1, 2. а) Гәдим вахтларда Јеһованын хидмәтчиләри һансы ибадәт јерләриндән истифадә едирдиләр? б) Иса Мәсиһ Аллаһын Јерусәлимдәки мәбәдинә неҹә мүнасибәт бәсләјирди? ҹ) Бу мәгаләдә нә мүзакирә олунаҹаг?

ТА ӘЗӘЛДӘН Аллаһын хидмәтчиләри пак ибадәт үчүн јерләр тикмишләр. Јәгин ки, Һабил Аллаһа өз гурбаныны гурбанҝаһда тәгдим етмишди (Јар. 4:3, 4). Нуһ, Ибраһим, Исһаг, Јагуб вә Муса да гурбанҝаһ тикмишди (Јар. 8:20; 12:7; 26:25; 35:1; Чых. 17:15). Јеһованын ҝөстәриши илә исраиллиләр мүгәддәс чадыр дүзәлтмишдиләр (Чых. 25:8). Сонралар исә онлар Јеһоваја ибадәт етмәк үчүн мәбәд тикмишдиләр (1 Пад. 8:27, 29). Бабил әсарәтиндән гајыдандан сонра јәһудиләр мүнтәзәм олараг синагогларда јығышырдылар (Марк 6:2; Јәһ. 18:20; Һәв. 15:21). Биринҹи әсрдәки мәсиһиләр јығынҹаг үзвләринин евләриндә топлашырдылар (Һәв. 12:12; 1 Кор. 16:19). Бу ҝүн Јеһованын халгы руһани тәлим алмаг вә ибадәт етмәк үчүн он минләрлә ибадәт евләриндә јығышыр.

² Иса Мәсиһин Јеһованын Јерусәлимдә олан мәбәдинә севҝиси вә еһтирамы о гәдәр бөјүк иди ки, онун шаҝирди: «Евинин гејрәти мәни јандырыб-јахыр», — дејән мәзмурчунун сөзләрини она аид етмишди (Зәб. 69:9; Јәһ. 2:17). Јерусәлимдәки мәбәд «Јеһованын еви» иди. Амма бу ҝүнки ибадәт евләри лап о  мәнада Јеһованын еви дејил (2 Салн. 5:13; 33:4). Бунунла белә, биз мүасир ибадәт евләринә һөрмәтлә јанашмалыјыг. Бу мәгаләдә Мүгәддәс Китабдан олан бәзи принсипләри нәзәрдән кечирәҹәјик вә өјрәнәҹәјик ки, ибадәт евләриндә оларкән неҹә давранмалыјыг, ибадәт евләринә неҹә гуллуг етмәлијик, һәмчинин бу биналарын тикинтисинин вә тәмиринин малијјәләшмәсинә неҹә јанашмалыјыг *.

3-5. Ибадәт евләри һансы мәгсәдә хидмәт едир вә бу, орада кечирилән ҝөрүшләрә мүнасибәтимизә неҹә тәсир етмәлидир?

³ Ибадәт еви јашадығымыз әразидә һәгиги ибадәтин мәркәзидир. Ибадәт евләриндә кечирилән һәфтәлик ҝөрүшләр Јеһованын бизим руһани рифаһымыз үчүн ҝөрдүјү тәдбирләрдән биридир. Биз орада руһани ҹәһәтдән тәравәтләнирик вә Аллаһын тәшкилатындан ҝөстәришләр алырыг. Бизи јығынҹаға Јеһова вә Онун Оғлу Иса Мәсиһ дәвәт едир. «Јеһованын сүфрәсиндән» јемәк дәвәти һәмишә гүввәдә олса да, биз бу дәвәти һеч вахт ади бир шеј кими гәбул етмәмәлијик (1 Кор. 10:21).

⁴ Ибадәт етмәк вә бир-биримизи руһландырмаг үчүн олан бу ҝөрүшләр Јеһова Аллаһын ҝөзүндә сон дәрәҹә ваҹибдир. Елә буна ҝөрә О, Мүгәддәс Китаб васитәсилә бизи јығынҹагларымыздан галмамаға тәшвиг едир. (Ибраниләрә 10:24, 25 ајәләрини охујун.) Әҝәр үзүрсүз сәбәбләрә ҝөрә јығынҹагдан галырыгса, бу, бизим тәрәфимиздән Јеһоваја һөрмәтсизлик сајылмаз? Әксинә, јығынҹаглара һазырлашмагла вә бу ҝөрүшләрдә үрәкдән иштирак етмәклә Јеһова Аллаһа һөрмәт етдијимизи вә Онун ҝөрдүјү тәдбирләри гијмәтләндирдијимизи ҝөстәририк (Зәб. 22:22).

