1, 2. Јеһованын досту олан кәсләрин һансы имканлары вар?

«БИЗ 35 илә јахындыр ки, евлијик, — дејә Моника адлы баҹы гејд едир. — Әримлә бир-биримизи чох јахшы таныјырыг. Үстүндән узун илләр кечмәсинә бахмајараг, бир-биримиз һагда һеч вахт билмәдијимиз јени шејләр өјрәнирик». Шүбһәсиз, буну бир чох никаһлара вә достлуг мүнасибәтләринә дә шамил етмәк олар.

² Адәтән, севдијимиз инсанлары даһа јахындан танымаг хошумуза ҝәлир. Анҹаг ән јахшы достлуг Јеһова илә гурулан достлугдур. Биз һеч вахт Онун һаггында һәр шеји өјрәнә билмәрик (Ром. 11:33). Бизим әбәдијјәт бојунҹа Јеһованын кејфијјәтләри барәдә өјрәнмәк вә онлары даһа чох гијмәтләндирмәк имканымыз олаҹаг (Ваиз 3:11).

3. Бу мәгаләдә нәји мүзакирә едәҹәјик?

³ Әввәлки мәгалә бизә Јеһованын ики хүсусијјәтини гијмәтләндирмәјә көмәк етди. Орадан өјрәндик ки, Јеһова әлчатан вә ајры-сечкилик етмәјән Аллаһдыр. Инди исә ҝәлин Онун даһа ики ҹәлбедиҹи хүсусијјәтини — сәхавәтлилик вә мүлајимлик хүсусијјәтләрини мүзакирә едәк. Бунунла биз Јеһованын һамыја хејирхаһлыг едән, јаратдыгларынын һәр биринә мәрһәмәт ҝөстәрән Аллаһ олдуғуну даһа ајдын баша дүшәҹәјик (Мәз. 145:9).

4. Сәхавәтли олмаг өзүнә нәји дахил едир?

⁴ Сәхавәтли олмаг өзүнә нәји дахил едир? Бу суалын ҹавабыны Исанын Һәвариләрин ишләри 20:35 ајәсиндә гәләмә алынмыш сөзләриндә тапырыг: «Вермәк алмагдан даһа чох хошбәхтлик ҝәтирир». Бу садә сөзләрлә Иса әсил сәхавәтлилијин маһијјәтини ачыглајыр. Сәхавәтли инсан башгаларынын рифаһы үчүн вахтыны, ҝүҹүнү вә вәсаитини  әсирҝәмир вә буну ҹанла-башла едир. Әслиндә, сәхавәтлилик һәдијјәнин бөјүклүјү вә ја кичиклији илә јох, инсанын һансы нијјәтдән ирәли ҝәләрәк вермәси илә өлчүлүр. (2 Коринфлиләрә 9:7 ајәсини оху.) Һеч кәс хошбәхт Аллаһымыз Јеһова гәдәр сәхавәтли ола билмәз (1 Тим. 1:11).

5. Јеһова сәхавәтлилији неҹә тәзаһүр етдирир?

⁵ Јеһова сәхавәтлилији неҹә тәзаһүр етдирир? О, бүтүн бәшәријјәтин, о ҹүмләдән һәлә Она ибадәт етмәјән инсанларын тәләбатларынын гајғысына галыр. Һәгигәтән дә, Јеһова һамыја хејирхаһлыг едир. О, «ҝүнәшә әмр едир ки, писләрин дә, јахшыларын да үзәринә доғсун; јағыша әмр едир ки, салеһләрин дә, гејри-салеһләрин дә үзәринә јағсын» (Мат. 5:45). Елә бу сәбәбдән дә һәвари Павел Јеһоваја ибадәт етмәјәнләрлә сөһбәт едәркән демишди: «[О,] сизә јахшылыг едәрәк ҝөјдән јағыш јағдырыр, бәрәкәтли мөвсүмләр вә бол-бол гида верир, үрәјинизи шадлыгла дојдурурду» (Һәв. иш. 14:17). Бурадан ајдын ҝөрүнүр ки, Јеһова һамыја гаршы сәхавәтлидир (Лука 6:35).

