1. Јеһованын халгынын арасында олдуғумуз үчүн һансы немәтләрә саһибик?

 АХЫРЗАМАНЫН бу ағыр дөнәминдә нә јахшы ки, биз Јеһованын халгынын арасындајыг. Дүнјадакы вәзијјәт ҝүнбәҝүн писләшир. Амма Јеһова бизә бу чәтин вәзијјәтләрә дөзә билмәјимиз үчүн ҝөзәл руһани аилә бәхш едиб (Зәб. 133:1). Һәмчинин О бизә аилә телләримизи мөһкәмләндирмәјә көмәк едир (Ефес. 5:33—6:1). Үстәлик, гәлб раһатлығымызы горумаг үчүн дәрракә вә һикмәт верир.

2. Биз нә етмәлијик вә нәјә ҝөрә?

² Бунунла белә, Јеһоваја даима сәдагәтлә хидмәт едә билмәјимиз үчүн вар ҝүҹүмүзлә чалышмалыјыг. Нәјә ҝөрә? Чүнки заман-заман башгаларынын гејри-камиллији бизә пис тәсир едә биләр. Һәмчинин өз сәһвләримизә ҝөрә, әләлхүсус, ејни сәһви дәфәләрлә тәкрарладығымыза ҝөрә руһдан дүшә биләрик. Она ҝөрә дә 1) диндашымыз бизи инҹидәндә, 2) һәјат јолдашымыз давранышы илә бизи мәјус едәндә вә 3) сәһвләримизә ҝөрә руһдан дүшәндә Јеһоваја хидмәти давам етдирмәлијик. Мәгаләдә бу вәзијјәтләрин һәр үчүнә нәзәр салаҹағыг. Һәмчинин Мүгәддәс Китабда ады чәкилән иманлы инсанлардан нә өјрәнә биләҹәјимизи арашдыраҹағыг.

ДИНДАШЫНЫЗ СИЗИ ИНҸИДӘНДӘ ТАГӘТДӘН ДҮШМӘЈИН

3. Јеһованын халгы һансы чәтинликлә үзләшир?

³ Чәтинлик. Ола билсин, бәзи диндашларымызын хасијјәти бизи гыҹыгландырыр, јахуд бәзиләринин дүшүнүлмәмиш вә ја кобуд давранышы бизи инҹидир. Һәтта мәсул гардашлар да сәһв едир. Бу кими вәзијјәтләр уҹбатындан бәзиләри тәшкилаты Јеһованын идарә етдијинә шүбһә етмәјә башлајыр. Баҹы-гардашларла «чијин-чијинә» Јеһоваја хидмәт етмәк әвәзинә, онлар хәтирләринә  дәјән диндашларындан јан ҝәзир, һәтта јығынҹаглара белә ҝетмәји дајандырырлар (Сәф. 3:9). Бәс бу нә дәрәҹәдә һикмәтли аддымдыр? Ҝәлин ҝөрәк бу кими вәзијјәтләрлә үзләшмиш Мүгәддәс Китабдакы бир персонаждан нә өјрәнирик.

4. Булус һансы чәтинликләрлә үзләшмишди?

⁴ Мүгәддәс Китаб нүмунәси. Һәвари Булус диндашларынын гејри-камил олдуғунун фәргиндә иди. Мәсәлән, әввәл-әввәл јығынҹагда бәзиләри онун Мәсиһин шаҝирди олдуғуна шүбһә илә јанашырды (Һәв. 9:26). Сонралар исә бир башгалары онун архасынҹа данышыб адына гара јахмаға чалышырдылар (2 Кор. 10:10). Һәмчинин Булус бир ағсаггалын баҹы-гардашларын бүдрәмәсинә сәбәб ола биләҹәк јанлыш һәрәкәтини дә ҝөрмүшдү (Гал. 2:11, 12). Бундан әлавә, Булусун әмәкдашларындан бири олан Марк ону чох мәјус етмишди (Һәв. 15:37, 38). Бәһс етдијимиз бу вәзијјәтләрин һәр бириндә Булус ону инҹидән кәсләрдән јан ҝәзә биләрди. Амма о, баҹы-гардашларла јахшы мүнасибәтини позмады вә Јеһоваја фәал шәкилдә хидмәтини давам етдирди. Бәс Булуса руһдан дүшмәмәјә нә көмәк етди?

5. Диндашларындан узаг ҝәзмәмәјә Булуса нә көмәк етмишди? (Колослулара 3:13, 14). (Һәмчинин шәклә бахын.)

