1, 2. а) Нәјә ҝөрә 24 000 исраилли ҝөзәл немәтләрдән мәһрум олду? б) Гәдимдә баш вермиш бу һадисә нәјә ҝөрә бизим үчүн әһәмијјәт кәсб едир?

ИСРАИЛ халгы вәд едилмиш дијара ҝирмәк үзрә иди. Белә бир мәгамда он минләрлә исраилли «Моав гызлары илә зина [етди]». Нәтиҹәдә, 24 000 нәфәр Јеһованын гәзәбинә туш ҝәлиб һәјатыны итирди. Тәсәввүр един, исраиллиләрин һәсрәтлә ҝөзләдикләри мирасы алмаларына лап аз галмышды. Анҹаг онлар еһтирасларынын бадына ҝедиб өзләрини ҝөзәл немәтләрдән мәһрум етдиләр (Сај. 25:1—5, 9).

² Бу фаҹиәви һадисә «дөврләрин сонунда јашајан бизләри горумаг мәгсәдилә јазылыб» (1 Кор. 10:6—11). Бу ҝүн биз ахыр ҝүнләрин сонунда јашајырыг вә салеһлијин һөкм сүрәҹәји јени дүнјанын астанасындајыг (2 Тим. 3:1; 2 Пет. 3:13). Амма тәәссүфләр олсун ки, Јеһованын хидмәтчиләриндән бәзиләри өз сајыглыгларыны итирирләр. Онлар әхлагсызлыг тәләсинә дүшүр вә бунун аҹы нәтиҹәләрини бичирләр. Белә давам етсәләр, онлар әбәди хејир-дуалардан мәһрум ола биләрләр.

3. Әр-арвадлар нә үчүн Јеһованын рәһбәрлијинә вә көмәјинә еһтијаҹ дујурлар? (Мәгаләнин әввәлиндәки шәклә бахын.)

 ³ Бу ҝүн дүнјада әхлагсызлыг баш алыб ҝедир. Белә бир дүнјада никаһы горумаг үчүн әр-арвадларын Јеһованын рәһбәрлијинә вә көмәјинә бөјүк еһтијаҹы вар. (Мәзмур 127:1 ајәсини охујун.) Бу мәгаләдә арашдыраҹағыг ки, әр-арвадлар үрәкләрини горумагла, Аллаһла сых мүнасибәт гурмагла, јени шәхсијјәтә бүрүнмәклә, хош үнсијјәт јаратмагла вә әр-арвадлыг борҹуну өдәмәклә никаһларыны неҹә мөһкәмләндирә биләрләр.

4. Бәзи мәсиһчиләрин ҝүнаһа батмасына нә сәбәб олмушдур?

⁴ Неҹә ола биләр ки, мәсиһчи әхлагсызлыға јол версин? Әхлагсызлыг учурумуна апаран јол чох вахт ҝөзләрдән башлајыр. Иса Мәсиһ демишди: «Гадына бахыб она гаршы шәһвәтлә аловланан һәр бир адам артыг үрәјиндә онунла зина етмиш олур» (Мат. 5:27, 28; 2 Пет. 2:14). Бу ҝүн ҝүнаһа јол вермиш мәсиһчиләрин чоху әввәлҹә әхлаги сајыглығы итирмишләр. Бәзиләриндә сајыглығы итирмәјә сәбәб порнографијаја бахмаг, еротик әдәбијјатлар охумаг, Интернетдә биабырчы видеолар изләмәк олмушдур. Диҝәрләри исә ачыг-сачыг филмләрә, тамашалара вә телевизија програмларына алудә олмуш, јахуд ҝеҹә клубларына, стриптиз шоулара вә ја еһтирас ојадан масажлара ҝетмишләр.

5. Нәјә ҝөрә үрәјимизи горумалыјыг?

