1. Сәбримиз нә үчүн түкәнә биләр?

МӘСИҺИН идарә етдији Падшаһлыг 1914-ҹү илдә гуруландан сонра Шејтан системинин сон ҝүнләри башлады. Ҝөјдә баш верән мүһарибәдән сонра Иса Иблиси вә ҹинләри јерин һүдудларына атды. (Вәһј 12:7—9 ајәләрини оху.) Шејтан «вахтынын аз олдуғуну» јахшы билир (Вәһј 12:12). Лакин бу вахт онилликләрдир давам едир вә кимләрәсә елә ҝәлә биләр ки, сон ҝүнләр узандыгҹа узаныр. Бәс биз неҹә, Јеһованын һәрәкәтә кечәҹәјини ҝөзләдијимиз мүддәтдә сәбирсизлик ҝөстәририкми?

2. Бу мәгаләдә нәләр нәзәрдән кечириләҹәк?

² Сәбирсизлик тәһлүкәли ола биләр, чүнки инсан белә вәзијјәтдә дүшүнмәдән һәрәкәт едир. Бәс биз сәбирлә неҹә ҝөзләјә биләрик? Бу мәгалә нөвбәти суаллара ҹаваб вермәклә бизә сәбирлә ҝөзләмәјә көмәк едәҹәк. 1) Микеја пејғәмбәрдән сәбирлә ҝөзләмәјә даир нә өјрәнә биләрик? 2) Артыг сонун ҝәлдијинә әламәт нә олаҹаг? 3) Јеһованын сәбринә ҝөрә миннәтдарлығымызы неҹә билдирә биләрик?

3. Микејанын ҝүнләриндә Исраилдә вәзијјәт нә јердә иди?

³ Микеја 7:2—6 ајәләрини оху. Јеһованын пејғәмбәри Микеја ҝөрүрдү ки, гәддар падшаһ Ахавын рәһбәрлији алтында олдуглары мүддәтдә исраиллиләрин руһани вәзијјәти ҝетдикҹә писләшир. О, итаәтсиз исраиллиләри тиканла мүгајисә етмишди. Тикан инсаны јараладығы кими, корланмыш исраиллиләр дә әтрафларындакы инсанлара зәрәр вурурдулар. Халгын вәзијјәти о гәдәр пис иди ки, һәтта аилә мүнасибәтләри дә корланмышды. Микеја вәзијјәти дәјишмәјин онун әлиндә олмадығыны биләрәк үрәјини Јеһоваја бошалтды. О, сәбирлә Аллаһын һәрәкәтә кечәҹәјини ҝөзләди. Микеја әмин иди ки,  Јеһова мәсләһәт билдији вахтда ишә мүдахилә едәҹәк.

4. Биз һансы чәтинликләрлә үзләширик?

⁴ Микеја кими, биз дә худбин инсанлар арасында јашајырыг. Бу ҝүн инсанларын әксәријјәти «нанкор, вәфасыз, доғмаларыны севмәјән»дир (2 Тим. 3:2, 3). Иш вә ја синиф јолдашларымызын, еләҹә дә гоншуларымызын егоистлијини ҝөрмәк бизи мәјус едир. Анҹаг Аллаһын хидмәтчиләриндән бәзиләринин даһа бөјүк проблемләри олур. Иса давамчыларынын аиләләри тәрәфиндән тәгиб олунаҹагларыны демишди. О, хош хәбәрин инсанлара неҹә тәсир едәҹәјини тәсвир едәркән Микеја 7:6 ајәсиндәки сөзләрә бәнзәр сөзләр демишди: «Мән оғулу атадан, гызы анадан, ҝәлини гајынанадан ајырмаға ҝәлмишәм. Бәли, инсанын дүшмәнләри өз евиндәкиләри олаҹаг» (Мат. 10:35, 36). Иманымыза шәрик олмајан аилә үзвләримиз тәрәфиндән едилән ришхәндләрә вә тәгибләрә дөзмәк олдугҹа чәтиндир. Әҝәр бу ҹүр сынагларла үзләшириксә, ҝәлин һеч вахт тәслим олмајаг. Әксинә, садиглијимизи горујараг Јеһованын мәсәләни неҹә һәлл едәҹәјини сәбирлә ҝөзләјәк. Даим Ондан көмәк истәсәк, О, бизи мөһкәмләндирәҹәк вә таб ҝәтирмәјимиз үчүн еһтијаҹ дујдуғумуз мүдриклији верәҹәк.

