Аллаһ ҝөзәҝөрүнмәз руһани варлыгдыр. О, јери, ҝөјү, һәр шеји хәлг едиб. Анҹаг Ону һеч ким јаратмајыб, О, әзәлдән вар оландыр (Мәзмур 90:2). Јараданымыз истәјир ки, инсанлар Онун барәсиндә һәгигәти билиб Ону даһа јахындан танысынлар. (Һәвариләрин ишләри 17:24—27 ајәләрини охујун.)

Аллаһ руһани варлыг олса да, биз Ону таныја биләрик. Онун бәзи хүсусијјәтләрини јаратдығы шејләр васитәсилә ҝөрмәк олар (Ромалылара 1:20). Анҹаг Аллаһы даһа јахындан танымаг үчүн Онун Кәламыны охумалыјыг. Мүгәддәс Китаб бизә севән Јараданымызын хүсусијјәтләрини ачыглајыр. (Мәзмур 103:7—10 ајәләрини охујун.)

Јараданымыз Аллаһ һагсызлыға нифрәт едир. О, инсанлары Өз сурәтиндә, јәни Онда олан хүсусијјәтләрлә јарадыб (Ганунун тәкрары 25:16). Мәһз буна ҝөрә биз дә һагсызлыгла барышмырыг. Дүнјада баш верән ганунсузлуғун сәбәбкары Аллаһ дејил. О, инсанлара ирадә азадлығы бәхш едиб. Чох тәәссүф ки, бәшәр оғуллары бу азадлыгдан суи-истифадә едәрәк әдаләтсиз давранырлар. Бунунла да онлар Аллаһы кәдәрләндирирләр. (Јарадылыш 6:5, 6; Ганунун тәкрары 32:4, 5 ајәләрини охујун.)

Худавәнд Рәбб әдаләтсизлијә һәмишә ҝөз јуммајаҹаг (Мәзмур 37:28, 29). Аллаһын Кәламында дејилир ки, тезликлә О, бүтүн һагсызлыға сон гојаҹаг. (2 Петер 3:7—9, 13 ајәләрини охујун.)