Диггәтимизи башгаларынын биздән фәргли олдуғуна ҹәмләјәндә бу фәргләри нөгсан вә ја гүсур һесаб едәҹәјик. Өзүмүзү онлардан үстүн сајаҹағыг. Бу ҹүр мүнасибәт оланда онлара анлајышла јанашмаг чәтин олур. Бу исә дәриндә олан бир проблемдән, гәрәздән хәбәр верир.

«Севинәнләрлә севинин, ағлајанларла ағлајын» (РОМАЛЫЛАРА 12:15).

Мәнасы: Бу мәсләһәти ики сөзлә ифадә етмәк олар: анлајыш ҝөстәрин. Јәни өзүнүзү башгасынын јеринә гојун, онун дәрдинә шәрик олун.

Биз башгасына анлајышла јанашанда һәмин адамла нә гәдәр охшар олдуғумузу баша дүшүрүк. Ҝөрүрүк ки, о да бизим кими ејни һиссләри кечирир. Анлајыш көмәк едир ки, мәншәјиндән асылы олмајараг, бүтүн инсанларын бәшәр аиләсинин үзвү олдуғуну дәрк едәк. О инсанларла арамызда олан охшар ҹәһәтләрә диггәтимизи ҹәмләјәндә онлара мүнасибәтимиз дә јахшылашыр.

Анлајыш бизә һәмчинин башгаларына һөрмәт етмәјә көмәк едир. Сенегалда јашајан Анн-Мари ашағы кастадан һесаб олунан адамлара бир вахтлар јухарыдан ашағы бахырды. Анҹаг анлајыш она бу мүнасибәтини дәјишмәјә көмәк етди. О дејир: «Ашағы кастадан олан адамларын чәтинликләрин и ҝөрәндә фикирләшдим ки, ҝөрәсән мән онларын јериндә олсајдым, өзүмү неҹә һисс едәрдим. Онда баша дүшдүм ки, бу адамлардан һеч дә үстүн дејиләм. Ахы нә етмишәм ки, онлардан үстүн олум?!» Бәли, әҝәр биз башгасынын чәтинликләрини баша дүшмәјә чалышсаг, онлара тәнгиди јанашмајаҹағыг.

Мәнфи мүнасибәт бәсләдијиниз адамларла араныздакы фәргли ҹәһәтләри јох, охшар ҹәһәтләри ҝөрмәјә чалышын. Мәсәлән, онларын нөвбәти һалларда һансы һиссләри кечирдији барәдә дүшүнүн:

• аиләликҹә јемәк јејәндә

• ағыр иш ҝүнүнүн сонунда

• достлары илә вахт кечирәндә

• севдикләри мусигијә гулаг асанда

Сонра өзүнүзү онларын јеринә гојун вә дүшүнүн:

• Кимсә мәним ләјагәтими алчалтсајды, өзүмү неҹә һисс едәрдим?

• Кимсә мәни танымадан һаггымда јанлыш дүшүнсәјди, өзүмү неҹә һисс едәрдим?

• Онларын мәнсуб олдуғу тәбәгәдән олсајдым, өзүмә гаршы һансы рәфтары ҝөзләјәрдим?