6, 7. а) Јеһова хүсусилә кимләрин еһтијаҹларыны өдәмәкдән зөвг алыр? б) Аллаһын Өз садиг хидмәтчиләринин гајғысына неҹә галдығыны нүмунә әсасында ҝөстәрин.

⁶ Өз садиг бәндәләринин еһтијаҹларыны өдәмәк Јеһоваја хүсуси зөвг верир. Давуд падшаһ јазмышды: «Ҝәнҹлијимдән гоҹалығымадәк салеһин тәрк едилдијини, нәслинин чөрәк үчүн диләндијини ҝөрмәмишәм» (Мәз. 37:25). Бир чох садиг мәсиһчиләр Јеһованын бу ҹүр гајғысыны өз үзәрләриндә һисс етмишләр. Ҝәлин бир нүмунәјә бахаг.

⁷ Таммүддәтли хидмәтчи олан Ненси офисиант ишләјирди. Бир нечә ил бундан әввәл о, чәтинликлә үзләшди. О хатырлајыр: «Сәһәриси ҝүн евин кирајәсини өдәмәк үчүн 66 доллар лазым иди. Пулу һарадан тапаҹағымы билмирдим. Проблемим барәдә дуа едиб ишә ҝетдим. Һәмин ахшам бу гәдәр чај пулу алаҹағымы ҝөзләмирдим, чүнки, адәтән, белә вахтларда чох иш олмур. Тәәҹҹүблүдүр ки, һәмин ахшам ресторана бир нечә мүштәри ҝәлмишди. Нөвбәм гуртардыгдан сонра алдығым чај пулуну һесаблајанда ҝөрдүм ки, нә аз, нә чох дүз 66 доллардыр». Ненси әминдир ки, онун еһтијаҹларыны сәхавәтлә өдәјән Јеһова Аллаһдыр (Мат. 6:33).

8. Јеһованын ән сәхавәтли һәдијјәси нәдир?

⁸ Јеһованын бүтүн инсанлара бәхш етдији ән сәхавәтли һәдијјә Оғлунун фидјә гурбанлығыдыр. Иса демишди: «Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын» (Јәһ. 3:16). Бурада ишләдилән «дүнја» сөзү алтында бүтүн бәшәријјәт нәзәрдә тутулур. Бәли, Јеһованын бу сәхавәтли һәдијјәсини гәбул едән бүтүн инсанлар ондан фајдалана биләрләр. Исаја иман едәнләр әбәди һәјата говушаҹаглар (Јәһ. 10:10). Доғрудан да, Јеһованын сәхавәтлилијинә бундан бөјүк сүбут ола биләрми?

9. Јеһованын сәхавәтлилијини неҹә тәглид едә биләрик?

⁹ Јеһованын сәхавәтлилијини неҹә тәглид едә биләрик? «Һәјатдан һәзз алмағымыз үчүн» Јеһова «бизи һәр шејлә бол-бол тәмин [едиб]», биз дә башгаларына севинҹ бәхш етмәк үчүн онлара «әл тутмаға һазыр [олмалыјыг]» (1 Тим. 6:17—19). Севдикләримизә вә корлуг чәкәнләрә һәдијјәләр бағышламаг бизим үчүн чох хошдур . (Ганунун тәкрары 15:7 ајәсини оху.) Сәхавәтли олмағы јаддан чыхартмамаға бизә нә көмәк едә биләр? Бәзи мәсиһчиләр гәрара ҝәлмишләр ки, һәр дәфә һәдијјә аланда өзләри дә кимәсә һәдијјә версинләр. Мәсиһчи јығынҹағында бир чох баҹы-гардашлар сәхавәтлилик ҝөстәрмәкдә јахшы нүмунәдирләр.

10. Сәхавәтли олмағын ән јахшы үсулларындан бири һансыдыр?

