1, 2. Бу мәгаләдә нәләрдән данышаҹағыг?

ТУТАГ КИ, чох ваҹиб бир бағлама ҝөзләјирсиниз. Амма о сизин ҝөзләдијиниз вахтда ҝәлиб чыхмыр. Һансы һиссләри кечирәрдиниз? Бәлкә дә, дилхор олардыныз. Белә вәзијјәтдә Мәсәлләр 13:12 ајәси јеринә дүшүр: «Узун интизар үрәји хәстә салар». Бәс әҝәр өјрәнсәниз ки, бағламанын сизин ҝөзләдијиниз вахтда ҝәлмәмәсинин әсаслы сәбәбләри вар? Јәгин, сәбирлә ҝөзләмәк сизә даһа асан оларды.

² Бу мәгаләдә сәбирлә ҝөзләмәјимизә көмәк едәҹәк бир нечә Мүгәддәс Китаб принсипини нәзәрдән кечирәҹәјик (Мик. 7:7). Һәмчинин Јеһова һәрәкәтә кечәнә гәдәр сәбир етмәли олдуғумуз ики саһәдән данышаҹағыг. Сонда исә Јеһованы сәбирлә ҝөзләјәнләрин алаҹағы немәтләр һагда сөз ачаҹағыг.

3. Мәсәлләр 13:11 ајәсиндәки принсипин мәғзи нәдир?

³ Сәбир етмәјин ваҹиблијини Мәсәлләр 13:11 ајәсиндәки сөзләр чох ҝөзәл тәсвир едир: «Тез топланан сәрвәт дағылар, дамла-дамла топланан сәрвәт исә артар». Бурада һансы принсипи ҝөрмәк олар? Һикмәтли инсан ишини сәбирлә, аддымбаддым ҝөрүр.

4. Мәсәлләр 4:18 ајәсиндәки принсипин мәғзи нәдир?

⁴ Мәсәлләр 4:18 ајәсиндә јазылыб: «Салеһләринсә јолу сүбһ шәфәги кимидир, ҝүн ҝүнорта јеринә галхдыгҹа даһа да ишыгланыр». Бу ајә Јеһованын халгына нијјәтини ачыглама тәрзини ҝөстәрир; О, буну тәдриҹән едир. Амма  ҝениш мәнада бу ајәни мәсиһинин руһани инкишафына да аид етмәк олар. Бу просеси тәләсдирмәк мүмкүн дејил. Бунун үчүн вахт кечмәлидир. Әҝәр биз дәрин мүталиә етсәк, Аллаһын Кәламындан вә тәшкилатындан алдығымыз ҝөстәришләрә әмәл етсәк, тәдриҹән Мәсиһә бәнзәјәҹәјик. Һәмчинин Аллаһы даһа јахындан таныјаҹағыг. Ҝәлин ҝөрәк Иса бунунла бағлы һансы нүмунәни чәкмишди.

5. Иса Мәсиһ инсанын руһани ҹәһәтдән тәдриҹән бөјүдүјүнү ҝөстәрмәк үчүн һансы нүмунәни чәкмишди?

⁵ Иса бәјан етдијимиз Падшаһлыг хәбәрини кичик тохума бәнзәтмишди. Тохумун сәмими гәлбли инсанларын үрәјиндә тәдриҹән бој атмасыны нүмунә әсасында белә изаһ етмишди: «Тохум неҹә ҹүҹәрир, неҹә бөјүјүр, о адамын [әкинчинин] хәбәри олмур. Торпаг өз-өзүнә тәдриҹән бар јетишдирир: әввәлҹә ҝөвдә ҹүҹәрир, сонра сүнбүл әмәлә ҝәлир, нәһајәт, сүнбүлдә дән јетишир» (Марк 4:27, 28). Иса бунунла нәји вурғуламаг истәјирди? О изаһ едирди ки, битки јаваш-јаваш бөјүдүјү кими, Падшаһлыг һаггында хәбәри гәбул едән инсан да руһани ҹәһәтдән јаваш-јаваш инкишаф едир. Мәсәлән, Мүгәддәс Китабы өјрәнән шаҝирд Јеһоваја јахынлашдыгҹа онда баш верән ҝөзәл дәјишикликләри ҝөрүрүк (Ефес. 4:22—24). Амма унутмамалыјыг ки, бу кичик тохуму бөјүдән Јеһова Аллаһдыр (1 Кор. 3:7).

6, 7. Јеһованын Јер күрәсини јаратма тәрзиндән нә өјрәнирик?

