Хәстәликләр мүхтәлиф олур.

• Бәзи инсанларда хәстәлијин әламәтләри өзүнү заһирән бүрузә верир, бәзиләриндә исә вермир.

• Елә хәстәликләр вар ки, тез кечиб-ҝедир, еләләри дә вар ки, ҝүнү-ҝүндән ағырлашыр, инсана әзаб верир.

• Бәзи хәстәликләри сағалтмаг вә ја, ән азы, нәзарәтдә сахламаг мүмкүндүр, амма бәзиләри ҝүнү-ҝүндән инсаны шам кими әридир, һәтта һәјаты үчүн тәһлүкә јарадыр.

Әфсуслар олсун ки, бу ҝүн ҝәнҹләр һәр ҹүр хәстәликдән әзијјәт чәкирләр. Бу мәгаләдә ағыр хәстәлији олан дөрд ҝәнҹдән сөһбәт ачылаҹаг. Әҝәр сәнин дә сәһһәтиндә проблем варса, онларын мүсаһибәләрини охумаг сәнә тәсәлли верәҹәк.

•  ГУЕНАЕЛЛА

•  ЗАКАРИ

•  АНАИС

•  ЖУЛИАНА

Мәним үчүн ән бөјүк чәтинлик мәһдудијјәтләримлә барышмагдыр. Әслиндә, мән чох шеј етмәк истәјирәм, амма һалым һәр ҝүн дәјишдијиндән она ујғунлашмаға мәҹбурам.

Синир-әзәлә позунтусундан әзијјәт чәкирәм; бу, елә хәстәликдир ки, бејнимин бәдәнимә мәлуматы дүзҝүн өтүрмәсинә мане олур. Һәрдән ајағымын уҹундан башымадәк бәдәнимин мүхтәлиф үзвләри титрәмәјә башлајыр вә ја ифлиҹ олур. Ҝәзмәк, данышмаг, охумаг, јазмаг вә башгаларыны баша дүшмәк кими ади шејләри етмәкдә чәтинлик чәкирәм. Вәзијјәтим лап писләшәндә јығынҹағымызын ағсаггаллары мәнимлә бирҝә дуа едирләр вә о дәгигә сакитләширәм.

Һисс едирәм ки, Јеһова һәр сынагда мәнә дајагдыр. Истәмирәм, хәстәлијим Она там шәкилдә хидмәт етмәјимә мане олсун. Һәјатда мәним үчүн биринҹи јердә дуран башгаларына Јеһова Аллаһын тезликлә јер үзүндә Ҹәннәт јарадаҹағына вә әзабларын бир даһа олмајаҹағына даир вәди һагда данышмагдыр (Вәһј 21:1—4).

Дүшүн. Сән дә, Гуенаелла кими, башгаларына неҹә ҹан јандыра биләрсән? (1 Коринфлиләрә 10:24).

16 јашым оланда һәкимләр мәнә ағыр бејин хәрчәнҝи диагнозу гојдулар. Онлар өмрүмүн сонуна сәккиз ај галдығыны сөјләдиләр. О вахтдан бәри ҹанымла чәкиширәм.

Шишләр бәдәнимин сағ тәрәфини ифлиҹ едиб. Ҝәзә билмәдијимдән һәмишә башгаларынын көмәјинә мөһтаҹам.

Хәстәлијим инкишаф етдији үчүн ајдын данышмагда чәтинлик чәкирәм. Әввәлләр чох фәал идим: су хизәкчилији илә мәшғул олмағы, баскетбол вә волејбол ојнамағы севирдим. Јеһованын Шаһиди кими, Аллаһа фәал хидмәт едирдим. Мәнҹә, әксәр инсанлар чох севдијин ишләрлә мәшғул олмаг габилијјәтини итирмәјин нә демәк олдуғуну билмирләр.

Јешаја 57:15 ајәсиндәки сөзләрдән өзүмә тәсәлли тапырам, чүнки орада Јеһова Аллаһ мәни әмин едир ки, «руһу [әзиләнләрә]» јахындыр вә гајғыма галыр. Һәмчинин Аллаһын Јешаја 35:6 ајәсиндәки вәдинә әсасән, ҝәләҹәкдә мән јенидән ҝәзә биләҹәјәм, мүкәммәл сағламлығым олаҹаг вә Она хидмәт едәҹәјәм.

Бәзән хәстәлијимлә мүбаризә апармаг олдугҹа чәтин олса да, әминәм ки, Јеһова мәнә дајагдыр. Севинирәм ки, руһ дүшкүнлүјүм оланда, ҹаныма ҝөрә үрәјимә горху дүшәндә дуа едиб сөһбәтләшәҹәјим бир Шәхс вар. Јеһованын севҝисиндән мәни һеч нә ајыра билмәз (Ромалылара 8:39).