⁵ Биз һәм ибадәт евинин бинасына, һәм дә орада кечирилән руһани тәдбирләрә һөрмәтлә јанашмалыјыг. Чүнки бунлара неҹә јанашмағымыздан бизим Аллаһын адына олан мүнасибәтимиз ҝөрүнүр. (1 Падшаһлар 8:17 ајәси илә мүгајисә един.)

6. Бәзи инсанлар ибадәт евләримиз вә ора ҝәләнләр һагда нә демишләр? (Мәгаләнин әввәлиндәки шәклә бахын.)

⁶ Бизим ибадәт јерләринә һөрмәтлә јанашмағымыз башгаларынын ҝөзүндән јајынмыр. Мисал үчүн, Түркијәдә бир киши демишди: «Сизин ибадәт евиниздәки тәмизлик вә низам-интизам мәним чох хошума ҝәлди. Орадакы адамлар сәлигәли ҝејинмишдиләр, һамынын үзүндә тәбәссүм вар иди вә мәни ҝүләрүзлә гаршыладылар. Бу аб-һава мәнә чох хош тәсир бағышлады». Һәмин киши јығынҹаглара ҝәлмәјә башлады вә чох тезликлә вәфтиз олунду. Индонезијада бир јығынҹаг ибадәт евинин һәср олунмасындан габаг ачыг гапы ҝүнү кечирмиш, дөвләт мәмурларыны вә гоншулугда јашајан инсанлары ора дәвәт етмишди. Шәһәрин мери дә гонагларын арасында иди. Бинанын кејфијјәтли иншасы, лајиһәси вә ҝөзохшајан бағы онун хошуна ҝәлмишди. О демишди: «Бу бинанын тәмизлији сизин мөһкәм иманыныздан хәбәр верир».

7, 8. Јығынҹаг ҝөрүшләринә ҝәләнләр нәји јадда сахламалыдырлар?

⁷ Јығынҹаг ҝөрүшләринә бизи дәвәт едән Јеһовадыр. Бизим давранышымыз, әјин-башымыз вә хариҹи ҝөркәмимиздән Аллаһа еһтирам бәсләдијимиз ҝөрүнмәлидир. Бу еһтирамдан ирәли ҝәләрәк биз ифрата вармамалыјыг. Мүшаһидә олунмушдур ки, бәзиләри јығынҹаг ҝөрүшләриндә дүзҝүн давранышла бағлы һәддән артыг сәрт мөвге  тутур, диҝәрләри исә өзләрини чох сәрбәст апарырлар. Дүздүр, Јеһова Аллаһ истәјир ки, Онун хидмәтчиләри вә гонаглар өзләрини ибадәт евиндә раһат һисс етсинләр. Лакин биз јығынҹаға неҹә ҝәлди ҝејинәрәк, ҝөрүш вахты месажлашараг, сөһбәт едәрәк, јемәк јејәрәк вә саирә ишләрлә мәшғул олараг ҝөрүшүн дәјәрини ашағы салмаг истәмәздик. Валидејнләр өз ушагларына баша салмалыдырлар ки, ибадәт еви гачмаг, ојнамаг јери дејил (Ваиз 3:1).

⁸ Иса Мәсиһ Аллаһын евиндә алвер едәнләри ҝөрәндә гәзәбләниб онлары орадан говмушду (Јәһ. 2:13—17). Ибадәт евләриндә дә, адындан ҝөрүндүјү кими, биз ибадәт едир вә руһани тәлим алырыг. Буна ҝөрә дә руһани ишләрлә әлагәси олмајан, мадди ҝәлир мәгсәди ҝүдән ишләрә бурада јер јохдур. (Нәһәмја 13:7, 8 ајәләри илә мүгајисә един.)

9, 10. а) Јени ибадәт евләринин тикилмәсинә неҹә көмәк едилир вә бунун сајәсиндә нә әлдә олунур? б) Өз һесабларына ибадәт еви тикә билмәјән јығынҹаглара һансы бөјүк көмәк ҝөстәрилир?

⁹ Јеһованын тәшкилаты ибадәт евләринин тикилмәси үчүн бөјүк зәһмәт чәкир. Ибадәт евләринин лајиһәсини, тикинтисини вә тәмир-бәрпа ишләрини һеч бир мадди мәнфәәт ҝүдмәјән көнүллүләр едирләр. Бунун сајәсиндә нә әлдә олунур? 1999-ҹу ил нојабрын 1-дән етибарән бүтүн дүнјадакы јығынҹаглар үчүн 28 000-дән чох ҝөзәл ибадәт евләри тикилмишдир. Бу, о демәкдир ки, сон 15 ил әрзиндә орта һесабла һәр ҝүн беш ибадәт еви тикилиб.

