1, 2. Вәфтиз олунмаздан әввәл нә етмәк лазымдыр?

 СОН беш ил әрзиндә бир милјондан чох инсан Јеһованын Шаһиди кими вәфтиз олунуб. Онларын чоху биринҹи әсрдә јашамыш Тимути кими һәгигәти «көрпәликдән» билир (2 Тим. 3:14, 15). Бәзиләри һәгигәти ҝәнҹ јашда, бәзиләри исә аһыл јашда өјрәниб. Мәсәлән, бир нечә ил бундан әввәл Мүгәддәс Китабы өјрәнән бир гадын 97 јашында Јеһованын Шаһиди кими вәфтиз олунуб.

² Әҝәр Мүгәддәс Китабы өјрәнирсинизсә, јахуд һәгигәтдә бөјүмүсүнүзсә вәфтиз олунмаг барәдә дүшүнүрсүнүз? Бу, чох ҝөзәл мәгсәддир! Вәфтиз олунмаздан әввәл сиз өзүнүзү Јеһоваја һәср етмәлисиниз. Бәс һәсролунма нә демәкдир? Нәјә ҝөрә өзүмүзү һазыр һисс едәндә һәср олунмаға вә вәфтиз олунмаға тәрәддүд етмәмәлијик? Мәгаләдә бу суалларын ҹаваблары арашдырылаҹаг.

ҺӘСРОЛУНМА НӘ ДЕМӘКДИР?

3. Мүгәддәс Китабда Јеһоваја һәср олунмуш кимләрин ады чәкилир?

³ Мүгәддәс Китабда һәср етмәк дејәндә нәјисә вә ја кимисә мүгәддәс бир иш үчүн ајырмаг нәзәрдә тутулур. Исраил халгы Јеһоваја һәср олунмуш халг иди. Амма халгын арасындан бәзиләри Јеһоваја хүсуси шәкилдә һәср олунмушду. Мәсәлән, Һарунун әммамәсинин габаг тәрәфинә мүгәддәс лөвһәҹик, парлаг гызыл лөвһәҹик бәркидилмишди. Бу гызыл лөвһәҹик ҝөстәрирди ки, о, Јеһоваја хидмәтдә хүсуси бир иш үчүн сечилиб — Исраилин баш каһини тәјин олунуб (Лав. 8:9). Нәзириләр дә Јеһоваја хүсуси шәкилдә һәср олунмушду. «Нәзири» сөзү ибраниҹә назир сөзүндән ҝөтүрүлүб вә «ајрылмыш», «һәср олунмуш» мәнасыны верир. Нәзириләр Мусанын  гануну илә тәнзимләнән гајдалар әсасында јашајырдылар (Сај. 6:2—8).

4. а) Инсан өзүнү Јеһоваја һәср едәндә ән үмдә мәгсәди нә олур? б) Өзүнү инкар етмәк нә демәкдир? (Һәмчинин шәклә бахын.)

⁴ Өзүнүзү Јеһоваја һәср едәндә сиз Мәсиһин шаҝирди олмағы вә Аллаһын ирадәсини јеринә јетирмәји һәјатда һәр шејдән үстүн тутмағы өһдәнизә ҝөтүрүрсүнүз. Бир мәсиһи кими һәср олунмаг нә демәкдир? Иса демишди: «Ким ардымҹа ҝәлмәк истәјирсә, гој өзүнү инкар етсин» (Мәт. 16:24). «Гој өзүнү инкар етсин» ифадәсини јунанҹадан «гој өзүнә “јох” десин» кими дә тәрҹүмә етмәк олар. Јеһованын һәср олунмуш бир хидмәтчиси кими сиз Онун ирадәсинә зидд ҝедән һәр бир шејә «јох» демәлисиниз (2 Кор. 5:14, 15). Бура «ҝүнаһлы бәдәнин әмәлләри», јәни ҹинси әхлагсызлыг да дахилдир (Гал. 5:19—21; 1 Кор. 6:18). Бәс бу ҹүр мәһдудијјәтләр сизин һәјатынызы чәтинә салаҹаг? Әҝәр Јеһованы севирсинизсә вә Онун ганунларынын сизин хејринизә олдуғуна әминсинизсә, онда һәјатыныз һеч дә чәтин олмајаҹаг (Зәб. 119:97; Әшј. 48:17, 18). Николас адлы бир гардаш буну белә изаһ едир: «Јеһованын ганунларына ики ҹүр јанаша биләрсиниз: ја сизи һәр шејдән мәһрум едән һәбсханадакы дәмир бармаглыглар кими, ја да сизи һәјати тәһлүкәдән горујан ширин сахланылдығы гәфәс кими».