5, 6. Јеһова Микејаны неҹә мүкафатландырды, бәс о, нәјин јеринә јетдијини ҝөрмәди?

⁵ Јеһова Микејаны сәбринә ҝөрә мүкафатландырды. Микеја Ахаз падшаһын вә онун пис һакимијјәтинин сүгутуну өз ҝөзләри ҝөрмүшдү. О һәмчинин Ахазын оғлу Хизгијанын тахта әјләшдијини вә тәмиз ибадәти бәрпа етдијини ҝөрмүшдү. Микеја Јеһованын онун васитәсилә Самарија барәдә дедији һөкм хәбәринин ашшурлулар Исраилин шимал падшаһлығыны әлә кечирән заман јеринә јетдијинин дә шаһиди олмушду (Мик. 1:6).

⁶ Лакин Микеја Јеһованын онун васитәсилә дедији пејғәмбәрликләрин һамысынын јеринә јетдијини ҝөрмәди. Мисал үчүн, о јазмышды: «Ахыр заманда Рәббин еви олан дағ дағларын зирвәсиндә мөһкәм дураҹаг, тәпәләрдән јухары уҹалаҹаг. Халглар она сары ҝәләҹәк. Чох милләтләр ҝәлиб дејәҹәк: “Ҝәлин Рәббин дағына... галхаг”» (Мик. 4:1, 2). Микеја бу пејғәмбәрлијин јеринә јетмәсиндән узун илләр габаг өлдү. Әтрафындакы инсанларын нә ојунларындан чыхмаларына бахмајараг, о, өмрүнүн сонуна кими Јеһоваја садиг галмаға гәтијјәтли иди. Бу барәдә Микеја јазмышды: «Бүтүн халглар, өз аллаһларынын ады илә ҝетсәләр белә, биз даим вә әбәди Аллаһымыз Рәббин ады илә ҝедирик» (Мик. 4:5). Микеја чәтин анларда сәбирлә ҝөзләмәји баҹарырды, чүнки Јеһованын бүтүн нијјәтләрини һәјата кечирәҹәјинә там әмин иди. Бәли, садиг пејғәмбәр Јеһоваја етибар едирди.

7, 8. а) Јеһоваја етибар етмәк үчүн һансы сәбәбимиз вар? б) Вахтын тез кечмәси үчүн нә едә биләрик?

⁷ Биз дә Јеһоваја бу ҹүр етибар едирикми? Бунун үчүн әсаслы сәбәбимиз вар. Белә ки, биз Микејанын пејғәмбәрлијинин јеринә јетдијини өз ҝөзләримизлә ҝөрүрүк. «Ахыр заманда» һәр милләтдән, һәр гәбиләдән, һәр халгдан вә һәр дилдән олан милјонларла инсан «Рәббин еви олан дағ»а ахышыр. Аллаһа хидмәт едән бу инсанлар бир-биринә дүшмән халглардан олсалар да, онлар «гылынҹларындан котан» дүзәлдиб вә артыг «дава етмәји [өјрәнмирләр]» (Мик. 4:3). Биз нә хошбәхтик ки, Јеһованын сүлһсевәр халгынын арасындајыг!