¹⁰ Сәхавәтли олмағын ән јахшы үсулларындан бири сөздә вә әмәлдә фәдакар олмагдыр. Биз буну неҹә едә биләрик? Вахтымызы вә ҝүҹүмүзү сәрф едәрәк башгаларына көмәк етмәклә (Гал. 6:10). Нә дәрәҹәдә сәхавәтли олдуғумузу јохламаг үчүн өзүмүздән соруша биләрик: «Башгалары мәним онлары динләмәјә һазыр олдуғуму ҝөрүрләрми? Әҝәр кимсә мәндән һәр һансы иши вә ја тапшырығы јеринә јетирмәк үчүн көмәк истәјирсә, имкан дахилиндә көмәк әлими узадыраммы? Сонунҹу дәфә нә вахт аилә үзвләрими вә ја һәмиманлыларымы үрәкдән тәрифләмишәм?» «Һәмишә верин» ҝөстәришинә әмәл етдијимиз тәгдирдә, Јеһова илә вә достларымызла јахын мүнасибәтләримизин олаҹағына әмин ола биләрик (Лука 6:38; Сүл. мәс. 19:17).

11. Јеһоваја гаршы сәхавәтлилик ҝөстәрмәјин бәзи үсуллары һансылардыр?

¹¹ Биз Јеһоваја гаршы да сәхавәтлилик ҝөстәрә биләрик. «Рәбби вар-дөвләтинлә... шәрәфләндир», — дејә Мүгәддәс Јазылар нәсиһәт едир (Сүл. мәс. 3:9). Малик  олдуғумуз «вар-дөвләтә» Аллаһа хидмәтә һәср едә биләҹәјимиз вахтымыз, ҝүҹүмүз вә вәсаитләримиз дахилдир. Һәтта балаҹа ушаглар белә Јеһоваја гаршы сәхавәтли олмағы өјрәнә биләрләр. Ҹејсон адлы бир ата дејир: «Адәтән, биз ианә етмәк истәдијимиз пулу ушаглара веририк ки, Падшаһлыг залында ианә гутусуна онлар атсын. Бу, онларын чох хошуна ҝәлир, чүнки бунунла Јеһоваја нәсә вермиш олурлар». Кичик јашларындан Јеһоваја нәсә вермәкдән севинҹ дујан ушаглар бөјүјәндә дә сәхавәтли олурлар (Сүл. мәс. 22:6).

12. Мүлајим олмаг нә демәкдир?

¹² Азәрбајҹанҹа Јени Дүнја тәрҹүмәсиндә «ағыллы-камаллы» кими тәрҹүмә олунан јунан сөзү «мүлајим» вә «ҝүзәштә ҝедән» демәкдир (Тит. 3:1, 2). Мүлајим инсан ганунун нөгтәбәнөгтә јеринә јетирилмәсини тәкид етмир, о, кобуд, һәддиндән артыг сәрт вә тәләбкар дејил. Әксинә, башгалары илә јумшаг рәфтар едир, онларын имканларыны вә шәраитләрини нәзәрә алыр. Мүлајим инсан башгаларыны динләмәји баҹарыр, јери дүшәндә онларын истәкләринә ҝүзәштә ҝедир вә өз тәләбләрини онларын вәзијјәтләринә ујғунлашдырыр.

13, 14. а) Јеһова мүлајимлији неҹә тәзаһүр етдирир? б) Јеһованын Лутла рәфтарындан мүлајимлијә даир нә өјрәнирик?

¹³ Јеһова мүлајимлији неҹә тәзаһүр етдирир? Јеһова хидмәтчиләринин һиссләрини нәзәрә алыр вә чох вахт онларын хаһишләрини јеринә јетирир. Мисал үчүн, Онун салеһ Лутла неҹә рәфтар етдијинә диггәт јетирәк. Содом вә Һоморра шәһәрләрини мәһв етмәк гәрарына ҝәләндә О, Лута дағлара гачмағы тапшырмышды. Анҹаг бәзи сәбәбләрдән Лут Јеһоваја јалварды ки, она башга јерә гачмаға иҹазә версин. Лутун хаһишинин нә демәк олдуғу үзәриндә бир анлыг дүшүнүн: әслиндә, Лут Јеһовадан ҝөстәришләрини дәјишмәсини хаһиш едирди! (Јарадылыш 19:17—20 ајәләрини оху.)

