Стрес организмин ҝәрҝин вәзијјәтә реаксијасыдыр. Бу заман бејинин ҝөндәрдији сигналларын нәтиҹәсиндә ифраз олунан күлли мигдарда һормон бүтүн организмдә дөвр едир. Үрәк дөјүнтүләри артыр, ган тәзјиги јүксәлир, тәнәффүс тезләшир, әзәләләрдә ҝәрҝинлик јараныр. Стресли вәзијјәт кечиб-ҝетдикдә организмин фәалијјәти нормаллашыр.

Стрес организмин чәтин, јахуд тәһлүкәли вәзијјәтләрә гаршы дурмаг үчүн тәбии реаксијасыдыр. Реаксија бејиндә башлајыр. Мүсбәт стрес инсаны дәрһал һәрәкәтә кечмәјә, јахуд реаксија вермәјә тәшвиг едир. Мүәјјән дәрәҹәдә стрес инсана мәгсәдләринә чатмаға, јахуд ишини даһа јахшы ҝөрмәјә, мәсәлән, имтаһан вахты, иш мүсаһибәсиндә, идманла бағлы тәдбирдә даһа уғурлу нәтиҹә әлдә етмәјә көмәк едә биләр.

Лакин стрес узун сүрәрсә, шиддәтли вә ја хроники оларса, инсан организминә зәрәр јетирә биләр. Организм мүтәмади олараг өз ҝүҹүнү сәфәрбәр едәрсә, јахуд һәмишә бу вәзијјәтдә оларса, бунун инсана емосионал, физики вә әгли зәрәри дәјә биләр. Инсанын давранышы, һәмчинин башгалары илә рәфтары дәјишә биләр. Хроники стресдән әзијјәт чәкән инсан вәзијјәтә таб ҝәтирмәк үчүн сигарет чәкмәк, наркотикдән истифадә етмәк вә саирә кими зәрәрли вәрдишләрә алудә ола биләр. Һәтта депрессијаја гапыла биләр, инсанда түкәнмишлик синдрому, суи-гәсд барәдә фикирләр јарана биләр.

Дүздүр, стрес һәр кәсә ејни ҹүр тәсир етмир, лакин бу, мүхтәлиф ҹүр хәстәликләрә јол ача биләр. Стрес бәдәнин, демәк олар ки, бүтүн органларына тәсир едир.