⁵ Бәзи аиләли инсанлар диггәти һәјат јолдашындан јох, өзҝәсиндән ҝөзләдикләри үчүн ҝүнаһа сүрүкләнмишләр. Бу дүнјада инсанлар өзләрини ҹиловламыр, һәр ҹүр әхлагсызлыгла мәшғул олурлар. Белә мүһитдә һијләҝәр, чарәси олмајан үрәкдә башгасына гаршы романтик һиссләрин ојанмасы чох асандыр. (Јеремја 17:9, 10 ајәләрини охујун.) Бәли, Иса Мәсиһин дедији кими «пис фикирләр, гәтл, зина, ҹинси әхлагсызлыг... үрәкдән чыхыр» (Мат. 15:19).

6, 7. а) Һијләҝәр үрәк адамы ҝүнаһлы јола неҹә сүрүкләјә биләр? б) Әхлагсыз һәрәкәтин гаршысыны неҹә алмаг олар?

⁶ Бир-биринә мејил салан ики нәфәрин һијләҝәр үрәјиндә јанлыш истәкләр көк атанда бир дә ајылырлар ки, һәјат јолдашлары илә данышмалы олдуглары мөвзуну бир-бирләри илә бөлүшүрләр. Онлар даһа чох бир јердә олмаға фүрсәт ахтарыр, «тәсадүф» дону ҝејиндирдикләри ҝөрүшләрин сајыны ҝетдикҹә артырырлар. Һиссләр алышдыгҹа әхлаги сајыглыг зәифләјир. Ҝүнаһлы јолда ирәлиләдикҹә, дүзҝүн иш тутмадыгларыны дәрк етсәләр дә, дајанмаг онлар үчүн чәтин олур (Сүл. мәс. 7:21, 22).

⁷ Јанлыш истәкләр вә үнсијјәт ҝүҹләндикҹә, онлар әл-әлә тутмаға, бир-бирини охшамаға, өпүшмәјә, еһтирасла гуҹаглашмаға вә башга ҹүр нәвазиш ҝөстәрмәјә башлајырлар. Һалбуки бу кими һәрәкәтләр јалныз һәјат јолдашы илә мүнасибәтдә јолвериләндир. Бу һәрәкәтләри етдикҹә онларын руһанилији тәнәззүлә уғрајыр. Нәтиҹәдә онлар нәфсин торуна дүшүрләр. Вә бу «нәфс бојлу галыб ҝүнаһ доғур», јәни әхлагсызлыг баш верир (Јаг. 1:14, 15). Чох һејиф! Әҝәр онлар никаһын мүгәддәслијинә Јеһованын ҝөзү илә бахсајдылар, бу ҹүр аҹынаҹаглы һал да баш вермәзди. Бәс никаһа Јеһованын ҝөзү илә бахмаг үчүн нә етмәк олар?

8. Јеһова илә достлуг әхлаги ҹәһәтдән тәмиз галмаға неҹә көмәк едир?

⁸ Мәзмур 97:10 ајәсини охујун. Јеһова Аллаһла достлуг әхлаги ҹәһәтдән тәмиз галмаг үчүн олдугҹа ваҹибдир.  Аллаһын ҝөзәл кејфијјәтләри һагда өјрәндикҹә, «севимли өвладлары» кими Она бәнзәмәјә вә мәһәббәт јолунда јеримәјә чалышдыгҹа «ҹинси әхлагсызлығы, һәр ҹүр натәмизлији» рәдд етмәјә гәтијјәтли олаҹағыг (Ефес. 5:1—4). Аллаһын «әхлагсызлары вә зинакарлары мүһакимә» едәҹәјини билән әр-арвадлар ҹидд-ҹәһдлә чалышырлар ки, никаһларына һөрмәт едиб ону ләкәсиз сахласынлар (Ибр. 13:4).

9. а) Јусиф әхлагсыз тәклифә неҹә гаршы дурду? б) Јусифдән биз нә өјрәнирик?

