Мүгәддәс Китабда бирбаша олараг порнографијанын, киберсексин вә буна бәнзәр диҝәр шејләрин ады чәкилмир. Лакин орада Аллаһын никаһдан кәнар ҹинси әлагәјә бахышы вә секслә бағлы тәһриф едилмиш фикирләрә мүнасибәти ајдын шәкилдә ҝөстәрилир. Бир нечә ајәјә нәзәр салаг:

• «Торпагдан јарадылмыш бәдәнинизин үзвләриндәки мејилләри — ҹинси әхлагсызлыға, натәмизлијә, шәһвәтә, еһтираса... мејилләри өлдүрүн» (Колослулара 3:5). Порнографија әхлагсыз арзулары өлдүрмәк әвәзинә, онлары аловландырыр вә инсаны Аллаһын ҝөзүндә натәмиз, мурдар едир.

• «Гадына бахыб она гаршы шәһвәтлә аловланан һәр бир адам артыг үрәјиндә онунла зина етмиш олур» (Матта 5:28). Ҹинси әхлагсызлығы әкс етдирән сәһнәләр инсанда сәһв һәрәкәтләрә сүрүкләјәҹәк фикирләри аловландырыр.

• «Ҹинси әхлагсызлығы, һәр ҹүр натәмизлији вә ја аҹҝөзлүјү дилинизә белә ҝәтирмәјин» (Ефеслиләрә 5:3). Биз әјләнҹә хатиринә нәинки ҹинси әхлагсызлыға бахмалы вә онун һаггында охумалы, һәтта бу барәдә дилимизә сөз белә ҝәтирмәмәлијик.

• «Ҝүнаһлы бәдәнин әмәлләри бәллидир. Бунлар: ҹинси әхлагсызлыг, натәмизлик... вә саирәдир. Әввәлки кими, сизи јенә дә хәбәрдар едирәм: белә ишләрлә мәшғул оланлар Аллаһын падшаһлығына ҝирмәјәҹәкләр» (Галатијалылара 5:19—21). Аллаһ порнографијаја бахан, киберсекслә, телефон секси илә вә ја секстинглә мәшғул оланлары натәмиз, мәнән мурдарланмыш һесаб едир. Бу ишләрлә мәшғул оланлар Аллаһын ҝөзүндән тамамилә дүшә биләрләр.