1, 2. Аллаһын хидмәтчиләри бу дүнјада өзләрини неҹә һисс едирләр вә онлар һансы мәскәнә саһибдирләр?

 СӘН өзүнү бу дүнјада евиндәки кими раһат вә сәрбәст һисс едирсәнми? Әҝәр белә дејилсә, бил ки, бу һиссләри кечирән тәк сән дејилсән. Әсрләр боју Јеһованы ҹани-дилдән севән хидмәтчиләри өзләрини бу дүнјада јад вә гәриб кими һисс едирдиләр. Мәсәлән, чадырларда јашајан вә Кәнан дијарыны гарыш-гарыш доланан Аллаһын садиг бәндәләри «о торпагда гәриб вә мүвәггәти сакин олдугларыны» бәјан едирдиләр (Ибр. 11:13).

²Ҝөјләр вәтәндашлығыны алмыш Мәсиһин мәсһ олунмуш давамчылары да өзләрини бу дүнјада «гәриб вә мүвәггәти сакин» һесаб едирләр (Филип. 3:20; 1 Пет. 2:11). Мәсиһин башга гојунлары да онун кими «дүнјаја мәхсус дејилләр» (Јәһ. 10:16; 17:16). Бунунла белә, Аллаһын халгы «евсиз» дејил. Әслиндә, бизим ән тәһлүкәсиз вә иман ҝөзү илә ҝөрә биләҹәјимиз исти бир јувамыз вар. Муса јазмышды: «Еј Јеһова, нәсилдән-нәслә мәскәнимиз Сәнсән» (Мәз. 90:1, Јени Дүнја тәрҹүмәси). Јеһова гәдим дөврләрдә Өз садиг бәндәләринин мәскәни неҹә олмушду? Бәс бу ҝүн Аллаһ һансы мәнада Онун адыны дашыјан халгын мәскәнидир? Вә О, ҝәләҹәкдә јеҝанә тәһлүкәсиз мәскән неҹә олаҹаг?

3. Мәзмур 90:1 ајәсиндә мөвзу кимдир, образ вә бәнзәрлик нәдир?

³Мүгәддәс Китабда истифадә олунан бир чох бәдии ифадәләр кими, Мәзмур 90:1 ајәсиндә дә мөвзу, образ вә бәнзәрлик вар. Бурада мөвзу Јеһовадыр. Образ исә мәскән, јәни јашајыш јеридир. Јеһованын мәскәнә бәнзәдилмәси тәәҹҹүблү дејил. Чүнки Аллаһ Өз халгыны горујур, ахы О, мәһәббәтин тәҹәссүмүдүр (1 Јәһ. 4:8). О һәмчинин садиг бәндәләрини  әмин-аманлыгда јашадан сүлһ Аллаһдыр (Мәз. 4:8). Ҝәлин Ибраһим пејғәмбәрдән башлајараг Аллаһын садиг хидмәтчиләринә һансы мәнада мәскән олдуғуну арашдыраг.

4, 5. Јеһова Ибраһим үчүн неҹә мәскән олду?

⁴Әввәлләр ады Ибрам олан Ибраһим пејғәмбәрә Јеһова бујурмушду: «Өз торпағындан, гоһумларынын арасындан... чых, сәнә ҝөстәрәҹәјим торпаға ҝет». Һәмин вахт Ибраһимин һансы һиссләри кечирдијини биз јалныз тәхмин едә биләрик. Онда һансыса бир нараһатчылыг олса да, шүбһә јохдур ки, Јеһованын нөвбәти сөзләриндән сонра о тохтаглыг тапмышды: «Сәндән бөјүк бир милләт төрәдәҹәјәм, сәнә хејир-дуа верәҹәјәм, адыны уҹалдаҹағам... Сәнә хејир-дуа верәнләрә хејир-дуа верәҹәјәм, сәнә ләнәт едәнләри ләнәтләјәҹәјәм» (Јар. 12:1—3).