5. а) Өзүнүзү Јеһоваја неҹә һәср едә биләрсиниз? б) Һәсролунма илә вәфтиз арасында һансы фәргләр вар? (Һәмчинин шәклә бахын.)

⁵ Бәс һәсролунма неҹә олур? Сиз Јеһоваја дуа едиб сөз верирсиниз ки, јалныз Она ибадәт едәҹәксиниз вә Онун ирадәсини һәјатынызда һәр шејдән үстүн тутаҹагсыныз. Һәмчинин бундан сонра да Јеһованы бүтүн гәлбинизлә, бүтүн варлығынызла, бүтүн ағлынызла вә вар ҝүҹүнүзлә  севәҹәјинизә сөз верирсиниз (Марк 12:30). Һәсролунма тәкликдә, Јеһова илә сизин аранызда олур. Амма вәфтиз һамынын ҝөзү өнүндә олур. Инсанлар ҝөрүр ки, сиз өзүнүзү Јеһоваја һәср етмисиниз. Сизин һәсролунма әһдиниз мүгәддәс бир әһддир вә Јеһова вердијиниз әһдә ујғун јашамағынызы истәјир (Ваиз 5:4, 5).

ӨЗҮМҮЗҮ ЈЕҺОВАЈА НӘЈӘ ҜӨРӘ ҺӘСР ЕДИРИК?

6. Инсан нәјә ҝөрә өзүнү Јеһоваја һәср етмәк гәрарына ҝәлир?

⁶ Өзүнүзү Јеһоваја һәср етмәјинизин әсас сәбәби Она бәсләдијиниз мәһәббәтдир. Амма бу мәһәббәт тәкҹә һиссләрә әсасланмыр. Бу мәһәббәт Јеһова һагда «дәгиг билик»дән вә «руһун вердији дәрракә»дән гајнагланыр (Кол. 1:9). Јеһова һагда өјрәндијиниз шејләр Она олан мәһәббәтинизи даһа да артырыр. Мүгәддәс Китабы арашдырдыгҹа әмин олурсунуз ки, 1) Јеһова реал варлыгдыр, 2) Мүгәддәс Китаб Онун Кәламыдыр вә 3) О, нијјәтини һәјата кечирмәк үчүн Өз тәшкилатындан истифадә едир.

7. Өзүнүзү Аллаһа һәср етмәздән әввәл нә етмәлисиниз?

⁷ Һәјатларыны Јеһоваја һәср едән кәсләр Мүгәддәс Китабын әсас тәлимләрини билмәли вә она ујғун һәјат тәрзи сүрмәлидирләр. Онлар шәраитләри јол вердији гәдәр иманлары һагда башгаларына да данышырлар (Мәт. 28:19, 20). Беләҹә, онларын Јеһоваја мәһәббәтләри ҝет-ҝедә артыр вә өзләрини Она һәср етмәји үрәкдән истәјирләр. Сиздә дә беләдир? Јеһоваја бу ҹүр мәһәббәт бәсләсәниз, онда һәср олунуб, вәфтиз олунмағы садәҹә валидејнләринизи,  Мүгәддәс Китаб мүәллиминизи разы салмаг, јахуд һәмјашыдларынызла ајаглашмаг хатиринә истәмәјәҹәксиниз.

