Нәјә ҝөрә инсанлар арасында һөрмәт галмајыб?

PLAY

БАШГАЛАРЫНА ҺӨРМӘТ ҜӨСТӘРМӘК НӘЈӘ ҜӨРӘ ВАҸИБДИР?

Һөрмәт ҝөстәрмәк ҝәрҝинлији азалдыр вә вәзијјәтин даһа да писләшмәсинин гаршысыны алыр.

Мүгәддәс Китабдакы бир мәсәлдә дејилир: «Мүлајим ҹаваб һирси јатырар, кобуд сөз гәзәб ојадар» (Мәсәлләр 15:1). Һөрмәтсиз данышыг вә рәфтар одун үстүнә бензин төкмәјә бәнзәјир вә адәтән ахыры чох пис олур.
Аллаһын Кәламында дејилир: «Инсан үрәјиндә ашыб-дашан фикирләри дилә ҝәтирир» (Мәтта 12:34). Биз гаршымыздакы инсана һөрмәтсизлик едәндә бу даһа дәрин проблеми, јәни ирги, гәбиләси, миллијјәти вә ја һәјат тәрзи бизимкиндән фәргли олан инсанлар барәдә әслиндә нә дүшүндүјүмүзү ашкара чыхарыр.

Бу јахынларда 28 өлкәдән олан 32 000 нәфәр арасында апарылан сорғуја әсасән иштиракчыларын 65 фаизи вурғулајыб ки, инсанлар арасында нәзакәт вә һөрмәт индијә гәдәр бу ҹүр азалмамышды.

ҺӨРМӘТ ҜӨСТӘРМӘЈӘ СИЗӘ НӘ КӨМӘК ЕДӘ БИЛӘР?

Мәктәбдә, јахуд ишдә инсанларын фикирләри илә разылашмасаныз да, онлара һөрмәт един. Мүәјјән един ҝөрүн һансы мәсәләләрдә фикриниз үст-үстә дүшә биләр. Бу сизә тәнгиди јанашмамаға вә ја инсанлары гынамамаға көмәк едәҹәк.

«Даһа инсанлары мүһакимә етмәјин, јохса өзүнүз дә мүһакимә олунарсыныз» (Мәтта 7:1).

Өзүнүзә гаршы неҹә мүнасибәт ҝөзләјирсинизсә, о ҹүр дә давранын. Әҝәр сиз башгалары илә мүлајим вә јахшы рәфтар етсәниз, онлар да сизинлә меһрибан давранаҹаглар.

«Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Лука 6:31).

Бағышлајан олун. Кимсә сизинлә хошаҝәлмәз тәрздә давранса, дүшүнмәјин ки, һәмин инсан буну гәсдән едир.

«Анлајыш һиддәти ләнҝидәр, ҝүнаһын үстүндән кечмәк инсанын јарашығыдыр» (Мәсәлләр 19:11).

ЈЕҺОВАНЫН ШАҺИДЛӘРИ НЕҸӘ ҺӨРМӘТ ҜӨСТӘРИР?

Јеһованын Шаһидләри јашадыглары вә ишләдикләри әразиләрдә инсанларла һөрмәтҹил рәфтар едирләр вә башгаларыны да буна тәшвиг едирләр.

Бүтүн инсанлара Мүгәддәс Китабдан пулсуз билик тәклиф едирик, амма һеч кимә өз инанҹларымызы вә ја фикирләримизи јеритмәјә чалышмырыг. Әксинә, биз Мүгәддәс Китабдакы бир мәсләһәтә ујғун давранараг бу билији инсанлара «һәлимликлә вә дәрин һөрмәтлә» чатдырырыг (1 Бутрус 3:15; 2 Тимутијә 2:24).

Биз ајры-сечкилик етмирик вә ибадәт ҝөрүшләримизә ҝәлән, Мүгәддәс Китаб тәлимләрини өјрәнмәк истәјән һәр кәси миллијјәтиндән асылы олмајараг хош гаршылајырыг. Биз толерант олмаға ҹан атырыг вә «һәр ҹүр инсана һөрмәт» едирик (1 Бутрус 2:17).

Биз јашадығымыз өлкәнин һакимијјәт даирәләринә һөрмәт едирик (Ромалылара 13:1). Биз ганунлара табе олуруг вә верҝиләри өдәјирик. Бунунла белә, сијаси мәсәләләрдә битәрәф галырыг вә башгаларынын шәхси гәрарларына вә сијаси мөвгеләринә һөрмәт ҝөстәририк.

ОЈАНЫН!