⁵ Булус баҹы-гардашлары севирди. Бу мәһәббәт она диггәтини диндашларынын сәһвләринә јох, мүсбәт хүсусијјәтләринә ҹәмләмәјә көмәк етмишди. Һәмчинин мәһәббәти сајәсиндә Колослулара 3:13, 14 ајәләриндә јаздығы сөзләрә ујғун даврана билмишди. (Ајәләри охујун.) Буну Булусун Марка олан мүнасибәтиндән ҝөрмәк олар. Булусун биринҹи тәблиғ сәјаһәти заманы Марк ону јары јолда гојса да, Булус инҹик галмамышды. Сонралар Колосдакы јығынҹаға јаздығы севҝи долу мәктубунда о, Маркы она «дајаг олан» дәјәрли әмәкдашы адландырмышды (Кол. 4:10, 11). Булус Ромада һәбсдә оларкән мәһз Маркын ҝәлиб она көмәк етмәсини хаһиш етмишди (2 Тим. 4:11). Ајдындыр ки, о, диндашларынын үстүндән хәтт чәкмирди, онлары бағышлајырды. Булусдан нә өјрәнә биләрик?

6, 7. Баҹы-гардашларымыза сәһвләринә рәғмән мәһәббәт ҝөстәрмәјә неҹә давам едә биләрик? (Ибраниләрә 13:1).

⁶ Нә өјрәнирик? Јеһова истәјир ки, диндашларымыза олан мәһәббәтимиз түкәнмәсин. (Ибраниләрә 13:1 ајәсини охујун.) Әҝәр кимдәсә мәсиһи хүсусијјәтләриндән бәзиләринин чатышмадығыны ҝөрсәниз, нәзәрә алын ки, о да Мүгәддәс Китаб принсипләринә ујғун давранмаг истәјир. Садәҹә һәмин вахт дүшүнүлмәмиш һәрәкәт едиб (Мәс. 12:18). Јеһова садиг хидмәтчиләрини  зәифликләринә рәғмән севир. Сәһвләр едәндә дәрһал бизи силиб атмыр, јахуд бизә аҹыглы галмыр (Зәб. 103:9). Нә јахшы ки, Јеһова бағышлајан Аллаһдыр. Биз дә Ондан өрнәк ҝөтүрүб, башгаларыны бағышламалыјыг! (Ефес. 4:32—5:1).

⁷ Бир мәгамы да унутмајын: бу шәр дүнјанын сону јахынлашдыгҹа баҹы-гардашларымызла мүнасибәтимизи мөһкәмләндирмәлијик. Биз гаршыда тәгибләрин артаҹағына һазырлыглы олмалыјыг. Һәтта иманымыза ҝөрә һәбсә дә дүшә биләрик. Әҝәр белә бир шеј баш версә, баҹы-гардашларымыза һәмишәкиндән даһа чох еһтијаҹымыз олаҹаг (Мәс. 17:17). Ҝәлин Испанијада ағсаггал кими хидмәт едән Ҹозеф a адлы бир гардашын нүмунәсинә бахаг. О вә бир нечә гардаш битәрәф галдыгларына ҝөрә һәбс олунмушду. Ҹозеф гардаш дејир: «Һәбсдә һамымыз бир јердә галдығымыз үчүн һәрдән кимсә давранышы илә диҝәрини гыҹыгландырырды. Биз бир-биримизә дөзмәли, бир-биримизи үрәкдән бағышламалы идик. Бу, арамыздакы бирлији горумаға вә Јеһоваја хидмәт етмәјән инсанларын арасында бир-биримизи мүдафиә етмәјә көмәк етди. Бир дәфә голуму зәдәләмишдим, сарғыда олдуғуна ҝөрә иш ҝөрә билмирдим. Амма гардашлардан бири палтарларымы јумагда вә диҝәр ишләрдә мәнә көмәк едирди. Ән чох еһтијаҹым олан анда диндашларымын сәмими мәһәббәтини дујдум». Бәли, биз диндашларымызла арамыздакы проблемләри индидән һәлл етмәлијик!

ЈОЛДАШЫНЫЗ ДАВРАНЫШЫ ИЛӘ СИЗИ МӘЈУС ЕДӘНДӘ ТАГӘТДӘН ДҮШМӘЈИН

8. Әр-арвадлар һансы чәтинликлә үзләшир?

