1. Анма мәрасими нәјә ҝөрә илин ән әламәтдар һадисәсидир? (Лука 22:19, 20).

 МӘСИҺИН өлүмүнү анма мәрасими Јеһованын халгы үчүн илин ән әламәтдар һадисәсидир. Бу, Исанын өз давамчыларына гејд етмәји әмр етдији јеҝанә һадисәдир. (Лука 22:19, 20 ајәләрини охујун.) Биз бир сыра сәбәбләрә ҝөрә бу мәрасими сәбирсизликлә ҝөзләјирик. Ҝәлин һәмин сәбәбләрдән бәзиләринә бахаг.

2. Анма мәрасимини сәбирсизликлә ҝөзләмәјимизин бәзи сәбәбләри һансылардыр?

² Анма мәрасими бизә фидјәнин дәјәри үзәриндә дүшүнмәјә көмәк едир. Бу мәрасим бизә Исанын гурбанлығына ҝөрә миннәтдарлығымызы һансы јолларла ҝөстәрә биләҹәјимизи хатырладыр (2 Кор. 5:14, 15). Бундан әлавә, анма мәрасиминдә баҹы-гардашларла бир-биримизи руһландырырыг (Ром. 1:12). Һәр ил хејли сајда гејри-фәал мәсиһи мәрасимдә иштирак едир. Һәтта бәзиләри орадакы исти мүнасибәти ҝөрүб Јеһоваја ҝери дөнмәк гәрарына ҝәлир. Үстәлик, мәрасимә јени ҝәләнләрин чохуна ешитдикләри вә ҝөрдүкләри о гәдәр хош тәсир бағышлајыр ки, онлар Мүгәддәс Китабы арашдырмаға башлајырлар. Елә бу сәбәбләрә ҝөрә анма мәрасими бизим үчүн хүсусидир.

3. Анма мәрасими бүтүн дүнјадакы баҹы-гардашларымыз арасында неҹә бирлик јарадыр? (Һәмчинин шәклә бахын.)

³ Бундан башга, анма мәрасими бүтүн дүнјада диндашларымыз арасында бирлик јарадыр. Ҝүнәш тәдриҹән гүруба ендикҹә бүтүн дүнјада Јеһованын Шаһидләри бир араја  топлашыр. Һәмин ҝүн һамымыз фидјәнин ваҹиблијини ҝөстәрән нитгә гулаг асырыг, ики һәмд нәғмәси охујуруг, символлары өтүрүрүк вә едилән дөрд дуаја үрәкдән «амин» дејирик. Мәрасим 24 саат ичиндә бүтүн јығынҹагларда ејни гајдада кечирилир. Бир дүшүнүн, Јеһова вә Иса Мәсиһ дүнјанын дөрд бир тәрәфиндә һамымызын онлары шәрәфләндирдијини ҝөрәндә неҹә севинир!

4. Мәгаләдә һансы суаллара ҹаваб тапаҹағыг?

⁴ Бу мәгаләдә нөвбәти суаллара ҹаваб тапаҹағыг: «Үрәјимизи анма мәрасиминә неҹә һазырлаја биләрик? Башгаларынын да бу ҝөрүшдән јарарланмасы үчүн нә едә биләрик? Һәмчинин гејри-фәаллара неҹә көмәк едә биләрик?» Бу суалларын ҹавабыны билмәк бизә илин ән мүгәддәс мәрасиминә һазыр олмаға көмәк едәҹәк.

ҮРӘЈИМИЗИ АНМА МӘРАСИМИНӘ НЕҸӘ ҺАЗЫРЛАЈА БИЛӘРИК?

5. а) Фидјәнин дәјәри барәдә нәјә ҝөрә дүшүнмәлијик? (Зәбур 49:7, 8). б) «Аллаһ Иса пејғәмбәрин өлүмүнә нә үчүн јол верди?» видеосундан нә өјрәндиниз?

⁵ Үрәјимизи анма мәрасиминә һазырламағын әсас јолларындан бири Иса Мәсиһин фидјә гурбанлығынын дәјәри барәдә дүшүнмәкдир. Биз һеч вахт өзүмүзү ҝүнаһын вә өлүмүн әсарәтиндән гуртара билмәздик. (Зәбур 49:7, 8 ајәләрини охујун; һәмчинин «Аллаһ Иса пејғәмбәрин өлүмүнә нә үчүн јол верди?» адлы видеоја бахын.) a Буна ҝөрә дә Јеһова бир тәдбир ҝөрүб Оғлу Исаны бизим уғрумузда гурбан верди. Бу һәм Јеһова, һәм дә Иса үчүн бөјүк фәдакарлыг иди (Ром. 6:23). Онларын биздән өтрү нәләрә гатлашдығы барәдә дүшүндүкҹә фидјәјә миннәтдарлығымыз артаҹаг. Ҝәлин ҝөрәк фидјәни өдәмәк Јеһоваја вә Исаја нәләрин баһасына баша ҝәлиб. Амма әввәлҹә бу суала ҹаваб тапаг: Фидјә дејиләндә нә нәзәрдә тутулур?