8. Јеһоваја миннәтдарлыг һисси өзүнүзү Она һәср етмәк гәрарыныза неҹә тәсир едир? (Зәбур 116:12—14).

⁸ Јеһованын сизин үчүн етдији һәр бир шеј барәдә дүшүнсәниз, Она миннәтдарлығыныз артаҹаг вә беләҹә, һәјатынызы Она һәср етмәк истәјәҹәксиниз. (Зәбур 116:12—14 ајәләрини охујун.) Мүгәддәс Китабда «һәр бир ҝөзәл пај вә һәр бир камил немәт»ин Јеһовадан назил олдуғу дејилир (Јаг. 1:17). Јеһованын ән бөјүк һәдијјәси исә Өз Оғлуну — Иса Мәсиһи бизим үчүн гурбан вермәсидир. Бир дүшүнүн, фидјә сајәсиндә бизим Јеһова илә јахын достлуг мүнасибәтләри гурмаг имканымыз јараныб. Һәмчинин өнүмүздә әбәди һәјата гапы ачылыб (1 Јәһ. 4:9, 10, 19). Тарих боју ҝөстәрилмиш мәһәббәтин ән бөјүк тәҹәссүмүнә — фидјәјә ҝөрә, һәмчинин Јеһованын бизә бәхш етдији диҝәр немәтләрә ҝөрә миннәтдарлығымызы билдирмәјин ән јахшы јолу өзүмүзү Она һәср етмәкдир (Ган. 16:17; 2 Кор. 5:15). Бу мөвзу «Әбәди хошбәхт һәјат!» дәрслијинин 46-ҹы дәрсинин 4-ҹү бәндиндә јерләшән «Јеһоваја вердијимиз бәхшишләр» адлы 3 дәгигәлик видеода вурғуланыр.

ҺӘСР ОЛУНМАҒА ВӘ ВӘФТИЗӘ ҺАЗЫРСЫНЫЗ?

9. Нәјә ҝөрә инсан мәҹбуријјәтдән ирәли ҝәләрәк өзүнү Јеһоваја һәср етмәмәлидир?

⁹ Ола билсин, һәср олунуб вәфтиз олунмаг үчүн өзүнүзү һазыр билмирсиниз. Бәлкә дә Јеһованын гајда-ганунларына ујғун јашамаг үчүн һәјатынызда һәлә дә дәјишикликләр етмәлисиниз. Јахуд, ола билсин, иманынызы мөһкәмләндирмәк үчүн сизә даһа чох вахт лазымдыр (Кол. 2:6, 7). Амма нәзәрә алын ки, бүтүн шаҝирдләрин инкишафы ејни дејил. Нә дә ки, бүтүн ҝәнҹләр ејни јашда вәфтиз олунмаға һазыр олмурлар. Одур ки, руһани инкишафынызы өзүнүзү башгалары илә мүгајисә етмәдән, өз ҝүҹүнүз дахилиндә өлчүб-бичин (Гал. 6:4, 5).

10. Һәлә вәфтизә һазыр олмадығыныз гәнаәтинә ҝәлсәниз, нә етмәлисиниз? (Һәмчинин « Һәгигәтдә бөјүјәнләр үчүн» адлы чәрчивәјә бахын.)

¹⁰ Һәтта ҝөрсәниз ки, өзүнүзү Јеһоваја һәср етмәјә һәлә һазыр дејилсиниз, бу мәгсәдә доғру ирәлиләмәји дајандырмајын. Лазыми дәјишикликләр едә билмәк үчүн дуа едиб Јеһовадан көмәк истәјин (Филип. 2:13; 3:16). Әмин олун ки, О сизин дуанызы ешидәҹәк вә ҹаваб верәҹәк (1 Јәһ. 5:14).

БӘЗИЛӘРИ НӘЈӘ ҜӨРӘ ТӘРӘДДҮД ЕДИР?

11. Јеһова халгына иманда мөһкәм галмаға неҹә көмәк едәҹәк?