⁵Бу сөзләрлә Јеһова ҝөстәрди ки, Ибраһимә вә онун нәслинә тәһлүкәсиз мәскән олмағы Өз өһдәсинә ҝөтүрүб (Јар. 26:1—6). Јеһова вәдини јеринә јетирди. Мисал үчүн, әввәлҹә фирон, сонра исә Ҝерар падшаһы Авимелек Ибраһими өлдүрүб Сараны өзләринә арвад етмәк истәјәндә Јеһова буна јол вермәди. Јеһова бу кими һалла үзләшән Исһагла Ребеканы да горумушду (Јар. 12:14—20; 20:1—14; 26:6—11). Биз охујуруг: «[Јеһова] һеч кими онлара әзаб вермәјә гојмады, онлара ҝөрә падшаһлары тәнбеһ етди. Деди: “Мәсһ етдикләримә дәјмәјин, пејғәмбәрләримә пислик етмәјин”» (Мәз. 105:14, 15).

6. Исһаг Јагуба нә деди вә онда һансы һиссләр јарана биләрди?

⁶Јеһова Ибраһимин нәвәси олан Јагубун да гајғысына галмышды. Јагубун евләнмәк вахты ҝәләндә атасы Исһаг она деди: «Кәнан гызларындан арвад алма. Галхыб Паддан-Арама, ана бабан Бетуелин евинә ҝет. Орадан дајын Лаванын гызларындан өзүнә арвад ал» (Јар. 28:1, 2). Јагуб атасынын сөзүнү јерә салмады. О, вахт итирмәдән Кәнан торпағыны, тәһлүкәсиз јашадығы доғма ев-ешијини тәрк едиб, ҝүман ки, тәк-тәнһа јүзләрлә километр узаглыгда јерләшән Һарана јолланды (Јар. 28:10). Ола билсин, о нараһатчылыг кечирирди: «Ҝөрәсән, мән ата јурдума нә вахт гајыдаҹағам? Дајым мәни неҹә гаршылајаҹаг? Аллаһдан горхан бир һәјат јолдашы тапаҹағаммы?» Јагуб бу кими шејләри ҝөтүр-гој етсә дә, Беер-Шевадан 100 километр узаглыгда јерләшән Луз шәһәринә ҝәлиб чатанда нараһатчылыгларына сон гојулду. Бәс Лузда нә баш верди?

7. Јухуда Јеһова Јагуба неҹә үрәк-дирәк верди?

⁷Лузда Јеһова ҝеҹә јухусунда Јагуба ҝөрүнәрәк деди: «Мән һәмишә сәнинләјәм,  ҝедәҹәјин һәр јердә сәни горујаҹағам вә бу торпаға гајтараҹағам. Дедијими едәнә гәдәр сәни тәрк етмәјәҹәјәм» (Јар. 28:15). Јәгин, бу сөзләр Јагубу хејли сакитләшдирди вә үрәкләндирди! Ҝүман ки, бундан сонра Јагуб Аллаһын вәдләринин јеринә јетәҹәјини даһа бөјүк интизарла ҝөзләмәјә башлады. Әҝәр сән евини тәрк едиб башга өлкәјә көчмүсәнсә вә ола билсин, буну хидмәт мәгсәдилә етмисән, онда Јагубун кечирдији һиссләр сәнә дә танышдыр. Шүбһә јохдур ки, Јеһованын сәнин гајғына неҹә галдығыны да ҝөрмүсән.

8, 9. Һансы мәнада Јеһова Јагуб үчүн мәскән олду вә биз бундан нә өјрәнә биләрик?

⁸Јагуб Һарана чатанда дајысы Лаван ону севинҹлә гаршылады. Сонрадан она гызлары Леа вә Рәһиләни арвад олараг верди. Лакин сонра Лаван Јагубун һаггыны он дәфә дәјишди, әмәјини истисмар етмәјә чалышды! (Јар. 31:41, 42). Јагуб бүтүн бу һагсызлыглара дөздү, чүнки әмин иди ки, Јеһова онун гејдинә галаҹаг вә бу, белә дә олду! Хејли вахтдан сонра Аллаһ Јагуба Кәнана гајытмағы бујуранда «онун чохлу сүрүсү, гарабашы, гулу, дәвәси вә ешшәји» вар иди (Јар. 30:43). Дәрин миннәтдарлыг һиссиндән ирәли ҝәләрәк Јагуб дуа етди: «Гулуна ҝөстәрдијин бүтүн хејирхаһлыға вә сәдагәтә лајиг дејиләм; бу Иордан чајыны тәкҹә дәјәнәјимлә кечдим, инди исә ики дәстә көчүм вар» (Јар. 32:10).