¹⁰ Јеһованын тәшкилаты тәләбат олан һәр јердә ибадәт евләринин тикилмәсинә көмәклик ҝөстәрир. Бу, Мүгәддәс Китабда олан бир принсипә — бәрабәрлик олмасы үчүн бәзиләриндәки боллуг башгаларындакы әскиклији долдурсун принсипинә әсасланыр. (2 Коринфлиләрә 8:13—15 ајәләрини охујун.) Бунун сајәсиндә өз һесабларына ибадәт евләри тикә билмәјән јығынҹаглар үчүн ҝөзәл ибадәт евләри тикилмишдир.

11. Гардашлар јени тикилән ибадәт евләри илә бағлы нә дејирләр вә бу, сиздә һансы һиссләри ојадыр?

¹¹ Коста-Рикада бу көмәкдән јарарланан бир јығынҹаг нөвбәти сөзләри јазмышды: «Јени ибадәт евинин гаршысында дуранда бизә елә ҝәлир ки, јуху ҝөрүрүк. Ҝөзләримизә инана билмирик. Бизим ҝөзәл ибадәт евимиз ҹәми сәккиз ҝүнә әрсәјә ҝәлиб. Бу, Јеһованын хејир-дуасы, тәшкилатынын јардымы вә әзиз баҹы-гардашларын зәһмәти сајәсиндә мүмкүн олуб. Бу ибадәт јери Јеһованын бизә вердији гијмәтли һәдијјә, ҝөзәл бәхшишдир. Бизим севинҹимиз јерә-ҝөјә сығмыр». Мәҝәр јени ибадәт евләринә ҝөрә миннәтдарлыг  сөзләрини ешитмәк вә дүнјанын мүхтәлиф јерләриндә баҹы-гардашларын бу ҹүр севиндијини билмәк үрәјинизи риггәтә ҝәтирмир? Бу, Јеһованын ишидир, чүнки ибадәт еви тикилән кими Јараданы ахтаран инсанларла долур (Зәб. 127:1).

12. Ибадәт евинин тикинтисинә өз төһфәнизи неҹә верә биләрсиниз?

¹² Бир чох баҹы-гардашлар ибадәт евләринин тикинтисиндә иштирак етмиш вә бундан чох мәмнун олмушлар. Тикинтидә иштирак едиб-етмәмәјимиздән асылы олмајараг, һәр биримиз ианә етмәклә бу лајиһәләри дәстәкләјә биләрик. Гәдим вахтларда пак ибадәтин гејрәтини чәкәнләр ибадәт јерләринин тикилмәсини мадди ҹәһәтдән дәстәкләјирдиләр. Бу ҝүн биз дә онларын нүмунәсини изләјирик, бунунла да Јеһованын адыны шәрәфләндиририк (Чых. 25:2; 2 Кор. 9:7).

13, 14. Мүгәддәс Китабда олан һансы принсипләрә ујғун олараг, биз ибадәт евләрини тәмиз вә сәлигәли сахламалыјыг?

¹³ Ибадәт еви низам-интизамы севән Аллаһын ҹалалыны әкс етдирмәлидир. Бу сәбәбдән ибадәт евләрини тәмиз вә сәлигәли сахламаг лазымдыр. (1 Коринфлиләрә 14:33, 40 ајәләрини охујун.) Аллаһын Кәламында мүгәддәслик вә руһани тәмизлик физики тәмизликлә әлагәләндирилир (Вәһј 19:8). Буна ҝөрә дә Јеһованы разы салмаг истәјән инсан шәхси ҝиҝијенасына фикир вермәлидир.

¹⁴ Бу принсипләрә ујғун олараг, биз ибадәт евләрини елә сахламалыјыг ки, марагланан инсанлары јығынҹаға дәвәт етмәјә утанмајаг, архајын олаг ки, ибадәт евимиз тәблиғ етдијимиз мүждәјә ујғун ҝәлир. Белә оланда инсанлар ҝөрәҹәкләр  ки, ибадәт етдијимиз Аллаһ мүгәддәсдир вә тезликлә бүтүн јер үзүнү тәмиз, ҝөзәл ҹәннәтә чевирәҹәк (Әшј. 6:1—3; Вәһј 11:18).