⁸ Ајдындыр ки, биз Јеһованын бу пис системә тезликлә сон гојмасыны истәјирик. Анҹаг сәбирлә ҝөзләмәк үчүн ҝәрәк һадисәләрә Јеһованын ҝөзү илә бахаг. О, бир ҝүн тәјин едиб вә һәмин ҝүн «сечдији адам» — Иса Мәсиһ васитәсилә бәшәријјәтә һөкм чыхараҹаг (Һәв. иш. 17:31).  Бундан әввәл исә Аллаһ һәр кәсә «һәгигәт барәсиндә дәгиг билијә» јијәләнмәјә, бу билијә әсасән давранмаға вә хиласа наил олмаға имкан верир. Ахы инсанларын дәјәрли һәјаты тәһлүкә алтындадыр. (1 Тимотејә 2:3, 4 ајәләрини оху.) Әҝәр биз инсанларын Аллаһ һаггында дәгиг билијә јијәләнмәләринә даим көмәк етсәк, Јеһованын һөкм ҝүнү бизим үчүн даһа тез ҝәләҹәк. Вахт бир ҝөз гырпымында кечәҹәк. О ҝүн ҝәләндә вахтымызы Падшаһлығын тәблиғ ишинә сәрф етдијимиз үчүн чох севинәҹәјик!

9-11. 1 Салониклиләрә 5:3 ајәсиндәки пејғәмбәрлик јеринә јетибми? Изаһ един.

⁹ 1 Салониклиләрә 5:1—3 ајәләрини оху. Јахын ҝәләҹәкдә милләтләр: «Сүлһ вә тәһлүкәсизлик», — дејә бәјан едәҹәкләр. Бу бәјаната алданмамаг үчүн ҝәлин «ојаг галыб ајыг олаг» (1 Салон. 5:6). Руһән ајыг галмаг үчүн јахшы оларды ки, бу ваҹиб бәјаната ҝәтириб чыхаран һадисәләри гысаҹа нәзәрдән кечирәк.

¹⁰ Баш вермиш дүнја мүһарибәләринин һәр бириндән сонра милләтләр сүлһ тәләб етмишдиләр. Биринҹи Дүнја мүһарибәсиндән сонра сүлһ ҝәтирәҹәји үмиди илә Милләтләр Ҹәмијјәти гурулду. Икинҹи Дүнја мүһарибәсиндән сонра исә инсанлар Бирләшмиш Милләтләр Тәшкилатынын бәшәријјәтә сүлһ ҝәтирәҹәјини ҝөзләјирдиләр. Һөкумәт вә дин рәһбәрләри дә бу тәшкилатлардан ејни шеји ҝөзләјирдиләр. Мисал үчүн, Бирләшмиш Милләтләр Тәшкилаты 1986-ҹы или Бејнәлхалг сүлһ или елан етди. Һәмин ил бир чох милләтләрин вә динләрин башчылары топлашыб Ассисидәки (Италија) Католик килсәсинин башчысы илә бирҝә сүлһ үчүн дуалар етдиләр.

¹¹ Лакин сүлһ вә тәһлүкәсизликлә бағлы нә бу, нә дә диҝәр бәјанатлар 1 Салониклиләрә 5:3 ајәсиндәки пејғәмбәрлијин јеринә јетмәси олмады. Нәјә әсасән белә демәк олар? Чүнки ајәдә дејилән «гәфил [мәһв]» һәлә баш вермәјиб.

12. «Сүлһ вә тәһлүкәсизлик» бәјанаты һагда нә билирик?

¹² «Сүлһ вә тәһлүкәсизлик»лә бағлы бу  ваҹиб бәјанат ҝәләҹәкдә ким тәрәфиндән вериләҹәк? Христиан дүнјасынын вә диҝәр динләрин башчыларынын ролу нәдән ибарәт олаҹаг? Өлкә башчылары бу бәјаната неҹә ҹәлб олунаҹаг? Мүгәддәс Јазыларда бу барәдә һеч нә дејилмир. Анҹаг биз бир шеји билирик ки, онлар нә бәјан етсәләр дә, дедикләри нә гәдәр инандырыҹы сәсләнсә дә, бунлар јалныз гуру сөзләр олаҹаг. Һәмин вахт көһнә систем һәлә дә Шејтанын рәһбәрлији алтында олаҹаг. Бу систем өзәјинә кими чүрүкдүр вә онда һеч нә дәјишмәјәҹәк. Бизләрдән киминсә Шејтанын тәблиғатына ујуб мәсиһчи битәрәфлијини итирмәси неҹә дә аҹынаҹаглы оларды!