⁹ Аллаһын садиг хидмәтчиләриндән бәзиләри иманларына шәрик олмајан иш јолдашлары илә ишдән сонра вахт кечирдикләри үчүн әхлаги сајыглыгларыны итирмишләр. Һәтта иш вахты да ҝүнаһа сүрүкләјән вәзијјәтләр јарана биләр. Мәсәлән, гәдимдә јашамыш Јусиф адлы јарашыглы бир ҝәнҹ ишләдији јердә белә вәзијјәтлә растлашмышды. Ағасынын арвадынын Јусифә ҝөзү дүшмүшдү. Һәр ҝүн ону јолдан чыхармаға чалышырды. Гадын ахырда онун палтарындан јапышыб: «Мәнимлә јат!» — деди. Амма Јусиф онун әлиндән гачды. Бу ҹүр вәзијјәтдә Јусифә руһани сајыглығыны горумаға нә көмәк етди? О, Аллаһла мүнасибәтләрини корламаг истәмирди вә бу, она тәмизлијини вә нөгсансызлығыны горумаға көмәк етди. Јусиф тутдуғу бу мөвгејә ҝөрә ишини итирди вә наһагдан зиндана салынды. Амма Јеһова она јар олду (Јар. 39:1—12; 41:38—43). Истәр ишдә олсун, истәрсә дә тәкликдә аиләли мәсиһчи јол вермәмәлидир ки, ону әхлагсызлыға сүрүкләјән вәзијјәт јарансын.

10. Јени шәхсијјәт инсана әхлагы горумаға неҹә көмәк едир?

¹⁰ Јени шәхсијјәт «Аллаһын ирадәси илә һәгиги салеһлик вә сәдагәт ичиндә» јарадылдығы үчүн әр-арвадын руһаниликләрини мөһкәмләндирмәләриндә бөјүк рол ојнајыр (Ефес. 4:24). Јени шәхсијјәтә бүрүнәнләр бәдәнләринин «үзвләриндәки мејилләри — ҹинси әхлагсызлыға, натәмизлијә, шәһвәтә, еһтираса вә бүтпәрәстлик олан тамаһкарлыға мејилләри» өлдүрүрләр. (Колослулара 3:5, 6 ајәләрини охујун.) «Өлдүрмәк» сөзү ҝөстәрир ки, бәдәнин истәкләринә гаршы мүбаризәдә сәрт тәдбирләр ҝөрмәлијик. Һәјат јолдашымыз олмајан инсана гаршы биздә еһтирас јарада биләҹәк һәр шејдән узаг гачмалыјыг (Әјј. 31:1). Бәли, һәјатымызы Аллаһын ирадәсинә ујғунлашдырдыгҹа биз «писликдән икраһ [етмәји], јахшылыгдан бәрк [јапышмағы]» өјрәнирик (Ром. 12:2, 9).

11. Јени шәхсијјәт никаһы неҹә мөһкәмләндирә биләр?

¹¹ Јени шәхсијјәт ону Јарадан Јеһова Аллаһын шәхсијјәтини әкс етдирир (Колос. 3:10). Әрлә арвад «дахилдән ҝәлән шәфгәти, һәмчинин хејирхаһлығы, тәвазөкарлығы, һәлимлији вә сәбири» ҝејиниб әхлаги сајыглыгларыны мөһкәмләндирсәләр, ҝөр онларын аиләси неҹә хошбәхт олар! (Колос. 3:12). «Мәсиһин вердији гәлб раһатлығы» үрәкләриндә һаким оларса, әр-арвад мүнасибәтләри даһа да мөһкәмләнәр (Колос. 3:15). Әр-арвад бир-биринә нәвазишлә мәһәббәт бәсләјәндә исә хошбәхтликләри бирә-беш артар. Бир-бирини һөрмәтдә габагламаг онлара хош олар (Ром. 12:10).

12. Сизҹә, никаһын хошбәхт олмасы үчүн һансы хүсусијјәтләр ваҹибдир?