6. Фидјә дејиләндә нә нәзәрдә тутулур?

⁶ Фидјә нәјисә ҝери гајтармаг үчүн өдәнилән дәјәрдир. Илк инсан Адәм камил јарадылмышды. Амма о, ҝүнаһ ишләјәндән сонра һәм өзүнү, һәм дә бүтүн өвладларыны әбәди јашамаг имканындан мәһрум етди. Адәмин итирдијини ҝери алмаг үчүн Иса өз камил һәјатыны гурбан верди. Јер үзүндә јашадығы мүддәтдә Иса «һеч бир ҝүнаһ ишләмәмишди, ағзындан јалан сөз чыхмамышды» (1 Бут. 2:22). Буна ҝөрә дә өлән вахт Исанын камил һәјаты Адәмин итирдији камил һәјата мүвафиг иди (1 Кор. 15:45; 1 Тим. 2:6).

7. Иса јер үзүндә оларкән һансы сынагларла үзләшмишди?

⁷ Иса јер үзүндә чохлу сынагларла үзләшмәсинә бахмајараг, Атасына мүкәммәл шәкилдә табе олмушду. Мәсәлән, о, ушаг оланда камил олмасына бахмајараг, гејри-камил валидејнләринин сөзүндән чыхмырды (Лука 2:51). Јенијетмә оланда ону итаәтсизлијә, сәдагәтсизлијә сүрүкләјән истәнилән тәзјигә гаршы дурмушду. Бөјүк оланда исә бирбаша ону Шејтан Иблис сынаға чәкмишди. Һәтта она ачыг-ајдын демишди ки, Аллаһа хәјанәт етсин. Иса бу сынагдан да үзүағ чыхмышды (Мәт. 4:1—11). Шејтан дәридән-габыгдан чыхырды ки, Иса ҝүнаһ етсин вә беләҹә, фидјә өдәнилмәсин.

8. Иса башга һансы сынаглара таб ҝәтирмәли олмушду?

⁸ Јер үзүндә хидмәт едәркән исә Исанын башга сынаглары да олмушду. Дүшмәнләри ону тәгиб едирди, һәтта ону өлдүрмәјә ҹәһд етмишдиләр (Лука 4:28, 29; 13:31). Бундан башга, Иса шаҝирдләринин сәһвләринә дә дөзмәли олмушду (Марк 9:33, 34). Һәјатынын һәлл олундуғу мәһкәмәдә Исаја ишҝәнҹә вериб  әлә салмышдылар. Сонра исә о, әзаблы, алчалдыҹы шәкилдә едам едилмишди (Ибр. 12:1—3). Иса ишҝәнҹә дирәјиндә чәкдији әзаблара тәкбашына, Јеһованын мүдафиәси олмадан дөзмәли олмушду b (Мәт. 27:46).

9. Исанын өзүнү гурбан вермәси барәдә дүшүнәндә һансы һиссләри кечиририк? (1 Бутрус 1:8).

⁹ Ајдындыр ки, Иса Мәсиһ фидјәни тәгдим етмәк үчүн чох әзаба гатлашыб. Исанын биздән өтрү нәләри гурбан вердији барәдә дүшүнәндә она мәһәббәтимиз даһа да артыр. (1 Бутрус 1:8 ајәсини охујун.)

10. Фидјә Јеһоваја нәјин баһасына баша ҝәлди?

¹⁰ Бәс фидјәнин өдәнилмәси үчүн Јеһова нәләрдән кечиб? Јеһова вә Иса ата-бала кими идиләр, араларында мөһкәм бағлылыг вар иди (Мәс. 8:30). Бир фикирләшин: Јеһоваја Исанын јер үзүндә чәкдији әзаблары ҝөрмәк нә гәдәр ағыр иди. Шүбһәсиз ки, Јеһова Оғлунун әзаб чәкдијини, онунла пис рәфтар едилдијини, рәдд едилдијини ҝөрәндә үрәји ган ағлајырды.

11. Иса едам олунан заман, чох јәгин ки, Јеһова һансы һиссләри кечирирди? Нүмунә чәкин.