⁹«Еј Јеһова, нәсилдән-нәслә мәскәнимиз Сәнсән» (Мәз. 90:1). Мусанын дуада дедији бу сөзләрдә нә гәдәр һәгигәт вар! Јеһованын мүасир хидмәтчиләри олан бизләр дә бу ҝүн бу сөзләри дејә биләрик. Чүнки «көлҝә кими дәјишкән» олмајан Аллаһ садиг хидмәтчиләри үчүн исти вә тәһлүкәсиз мәскән олараг галыр (Јаг. 1:17). Ҝәлин ҝөрәк неҹә.

10. Һарадан билирик ки, Јеһова бу ҝүн дә садиг хидмәтчиләри үчүн тәһлүкәсиз бир мәскәндир?

¹⁰Тәсәввүр ет ки, мәһкәмәдә бејнәлхалг криминал тәшкилата гаршы шаһидлик едирсән. Онун башчысы чох фәрасәтли вә игтидарлыдыр; үстәлик, инсафсыз гатил вә фырылдагчынын биридир. Динләмә битдикдән сонра мәһкәмә залындан чыханда өзүнү тәһлүкәсизликдә һисс едәҹәксәнми? Чәтин ки! Һәтта, ола билсин, хаһиш едәҹәксән ки, сәнин мүһафизә олунмағын үчүн бир тәдбир ҝөрсүнләр. Бу нүмунә Јеһованын мүасир хидмәтчиләринин вәзијјәтини чох ҝөзәл тәсвир едир: онлар Јеһова һагда ҹәсарәтлә шаһидлик етмәклә Онун баш дүшмәни олан гәддар Шејтаны горхмадан ифша едирләр! (Вәһј 12:17 ајәсини оху.) Бәс Шејтан Аллаһын халгыны сусдурмаға мүвәффәг олубму? Хејр! Биз һәлә дә руһани ҹәннәтдә јашајырыг вә бунун јалныз бир изаһаты вар: Јеһова һәмишә, хүсусилә дә бу сон ҝүнләрдә хидмәтчиләри үчүн пәнаһ јери, мәскәндир. (Јешаја 54:14, 17 ајәләрини оху.) Лакин Шејтан мәскәнимиздән узаг дүшмәјимизә наил оларса, Јеһова артыг мәскәнимиз олмајаҹаг.

11.. Ибраһим, Исһаг вә Јагубун нүмунәсиндән биз нә өјрәнирик?

¹¹Ибраһим, Исһаг вә Јагубун нүмунәсиндән башга ибрәт дәрси дә ҝөтүрә биләрик. Бу инсанлар Кәнан дијарында јашасалар да, оранын сакинләринин пис, әхлагсыз һәрәкәтләринә нифрәт етдикләриндән онлара гајнајыб-гарышмырдылар (Јар. 27:46). Онлар принсипләрин нә олдуғуну чох ҝөзәл баша дүшүрдүләр вә узун-узады «олар-олмазлар» сијаһысындан асылы дејилдиләр. Јеһова вә Онун хүсусијјәтләри һагда билдикләри онлар үчүн кифајәт иди. Онларын мәскәни Јеһова олдуғу үчүн дүнјадан мүмкүн гәдәр узаг  дурмаға чалышырдылар. Бу пејғәмбәрләр бизим үчүн неҹә дә ҝөзәл нүмунәдир! Дост вә әјләнҹә сечиминдә Аллаһын бу садиг хидмәтчиләринин нүмунәсини изләмәјә чалышырсанмы? Әфсуслар олсун ки, бәзи мәсиһчиләрин һәрәкәтләриндән өзләрини Шејтанын дүнјасында раһат һисс етдикләри сезилир. Сән дә бир балаҹа да олсун өзүнү бу дүнјада раһат һисс едирсәнсә, бу барәдә дуа ет. Јадда сахла: бу дүнја Шејтана мәхсусдур вә бурада онун сојуг, егоист руһу һөкм сүрүр (2 Кор. 4:4; Ефес. 2:1, 2).

