Мүгәддәс Јазыларын сон китабына әсасән, 666 дәниздән чыхан једдибашлы, онбујнузлу вәһши һејванын рәгәми, јәни адыдыр (Вәһј 13:1, 17, 18). Бу вәһши һејван һәр «гәбилә, халг, дил вә милләт үзәриндә» һөкмранлыг едән үмумдүнја сијаси системи тәмсил едир (Вәһј 13:7). Бу сијаси системә верилән 666 ады онун Аллаһын ҝөзүндә олдугҹа јарарсыз олдуғуну ҝөстәрир. Һансы мәнада?

Ади ад дејил. Аллаһын вердији һәр адын өз мәнасы вар. Мәсәлән, Аллаһ мәнасы «али ата» олан Ибрамын адыны дәјишиб Ибраһим гојмушду. «Ибраһим» «чохларынын атасы» демәкдир, чүнки Аллаһ она вәд етмишди ки, о, «чохлу милләтин атасы» олаҹаг (Јарадылыш 17:5, һашијә). Аллаһын вәһши һејвана вердији 666 ады да истисна дејил. Она бу ад мүәјјән ҹәһәтләринин рәмзи олараг верилиб.

6 рәгәми гејри-камиллијин рәмзидир. Мүгәддәс Китабда рәгәмләр чох вахт рәмзи мәна дашыјыр. Једди рәгәми, адәтән, тамлығы, мүкәммәллији билдирир. Једдидән бир әдәд аз олан алты рәгәми исә Аллаһын ҝөзүндә натамам, гүсурлу олан бир шејә аид ола биләр вә бәзән Аллаһын дүшмәнләринә аид ишләнилир (1 Салнамәләр 20:6; Даниел 3:1).

Вурғуламаг үчүн үч дәфә тәкрарланыр. Мүгәддәс Китабда бәзән бир шеји вурғуламаг лазым ҝәләндә үч дәфә тәкрарланыр (Вәһј 4:8; 8:13). Она ҝөрә дә 666 ады бирмәналы шәкилдә вурғулајыр ки, инсанларын гурдуғу сијаси систем Аллаһын ҝөзүндә олдугҹа јарарсыздыр. Онлар јер үзүндә әсил сүлһ вә тәһлүкәсизлији јарада билмәдиләр, буна јалныз Аллаһын Падшаһлығы наил олаҹаг.

Вәһши һејванын нишаны

Мүгәддәс Китабда дејилир ки, инсанлар «вәһши һејванын нишаны»ны алырлар, чүнки «һејрәтлә», она ибадәт едирләрмиш кими ардынҹа ҝедирләр (Вәһј 13:3, 4; 16:2). Онлар буну өлкәләринә, онун рәмзләринә вә һәрби гүввәләринә ибадәт характерли еһтирам бәсләмәклә едирләр. «Дин енсиклопедијасы»нда дејилир: «Милләтчилик мүасир дүнјамызын апарыҹы дининә чеврилиб» *.

Вәһши һејванын нишаны инсанларын сағ әлинә вә алынларына неҹә гојулур? (Вәһј 13:16). Аллаһ Исраил халгына вердији әмрләр барәдә демишди: «Мәним бу сөзләрими... голунуза бир нишан кими, ҝөзләринизин арасына алын бағы кими бағлајын» (Ганунун тәкрары 11:18). Бу о демәк дејилди ки, исраиллиләр һәрфи мәнада голларына вә алынларына нишан гојмалы идиләр, онлар садәҹә јол вермәли идиләр ки, онларын бүтүн фикир вә һәрәкәтләрини Аллаһын сөзләри идарә етсин. Ејнилә, Вәһј 13:16 ајәсиндә јазылан сөзләр киминсә өзүнә 666 рәгәмини дөјдүрдүјүнү ҝөстәрмир. Вәһши һејванын нишаны сијаси системин һәјатларыны идарә етмәсинә јол верән инсанларын рәмзи кими истифадә едилир. Вәһши һејванын нишаныны гәбул едәнләр Аллаһын дүшмәнинә чеврилирләр (Вәһј 14:9, 10; 19:19—21).