¹¹ Өвлад иткиси илә үзләшмиш һәр бир валидејн бу иткинин неҹә бөјүк бир дәрд олдуғуну јахшы билир. Дирилмәјә иманымыз нә гәдәр ҝүҹлү олса да, бу, јенә дә иткинин ҝәтирдији ағры-аҹыны там арадан галдырмыр. Бу нүмунә сајәсиндә баша дүшүрүк ки, ерамызын 33-ҹү илинин јазында Јеһова севимли Оғлунун әзаб чәкәрәк өлмәјини изләјәркән һансы һиссләри кечирирди c (Мәт. 3:17).

12. Анма мәрасими әрәфәсиндә нә едә биләрик?

¹² Бәлкә, анма мәрасиминә галан вахт әрзиндә фәрди мүталиәнизин вә ја аиләви ибадәтинизин әсас мөвзусу фидјә олсун? «Јеһованын Шаһидләринин нәшрләри үзрә ахтарыш» вә ја диҝәр вәсаитләрин көмәји илә бу мөвзуну даһа дәриндән арашдыра биләрсиниз d. Һәмчинин «Анма мәрасими илә әлагәдар Мүгәддәс Китабын гираәти» ҹәдвәлиндәки ајәләри охујун. Бу ҹәдвәл «Мәсиһи һәјаты вә ибадәти. Иш дәфтәри»ндә јерләшир. Анма мәрасими ҝүнү исә сәһәр ибадәтинин хүсуси бурахылышына бахмағы унутмајын. Үрәјимизи бу мәрасимә һазырласаг, онда башгаларына даһа јахшы көмәк едә биләҹәјик (Үзр. 7:10).

 БАШГАЛАРЫНА КӨМӘК ЕДИН

13. Башгаларынын да анма мәрасиминдән јарарланмасы үчүн әввәлҹә һансы аддымы атмалыјыг?

¹³ Башгаларынын анма мәрасиминдән јарарланмасы үчүн нә едә биләрик? Әввәлҹә, тәбии ки, онлары дәвәт етмәлијик. Хидмәтдә гаршылашдығымыз инсанлардан әлавә, биз дәвәт едә биләҹәјимиз инсанларын сијаһысыны тута биләрик. Бу сијаһыја гоһумларымызы, иш, мәктәб јолдашларымызы вә диҝәр инсанлары дахил едә биләрик. Һәтта чап форматда кифајәт гәдәр дәвәтнамәмиз олмаса да, онлара дәвәтнамәнин линкини ҝөндәрә биләрик. Ким билир нә гәдәр инсан бу дәвәтә һај верәҹәк! (Ваиз 11:6).

14. Дәвәтнамә вермәјин ваҹиблијини ҝөстәрән һадисә данышын.

¹⁴ Инсаны дәвәтнамә илә дәвәт етмәјин тәсиринин бөјүк олдуғуну унутмајын. Мәсәлән, бир баҹынын әри Јеһованын Шаһиди дејилди. Бир ҝүн о, фәхрлә баҹымыза дејир ки, о да анма мәрасиминә ҝедәҹәк. Баҹы чох тәәҹҹүбләнмишди. Чүнки о, илләрлә јолдашыны мәрасимә дәвәт едирди, амма јолдашы һеч вахт иштирак етмирди. Бәс бу дәфә нә әҹәб ҝетмәк истәјирди? Баҹынын јолдашы она дејир: «Мәнә дәвәтнамә верибләр». Сән демә, таныдығы бир ағсаггал ону шәхсән дәвәт едибмиш. Баҹынын јолдашы һәм һәмин ил, һәм дә нөвбәти илләр анма мәрасиминдә иштирак етди.

15. Инсанлары анма мәрасиминә дәвәт едәркән нәји нәзәрә алмалыјыг?

¹⁵ Дәвәт етдијимиз инсанларын мүәјјән суаллары ола биләр, әсас да онлар һеч вахт ҝөрүшләримиздә иштирак етмәјибләрсә. Она ҝөрә дә онларда јарана биләҹәк суаллара габагҹадан һазырлашсаныз, јахшы оларды (Кол. 4:6). Мәсәлән, кимсә соруша биләр: «Мәрасим неҹә кечирилир? Нә гәдәр давам едир? Ҝејимлә бағлы тәләб вар? Ҝириш өдәнишлидир? Пул јығылыр?» Инсаны анма мәрасиминә дәвәт едән вахт ондан соруша биләрик: «Һансыса суалларыныз вар?» Сонра да онда јаранан суаллара ҹаваб верә биләрик. Һәмчинин инсанын ҝөрүшләримиз барәдә тәсәввүрүнүн олмасы үчүн «Иса пејғәмбәрин өлүмүнү јад един» вә «Ибадәт ҝөрүшләримиз неҹә кечирилир?»  адлы видеолары ҝөстәрмәк олар. Еләҹә дә «Әбәди хошбәхт һәјат!» китабынын 28-ҹи дәрсиндәки мараглы фикирләри онларла бөлүшмәк олар.