12. а) Јеһова Өз садиг бәндәләринин гејдинә неҹә галыр? б) Бизи мөһкәмләндирмәк үчүн Јеһованын тәгдим етдикләри һагда нә фикирләширсән?

¹²Јеһованын Ону өзүнә мәскән сечән хидмәтчиләрини руһән мөһкәмләндирмәк үчүн тәгдим етдији һәр шејдән там шәкилдә фајдаланмалыјыг ки, Шејтанын фәндләринин гурбаны олмајаг. Бунлара јығынҹаг ҝөрүшләри, аиләви ибадәт, һәјатда үзләшдијимиз чәтинликләрә синә ҝәрмәкдә вә тәсәлли тапмагда бизә көмәк едән «инсанлар тимсалында һәдијјәләр», јәни Аллаһын тәјин етдији ағсаггаллар аиддир (Ефес. 4:8—12). Вахтилә Рәһбәрлик Шурасынын үзви олан Ҹорҹ Гангас јазмышды: «Аллаһын халгы арасында оланда өзүмү евимдәки кими һисс едирәм, санки, руһани ҹәннәтдәјәм». Сән дә бу кими һиссләри кечирирсәнми?

13. Ибраниләрә 11:13 ајәсиндә бизим үчүн һансы ваҹиб дәрс вар?

¹³Ибраһим, Исһаг вә Јагубун тәрифәлајиг диҝәр хүсусијјәти дә о иди ки, онлар әтрафдакы инсанлардан фәргләнмәкдән горхмурдулар.  Биринҹи абзасда гејд олундуғу кими, онлар «о торпагда гәриб вә мүвәггәти сакин олдугларыны бәјан етдиләр» (Ибр. 11:13). Сән дә бу дүнјанын инсанларындан фәргләнмәјә гәти гәрарлысанмы? Етираф етмәк лазымдыр ки, буну етмәк һәмишә асан олмур. Анҹаг Аллаһын вә һәмиманлыларынын көмәји илә сәндә һәр шеј алынаҹаг. Унутма: сән тәк дејилсән. Јеһоваја хидмәт етмәк истәјәнләрин һамысы мүбаризә апарыр (Ефес. 6:12). Әҝәр Јеһоваја ҝүвәнсәк вә Ону өзүмүзә мәскән етсәк, бу дөјүшдән галиб чыхаҹағыг.

14. Јеһованын хидмәтчиләри һансы «шәһәри» ҝөзләјирдиләр?

¹⁴Ибраһим кими ҝөзүмүзү мүкафатдан чәкмәмәк дә олдугҹа ваҹибдир (2 Кор. 4:18). Һәвари Павел јазмышды ки, Ибраһим «мемары вә иншаатчысы Аллаһ олан, мөһкәм бүнөврә үзәриндә тикилмиш шәһәри ҝөзләјирди» (Ибр. 11:10). Һәмин «шәһәр» Аллаһын Падшаһлығыдыр. Ибраһим һәмин шәһәри ҝөзләмәли иди. Биз исә  јох, чүнки о артыг ҝөјләрдә идарә едир. Үстәлик, ҝетдикҹә артан дәлилләр ҝөстәрир ки, сәмави Падшаһлыг тезликлә бүтүн јери идарә едәҹәк. Аллаһын Падшаһлығы сәнин үчүн реалдырмы? Бу, сәнин һәјата вә бу дүнјаја олан бахышына, еләҹә дә приоритетләринә тәсир едирми? (2 Петер 3:11, 12 ајәләрини оху.)

15. Бу дүнјаја ҝүвәнәнләрин агибәти неҹә олаҹаг?

¹⁵Шејтан дүнјасынын сону јахынлашдыгҹа онун «бәлалары» да артаҹаг (Мат. 24:7, 8). Бөјүк мүсибәт вахты исә вәзијјәт лап писләшәҹәк. Бүтүн инфраструктур чөкәҹәк вә инсанларын ҹанына вәлвәлә дүшәҹәк (Һаб. 3:16, 17). Әлаҹсызлыгдан онлар «мағараларда, дағларда, гајалыгларда» өзләринә сығынаҹаг ахтараҹаг (Вәһј 6:15—17). Анҹаг нә мағаралар, нә дә ки дағабәнзәр сијаси вә өзәл тәшкилатлар инсанлары зәррә гәдәр дә мүдафиә едә билмәјәҹәк.