⁸ Чәтинлик. Бүтүн аиләләрдә чәтинликләр вар. Мүгәддәс Китабда ајдын шәкилдә дејилир ки, евләнәнләр «һәјатда јени чәтинликләрлә үзләшәҹәкләр» (1 Кор. 7:28). Чүнки әр дә, арвад да гејри-камилдир вә хасијјәтләри, севиб-севмәдији шејләр бир-бириндән фәргләнир. Онларын алдығы тәрбијә, бөјүдүјү мәдәнијјәт дә фәргли ола биләр. Вахт кечдикҹә, ола билсин, онлар никаһдан әввәл бир-бириләриндә ҝөрмәдикләри хүсусијјәтләри сезсинләр. Бу кими шејләр әрлә арвад арасында сөз-сөһбәтә ҝәтириб чыхара биләр. Һәр икисиндә дә сәһв олдуғу һалда, онлар проблеми һәлл етмәк јеринә, ола билсин, бир-бириләрини ҝүнаһландырсынлар. Һәтта вәзијјәт о һәддә чата биләр ки, онлар мәсәләнин һәллини ајры јашамагда вә ја бошанмагда ҝөрсүнләр. Бәс бу јахшы һәлл јолудур? b Ҝәлин аиләсиндәки бөјүк чәтинликләрә таб ҝәтирмиш Мүгәддәс Китабдакы бир персонажын нүмунәсинә бахаг.

9. Абигајил һансы чәтинликлә үзләшмишди?

⁹ Мүгәддәс Китаб нүмунәси. Абигајил Набал адлы бир киши илә евләнмишди. Мүгәддәс Китабда дејилир ки, Набал «кобуд вә бәдхасијјәт иди» (1 Ишм. 25:3). Јәгин ки, белә бир киши илә бир дамын алтында јашамаг Абигајил үчүн чәтин иди. Бәс Абигајилин бу евлиликдән ҹаныны гуртармаг имканы вар иди? Бәли, онун белә бир имканы вар иди. Набал Исраилин ҝәләҹәк падшаһы Давуду вә адамларыны тәһгир етдији үчүн онлар Набалы өлдүрмәјә ҝәлирдиләр (1 Ишм. 25:9—13). Абигајил Давуда мане олмајыб, башыны ҝөтүрүб гача биләрди. Амма о, белә етмәди, мәсәләјә мүдахилә едиб Набалын ҹанына гыјмамасы үчүн Давуду разы салды (1 Ишм. 25:23—27). Бәс Абигајил нәјә ҝөрә белә етди?

10. Аиләсиндәки чәтин вәзијјәтә таб ҝәтирмәјә Абигајилә, еһтимал ки, нә көмәк етмишди?

 ¹⁰ Абигајил Јеһованы севирди вә Онун никаһла бағлы гојдуғу гајдалара һөрмәт едирди. Сөзсүз ки, Абигајил Јеһованын Адәм үчүн Һәвваны јараданда дедији сөзләрдән аҝаһ иди (Јар. 2:24). Абигајил билирди ки, Јеһованын ҝөзүндә никаһ мүгәддәсдир. О, Аллаһы разы салмаг истәјирди. Мәһз елә буна ҝөрә дә о, ев әһлини, әрини хилас етмәк үчүн әлиндән ҝәләни етди. О, ҹәлд давраныб Набалы өлүмдән хилас етди. Һәтта етмәдији сәһвә ҝөрә үзр дә истәди. Сөзсүз, Јеһова бу ҹәсур, фәдакар гадындан разы иди. Һәм әрләр, һәм дә арвадлар Абигајилдән нә өјрәнә биләр?

11. а) Јеһова әрлә арваддан нә ҝөзләјир? (Ефеслиләрә 5:33). б) Карменин өз никаһыны горумаг үчүн етдикләриндән нә өјрәнирсиниз? (Һәмчинин шәклә бахын.)