⁶ Јеһова ҝөрдүјү бүтүн ишләри нә гәдәр вахт апармасындан асылы олмајараг, сәбирлә ҝөрүр. О, буну һәм Өз адынын шәрәфләнмәси, һәм дә башгаларынын хејри наминә едир. Мәсәлән, ҝөтүрәк Јеһованын Јер күрәсини инсанларын јашамасы үчүн мәрһәләли шәкилдә јаратмасыны.

⁷ Јеһованын дүнјаны јаратмасы илә бағлы Мүгәддәс Китабда дејилир ки, она «өлчү вериб», «тәмәли»ни јерләшдириб, «ҝушә дашыны» гојуб (Әјј. 38:5, 6). Һәтта Јеһова  ишләринә нәзәр салмаг үчүн вахт ајырырды (Јар. 1:10, 12). Тәсәввүр едирсиниз, мәләкләр Јеһованын јаратдыгларынын бир-бир әрсәјә ҝәлдијини ҝөрәндә һансы һиссләри кечирирди? Шүбһәсиз, севинҹләринин һәдди-һүдуду јох иди! Һәтта онлар «һајгырыб алгыш» охумушдулар (Әјј. 38:7). Бундан һансы нәтиҹәни чыхарырыг? Јеһованын хилгәти хәлг етмәси минләрлә илә әрсәјә ҝәлди. Амма О, һәр хырдалығына гәдәр дүшүнәрәк јаратдығы хилгәтә баханда демишди ки, «һәр шеј чох јахшыдыр» (Јар. 1:31).

8. Инди нә һагда данышаҹағыг?

⁸ Јухарыдакы нүмунәләрдән ҝөрдүјүмүз кими, Аллаһын Кәламында сәбрин ваҹиблијини вурғулајан чохлу принсип вар. Инди исә Јеһованы сәбирлә ҝөзләмәли олдуғумуз ики саһәдән данышаҹағыг.

9. Јеһованы сәбирлә ҝөзләмәли олдуғумуз саһәләрдән бири һансыдыр?

⁹Дуаларымызын ҹавабыны сәбирлә ҝөзләмәлијик. Јеһовадан һансыса чәтинлијә дөзмәк үчүн ҝүҹ истәјәндә вә ја зәифлијимизлә баҹармаг үчүн көмәк диләјәндә бизә елә ҝәлә биләр ки, дуамызын ҹавабы ҝөзләдијимиздән ҝеҹ ҝәлир. Нәјә ҝөрә Јеһова бүтүн дуаларымыза дәрһал ҹаваб вермир?

10. Нәјә ҝөрә дуаларымызын ҹавабыны сәбирлә ҝөзләмәлијик?

¹⁰ Јеһова дуаларымызы диггәтлә динләјир (Зәб. 65:2). О бизим үрәкдән ҝәлән дуаларымыза иманымызын сүбуту кими бахыр (Ибр. 11:6). Һәмчинин Јеһова ҝөрмәк истәјир ки, дуаларымыза ујғун јашамаға вә Онун бәјәндији кими давранмаға нә гәдәр гәтијјәтлијик (1 Јәһ. 3:22). Буна ҝөрә дә пис вәрдишимизин вә ја зәифлијимизин өһдәсиндән ҝәлмәк үчүн Јеһоваја дуа едәндә сәбирли олмаг вә дуамыза ујғун давранмаг лазым ҝәлә биләр. Иса Мәсиһ демишди: «Дурмадан диләјин, сизә вериләҹәк; дурмадан ахтарын, тапаҹагсыныз; дурмадан гапыны дөјүн, сизә ачаҹаглар. Чүнки диләјән истәдијини алыр, ахтаран тапыр вә гапыны дөјәнә ачырлар» (Мәт. 7:7, 8). Бу сөзләрлә о ҝөстәрирди ки, бәзи дуаларымыза дәрһал ҹаваб алмајаҹағыг. Амма бу мәсләһәтә әмәл едиб «даима дуа» едириксә, архајын ола биләрик ки, Јеһова бизи ешидир вә дуамыза ҹаваб верәҹәк (Кол. 4:2).

11. Дуамызын ҹавабынын ҝеҹикдијини дүшүнәндә 1 Бутрус 5:6, 7 ајәләри бизә неҹә көмәк едә биләр?