¹¹ Бәзиләри вәфтиз олунмаға һазыр олсалар да, мүәјјән тәрәддүдләри вар. Кимсә дүшүнә биләр: «Бирдән вәфтиздән сонра ҹидди ҝүнаһ едиб јығынҹагдан кәнар едиләрәм». Әҝәр сиздә дә бу горху варса, әмин олун ки, Јеһова Онун адына лајиг јашајыб Ону там разы салмағыныз үчүн сизә көмәк едәҹәк (Кол. 1:10). Һәмчинин О, дүзҝүн давранмағыныз үчүн сизә ҝүҹ верәҹәк. Јеһова артыг чохларына көмәк етмәклә буну сүбут едиб (1 Кор. 10:13). Елә јығынҹагдан, демәк олар ки, чох аз адамын кәнар едилмәсинин бир сәбәби дә будур. Бәли, Јеһова халгына иманда мөһкәм галмаға көмәк едир.

12. Ҹидди ҝүнаһа јол вермәмәк үчүн нә едә биләрик?

 ¹² Биз ҝүнаһлы инсанлар пислијә мејиллијик (Јаг. 1:14). Амма бу мејилә ујуб-ујмамаг сечим мәсәләсидир вә бу сечими сиз едирсиниз. Реаллыг одур ки, неҹә јашајаҹағыныз, һәр бир һалда, сизин әлиниздәдир. Амма бу ҝүн бәзи инсанлар иддиа едиб дејир: «Инсанлар өз һиссләрини, һәрәкәтләрини идарә етмәјә гадир дејил». Бу јанлыш фикирдир! Инсан јанлыш истәкләрини ҹиловлаја биләр. Һәтта јанлыш истәкләр баш галдырса да, сиз онлары рам едә биләрсиниз. Бунун үчүн һәр ҝүн дуа един. Мүгәддәс Китабы мүнтәзәм мүталиә един. Јығынҹаглардан галмајын. Тәблиғ един. Бу аддымлары мүнтәзәм атмаг сизә һәсролунма әһдинизә ујғун јашамаға ҝүҹ верәҹәк. Вә унутмајын ки, Јеһова сизә бу саһәдә көмәк едәҹәк (Гал. 5:16).

13. Јусиф бизим үчүн һансы ҝөзәл нүмунәни гојуб?

¹³ Ширникдириҹи вәзијјәтлә үзләшәндә нә едәҹәјинизи габагҹадан гәрарлашдырсаныз, онда һәсролунма әһдинизә ујғун јашамаг асан олаҹаг. Мүгәддәс Китабда гејри-камил олмаларына рәғмән нәфсинә галиб ҝәлмиш чох сајда инсанын нүмунәси вар. Мәсәлән, Фитфирин арвады Јусифи дәфәләрлә јолдан чыхармаға чалышмышды. Амма Јусиф бу мәсәләдә габагҹадан гәти бир мөвге тутмушду. О, гадынын бу тәклифини рәдд едиб она гәтијјәтлә белә демишди: «Мән неҹә белә бир јаманлыг едиб Аллаһа гаршы ҝүнаһ ишләјә биләрәм?» (Јар. 39:8—10). Ајдындыр ки, Јусиф гадын ону ҝүнаһа тәһрик етмәздән әввәл неҹә давранаҹағыны билирди. Тутдуғу бу мөвге она үзләшдији вәзијјәтдә дүзҝүн давранмаға көмәк етмишди.

14. Јеһованын нифрәт етдији шејләрә јох демәји неҹә өјрәнә биләрик?

¹⁴ Јусиф кими сиз дә неҹә гәтијјәт ҝөстәрә биләрсиниз? Ҝүнаһа сүрүкләјән вәзијјәтлә үзләшәндә нә едәҹәјинизи индидән гәрарлашдырмагла. Јеһованын нифрәт етдији шејләрә «јох» демәји өјрәнин, бу шејләри һәтта ағлынызын уҹундан белә кечирмәјин (Зәб. 97:10; 119:165). Онда тәләјә дүшүб ҝүнаһ етмәјәҹәксиниз. Чүнки әввәлҹәдән конкрет бир мөвге тутдуғунуз үчүн нә едәҹәјинизи биләҹәксиниз.