13. Мәләкләр дағыдыҹы күләкләри нә үчүн тутуб сахлајырлар?

¹³ Вәһј 7:1—4 ајәләрини оху. Биз 1 Салониклиләрә 5:3 ајәсинин јеринә јетмәсини ҝөзләдијимиз мүддәтдә гүдрәтли мәләкләр бөјүк мүсибәтин дағыдыҹы күләкләрини тутуб сахлајырлар. Онлар нәји ҝөзләјирләр? Ваҹиб сәбәбләрдән бири һәвари Јәһјанын тәсвир етдији Аллаһын мәсһ олунмуш гулларынын сонунҹу мөһүрләнмәсидир *. Сонунҹу мөһүрләнмә тамамлананда мәләкләр дағыдыҹы күләкләри бурахаҹаглар. О заман нә баш верәҹәк?

14. Бөјүк Бабилин мәһвинин јахын олдуғу нәдән ҝөрүнүр?

¹⁴ Јалан динин дүнја империјасы олан Бөјүк Бабил лајиг олдуғу мәһвә дүчар олаҹаг. Халглар, күтләләр, милләтләр вә дилләр она һеч бир чарә гыла билмәјәҹәкләр. Чүнки, онун сонунун јахын олдуғуну ҝөстәрән әламәтләр артыг ҝөз габағындадыр (Вәһј 16:12; 17:15—18; 18:7, 8, 21). Әслиндә, онун дәстәкләнмәдији артыг индидән — динләрин вә дин рәһбәрләринин күтләви информасија васитәләриндә даһа чох тәнгид атәшинә тутулмасындан ҝөрүнүр. Бунунла белә, Бөјүк Бабилин рәһбәрләри тәһлүкә алтында олдугларыны дүшүнмүрләр. Анҹаг онлар бөјүк сәһв едирләр! «Сүлһ вә тәһлүкәсизлик» бәјанатындан сонра Шејтан дүнјасынын сијаси гүввәләри јалан динә гәфил һүҹум едәҹәк вә ону јер үзүндән силәҹәк. Бөјүк Бабилин изи-тозу галмајаҹаг! Сөзсүз, бу ҹүр әламәтдар һадисәләри сәбирлә ҝөзләмәјә дәјәр! (Вәһј 18:8, 10).

15. Нәјә ҝөрә Јеһова тәләм-тәләсик һәрәкәтә кечмир?

¹⁵ Инсанларын Онун адыны бәднам етмәләринә бахмајараг, Јеһова һәрәкәтә кечмәк үчүн сәбирлә мүнасиб вахты ҝөзләјир. Јеһова һеч бир тәмизгәлбли инсанын мәһв олмасынын истәмир (2 Пет. 3:9, 10). Бәс биз Јеһованын һиссләринә шәрикикми? Јеһованын ҝүнү ҝәлмәмишдән габаг, биз Онун сәбринә ҝөрә миннәтдарлығымызы нөвбәти үсулларла ҝөстәрә биләрик.

16, 17. а) Нәјә ҝөрә гејри-фәаллара көмәк етмәлијик? б) Нәјә ҝөрә инди гејри-фәалларын Јеһоваја гајытмасынын вахтыдыр?

¹⁶ Гејри-фәал оланлара көмәк един. Иса демишди ки, һәтта итмиш бир гојунун тапылмасы ҝөјдә бөјүк севинҹә сәбәб олур (Мат. 18:14; Лука 15:3—7). Јеһова Онун адына мәһәббәт ҝөстәрән, һәтта һал-һазырда гејри-фәал олан һәр кәсин гејдинә галыр. Биз бу ҹүр инсанлара јығынҹаға гајытмаға көмәк едәндә Јеһованы вә мәләкләри севиндирмиш олуруг.