¹¹ Дуамыза ҝеҹ ҹаваб алдығымызы дүшүнсәк дә, Јеһова сөз верир ки, «вахты ҝәләндә» дуаларымыза ҹаваб верәҹәк. (1 Бутрус 5:6, 7 ајәләрини охујун.) Елә буна ҝөрә дә дуамыза истәдијимиз ан ҹаваб алмајанда Јеһованы ҝүнаһландырмамалыјыг. Мәсәлән, чохлары узун илләрдир, Аллаһын Падшаһлығынын бу дүнјадакы писликләрә сон гојмасы үчүн дуа едир. Һәтта Иса өзү дә демишди ки, биз бу һагда дуа етмәлијик (Мәт. 6:10). Амма сонун биз инсанларын ҝөзләдији вахт ҝәлмәдијинә ҝөрә Аллаһа иманымызы итирмәк неҹә дә ағылсызлыг оларды! (Һәб. 2:3; Мәт. 24:44). Ағыллы адам исә Јеһованы сәбирлә ҝөзләјир вә иманла дуа едир. Сон дүз вахтында ҝәләҹәк, чүнки Јеһова һәмин «ҝүнү вә сааты» артыг тәјин едиб. Онун тәјин етдији ҝүн Аллаһы севән һәр кәсин хејринә олаҹаг вахтдыр (Мәт. 24:36; 2 Бут. 3:15).

12. Һансы вәзијјәтдә сәбримиз сынана биләр?

¹²Һагг-әдаләтин бәргәрар олунмасыны сәбирлә ҝөзләмәлијик. Бу дүнјада инсанлар  чох вахт ҹинсијјәти, миллијјәти, мәдәнијјәти, етник вә ја ирги мәнсубијјәти онлардан фәргли оланларла пис рәфтар едир. Диҝәрләри физики вә ја әгли гүсурларына ҝөрә һагсыз рәфтара мәруз галыр. Бир чох Јеһованын Шаһиди исә Мүгәддәс Китаба әсасланан етигадларына ҝөрә әдаләтсизликлә үзләшир. Бу кими мүнасибәтләрлә үзләшәндә Иса Мәсиһин сөзләри бизә көмәк едә биләр. О демишди: «Ахыра кими дөзән хилас олаҹаг» (Мәт. 24:13). Бәс әҝәр јығынҹагда киминсә ҹидди ҝүнаһ ишләдијини билирсинизсә, нә етмәлисиниз? Ағсаггаллар бундан хәбәрдар оландан сонра онларын бу мәсәләни Јеһованын ҝөстәришинә ујғун һәлл едәҹәкләринә етибар едиб, сәбирлә ҝөзләјәҹәксиниз? Ағсаггаллар бу кими мәсәләләри неҹә һәлл едирләр?

13. Кимсә ҝүнаһ ишләјәндә Јеһова ағсаггалларын бу мәсәләни неҹә һәлл етмәсини истәјир?

¹³ Онлар илк нөвбәдә дуа едиб «јухарыдан назил олан һикмәт» диләјирләр ки, вәзијјәтә Јеһованын ҝөзү илә бахсынлар (Јаг. 3:17). Онларын мәгсәди мүмкүнсә, ҝүнаһкары сәһв јолдан гајтармагдыр (Јаг. 5:19, 20). Һәмчинин онлар әлләриндән ҝәләни едирләр ки, јығынҹағы горусунлар вә зәрәрчәкәнләрә тәсәлли версинләр (2 Кор. 1:3, 4). Кимсә ҹидди ҝүнаһ ишләјәндә ағсаггаллар әввәлҹә бүтүн фактлары өјрәнмәлидир, бунун үчүн исә мүәјјән вахт лазымдыр. Сонра онлар дуа едиб, дүшүнүлмүш шәкилдә ҝүнаһкара Мүгәддәс Китабдан мәсләһәт верир вә «лазыми өлчүдә» дүзәлиш едир (Әрм. 30:11). Ағсаггаллар бу мәсәләни узатмыр, амма тез-тәләсик дә гәрар вермир. Онлар Јеһованын ҝөстәришләринә ујғун даврананда бүтүн јығынҹаг бунун хејрини ҝөрүр. Амма бәзән һәтта һәр шеј дүзҝүн шәкилдә һәлл олунса да, зәрәрчәкән тәрәф һәлә дә гәлб јарасы дуја биләр. Әҝәр сиз дә белә вәзијјәтдәсинизсә, ағрынызы неҹә јүнҝүлләшдирә биләрсиниз?

14. Мүгәддәс Китабдакы һансы нүмунә мәсиһинин вурдуғу ағыр гәлб јарасына дөзмәјә көмәк едә биләр?

