Әҝәр хошумуза ҝәлмәјән инсанлардан һәмишә узаг ҝәзсәк, үрәјимиздә гәрәз һиссини даһа да аловландыраҹағыг. Јалныз өзүмүзә бәнзәјән инсанларла достлашсаг, дүшүнәҹәјик ки, тәкҹә биз дүзҝүн фикирләширик, дүзҝүн давранырыг вә тәкҹә бизим һиссләримиз өнәмлидир.

«Үрәјинизи ҝениш ачын» (2 КОРИНФЛИЛӘРӘ 6:13).

Мәнасы: Ајәдәки «үрәк» сөзү инсанын һиссләрини, дујғуларыны билдирир. Әҝәр јалныз өзүмүзә бәнзәјән инсанлары севириксә, бизә ҝениш үрәкли инсан демәк олмаз. Одур ки, биздән фәргләнән инсанларла да достлашмалыјыг.

Башгалары илә шәхсән таныш оланда онларын нәјә ҝөрә биздән фәргләндијини баша дүшүрүк. Мүнасибәтләримиз јахын олдугҹа исә онлара артыг өзүмүзүнкү кими бахырыг. Онларын гәдрини билирик, севинҹләринә, кәдәрләринә шәрик олуруг.

Мәсәлән, Назаринин нүмунәсинә бахаг. О, бир вахтлар мүһаҹирләрә гәрәзли јанашырды. Ҝөрүн она нә көмәк еләди. Назари дејир: «Мән онларла ишләјирдим, бир јердә вахт кечирирдик. Елә адамларла таныш олдум ки, ҹәмијјәтдә онлар һагда дејиләнләрин там әкси идиләр. Фәргли мәдәнијјәтдән олан инсанларла таныш оланда ҝөрүрсән ки, һеч дә һамы ејни дејил. Онлары севмәјә, дәјәрләндирмәјә башлајырсан».

Башга өлкәдән, милләтдән олан, јахуд башга дилдә данышан адамларла сөһбәт етмәјә чалышын. Мәсәлән,..

• Өзләри барәдә данышмағы хаһиш един.

• Онлары наһара дәвәт един.

• Һәјатлары барәдә данышдыгларыны динләјин, нәләрә дәјәр вердикләрини өјрәнин.

Баша дүшмәјә чалышсаныз ки, онларын шәхсијјәтини формалашдыран һәјатда јашадыглары шејләрдир, һәмин ҹәмијјәтдән олан инсанлара мүнасибәтиниз јахшылашаҹаг.