¹⁴ Әлбәттә, кимсә Луту зәифликдә вә ја итаәтсизликдә иттиһам едә биләр. Шүбһә јохдур ки, Јеһова Луту хилас етмәјә гадир иди, буна ҝөрә дә онун горхмаға һеч бир әсасы јох иди. Амма Лут јенә дә горхурду. Јеһова онун һиссләринә һөрмәт ҝөстәрди вә мәһв етмәјә һазырлашдығы башга бир шәһәрә гачмаға иҹазә верди. (Јарадылыш 19:21, 22 ајәләрини оху.) Бурадан ајдын ҝөрүнүр ки, Јеһова һәддиндән артыг сәрт вә тәләбкар дејил, мүлајим вә ҝүзәштә ҝедән Аллаһдыр.

15, 16. Јеһованын мүлајимлији Мусанын ганунунда өз әксини неҹә тапыб? (Мәгаләнин әввәлиндәки шәклә бах.)

¹⁵ Инди исә ҝәлин Мусанын ганунда өз әксини тапан Јеһованын мүлајимлијинин башга бир нүмунәсинә нәзәр салаг. Әҝәр исраилли гојун вә ја кечи гурбаны ҝәтирмәк үчүн һәддән артыг касыб идисә, ики гумру гушу вә ја ики ҝөјәрчин гурбаны тәгдим едә биләрди. Бәс әҝәр онун ҝүҹү ики ҝөјәрчинә дә чатмырдыса, онда неҹә? Белә олан һалда, Јеһова корлуг ичиндә јашајан исраиллијә бир аз ун тәгдими ҝәтирмәјә иҹазә верирди. Анҹаг ваҹиб бир амилә диггәт јетирәк: исраилли истәнилән нөв јох, јалныз «нарын ун», һөрмәтли гонаг үчүн биширилән чөрәјин унундан тәгдим етмәли иди (Јар. 18:6). Нәјә ҝөрә бу, белә әһәмијјәтли иди? (Левилиләрә 5:7, 11 ајәләрини оху.)

¹⁶ Тәсәввүр един ки, сиз исраиллисиниз, өзү дә чох касыбсыныз. Әлиниздә бир гәдәр ун мүгәддәс мәскәнә дахил олур вә варлы исраиллиләрин һејван гурбанлары ҝәтирдикләрини ҝөрүрсүнүз. Ола билсин, бу гәдәр әһәмијјәтсиз бир гурбан ҝәтирдијинизә ҝөрә хәҹаләт чәкирсиниз. Сонра исә хатырлајырсыныз ки, тәгдиминиз Јеһованын ҝөзүндә дәјәрлидир. Нәјә ҝөрә? Әввәла, Јеһова тәләб едир ки, ҝәтирилән ун әла нөв олсун. Маһијјәт етибарилә, Јеһова исраиллиләрә белә демишди: «Билирәм, сәнин башгалары гәдәр имканын јохдур, анҹаг ону да билирәм ки, сән Мәнә малик олдуғунун ән  јахшысыны верирсән». Һәгигәтән дә, Јеһова хидмәтчиләринин мәһдудијјәтләрини вә шәраитләрини нәзәрә алараг мүлајимлик тәзаһүр етдирир (Мәз. 103:14).

17. Јеһова һансы хидмәти гәбул едир?

¹⁷ Јеһованын мүлајим олдуғуну вә ҹанла-башла етдијимиз хидмәти гәбул етдијини билмәк бизә тәсәлли верир (Колос. 3:23). Констанс адлы јашлы италјан баҹы дејир: «Јарадан барәдә башгаларына данышмаг ән чох севдијим ишдир. Елә буна ҝөрә дә мән һәмишә тәблиғ едир вә Мүгәддәс Китаб өјрәнмәси кечирирәм. Сағламлығым уҹбатындан даһа чох хидмәт едә билмәдијим үчүн һејфсиләнирәм. Анҹаг баша дүшүрәм ки, Јеһова имканларымын мәһдуд олдуғуну билдији вә мәни севдији үчүн ҝөрдүјүм ишләри гијмәтләндирир».

18. Валидејнләр Јеһованын нүмунәсини неҹә тәглид биләрләр?