Закари 18 јашында, мүсаһибәсиндән ики ај сонра һәјата ҝөзләрини јумду. Онун Аллаһын јерүзү Ҹәннәтдә өлүләри дирилдәҹәјинә даир вәдинә иманы әсла сарсылмады.

Дүшүн. Дуа, Закари кими, сәнә дә Аллаһын мәһәббәтиндә галмаға неҹә көмәк едә биләр?

Һәлә көрпә икән бејнимә ган сызды, бу, бүтүн бәдәнимә, хүсусилә дә ајагларыма өз тәсирини ҝөстәрди.

Бу ҝүн јахын мәсафәләрә ролјаторла ҝедиб-ҝәлирәм, амма чох вахт әлил арабасы олмадан кечинә билмирәм. Тез-тез спазмаларым тутур, белә вахтларда јазмаг кими ади ишләри ҝөрә билмирәм.

Хәстәлијимин јаратдығы стрессдән савајы, мүалиҹәм дә ағыр ҝедир. Лап ушаглыгдан һәфтәдә бир нечә дәфә физиотерапијаја ҝедирәм. Илк бөјүк әмәлијјатымы беш јашымда кечирдим; бундан сонра даһа үч дәфә әмәлијјат олундум. Сон ики әмәлијјат хүсусилә ағыр иди, чүнки сағалана кими үч ај евдән узагда галмалы олдум.

Аилә үзвләрим мәнә бөјүк дајагдыр. Биз бир јердә дејиб-ҝүлүрүк, өзүмү пис һисс едәндә бунун, доғрудан да, көмәји дәјир. Анам да, баҹыларым да мәним гәшәнҝ ҝөрүнмәјимә көмәк едирләр, мән тәк ҹаныма буну баҹармаздым. Дикдабан ајаггабыда ҝәзә билмәдијимә ҝөрә һејифсиләнирәм. Амма бир дәфә буну еләмишәм: ушаглыгда әлими ајаггабыларын ичинә салыб ҝәзмишдим. Онда һамымыз чох ҝүлмүшдүк.

Мән јол вермирәм ки, фикрим-зикрим хәстәлијимдә олсун. Хариҹи дилләр өјрәнирәм. Инди сөрфинглә мәшғул ола вә сноуборд сүрә билмәсәм дә, ән азындан үзҝүчүлүјә ҝедирәм. Јеһованын Шаһиди кими, хидмәтә чыхмағы вә инсанлара иманым һагда данышмағы чох севирәм. Мәнә елә ҝәлир ки, мән данышанда инсанлар мәнә диггәтлә гулаг асырлар.

Валидејнләрим ушаглыгдан мәнә вәзијјәтимин мүвәггәти олдуғуну өјрәдибләр. О вахтдан бәри мән шәхсән әмин олмушам ки, Јеһова һәгиги Аллаһдыр вә бүтүн әзаб-әзијјәтләрә, еләҹә дә мәним әзаб-әзијјәтләримә сон гојаҹаг. Бу, мәнә ирәли ҝетмәјә ҝүҹ верир (Вәһј 21:3, 4).

Дүшүн. Анаис кими, сән дә нә едә биләрсән ки, «фикрин-зикрин хәстәлијиндә олмасын»?

Мән ағыр аутоиммун хәстәликдән әзијјәт чәкирәм, бу хәстәлик үрәјимә, ағ ҹијәрләримә, ганыма тәсир едә биләр вә артыг бөјрәкләримә тәсир едиб.

Мәнә дәри вәрәми диагнозу гојуланда он јашым вар иди. Тез-тез ағрыјырам, һалсыз олурам, овгатым ҝаһ јахшы, ҝаһ пис олур. Өзүмү лазымсыз һисс етдијим анлар да олур.

13 јашым оланда Јеһованын Шаһиди олан бир гадын гапымызы дөјдү. О, мәнә Јешаја 41:10 ајәсини охуду. Орада Јеһова Аллаһ дејир: «Горхма, чүнки Мән сәнинләјәм... Садиг сағ әлимлә сәнә дајаг олаҹағам». Мәһз һәмин андан мән Јеһованын Шаһидләри илә Мүгәддәс Китабы өјрәнмәјә башладым. Артыг сәккиз илдир ки, Аллаһа үрәкдән хидмәт едирәм вә хәстәлијимин һәјатыма һаким кәсилмәсинә имкан вермирәм. Һисс едирәм ки, мүсбәт әһвал-руһијјәми горујуб сахламағым үчүн Јеһова мәнә «инсан ҝүҹүндән үстүн олан» ҝүҹ верир (2 Коринфлиләрә 4:7).

Дүшүн. Јешаја 41:10 ајәси Жулианаја көмәк етдији кими, сәнә дә мүсбәт әһвал-руһијјәни горумаға неҹә көмәк едә биләр?