¹⁷ Ола билсин, сиз дә һал-һазырда Аллаһа хидмәтдән сојумусунуз. Бәлкә дә, јығынҹагда кимсә хәтринизә дәјдијинә ҝөрә Јеһованын тәшкилаты илә әлагәни кәсмисиниз. Јәгин, баш верәнләрин үстүндән бир гәдәр вахт кечиб. Инди өзүнүздән  сорушун: «Әввәлкинә нисбәтән даһа мәналы вә хошбәхт һәјат сүрүрәм? Хәтримә дәјән Јеһова олуб, јохса гејри-камил инсан? Јеһова мәни јаралајаҹаг нәсә едиб?» Әслиндә, Јеһова бизә гаршы һәмишә хејирхаһ олуб. Һәтта Она һәср олунмағымыза ујғун јашамасаг да, О, севинҹ ҝәтирән шејләрдән бизи мәһрум етмир (Јаг. 1:16, 17). Јеһованын ҝүнү тезликлә јетишәҹәк. Инди сәмави Атамызын исти гуҹағына вә јығынҹаға — бу ахыр ҝүнләрдә ән тәһлүкәсиз јерә гајытмағын әсил вахтыдыр (Ганун. т. 33:27; Ибр. 10:24, 25).

18. Үзәримиздә рәһбәрлик едәнләри нә үчүн дәстәкләмәлијик?

¹⁸ Үзәриниздә рәһбәрлик едәнләри сәдагәтлә дәстәкләјин. Јеһова, гајғыкеш Чобан кими, бизә рәһбәрлик верир вә горујур. О, Оғлуну Өз сүрүсүнүн үзәринә Баш Чобан тәјин едиб (1 Пет. 5:4). Ағсаггаллар 100 000-дән чох јығынҹагда Аллаһын сүрүсүнү ҹанла-башла отарырлар (Һәв. иш. 20:28). Үзәримиздә рәһбәрлик едәнләри сәдагәтлә дәстәкләмәклә бизим үчүн етдикләри һәр шејә ҝөрә Јеһоваја вә Исаја миннәтдарлығымызы билдирмиш олуруг.

19. Бир-биримизә даһа јахын олмаг үчүн нә едә биләрик?

¹⁹ Бир-биринизә даһа јахын олун. Бу нә демәкдир? Дүшмән јахшы тәлим алмыш ордуја һүҹум чәкәндә, адәтән, әсҝәрләр сыраларыны сыхлашдырмаға, јәни бир-биринә јахын дајанмаға чалышырлар. Бунунла онлар мөһкәм мүдафиә јарадырлар. Шејтан Аллаһын халгына һүҹумларыны ҝүҹләндирир. Инди бир-биримизлә дидишмәјин вахты дејил. Инди бир-биримизә даһа јахын олмағын, бир-биримизин гејри-камиллијинә ҝөз јуммағын вә Јеһованын рәһбәрлијинә етибар етмәјин вахтыдыр.

20. Инди нәјин вахтыдыр?

²⁰ Ҝәлин һәр биримиз руһән ајыг галыб сәбирлә ҝөзләјәк. Ҝәлин «сүлһ вә тәһлүкәсизлик» бәјанатыны вә сечилмишләрин сонунҹу мөһүрләнмәсини сәбирлә ҝөзләјәк. Сонра дөрд мәләк дағыдыҹы күләкләри бурахаҹаг вә Бөјүк Бабил мәһв олаҹаг. Бу әламәтдар һадисәләри ҝөзләјәркән ҝәлин Јеһованын тәшкилатында рәһбәрлик һәвалә олунан кәсләрдән алдығымыз ҝөстәришләрә табе олаг. Иблисә вә ҹинләрә гаршы дурмаг үчүн бир-биримизә сипәр олаг! Бәли, инди мәзмурчунун чағырышына һај вермәјин вахтыдыр: «Еј Рәббә үмид бағлајан бүтүн инсанлар, мөһкәм олун, гој үрәјиниз ҹәсарәтли олсун!» (Мәз. 31:24).