¹⁸ Јеһованын мүлајимлијини неҹә тәглид едә биләрик? Ҝәлин Јеһованын Лутла неҹә рәфтар етдији барәдә бир дә дүшүнәк. Онун Лута һара ҝетмәли олдуғуну демәјә там ихтијары чатырды. Анҹаг О, өз һиссләрини дилә ҝәтирән Луту хејирхаһлыгла динләди вә онун хаһишини јеринә јетирди. Әҝәр өвладларыныз варса, Јеһованын нүмунәсини тәглид един. Ушагларынызын хаһишләрини динләјиб мүнасиб олан арзуларыны һәјата кечирин. Бунунла әлагәдар «Ҝөзәтчи гүлләси» журналынын 2007-ҹи ил сентјабр сајында јазылмышды ки, бәзи валидејнләр евдә тәсис етдикләри гајда-ганунлары ушаглары илә мүзакирә едә биләрләр. Мәсәлән, валидејнләрин ушагларынын нә заман евә ҝәлмәли олдугларына даир конкрет вахт тәјин етмәјә ихтијарлары чатыр. Һәтта белә олан һалда да мәсиһчи валидејнләр һәмин вахтла бағлы ушагларынын фикирләринә гулаг аса биләрләр. Мүгәддәс Китаб принсипләри позулмурса, бәзән валидејнләр ушагларына ҝүзәштә ҝетмәји гәрара ала биләрләр. Ола билсин, валидејнләр диггәт јетирмишләр ки, онлар евдәки гајда-ганунлара даир ушагларын фикирләрини нәзәрә аланда бу гајдалары баша дүшмәк вә табе олмаг ушаглара асан олур.

19. Ағсаггаллар Јеһованын мүлајимлијини неҹә тәглид едә биләрләр?

¹⁹ Јығынҹаг ағсаггаллары һәмиманлыларынын вәзијјәтини нәзәрә алараг Јеһованын мүлајимлијини тәглид етмәјә чалышырлар. Унутмајаг ки, касыб исраиллиләрин ҝәтирдији гурбанлар белә Јеһова үчүн дәјәрли иди. Ејнилә, бәзи баҹы-гардашларымыз да зәиф сағламлыг вә гоҹалыг уҹбатындан, еләҹә дә диҝәр сәбәбләрдән хидмәтдә чох иштирак едә билмирләр. Бәс әҝәр бу әзиз баҹы-гардашларымызын мәһдудијјәтләри онлары руһдан салырса, онда неҹә? Ағсаггаллар онлары хејирхаһлыгла әмин едә биләрләр ки, әлләриндән ҝәләни етдикләри үчүн Јеһова онлары севир (Марк 12:41—44).

20. Аллаһа хидмәтдә өзүмүзә ҝүзәштә ҝетмәк нә демәк дејил? Изаһ един.

²⁰ Әлбәттә, мүлајимлик, јәни ҝүзәштә ҝетмәк һеч дә өзүмүзә јазығымыз ҝәләрәк Аллаһа хидмәтә даһа аз вахт сәрф етмәк демәк дејил (Мат. 16:22). Биз имканымыз ола-ола хидмәтә аз вахт ајырараг өзүмүзә бәраәт газандырмамалыјыг. Әксинә, Падшаһлығын марагларыны дәстәкләмәк үчүн вар ҝүҹүмүзлә чалышмалыјыг (Лука 13:24). Һәгигәтән дә, бу ики шеј арасында таразлығы горумаг ваҹибдир. Дүздүр, бир тәрәфдән, биз хидмәтдән гачмырыг, вар ҝүҹүмүзлә чалышырыг. Диҝәр тәрәфдән исә, Јеһованын һеч вахт ҝүҹүмүздән артыг шеј тәләб етмәдијини унутмуруг. Әҝәр Она малик олдуғумузун ән јахшысыны вермәјә чалышсаг, әмин ола биләрик ки, О, биздән разы галаҹаг. Бу ҹүр гәдирбилән вә мүлајим Ағаја гуллуг етмәк неҹә дә хошдур! Нөвбәти мәгаләдә биз Јеһованын даһа ики ҹәлбедиҹи хүсусијјәтини нәзәрдән кечирәҹәјик (Мәз. 73:28).