¹⁴ Олубму ки, кимсә, һәтта диндашыныз сизә ағыр гәлб јарасы вурсун? Мүгәддәс Китабдакы нүмунәләр бизә көмәк едә биләр ки, мәсәләни Јеһованын өһдәсинә бурахыб, сәбирлә ҝөзләмәји өјрәнәк. Мисал  үчүн, Јусифин гардашлары она гаршы чох бөјүк һагсызлыг етмишдиләр. Амма Јусиф имкан вермәди ки, онларын бу һәрәкәти ону аҹыглы инсана чевирсин. Әксинә, о, диггәтини Јеһоваја хидмәтә ҹәмләди, Јеһова да она сәбирлә дөздүјүнә ҝөрә бол-бол мүкафат верди (Јар. 39:21). Заманла Јусиф гардашларынын она чәкдирдији әзаблары унутмағы баҹарды вә Јеһованын она вердији немәтләри ҝөрә билди (Јар. 45:5). Јусиф кими, биз дә Јеһоваја јахынлашанда вә һагсызлығы һәлл етмәји Онун өһдәсинә бураханда тәсәлли тапырыг (Зәб. 7:17; 73:28).

15. Бир баҹыја һагсызлыға дөзмәјә нә көмәк етди?

¹⁵ Әлбәттә, үзләшдијимиз бүтүн һагсызлыглар Јусифинки гәдәр ағыр дејил. Амма истәнилән һалда, пис рәфтар инсана гәлб ағрысы верир. Киминләсә, о ҹүмләдән Јеһоваја ибадәт етмәјән инсанла арамызда проблем јарананда Мүгәддәс Китабдакы принсипләрә әмәл етсәк, хејрини ҝөрәрик (Филип. 2:3, 4). Баш вермиш бир һадисәјә нәзәр салаг. Бир баҹы өјрәнәндә ки, иш јолдашы онун һаггында пис данышыр, шајиәләр јајыр, чох сарсылмышды. Амма баҹы тез өзүндән чыхмады, Иса Мәсиһин нүмунәси үзәриндә дүшүндү. Иса тәһгирә тәһгирлә ҹаваб вермирди (1 Бут. 2:21, 23). Баҹы да баш верәнләри удмаг гәрарына ҝәлди. Сонралар баҹы билди ки, иш јолдашынын сәһһәтиндә ҹидди проблем вар имиш вә буна ҝөрә ҹидди стрес кечирирмиш. Баҹы белә гәнаәтә ҝәлди ки, јәгин, иш јолдашы бу сөзләри гәсдән демәјиб. Бу пис рәфтар гаршысында тәмкин ҝөстәрдији үчүн баҹы чох севинирди вә үрәји раһат иди.

16. Һагсызлыгла үзләширсинизсә, сизә нә тәскинлик верә биләр? (1 Бутрус 3:12).

¹⁶ Әҝәр һагсызлыгла үзләширсинизсә, јахуд башга сәбәбә ҝөрә әзаб чәкирсинизсә, унутмајын ки, Јеһова «гәлбисыныглара» јахындыр (Зәб. 34:18). Јеһова сәбир етдијинизә, гајғы јүкүнүзү Она вердијинизә ҝөрә сизи чох истәјир (Зәб. 55:22). О, дүнјанын Һакимидир. Һеч нә Онун нәзәриндән јајынмыр. (1 Бутрус 3:12 ајәсини охујун.) Бәс сиз һәлли сиздән асылы олмајан чәтинликләрлә үзләшәндә Јеһованы сәбирлә ҝөзләјирсиниз?

17. Әшија 30:18 ајәсиндә јазылдығы кими, Јеһова бизә нә вәд едир?

¹⁷ Тезликлә, сәмави Атамыз Јеһова Падшаһлығы васитәсилә башымыздан бол-бол немәтләр төкәҹәк. Әшија 30:18 ајәсиндә јазылыб: «Јеһова сәбирлә ҝөзләјир ки, сизә лүтф ҝөстәрсин, О галхаҹаг ки, сизә мәрһәмәт ҝөстәрсин. Чүнки Јеһова һагг Аллаһдыр. Нә хошбәхтдир үмидини Она бағлајанлар!» Бәли, үмидини Јеһоваја бағлајанлар һәм инди, һәм дә ҝәләҹәкдә јени дүнјада чохлу немәтләр алаҹаг.

18. Бизи гаршыда һансы немәтләр ҝөзләјир?

¹⁸ Аллаһын халгы јени дүнјаја дахил оландан сонра даһа нараһатчылыг, чәтинлик нәдир билмәјәҹәк. