Сәнин бир гыздан (вә ја оғландан) хошун ҝәлир вә әминсән ки, бу һиссләр гаршылыглыдыр. Сиз бүтүн ҝүнү јазышырсыныз, бир јердәсиниз. Јазышдығын инсан бәзән сәнә достлуг мүнасибәтләрини ашан месажлар ҝөндәрир.

Вә сән гәрара ҝәлирсән ки, мүнасибәтләринизин нә јердә олдуғуну сорушасан, һиссләринизин гаршылыглы олуб-олмадығына әмин оласан. Алдығын ҹаваб бу олур: «Мән сәнә садәҹә дост ҝөзү илә бахырам».

•  Һиссләр

•  Бу неҹә баш верә биләр?

•  Нә едә биләрсән?

«Дәһшәт әсәбиләшмишдим! Һәм она әсәбиләшмишдим, һәм дә өзүмә! Биз һәр ҝүн јазышырдыг. О, мәнә диггәт ҝөстәрирди. Тәбии олараг мәндә дә она гаршы һиссләр јаранмышды» (Жасмин).

«О гызла мән һәмишә бир ҹүтлүјүн јанында олурдуг. Вахт кечдикҹә, кәнардан елә ҝөрсәнирди ки, биз дә ҝөрүшүрүк. Икимиз саатларла сөһбәт едирдик, сонра саатлара јазышмаға башладыг. О, мәнә дејәндә ки, мәни садәҹә дост ҝөзүндә ҝөрүр вә онун башга бири илә ҝөрүшдүјүнү биләндә һеч ҹүрә гәбул едә билмирдим» (Ричард).

«О оғлан мәнә һәр ҝүн јазырды вә заман кечдикҹә биз икимиздә бир-биримизлә флирт едирдик. Амма мән она һиссләрими ачыб дејәндә о ҝүлүб деди: “Мән бу дәгигә һеч кимлә ҝөрүшмәк истәмирәм!” Мән чох ағладым» (Тамара).

Мәсләһәт. Кимәсә гаршы һиссләрин вар вә биләндә ки, бу һиссләр гаршылыглы дејил, әсәбиләшмәјин, пис олмағын, һәтта өзүнү алдадылмыш кими һисс етмәјин нормалдыр. Стив адлы ҝәнҹ дејир: «Бу, мәним башыма ҝәләндә дүнјам алт-үст олмушду. Сөзүн әсл мәнасында мәнә зәрбә олмушду. Јенидән кимәсә етибар етмәјим үчүн мәнә хејли вахт лазым олду».

Јазышмагла вә сосиал медиа васитәсилә сәнә гаршы һиссләри олмајан инсана асанлыгла бағлана биләрсән. Ҝәл ҝөрәк бәзи ҝәнҹләр бу һагда нә дејир.

«Кимсә сәнинлә садәҹә вахт өлдүрмәк үчүн јазыша биләр. Амма сәнә елә ҝәлә биләр ки, о, сәнә гаршы нәсә һисс едир» (Ҹенифер).

«Ола биләр инсан гаршысындакына романтик һиссләр бәсләсин, амма һәмин адам садәҹә үнсијјәт етмәк, өзүнә әминлијини артырмаг үчүн јазыша биләр» (Ҹејмс).

«Адиҹә “ҝеҹән хејрә галсын” сөзләри романтик һиссләрлә охуна биләр, амма бу, нәзакәт хатиринә јазылан ади сөз дә ола биләр» (Һејли).

«Ади смајлик ја хош мүнасибәт ҝөстәрдијини билдирир, ја да флирт етдијини. Бәзән месажы гәбул едән инсан буну флирт кими баша дүшә биләр» (Алисија).

Мәсләһәт. Диггәт ҝөстәрмәклә романтик һиссләр бәсләмәји сәһв салма. Буну демәк асандыр. Чүнки Мүгәддәс Китабда да дејилир: «Үрәк ән бөјүк хаиндир, хатакардыр» (Әрәмја 17:9). Сәнин хәјаллара гапылмағын гумдан гала дүзәлтмәјә бәнзәјәҹәк. Јадында сахла ки, далға ҝәлиб о галаны јујуб апараҹаг.

•   Објектив јанаш. Бир анлыг дајан вә мүнасибәтинизи ҝөтүр-гој ет. Фикирләш: «Онун мәнә хүсуси мүнасибәт ҝөстәрдијини дүшүнмәјә әсаслы сәбәбләрим вар?» Һиссләрин сәни чулғамасына јол вермә (Ромалылара 12:1).

• Ајдынлашдыр. Араныздакы мүнасибәтин ади бир достлуг олмадығы гәнаәтинә ҝәлмәјинә сәбәб олан шејләрин сәнин ујдурмаларын олуб-олмадығыны мүәјјән ет. Дүшүнмә ки, сәнин кимәсә гаршы һиссләрин варса, демәли, бу һиссләр гаршылыглыдыр.

• Сәбирли ол. Һәмин инсан ачыг шәкилдә сәнә романтик һиссләр бәсләдијини дилә ҝәтирмәјинҹә, бу мүнасибәтләр үчүн һәдәр јерә ҹан гојма.

• Өзүнү алдатма. Мүгәддәс Китабда дејилир ки, «данышмағын өз вахты» вар (Ваиз 3:7). Әҝәр һәмин инсанын сәни өзүнә достдан даһа јахын һесаб едиб-етмәдијини билмәк истәјирсәнсә, буну онун өзүндән соруш. Валери адлы бир гыз дејир: «Әҝәр һиссләр гаршылыглы дејилсә, јахшысы будур инсанын сәнә гаршы һиссләри олмадығыны бәри башдан өјрәниб бир аз әзаб чәкәсән, нәинки ајлар сонра билиб даһа чох әзаб чәкәсән».

Чыхыш јолу. Мәсәлләр 4:23 ајәсиндә дејилир: «Үрәјини гору». Әҝәр кимдәнсә хошун ҝәлирсә, һәмин адамын да сәндән хошу ҝәлиб-ҝәлмәдијини мүәјјән ет. Мүәјјән етмәздән өнҹә романтик һиссләрин көк атмасына јол вермәк, гаја үзәриндә битки бөјүтмәк үчүн әлләшмәјә бәнзәјир.

Әҝәр һәмин инсанын сәнә гаршы һиссләри олдуғуна әминсәнсә, еләҹә дә ҝөрүшмәјә јашын чатырса вә өзүнү буна һазыр һисс едирсәнсә, онда һәмин инсанла ҝөрүшүб-ҝөрүшмәјәҹәјинә гәрар верә биләрсән. Јадда сахла, ејни руһани мәгсәдләри олан, бир-бири илә сәмими вә дүрүст давранан инсанларын мөһкәм никаһы олур (1 Коринфлиләрә 7:39). Шүбһә јохдур ки, онларын арасында јаранан достлуг мүнасибәтләри евләнәндән сонра да давам едәҹәк (Мәсәлләр 5:18).