Достун сөһбәт етмәк истәјәндә онун јанында олмаға чалышырсан. Вахт кечдикҹә достларындан бири илә даһа чох сөһбәт едирсән. Мәсәлә ондадыр ки, бу достун әкс ҹинсин нүмајәндәсидир. Өз-өзүнә: «Биз садәҹә достуг», — дејирсән. Архајынсан ки, достун да сәнин кими фикирләшир. Бәс нараһатчылыға әсас вар?

•  Нә баш верә биләр?

•  Нә үчүн бу ҹидди мәсәләдир?

•  Нә едә биләрсән?

•  Мәсләһәт

Әкс ҹинсдән киминләсә дост олмагда пис бир шеј јохдур. Амма һәмин инсана башгаларындан фәргли олараг даһа хүсуси мүнасибәт бәсләјирсәнсә, онда неҹә? Белә вәзијјәтдә һәмин инсана елә ҝәлә биләр ки, она гаршы һиссләрин вар.

Доғрудан, бу месажы ҝөндәрмәк истәјирсән? Ҝәл һеч өзүнүн дә хәбәрин олмадан дүшә биләҹәјин вәзијјәтләрә бахаг.

• Кимәсә хүсуси диггәт ҝөстәрәндә.

  «Дүздүр, башгаларынын һиссләрини идарә едә билмәзсән. Амма “биз садәҹә достуг” дејиб бүтүн ҝүнү она зәнҝ етмәклә, данышмагла одун үстүнә бензин төкмүш олурсан» (Сиера).

• Һәмин инсанын ҝөстәрдији диггәти ҹавабсыз гојмајанда.

  «Месажлашмаға мән башламырдым, анҹаг о гызын һеч бир месажыны ҹавабсыз гојмурдум. Сонра она дост ҝөзү илә бахдығымы баша салана кими мәнимки мәнә дәјди» (Ричард).

• Киминсә диггәтини өзүнә ҹәлб етмәјә чалышанда.

  «Бәзиләри бу ҹүр мүнасибәтләрә ојун кими бахыр. Онлар ҹидди фикирләри олмадан киминсә һиссләри илә ојнајырлар. Фикир вермишәм ки, бу, тез-тез баш верир. Һәр дәфә дә кимсә әзијјәт чәкир» (Тамара).

Јадда сахла. Мүтәмади үнсијјәт вә диггәт романтик һиссләрә ишарә едир.

• Бу, инсана әзаб верир.

  Мүгәддәс Китабда дејилир: «Узун интизар үрәји хәстә салар» (Мәсәлләр 13:12). Кимсә сәнә гаршы романтик һиссләри олдуғуна ишарә етсәјди, сән ондан нә ҝөзләјәрдин?

  «Бу заман сән, санки, кимисә гармагда сахлајырсан. Елә бил балығы гармаға кечирмисән, амма ону нә дәнизә бурахырсан, нә дә өзүнә ҝөтүрүрсән. Буну мүнасибәтләрә дә аид етмәк олар. Киминләсә ҝөрүшмәк истәмәјиб ону “гармагда сахлајанда” һәмин инсана чох әзаб верирсән» (Ҹесика).

• Адына ләкә ҝәтирир.

  Мүгәддәс Китабда дејилир: «Тәкҹә өзүнүзү фикирләшмәјин, башгаларыны да фикирләшин» (Филиппилиләрә 2:4). Сән өзүндән башга һеч кими дүшүнмәјән инсан һагда нә фикирләшәрсән? Бу хасијјәт инсана неҹә ад газандырыр?

  «Гызларла флирт едән оғланлардан зәһләм ҝедир. Белә инсан арвадына да хәјанәт едәр. Бу ҹүр адамларла отуруб-дурсан, сән дә егоист оларсан» (Ҹулја).

Јадда сахла. Ҹидди фикирләри олмадан кимәсә романтик һиссләр бәсләдијинә ејһам вуран кәсләр һәм өзләринә, һәм дә гаршы тәрәфә әзаб вермиш олурлар.

• Мүгәддәс Китабда дејилир ки, «ҹаванлара гардашын кими», «ҹаван гадынлара баҹын ким» бах (1 Тимутијә 5:1, 2). Әҝәр бу принсипә ујғун даврансан, әкс ҹинслә дост олараг гала биләҹәксән.

  «Әҝәр евли олсајдым, киминсә һәјат јолдашы илә флирт етмәздим. Буна ҝөрә дә артыг индидән, субај икән әкс ҹинслә мүнасибәтдә таразлы олмағы өјрәнмәлијәм» (Лиа).

• Мүгәддәс Китабда дејилир: «Сөз чох олан јердә хәта әскик олмаз» (Мәсәлләр 10:19). Бу принсип тәкҹә сөһбәт етмәјә јох, јазышмаға да аиддир. Үнсијјәтин һансы мөвзуда вә нә дәрәҹәдә тез-тез олдуғу да өнәмлидир.

  «Ҝөрүшмәк истәмәдијин гызла һәр ҝүн јазышмаға нә еһтијаҹ вар?» (Брајн).

• Мүгәддәс Китабда дејилир: «Јухарыдан назил олан һикмәт илк нөвбәдә сафдыр» (Јагуб 3:17). Мәсәлән, гуҹагламағы саф нијјәтдән ирәли ҝәлән һәрәкәт кими дә гәбул етмәк олар, романтик мүнасибәтин ишарәси кими дә.

  «Инсанларла достјана сөһбәт едирәм, амма чалышырам ки, һәм данышығымда, һәм дә һәрәкәтимдә арада мәсафә сахлајым» (Марија).

Јадда сахла. Гызла (оғланла) неҹә даврандығына фикир вер. Ҹенифер адлы јенијетмә дејир: «Јахшы достлар тапмаг чәтиндир. Истәмирәм неҹә ҝәлди давранараг достлуғуму корлајым».

• Кәнардан дејиләнләри нәзәрә ал. Әҝәр кимсә сорушурса ки, «сән филанкәслә ҝөрүшүрсән?», бу ону ҝөстәрир ки, сән достунла чох јахынсан.

• Бүтүн гызлара (оғланлара) гаршы ејни ҹүр давран. Бирини диҝәрләриндән сечиб, даһа чох диггәт ҝөстәрмә.

• Јазышаркән еһтијатлы ол. Нә дәрәҹәдә тез-тез месаж јаздығына, данышдығыныз мөвзулара вә ҝүнүн һансы саатларында месаж јаздығына диггәт јетир. Алис адлы гыз дејир: «Ҝеҹә вахты әкс ҹинсдән олан кимәсә месаж јазма».