16. Анма мәрасиминдә иштирак едәнләрдә һансы суаллар јарана биләр?

¹⁶ Дәвәт етдијимиз инсанларын анма мәрасиминдә иштирак етдикдән сонра башга суаллары јарана биләр. Мәсәлән, онлар соруша биләрләр: «Символлардан нәјә ҝөрә һеч ким гәбул етмәди вә ја ҹәми бир нечә нәфәр гәбул етди? Бу мәрасими нечә мүддәтдән бир гејд едирсиниз? Јеһованын Шаһидләринин бүтүн ҝөрүшләри бу ҹүр кечирилир?» Дүздүр, анма мәрасиминдә натиг бу суалларын чохуна тохунур, амма, ола билсин, јени ҝәләнләрә даһа әтрафлы изаһ етмәк лазым ҝәләҹәк. jw.org сајтында белә бир мәгалә вар: «Нәјә ҝөрә Јеһованын Шаһидләри Мәсиһин өлүмүнү анма мәрасимини диҝәр динләрин кечирдији кими кечирмирләр?» Орадакы фикирләрин көмәји илә бу суаллардан бәзиләринә ҹаваб верә биләрик. Биз истәјирик ки, «әбәди һәјата апаран јолда јеримәјә мејли оланларын һамысы» анма мәрасиминдән фајда әлдә етсин (Һәв. 13:48). Бунун үчүн мәрасимдән әввәл, мәрасим вахты вә сонра әлимиздән ҝәләни етмәјә һазырыг.

ГЕЈРИ-ФӘАЛЛАРА КӨМӘК ЕДИН

17. Ағсаггаллар гејри-фәаллара неҹә көмәк едә биләр? (Һизгијал 34:12, 16).

¹⁷ Әзиз ағсаггаллар, анма мәрасими дөврүндә гејри-фәаллара неҹә көмәк едә биләрсиниз? Онлара диггәт ҝөстәрин. (Һизгијал 34:12, 16 ајәләрини охујун.) Анма мәрасимдән әввәл мәгсәд гојун ки, гејри-фәалларын чохуна зәнҝ едәсиниз. Онлары севдијинизи, лазыми көмәји ҝөстәрмәјә һазыр олдуғунузу дејин. Һәмчинин онлары анма мәрасиминә дәвәт един. Ишдир ҝәлсәләр, онлары меһрибан гаршылајын. Мәрасимдән сонра да бу әзиз баҹы-гардашларымызла әлагәни кәсмәјин. Јеһоваја ҝери дөнмәләри үчүн онлара руһани ҹәһәтдән дајаг олун (1 Бут. 2:25).

18. Гејри-фәаллара көмәк етмәк үчүн һәр биримиз нә едә биләрик? (Ромалылара 12:10).

¹⁸ Јығынҹагда олан һәр бир кәс анма  мәрасиминдә иштирак едән гејри-фәаллара көмәк едә биләр. Неҹә? Онлара мәһәббәт, хејирхаһлыг вә һөрмәт ҝөстәрмәклә. (Ромалылара 12:10 ајәсини охујун.) Нәзәрә алын ки, Јеһованын бу дәјәрли гузуларына јығынҹаглара ҝери дөнмәк чәтин ола биләр. Ола билсин, онлар јығынҹагдакы баҹы-гардашларын нәсә дејәҹәјиндән горхурлар e. Буна ҝөрә дә онлары пис вәзијјәтдә гојан суаллар вермәјин, хәтирләринә дәјәҹәк сөзләр ишләтмәјин (1 Салон. 5:11). Бу баҹы-гардашлар бизим диндашларымыздыр. Онларла бирликдә јенидән Јеһоваја чијин-чијинә хидмәт етмәк бизим үчүн чох хошдур (Зәб. 119:176; Һәв. 20:35).

19. Иса Мәсиһин өлүмүнү анма мәрасимини гејд етмәјин һансы фајдасы вар?

¹⁹ Иса Мәсиһ һәр ил анма мәрасимини гејд етмәји бизә әбәс јерә бујурмајыб. Бунун һәм бизә, һәм дә башгаларына чох хејри вар (Әшј. 48:17, 18). Мәсәлән, Јеһоваја вә Исаја мәһәббәтимиз артыр. Онларын биздән өтрү етдикләрини гијмәтләндирдијимизи ҝөстәририк. Диндашларымызла даһа јахын олуруг. Үстәлик, башгаларына да фидјәнин ҝәтирдији немәтләрдән јарарланмаға көмәк едирик. Одур ки, ҝәлин һамымыз бу илин ән әламәтдар һадисәсинә, анма мәрасими ҝүнүнә һазыр олмаг үчүн әлимиздән ҝәләни едәк!