¹² Сид адлы бир гардашдан сорушанда ки, онун аиләсинин хошбәхт олмасына һансы хүсусијјәтләр көмәк едир, о демишди: «Ән ваҹиби мәһәббәтдир. Биз һәмишә мәһәббәт ҝөстәрмәјә чалышырыг.  Һәлимлик дә чох ваҹибдир». Онунла ејни фикирдә олан һәјат јолдашы Сонја дејир: «Гајғыкеш олмаг олдугҹа зәруридир. Бир дә ки, тәвазөкарлыг. Һәмишә асан олмаса да, чалышырыг ки, бу хүсусијјәти јаддан чыхармајаг».

13. Хошбәхт никаһда нәјин ролу әвәзсиздир вә нә үчүн?

¹³ Сөзсүз ки, хошбәхт никаһда меһрибан үнсијјәтин ролу әвәзсиздир. Бәзи аиләләрдә аҹынаҹаглы вәзијјәт һөкм сүрүр: әр-арвад јад адамла, һәтта евдәки ит-пишиклә даһа һөрмәтҹил рәфтар едир, нәинки бир-бири илә. Әрлә арвад бир-бирләринә «кин, һирс, гәзәб, гышгырыг, тәһгирамиз данышыг» јағдыранда никаһа руһани ҹәһәтдән зәрбә вурурлар (Ефес. 4:31). Ҝедиб-ҝәлиб бир-бирини тәнгид едәрәк, бир-бирини санҹараг никаһы бәрбад һала салмагданса, јахшы олар ки, онлар хош, меһрибан, нәвазишли сөзләрлә мүнасибәтләрини мөһкәмләндирсинләр (Ефес. 4:32).

14. Әр-арвад арасында нәјә јер јохдур?

¹⁴ Мүгәддәс Китабда дејилир ки, «сусмағын өз вахты» вар (Ваиз 3:7). Бу о демәк дејил ки, биз гара сүкута гәрг олмалыјыг. Чүнки белә сүкут данышыб проблеми һәлл етмәјә мане олур. Алманијада јашајан бир гадын бөлүшүр: «Белә вәзијјәтдә сусмаг һәјат јолдашыны бәрк инҹидә биләр». Анҹаг о, әлавә едәрәк дејир: «Һирсли вахтда сакит галмаг асан олмаса да, өзүндән чыхмаг да дүзҝүн дејил. Јохса, гејри-иради олараг елә сөз дејә вә ја елә һәрәкәт едә биләрсән ки, бу, һәјат јолдашыны јаралаја биләр. Вә ишләр даһа да корланар». Әрлә арвад гышгырмагла, бир-бириндән күсмәклә проблеми һәлл едә билмәзләр. Әксинә, мүбаһисәләрин ади һал алмасына вә ја узандыгҹа узанмасына јол вермәмәклә онлар никаһларыны мөһкәмләндирә биләрләр.

15. Хош үнсијјәт никаһы неҹә сарсылмаз едә биләр?

¹⁵ Әрлә арвад фикирләрини вә һиссләрини бир-бири илә бөлүшәндә аилә бағы мөһкәмләнир. Сөзү неҹә демәјимиз нә демәјимиз  гәдәр ваҹибдир. Буна ҝөрә дә һәтта чәтин вәзијјәтләрдә дә, чалышын һәм сәс тонунуз, һәм дә сечдијиниз сөзләр үрәкачан олсун. Бу һалда һәјат јолдашыныза сизә гулаг асмаг асан олаҹаг. (Колослулара 4:6 ајәсини охујун.) Әр вә ја арвад һәјат јолдашына фајда ҝәтирсин дејә «анҹаг зәрурәтә ҝөрә иманы мөһкәмләндирән сөз» сөјләјә вә бунунла да араларында хош үнсијјәт јарада биләр. Бу исә онларын никаһыны сарсылмаз едәҹәк (Ефес. 4:29).

16, 17. Әрлә арвад бир-биринин емосионал вә ҹинси тәләбатларына неҹә јанашмалыдыр?

