Јығынҹагдан кәнар едилмиш адамын Падшаһлыг залында һарада отурмасы илә бағлы һәддән артыг нараһат олмаға сәбәб јохдур. Бу журнал валидејнләрә јығынҹагдан кәнар едилмиш вә онларла бирҝә јашајан өвладларына руһани көмәк етмәләри үчүн чохлу тәшвигедиҹи мәсләһәтләр верир. «Ҝөзәтчи гүлләси»нин 1989-ҹу ил 15 сентјабр сајынын 16, 17-ҹи сәһифәләриндә (рус.) дејилир ки, валидејнләр јығынҹагдан кәнар едилмиш вә онларла бирҝә јашајан һәдди-бүлуға чатмамыш ушагларына Мүгәддәс Китабы өјрәдә биләрләр. Үмид вар ки, дүз јола гајытмасы үчүн ушаг она верилән лазыми дәстәји гәбул едәҹәк.

Падшаһлыг залында һарада отурмаг мәсәләсинә ҝәлдикдә исә, мәнтиглидир ки, јығынҹагдан кәнар едилмиш азјашлы сакитҹә өз валидејнләринин јанында отура биләр. Јығынҹагдан кәнар едилмиш инсанын залын ахырында отурмасы шәрт олмадығы кими, кәнар едилмиш ушағын өз валидејнләринин јанында отурмасы да проблем едилмәмәлидир. Әлбәттә, ушағынын руһанилијинин гејдинә галан валидејн онун ҝөрүшләрә диггәтлә гулаг асдығына әмин олмаг истәјир. Бу һалда, јахшы олар ки, ушаг һарада ҝәлди јох, өз валидејнләринин јанында отурсун.

Бәс әҝәр јығынҹагдан кәнар едилмиш өвлад артыг валидејнләри илә галмырса, онда неҹә? Бу о демәкдирми ки, о, валидејнләринин јанында әјләшә билмәз? Әввәлләр, «Ҝөзәтчи гүлләси» журналында мәсиһчинин онунла бир евдә јашамајан вә јығынҹагдан кәнар едилмиш гоһумла үнсијјәт гурмаг мәсәләсиндә неҹә давранмалы олдуғуна даир ајдын ҝөстәришләр верилиб *. Лакин јығынҹагдан кәнар едилән кәсин ҝөрүш заманы гоһумларынын јанында сакитҹә әјләшмәси илә онларын лүзумсуз јерә онунла үнсијјәтә ҝирмәјә чалышмасы арасында бөјүк фәрг вар. Аиләдәки мәсиһчиләр јығынҹагдан кәнар едилмиш гоһумларына дүзҝүн мүнасибәт бәсләјирләрсә вә Мүгәддәс Јазыларда белә инсанла үнсијјәтә даир верилән мәсләһәтләрә һөрмәтлә јанашырларса, нараһатчылыға сәбәб јохдур (1 Кор. 5:11, 13; 2 Јәһ. 11).

Јығынҹагдан кәнар едилмиш адам өзүнү дүзҝүн апардығы тәгдирдә, онун гоһумларынын вә ја јығынҹағын диҝәр үзвләринин јанында отурдуғуна ҝөрә нараһат олмаға дәјмәз. Инсанын һарада отурмасына мәһдудијјәтләр гојмаг, вәзијјәтдән асылы олараг, мүхтәлиф проблемләрә ҝәтириб чыхара биләр. Әҝәр, мәсиһчи гоһумлар да дахил олмагла, јығынҹагда иштирак едәнләрин һамысы Мүгәддәс Китабда јығынҹагдан кәнар едилмиш адамларла бағлы верилән принсипләрә риајәт едирләрсә вә бу, һәмиманлыларын бүдрәмәсинә сәбәб олмурса, онда онларын јығынҹагда һарада әјләшдикләринә ҝөрә нараһат олмаға еһтијаҹ јохдур.