¹¹ Нә өјрәнирик? Јеһова истәјир ки, әр дә, арвад да никаһа һөрмәт етсин, һәтта һәјат јолдашы чәтин адам олса да. Әрлә-арвадын проблемләри һәлл етмәк үчүн вар ҝүҹләри илә чалышмасы, бир-бирләринә фәдакар мәһәббәт, һөрмәт ҝөстәрмәси Јеһованын үрәјини севиндирир. (Ефеслиләрә 5:33 ајәсини охујун.) Кармен адлы бир гадынын нүмунәсинә бахаг. Евлилијиндән алты ил сонра Кармен Јеһованын Шаһидләри илә Мүгәддәс Китабы өјрәнмәјә башлајыр вә бир мүддәт сонра вәфтиз олунур. О дејир: «Әрим буну јахшы гаршыламады. Ону евдә гојуб јығынҹаглара ҝетдијимә ҝөрә әсәбиләширди. Јолдашым мәни тәһгир едирди, тәрк етмәклә һәдәләјирди». Бүтүн бунлара рәғмән, Кармен никаһыны горуду. О, 50 ил әрзиндә јолдашына севҝи вә һөрмәт ҝөстәрмәк үчүн әлиндән ҝәләни етди. Кармен дејир: «Илләр өтдүкҹә мән даһа анлајышлы олмағы, јолдашымла даһа нәзакәтлә данышмағы өјрәндим. Билирәм ки, никаһ Јеһованын ҝөзүндә мүгәддәсдир. Буна ҝөрә дә аиләми горумаг үчүн вар ҝүҹүмлә чалышдым. Һеч вахт јолдашымдан ајрылмаға чалышмадым, чүнки Јеһованы севирәм» c. Никаһынызда чәтинликләр баш галдыранда әмин олун ки, Јеһова сизә дајаг олаҹаг вә таб ҝәтирмәјә көмәк едәҹәк.

ҸИДДИ ҜҮНАҺ ИШЛӘДӘНДӘ ТАГӘТДӘН ДҮШМӘЈИН

12. Ҹидди ҝүнаһа јол вермәк бизә неҹә тәсир едә биләр?

¹² Чәтинлик. Ҹидди ҝүнаһ ишләдәндә тамамилә руһдан дүшә биләрик. Мүгәддәс Китабда дејилир ки, инсан ҝүнаһ ишләдәндән сонра үрәји бир нөв «чилик-чилик» олур, пешманчылыг һисси кечирир (Зәб. 51:17). Роберт адлы гардаш илләрлә вар ҝүҹү илә чалышыб јығынҹаг хидмәтчиси олмушду. Амма о, ҹидди ҝүнаһ  ишләтди вә Јеһоваја хәјанәт етдијини баша дүшдү. Роберт дејир: «Виҹдан әзабы мәни јејиб-битирирди. Өзүмү дәһшәтли дәрәҹәдә пис һисс етмәјә башладым. Һөнкүр-һөнкүр ағлајыб Јеһоваја дуа еләдим. Һәмин вахт дүшүнүрдүм ки, Јеһова даһа мәним дуаларыма гулаг асмајаҹаг. Нијә дә гулаг ассын?! Ахы мән ону мәјус еләдим». Ҹидди ҝүнаһ ишләдәндә мәјуслуға гапыла биләрик. Пәришан гәлбимиз бизи инандыра биләр ки, артыг Јеһова бизи тәрк едиб, бундан сонра нә етсәк дә фајдасы јохдур (Зәб. 38:4). Ола билсин, сиз дә бу ҹүр һиссләр кечирирсиниз. Мүгәддәс Китабдан ҹидди ҝүнаһ ишләтсә дә, Јеһоваја хидмәтини давам етдирән бир шәхсин нүмунәси сизә көмәк едә биләр.

13. Бутрус һансы сәһвләрә јол вермишди вә бу, һансы ҹидди ҝүнаһ ишләтмәсинә ҝәтириб чыхартмышды?

¹³ Мүгәддәс Китаб нүмунәси. Исанын едамындан әввәлки ҝеҹә һәвари Бутрус бир нечә сәһвә јол верди. Вә бунлар ону һәјатынын ән бөјүк сәһвини етмәјә ҝәтириб чыхартды. Биринҹиси, Бутрус өзүнә архаланды, өјүнәрәк деди ки, диҝәр һәвариләр Исаны тәрк етсә дә, о, садиг галаҹаг (Марк 14:27—29). Сонра, Ҝетсемани бағында оланда Бутрус ојаг галмајыб, дәфәләрлә јухуја ҝетди (Марк 14:32, 37—41). Даһа сонра, Бутрус Исаны издиһамын арасында гојуб гачды (Марк 14:50). Ахырда исә, о, Исаны үч дәфә данды. Һәтта бу јаланыны анд ичәрәк тәсдигләди (Марк 14:66—71). Бәс Бутрус ҹидди ҝүнаһ ишләтдијини баша дүшәндә һансы һиссләри кечирди? Өзүнү сахлаја билмәјиб һөнкүр-һөнкүр ағлады (Марк 14:72). Ҝөрүнүр, о, неҹә бөјүк бир ҝүнаһа јол вердијинин фәргинә вармышды. Бир нечә саат сонра досту Иса едам олунанда Бутрусун неҹә изтираб чәкдијини бир тәсәввүр един! Бутрус бу һәрәкәтинә ҝөрә, јәгин ки, өзүнү чох дәјәрсиз һисс етмишди.

