Һәгигәтәнми, Аллаһ бизим гајғымыза галыр, јохса биз инсанларын һалы ону гәтијјән марагландырмыр? Мүгәддәс Китабын бу суала вердији ҹаваб бизә тәскинлик верир. Аллаһ, доғрудан да, бәшәр аиләсинин гајғысына галыр вә бизим хошбәхт өмүр сүрмәјимизи истәјир. Аллаһ-Таала һамыја, һәтта нашүкүрләрә белә Онун бол хејирхаһлығындан һәр ҝүн дадмаға имкан верир. Ҝәлин Аллаһын хидмәтчиси Павелин дедији сөзләрин үзәриндә дүшүнәк. (Һәвариләрин ишләри 14:16, 17 ајәләрини охујун.)

О, ваһид һәгиги Аллаһа ибадәт етмәјән Листра шәһәринин сакинләринә мүраҹиәтиндә демишди: «[Аллаһ] кечмишдә һәр бир милләтә өз јолу илә ҝетмәјә изин вермишди. Һәрчәнд Өзү һаггында даима шәһадәт верирди: сизә јахшылыг едәрәк ҝөјдән јағыш јағдырыр, бәрәкәтли мөвсүмләр вә бол-бол гида верир, үрәјинизи шадлыгла дојдурурду». Павелин сөзләри онун динләјиҹиләри үчүн һансы мәнаны кәсб едирди?

Павелин дедикләринин доғру олдуғуну ҝөрмәк үчүн Листра ҹамаатына һараса ҝетмәк лазым дејилди. Әкинчиликлә мәшғул олан бу инсанлар бол јағышлы вә мүнбит торпағы олан әразидә јашајырдылар. Лакин Павел онлара хатырлатды ки, бу јағышлар вә бәрәкәтли мөвсүмләр Јеһова Аллаһдандыр. Буна ҝөрә дә һәр дәфә торпагдан бол мәһсул јығанда вә ләзиз јемәкләр јејәндә Јеһованын хејирхаһлығындан дадмыш олурдулар.

Һәвари Павелин Листра ҹамаатына дедији сөзләрдән Јеһова Аллаһ һаггында бир нечә ваҹиб дәрс өјрәнирик.

Јеһова Аллаһ бизә ирадә азадлығы вериб. Јәгин, фикир вердиниз ки, Јеһова бүтүн бүтпәрәст халглара «өз јолу илә ҝетмәјә» изин вермишди. Мүгәддәс Китабы тәрҹүмә едәнләр үчүн бир вәсаитдә гејд олунур ки, бу ифадә «истәдикләри кими ҝетмәк», јахуд да «өзләринин ән дүзҝүн һесаб етдикләри кими давранмаг» мәнасыны да верә биләр. Јеһова һеч кәси Она ибадәт етмәјә мәҹбур етмир. О, бизә ирадә азадлығыны — һәјат јолумузу сечмәк габилијјәтини бәхш едиб (Ганунун тәкрары 30:19).

Јеһова Аллаһ истәјир ки, биз Ону таныјаг. Һәвари изаһ етди ки, Аллаһ «Өзү һаггында даима шәһадәт верирди». Јухарыда гејд олунан вәсаитә әсасән, бу ифадәни «Аллаһ инсанлара неҹә Аллаһ олдуғуну ҝөстәрди» кими тәрҹүмә етмәк олар. Аллаһын хәлг етдији һәр шеј, Онун хејирхаһлығы, һикмәти, ҝүҹү вә мәһәббәти дә дахил олмагла, «ҝөзәҝөрүнмәз кејфијјәтләри» һагда парлаг шәкилдә шәһадәт верир (Ромалылара 1:20). Мүгәддәс Китабда исә Аллаһ Өзү һаггында даһа чох мәлумат ачыглајыр (2 Тимотејә 3:16, 17). Бүтүн бунлар Јеһова Аллаһын бизим Ону танымағымызы истәдијинә дәлаләт едир.

Јеһова Аллаһ бизим хошбәхт олмағымызы истәјир. Павел демишди ки, Аллаһ бизә бол-бол гида верир, үрәјимизи шадлыгла дојдурур. Һәтта Јеһованы гәбул етмәјән ҝүнаһкарлар белә дојунҹа јемәк јејир вә һәјатдан мүәјјән мәнада севинҹ дујур. Лакин Аллаһ истәјир ки, биз һәгиги вә әбәди сүрән хошбәхтлијә говушаг. Бу јалныз Онун һаггында һәгигәти өјрәндијимиз вә өјрәндикләримизи һәјатымызда тәтбиг етдијимиз һалда мүмкүндүр (Мәзмур 144:15; Матта 5:3).

Биз һамымыз һәр ҝүн Јеһованын хејирхаһлығыны дадырыг. Бизә бол рузи-бәрәкәт верән, үрәјимизи шадлыгла дојдуран Јараданымыза чох миннәтдарыг! Бу миннәтдарлығы неҹә ифадә едә биләҹәјиниз һагда нәјә ҝөрә өјрәнмәјәсиниз?