Ибрани дилиндә гәләмә алынан Мүгәддәс Јазыларын сонунҹу китабынын јазылмасындан тәхминән дөрд әср сонра Микеја пејғәмбәрин Мәсиһин Бетлеһемдә доғулаҹағы илә бағлы дедији пејғәмбәрлик јеринә јетди. Тәгрибән 30 ил сонра, бизим еранын 29-ҹу илиндә Даниел пејғәмбәрин Мәсиһин ҝәлиши илә әлагәдар јаздығы пејғәмбәрлијин биринҹи һиссәси јеринә јетди. Иса вәфтиз олунду вә Аллаһ ону мүгәддәс руһ илә мәсһ етди. Елә һәмин ан узун мүддәт ҝөзләнилән «өвлад», јәни Мәсиһ пејда олду!

Иса јубанмадан инсанлара «Аллаһын падшаһлығы һаггында хош хәбәри» чатдырмаға башлады (Лука 8:1). Пејғәмбәрликдә дејилдији кими, о, инсанлара гаршы гајғыкеш, нәзакәтли иди вә сәмими мараг ҝөстәрирди. Исанын тәлимләриндә мәһәббәт әкс олунурду. О, һәр ҹүр нахошлуғу сағалдараг Аллаһын онунла олдуғуну ҝөстәрирди (Матта 4:23). Јашындан асылы олмајараг, Исанын јанына ҝәлән һәр бир инсан онун Мәсиһ олдуғуна әмин олурду (Јәһја 1:41).

Иса билдирмишди ки, Аллаһын Падшаһлығы дүнјаны идарә етмәздән габаг јер үзүндә мүһарибәләр, зәлзәләләр вә бир чох башга фәлакәтләр олаҹаг. Мәһз буна ҝөрә о, һамыны руһән ојаг галмаға чағырырды (Марк 13:37).

Иса Аллаһа итаәт едән камил бир инсан иди, анҹаг она дүшмән кәсилән инсанлар ахырда онун һәјатына сон гојдулар. Иса Мәсиһин өлүмү мүкәммәл бир гурбанлыг иди, чүнки о, Адәм вә Һәвванын итирдији әбәди һәјаты — Ҹәннәтдә јашамаг имканыны ҝери алды.

Исанын өлүмү илә даһа бир пејғәмбәрлик јеринә јетди. Белә ки, Аллаһ ону үч ҝүндән сонра руһани варлыг кими дирилтди. Дириләндән сонра о, 500-дән чох шаҝирдинә ҝөрүндү. Ҝөјә галдырылмаздан әввәл Иса өз давамчыларына тапшырды ки, Аллаһын Падшаһлығы барәдә хош хәбәри бүтүн милләтләрә тәблиғ етсинләр (Матта 28:19). Бәс онлар бу тапшырығы неҹә јеринә јетирәҹәкдиләр?

«Маттанын јаздығы хош хәбәр», «Маркын јаздығы хош хәбәр», «Луканын јаздығы хош хәбәр», «Јәһјанын јаздығы хош хәбәр» китабларына вә «Коринфлиләрә биринҹи мәктуб»а әсасланыб.