14. Бутрус нәјин сајәсиндә Јеһоваја хидмәтини давам етдирә билди? (Шәклә бахын.)

¹⁴ Бутрус бир нечә сәбәбә ҝөрә Јеһоваја хидмәтини давам етдирә билмишди. О өзүнү баҹы-гардашлардан тәҹрид етмәди. Онларын јанына ҝетди вә шүбһәсиз, диндашлары да Бутруса тәсәлли верди (Лука 24:33). Үстәлик, Иса дириләндән сонра Бутруса ҝөрүндү. Еһтимал ки, ону руһландырмаг истәјирди (Лука 24:34; 1 Кор. 15:5). Сонра исә Бутрусу етдији сәһвләрә ҝөрә данламады. Әксинә, достуна деди ки, ҝәләҹәкдә она ҹидди мәсулијјәтләр һәвалә олунаҹаг (Јәһ. 21:15—17). Бутрус сәһвинин бөјүклүјүнү анлајырды. Бунунла белә, дүзҝүн оланы етмәкдән ваз кечмәди. Чүнки о әмин иди ки, Ағасы Иса ондан әлини үзмәјиб. Бутрусун диндашлары да она дәстәк олмаға давам етди. Бутрусдан нә өјрәнирик?

15. Јеһова нәјә әмин олмағымызы истәјир? (Зәбур 86:5; Ромалылара 8:38, 39). (Һәмчинин шәклә бахын.)

 ¹⁵ Нә өјрәнирик? Јеһова истәјир ки, биз бир шејә әмин олаг: О бизи севир вә бағышламаға һазырдыр. (Зәбур 86:5; Ромалылара 8:38, 39 ајәләрини охујун.) Ҝүнаһ ишләдәндә өзүмүзү мәјус һисс етмәјимиз нормалдыр. Әслиндә белә дә олмалыдыр. Лакин севилмәјә, бағышланмаға лајиг олмадығымызы дүшүнмәмәлијик. Јахшы олар ки, дәрһал көмәк истәјәк. Әввәлдә һаггында данышдығымыз Роберт гардаш дејир: «Дүшүнүрдүм ки, ҝүнаһа мејлимә өз ҝүҹүмлә галиб ҝәлә биләрәм. Елә өзүмә архаландығым үчүн ҝүнаһ ишләтдим». Роберт ағсаггалларла данышмалы олдуғуну баша дүшдү. О дејир: «Гардашларла данышанда онлар мәнә Јеһованын мәһәббәтини дујмаға көмәк еләдиләр. Һәмчинин гардашларын да мәһәббәтини дујдум. Онлар мәни әмин етдиләр ки, Јеһова мәни атмајыб». Ҝүнаһ ишләдәндә төвбә етсәк, көмәк ахтарсаг вә һәмин сәһви тәкрарламамаға гәтијјәтли олсаг, әмин ола биләрик ки, Јеһова бизи һәлә дә севир вә бағышламаға һазырдыр (1 Јәһ. 1:8, 9). Бу әминлик бизә бүдрәјәндә вә ја јыхыланда тагәтдән дүшмәмәјә көмәк едир.

16. Нәјә ҝөрә Јеһоваја хидмәтинизи давам етдирмәјә әзмлисиниз?

¹⁶ Јеһова ахырзаманын бу чәтин ҝүнләриндә Она етдијимиз хидмәти чох гијмәтләндирир. Јеһованын көмәји илә биз Она сәдагәтлә хидмәт етмәјә давам едә биләрик. Баҹы-гардашлар хәтримизә дәјсә дә, онлары севмәк үчүн чохлу сәбәбләримиз вар. Никаһымызда јаранан проблемләри һәлл етмәјә чалышанда Јеһоваја дәрин мәһәббәтимизи вә никаһ гурулушуна һөрмәт етдијимизи ҝөстәририк. Һәмчинин ҝүнаһ ишләдәндә Јеһовадан көмәк истәмәли, Онун мәһәббәтинә, бизи бағышладығына инанмалы вә хидмәтимизи давам етдирмәлијик. Әмин ола биләрик ки, «дүзҝүн иш ҝөрмәкдән» јорулмасаг, бол немәтләр бичәҹәјик (2 Салон. 3:13).