¹⁶ Инсан өз һәјат јолдашынын рифаһыны өзүнүнкүндән үстүн тутмагла онун хејрини дүшүнә биләр. Никаһ бағыны мөһкәмләндирән амилләрдән бири дә будур (Филип. 2:3, 4). Һәм әр, һәм дә арвад өз һәјат јолдашынын емосионал вә ҹинси тәләбатларына гаршы һәссас олмалыдыр. (1 Коринфлиләрә 7:3, 4 ајәләрини охујун.)

¹⁷ Әфсуслар олсун ки, бәзиләри һәјат јолдашына нә нәвазиш ҝөстәрир, нә дә онунла јахынлыг едир. Бәзи кишиләр дүшүнүр ки, арвадына нәвазиш ҝөстәрмәк кишијә јарашмаз. Анҹаг Мүгәддәс Китаб әрләри тәшвиг едир ки, һәјат јолдашлары илә анлајышла даврансынлар (1 Пет. 3:7). Әр баша дүшмәлидир ки, әр-арвадлыг борҹу тәкҹә интим мүнасибәти өзүнә дахил етмир. Әриндән башга вахтларда да мәһәббәт вә нәвазиш ҝөрән гадын, сөзсүз ки, араларындакы интим мүнасибәтдән дә зөвг алаҹаг. Һәм әр, һәм дә арвад анлајышла давранса, бир-биринин емосионал вә ҹинси тәләбатларыны өдәјә биләр.

18. Әрлә арвад никаһ бағыны неҹә мөһкәмләндирә биләр?

¹⁸ Дүздүр, хәјанәтә һеч нә илә бәраәт газандырмаг олмаз. Лакин һәјат јолдашындан нәвазиш ҝөрмәјән инсан мәһәббәти вә доғма мүнасибәти кәнарда ахтара биләр (Сүл. мәс. 5:18; Ваиз 9:9). Буна ҝөрә дә Мүгәддәс Китаб әр-арвадлары тәшвиг едир: «Бир-биринизи әр-арвадлыг борҹундан мәһрум етмәјин. Бу мүнасибәтләри јалныз икинизин дә разылығы илә... мүәјјән мүддәтә сахлаја биләрсиниз. Сонра јенидән бир јердә олун ки, нәфсинизә һаким ола билмәдијиниздән Шејтан сизи имтаһана чәкмәсин» (1 Кор. 7:5). Киминсә өз нәфсинә һаким ола билмәјиб Шејтана ујмасы вә әхлагсызлыг етмәси неҹә дә аҹынаҹаглы оларды. Бунун әксинә олараг, әр дә, арвад да өз хејрини јох, башгасынын хејрини дүшүнәндә, әр-арвадлыг борҹуна јүк кими јох, мәһәббәтин тәзаһүрү кими баханда онларын интим мүнасибәти никаһ бағыны даһа да мөһкәм едәҹәк (1 Кор. 10:24).

19. Биз нә етмәјә әзмли олмалыјыг вә нә үчүн?

¹⁹ Биз салеһлијин һөкм сүрәҹәји јени дүнјанын астанасындајыг. Буна ҝөрә дә бәдәнин истәкләринә тәслим олмаг Моав дүзәнлијиндә мәһв олан 24 000 исраилли кими, бизә дә баһа баша ҝәлә биләр. Аллаһын Кәламында бу биабырчы вә фаҹиәви һадисәјә истинад едилдикдән сонра хәбәрдарлыг едилир: «Мөһкәм дајандығыны дүшүнән адам еһтијатлы олсун ки, јыхылмасын» (1 Кор. 10:12). Одур ки, сәмави Атамыза вә һәјат јолдашымыза садиг галараг никаһы мөһкәмләндирмәк сон дәрәҹә ваҹибдир (Мат. 19:5, 6). Ҝәлин инди һәмишәкиндән дә чох чалышаг ки, «Аллаһ [бизи] ахырда ләкәсиз, гүсурсуз вә әмин-аманлыг ичиндә јашајан тапсын» (2 Пет. 3:13, 14).