ХОШБӘХТЛИЈИН ВАР-ДӨВЛӘТДӘН АСЫЛЫ ОЛДУҒУНУ ДҮШҮНӘН ИНСАНЛАРА ТЕЗ-ТЕЗ РАСТ ҜӘЛИРИК. Милјонларла инсан даһа чох пул газанмаг үчүн ҝеҹәни ҝүндүзә гатыб ишләјир. Бәс газандыглары пулун вә мал-мүлкүн ҝәтирдији хошбәхтлик нә гәдәр чәкир? Фактлар нәји ҝөстәрир?

«Хошбәхтлик Арашдырмалары Ҝүндәлији» адлы бир нәшрдә гејд олунур ки, әҝәр инсанын әсас тәләбатлары гаршыланырса, әлавә ҝәлир онун үмуми әһвал-руһијјәсини вә хошбәхтлијини елә дә артырмыр («Journal of Happiness Studies»). Әлбәттә, мәсәлә пулда дејил. Бир мәгаләјә әсасән, «хошбәхтлијин итирилмәсинин сәбәби пулдан өтрү дәридән-габыгдан чыхмагдыр» («Monitor on Psychology»). Бу сөзләр тәхминән ики мин ил өнҹә Мүгәддәс Китабда јазылан факты тәсдигләјир: «Һәр ҹүр пислијин көкү пулпәрәстликдир. Бәзиләри бу севдаја дүшәрәк... өзләринә чохлу әзаб чәкдирмишләр» (1 Тимутијә 6:9, 10). Сөһбәт һансы әзаблардан ҝедир?

МАЛ-МҮЛКҮ ИТИРМӘК ГОРХУСУ НАРАҺАТЧЫЛЫҒА ВӘ ЈУХУСУЗЛУҒА СӘБӘБ ОЛУР. «Зәһмәткеш аз да јесә, чох да јесә, јухусу ширин олур, амма варлынын дөвләти ону јатмаға гојмур» (Ваиз 5:12).

ПУЛУН ВӘД ЕТДИЈИ ХОШБӘХТЛИЈИ ДУЈМАМАГ ИНСАНЫ ДИЛХОР ЕДИР. Инсанда пул һәрислији варса, о, нә гәдәр чох газанса да, гане олмајаҹаг. Бу да өз нөвбәсиндә мәјуслуға сәбәб олур. Неҹә дејәрләр: «Ҝүмүш севән ҝүмүшдән дојмаз, вар-дөвләт севән дә газанҹдан» (Ваиз 5:10). Бундан әлавә, вар-дөвләт севдасына дүшән әксәр инсанлар хошбәхтлик ҝәтирән ән мүһүм шејләри — аилә үзвләри вә достлары илә вахт кечирмәји, јахуд ибадәтә вахт ајырмағы бада верир.

ИНВЕСТИСИЈА ВӘ ПУЛУН ДӘЈӘРИНИН АШАҒЫ ДҮШМӘСИ МӘЈУСЛУГ ҜӘТИРИР. «Вар-дөвләт газанмаг үчүн өзүнү јорма. Дајан вә дүшүн, бир дә бахыб ҝөрәҹәксән ки, јохдур. Гарталтәк ганад ачыб ҝөјләрә учаҹаг» (Мәсәлләр 23:4, 5).

ГАНЕ ОЛМАГ. «Ахы биз бу дүнјаја һеч нә ҝәтирмәмишик, өзүмүзлә дә һеч нә апармајаҹағыг. Буна ҝөрә дә јемәјимиз, палтарымыз варса, бунлара гане олаҹағыг» (1 Тимутијә 6:7, 8). Гане олмағы баҹаран инсан дејинмир, ҝилејләнмир вә башгаларынын пахыллығыны чәкмир. Белә инсан ајағыны јорғанына ҝөрә узатдығы үчүн стресс вә нараһатлыға гапылмыр.

СӘХАВӘТ. «Вермәк алмагдан даһа чох хошбәхтлик ҝәтирир» (Һәвариләрин ишләри 20:35). Һәгигәтән дә, башгаларыны хошбәхт етмәк инсанын өзүнә хошбәхтлик бәхш едир. Бәзән сәхавәтли инсанын әлиндән ҝәлән јалныз вахтыны вә ҝүҹүнү сәрф етмәк олса да, о, буну әсирҝәмир. Белә инсан мәһәббәт, һөрмәт вә јахшылығыны әвәзсиз гојмајан әсл достлар газаныр. Бүтүн бунлары исә пулла әлдә етмәк мүмкүн дејил! (Лука 6:38).

ИНСАНЛАРЫ МАДДИЈЈАТДАН ҮСТҮН ТУТМАГ. «Мәһәббәт олан јердә тәрәвәз јемәк, нифрәт олан јердә јағлы дана әти јемәкдән јахшыдыр» (Мәсәлләр 15:17). Һансы мәнада? Инсанлар арасында гаршылыглы мәһәббәт истәнилән мал-мүлкдән дәјәрлидир. Нөвбәти мәгаләләрдә мәһәббәтин хошбәхтлик үчүн зәрури хүсусијјәт олдуғуну ҝөрәҹәјик.

Ҹәнуби Америкада јашајан Сабина адлы бир гадын Мүгәддәс Китаб принсипләринин нә гәдәр дәјәрли олдуғуна өзү шаһид олуб. Әри атыб ҝедәндән сонра ики гызыны доландырмаг үчүн о, ҝеҹә-ҝүндүз вурушурду. Сабина ики јердә ишләјир вә һәр ҝүн сүбһ тездән, саат 4:00-да јухудан дурурду. Ҝәрҝин графикинә бахмајараг, бу гадын Мүгәддәс Китабы өјрәнмәк гәрарына ҝәлди. Бәс нәтиҹә неҹә олду?

Дүздүр, о варланмады, амма онун һәјата бахышы тамамилә дәјишди. Мәсәлән, Аллаһа еһтијаҹы олдуғуну дәрк етмәјин вә бу еһтијаҹы өдәмәјин сајәсиндә хошбәхтлик тапды (Мәтта 5:3). Сабина диндашлары арасында әсл достлар газанды. Өјрәндикләрини башгалары илә бөлүшмәк дә она хошбәхтлик ҝәтирир.

Мүгәддәс Китабда јазылыб: «Һикмәт әмәлләри сајәсиндә һаглы чыхыр» (Мәтта 11:19). Демәк ки, гане олмаг, сәхавәт ҝөстәрмәк вә инсанлары мадди шејләрдән үстүн тутмаг мүтләг ҝөзәл нәтиҹәләр верәҹәк!