәм?»

15, 16. Јанлыш истәкләрә гаршы дуран бир гардашын нүмунәсиндән нә өјрәндиниз?

¹⁵ Өзүнүзү дүрүстҹәсинә јохлајыб, зәифликләринизи мүәјјән един. Бунун нә демәк олдуғуну Роберт адлы гардашын башына ҝәлән бир һадисәдән ҝөрмәк олар. О дејир: «Тәхминән 20 јашларында јарымҝүнлүк ишдә ишләјирдим. Бир ҝүн ишдән сонра гадын иш јолдашларымдан бири мәни өз евинә дәвәт еләди. Деди ки, евдә тәк олаҹағыг вә “јахшы вахт кечирәҹәјик”. Әввәл-әввәл јүнҝүлвари үзрхаһлыг еләдим, амма ахырда она “јох” дедим вә сәбәбини изаһ еләдим». Робертә әһсән! О бу тәләјә дүшмәди. Амма сонра о бу вәзијјәтин үзәриндә дүшүнәндә ҝөрдү ки, мәсәләни даһа јахшы һәлл едә биләрди. Роберт етираф  едир: «Јусиф Фитфирин арвадынын тәклифини гәтијјәтлә вә дәрһал рәдд етмишди. Тәәссүф ки, мән белә едә билмәдим (Јар. 39:7—9). Билмәздим ки, “јох” демәк мәним үчүн бу гәдәр чәтин имиш. Бу вәзијјәт мәнә Јеһова илә мүнасибәтләрими мөһкәмләндирмәли олдуғуму ҝөстәрди».

¹⁶ Роберт кими өзүнүзү јохламаг сизә дә көмәк едә биләр. Ола билсин, ҝүнаһа мејилә раһат шәкилдә гаршы дура билирсиниз. Амма јахшы олар ки, өзүнүздән сорушасыныз: «Дәрһал “јох” дедим, јохса бир аз дүшүндүм?» Ҝөрсәниз ки, өз үзәриниздә ишләмәлисиниз, руһдан дүшмәјин. Әксинә, севинин ки, инди зәифлијинизи билирсиниз. Бу барәдә мүнтәзәм дуа един вә Јеһованын гајда-ганунларына ујғун јашамаг әзминизи мөһкәмләндирмәк үчүн лазыми аддымлар атын (Зәб. 139:23, 24).

17. Робертин башына ҝәләнләр Јеһованын адынын тәмизә чыхмасы илә неҹә әлагәли иди?

¹⁷ Робертин үзләшдији вәзијјәтдән даһа бир шеј өјрәнә биләрик. Роберт сөзүнә белә давам едир: «Иш јолдашымын тәклифини рәдд едәндән сонра о мәнә демишди: “Сән бу сынагдан кечдин!”. Бунун нә демәк олдуғуну сорушдум. Сән демә, онун достлуг етдији, вахтилә Јеһованын Шаһиди олмуш бир нәфәр она дејиб ки, Јеһованын Шаһиди олан ҝәнҹләр икили һәјат тәрзи сүрүр вә белә вәзијјәтләр јарананда фүрсәти әлдән вермирләр. О да достуна дејиб ки, мәним белә олуб-олмадығымы јохлајаҹаг. Һәмин ан Јеһованын адыны шәрәфләндирдијим үчүн о гәдәр севиндим ки!»

18. Вәфтиздән сонра нә етмәк әзминдәсиниз? (Һәмчинин « Фајдалы ики мәгалә» адлы чәрчивәјә бахын.)

¹⁸ Өзүнүзү Јеһоваја һәср едиб вәфтиз олунанда ҝөстәрирсиниз ки, нә олурса-олсун, Онун адыны тәмизә чыхармаг истәјирсиниз. Әмин олун, Јеһова сизин кечдијиниз чәтинликләрдән, гаршы дурдуғунуз сынаглардан аҝаһдыр. О сизин садиг галмаг әзминизи мүкафатсыз гојмајаҹаг. Билин ки, Јеһова Өз мүгәддәс руһу васитәсилә сизә бу саһәдә көмәк едәҹәк (Лука 11:11—13). Јеһованын көмәји илә вәфтиздән сонра да Исанын ардынҹа ҝедә биләҹәксиниз.