15. Инсан Јеһованы ҹидд-ҹәһдлә ахтардығыны неҹә ҝөстәрә биләр? (Ибраниләрә 11:6).

¹⁵ Һәгигәти тапдығыныза әмин олсаныз  да, Јеһоваја бүтүн гәлбинизлә ибадәт етмәк истәсәниз дә, ола билсин, һәлә дә нәләрсә сизи вәфтиз олунмагдан сахлајыр. Сиз дә Давуд падшаһ кими Јеһоваја јалварыб белә дејә биләрсиниз: «Худаја, мәни јохла, гәлбими өјрән, мәни имтаһан ет, нараһат дүшүнҹәләрими бил, ҝөр мәндә пис мејил вармы. Әбәдијјәт јолунда мәнә бәләдчи ол!» (Зәб. 139:23, 24). Јеһова «Ону ҹидд-ҹәһдлә ахтаранлара» мүкафат верир. Сиз дә вәфтизә доғру аддымламагла мәһз Ону ахтардығынызы ҝөстәрмиш олурсунуз. (Ибраниләрә 11:6 ајәсини охујун.)

АЛЛАҺА ДАИМА ЈАХЫНЛАШЫН

16, 17. Һәгигәтдә бөјүјән кәсләри Јеһова валидејнләринә ҝөрә өзүнә ҹәлб едир? (Јәһја 6:44).

¹⁶ Иса демишди ки, Јеһова ҹәлб етмәсә, һеч ким онун ардынҹа ҝедә билмәз. (Јәһја 6:44 ајәсини охујун.) Бу, чох мараглы фикирдир. Бәс бу фикир сизә неҹә аиддир? Јеһова Өзүнә ҹәлб етдији һәр кәсдә јахшы бир шеј ҝөрүр. О, һәр бир бәндәсини Өз «хүсуси мүлкү» һесаб едир (Ган. 7:6). Јеһова сизә дә мәһз бу ҹүр јанашыр.

¹⁷ Әзиз ҝәнҹләр, ола билсин, сиз һәгигәтдә бөјүмүсүнүз. Бәлкә дә, дүшүнүрсүнүз ки, Јеһова сизи Өзүнә ҹәлб етмәјиб, садәҹә валидејнләриниз ибадәт етдији үчүн сиз дә Она ибадәт едирсиниз. Амма Јеһова бизә садәҹә бир күтлә кими јанашмыр. О һәр бир инсаны, һәтта һәгигәтдә бөјүјән һәр бир кәси шәхсән Өзүнә ҹәлб едир. Үстәлик, Мүгәддәс Китабда дејилир: «Аллаһа јахынлашын, О да сизә јахынлашаҹаг» (Јаг. 4:8; 1 Салн. 28:9). Одур ки, Јеһоваја јахынлашмаг үчүн илк аддымы сиз атсаныз, Јагуб 4:8 ајәсиндә дејилдији кими, Јеһова да сизә гаршылыг верәҹәк. (2 Салоникилиләрә 2:13 ајәси илә әлагәләндирин.)

18. Нөвбәти мәгаләдә нә арашдырылаҹаг? (Зәбур 40:8).

¹⁸ Өзүнүзү Јеһоваја һәср едиб вәфтиз олунанда Иса Мәсиһин әһвал-руһијјәсини әкс етдирмиш олурсунуз. О, Јеһованын истәјини көнүл хошлуғу илә јеринә јетирирди вә бундан һәзз алырды (Зәбур 40:8 ајәсини охујун; Ибр. 10:7). Нөвбәти мәгаләдә арашдыраҹағыг ки, вәфтиздән сонра да Јеһоваја сәдагәтлә хидмәт етмәјә бизә нәләр көмәк едә биләр.