16. Јығынҹаглара гаршы мүнасибәтимиз неҹә олмалыдыр вә нә үчүн?

¹⁶Буна бахмајараг, Јеһова Аллаһ бөјүк мүсибәт заманы да Өз халгы үчүн тәһлүкәсиз мәскән олаҹаг. Һабаггуг пејғәмбәр кими, онлар да Рәбдә севинҹ тапаҹаглар вә хиласларынын Аллаһы илә шадлыгдан ҹошаҹаглар (Һаб. 3:18). Һәмин кешмәкешли вахтларда Јеһова халгына неҹә мәскән олаҹаг? Бизә јалныз сәбирлә ҝөзләмәк галыр. Лакин бир шејә әмин ола биләрик: Мисир әсарәтиндән чыхан исраиллиләр кими, бөјүк издиһам да мүтәшәккиллијини горујуб сахлајаҹаг вә Онун бүтүн ҝөстәришләринә гаршы диггәтли олаҹаг (Вәһј 7:9; Чыхыш 13:18 ајәсини оху). Һәмин ҝөстәришләр теократик үсулла, ола билсин ки, јығынҹаг васитәсилә вериләҹәк. Јешаја 26:20 ајәсиндә Аллаһын халгынын сығындығы «ичәри [отаглар]» хатырланыр. Бу, бүтүн дүнјада мөвҹуд олан минләрлә јығынҹаглара аид ола биләр. (Ајәни оху.) Сән јығынҹаг ҝөрүшләрини дәјәрләндирирсәнми? Јығынҹаг васитәсилә Јеһованын вердији ҝөстәришләрә дәрһалмы риајәт едирсән? (Ибр. 13:17).

17. Һансы мәнада Јеһова һәтта өлән садиг хидмәтчиләри үчүн «мәскәндир»?

¹⁷Һәтта бөјүк мүсибәтдән өнҹә өлән Јеһованын садиг хидмәтчиләри белә етибарлы јердәдирләр. Һансы мәнада? Ибраһим, Исһаг вә Јагубун өлүмүндән хејли вахт сонра Јеһова Мусаја демишди: «Мән... Ибраһимин Аллаһы, Исһагын Аллаһы вә Јагубун Аллаһыјам» (Чых. 3:6). Иса Мәсиһ бу сөзләри ситат ҝәтириб әлавә етмишди: «О, өлүләрин јох, дириләрин Аллаһыдыр, чүнки Онун үчүн онларын һамысы сағдыр» (Лука 20:38). Сонадәк Јеһоваја садиг галан хидмәтчиләр Јеһова үчүн, санки, сағдырлар, чүнки Јеһова онлары һөкмән дирилдәҹәк (Ваиз 7:1).

18. Јеһова јени дүнјада халгына һансы мәнада «мәскән» олаҹаг?

¹⁸Гаршыдан ҝәлән јени дүнјада Јеһова халгы үчүн башга мәнада «мәскән» олаҹаг. Вәһј 21:3 ајәсиндә дејилир: «Аллаһын чадыры инсанларладыр вә О, инсанларла јашајаҹаг». Јеһова јер үзүнү идарә етмәк үчүн илк мин ил әрзиндә Иса Мәсиһдән истифадә едәҹәк. Миниллијин сонунда исә Аллаһын јерлә бағлы нијјәтини там һәјата кечирдикдән сонра Иса Падшаһлығы Атасына тәһвил верәҹәк (1 Кор. 15:28). Бәшәријјәт камиллијә говушдугдан сонра артыг Исанын васитәчилијинә еһтијаҹ галмајаҹаг. Јеһова Өзү халгы илә олаҹаг. Гаршыда бизи неҹә дә мөһтәшәм ҝәләҹәк ҝөзләјир! Бу әрәфәдә исә ҝәлин Јеһованы өзүмүзә «мәскән» етмәклә Онун гәдимдә јашамыш хидмәтчиләрини тәглид етмәјә чалышаг.