15, 16. а) Ибадәт евини тәмиз сахламаг нәјә ҝөрә чәтин ола биләр, амма бу, нәјә ҝөрә ваҹибдир? б) Сизин јығынҹағын ибадәт евинин тәмиз сахланылмасы үчүн һансы тәдбирләр ҝөрүлүр вә һәр биримиз бу саһәдә нә едә биләрик?

¹⁵ Инсанларын тәмизлијә даир фикирләри бир-бириндән фәргләнир. Бунда тәрбијәнин дә ролу вар. Јахуд да бәзиләринин јашадығы әрази тозлу-торпаглы, јоллары палчыгдыр. Диҝәрләринин исә јашадығы јердә кифајәт гәдәр су вә тәмизләјиҹи васитәләр јохдур. Јашадығымыз јердәки шәраитдән вә тәмизлијә мүнасибәтдән асылы олмајараг, бизим ибадәт евимиз бу саһәдә нүмунәви олмалыдыр, чүнки бурада биз Јеһоваја ибадәт едирик (Ган. 23:14).

¹⁶ Ибадәт евинин тәмизлијини башлы-башына бурахмаг олмаз. Јығынҹағын ибадәт јеринин мүмкүн гәдәр тәмиз сахланылмасы үчүн ағсаггаллар шурасы ҹәдвәл һазырламалы вә нәзарәт етмәлидир ки, јығынҹагда кифајәт гәдәр тәмизләјиҹи вәсаитләр вә аваданлыглар олсун. Бәзи тәмизлик ишләрини һәр јығынҹаг ҝөрүшүндән сонра, бәзиләрини исә арадабир ҝөрмәк лазымдыр. Буна ҝөрә дә һеч бир ишин ҝөздән гачмамасы үчүн ағсаггаллар ишләри дүзҝүн планлашдырмалы вә ишин ҝөрүлмәсинә нәзарәт етмәлидирләр. Јығынҹағын бүтүн үзвләри ибадәт евинин тәмиз сахланылмасы үчүн әлләриндән ҝәләни етмәлидирләр.

17, 18. а) Ибадәт јерләринин тәмири илә бағлы Мүгәддәс Китабда һансы нүмунәләр вар? б) Нәјә ҝөрә ибадәт евләрини јахшы вәзијјәтдә сахламалыјыг?

¹⁷ Јеһованын хидмәтчиләри ибадәт јерләринин тәмиринә дә хүсуси диггәт јетирирләр. Јәһуда падшаһы Јуәс каһинләрә әмр етмишди ки, мәбәдә ҝәтирилән ианәләрлә онун «учуг јерләрини тәмир еләсинләр» (2 Пад. 12:4, 5). 200 илдән сонра Јушијјә падшаһ да мәбәдә ҝәтирилән ианәләрлә мәбәди тәмир етмишди. (2 Салнамәләр 34:9—11 ајәләрини охујун.)

¹⁸ Бәзи филиаллар һесабатларында билдирирләр ки, онларын нәздиндә олан өлкәләрдә инсанлар тикилиләрин, јахуд да аваданлыгларын тәмиринә башдансовду јанашыр. Ола билсин, белә өлкәләрдә бу ишдән башы чыхан аздыр, јахуд да чох аз адамын тәмир етмәјә имканы чатыр. Лакин ибадәт евләринин тәмиринә бармагарасы бахылса, бина тезликлә сырадан чыхаҹаг. Бу исә јахшы шаһидлик олмајаҹаг. Анҹаг јығынҹаг үзвләри ибадәт евини јахшы вәзијјәтдә сахлајанда Јеһованын ады уҹалыр вә диндашларымызын етдији ианәләр һәдәр ҝетмир.

19. Пак ибадәт үчүн олан јерләрә һөрмәт етдијимизи неҹә ҝөстәрә биләрик?

¹⁹ Ибадәт еви Јеһова Аллаһа һәср олунмуш тикилидир. Буна ҝөрә дә һүгуги адындан асылы олмајараг, бу тикили һеч бир шәхсә вә ја јығынҹаға мәхсус дејил. Мәсиһи принсипләри бизә ашылајыр ки, бу биналарын тикилдији мәгсәдә мүвафиг ҝәлмәси үчүн әлимиздән ҝәләни едәк. Бу сәбәбдән биз ибадәт јерләримизә һөрмәтлә јанашырыг, јени ибадәт евләринин тикилмәси үчүн ианәләр едирик, һәмчинин һазырда мөвҹуд олан ибадәт евләрини тәмиз вә јахшы вәзијјәтдә сахлајырыг. Бүтүн бунларла ҝөстәририк ки, биз Иса Мәсиһ кими, Јеһоваја ибадәт етдијимиз јерләрин гејрәтини чәкирик (Јәһ. 2:17).