Бәзи инсанлар әзабларын сәбәбкарынын Аллаһ олдуғуну дүшүнүб Ондан үз дөндәрир.

Бир чох дин хадимләри бирбаша вә ја долајысыјла өјрәдирләр ки, әзабларын сәбәбкары Аллаһдыр. Мәсәлән, дејирләр:

• Тәбии фәлакәтләр Аллаһын ҹәзасыдыр.

• Аллаһ јахшы адамлары јанына тез апарыр.

• Бөјүк изтираблара сәбәб олан мүһарибәләрдә Аллаһ тәрәф тутур.

Бәс ола биләрми ки, дин хадимләри Аллаһ һаггында јанлыш мәлумат верир? Бәлкә, Аллаһ елә буна ҝөрә онлардан үз дөндәриб?

Әзабларын сәбәбкары Аллаһ дејил.

Әзабларын Аллаһдан олмасы фикри Мүгәддәс Китабда Онун хүсусијјәтләри илә бағлы дејиләнләрә зиддир. Кәламда јазылыб:

«Гајадыр О, һәр иши мүкәммәл... Адилдир, һагдыр О» (ГАНУНУН ТӘКРАРЫ 32:4).

«Аллаһ гәтијјән пислик етмәз, Гүдрәт Саһиби һагсызлыг етмәз!» (ӘЈЈУБ 34:10).

«Гүдрәт Саһиби әдаләти тәһриф етмир» (ӘЈЈУБ 34:12).

Аллаһ Онун һагда јанлыш тәлимләр јајан динләри рәдд едир.

Әзабларын сәбәбкарынын Аллаһ олдуғуну өјрәдән, һәмчинин мүһарибәләрдә, зоракылыгда әли олан динләр Аллаһда икраһ доғурур.

«Пејғәмбәрләр Мәним адымла јаландан пејғәмбәрлик едир. Онлары Мән ҝөндәрмәмишәм, онлара һеч нә бујурмамышам, онларла данышмамышам. Сизә сөјләдикләри шејләр јалан вәһјләрдир,.. өз ујдурмаларыдыр» (ӘРӘМЈА 14:14).

Иса пејғәмбәр дини ријакарлығы ифша едирди.

«Мәнә “Аға, Аға” дејән һәр кәс сәмави Падшаһлыға ҝирмәјәҹәк, јалныз ҝөјдәки Атамын ирадәсини јеринә јетирән ора ҝирәҹәк. О ҝүн чохлары мәнә дејәҹәк: “Аға, Аға, мәҝәр биз сәнин адынла пејғәмбәрлик етмирдик? Мәҝәр сәнин адынла ҹинләри говмурдуг? Мәҝәр сәнин адынла чохлу мөҹүзәләр ҝөстәрмирдик?” О заман онлара дејәҹәјәм: “Мән сизи танымырам! Рәдд олун, ганунсузлуғун гуллуғунда дуранлар!”» (МӘТТА 7:21—23).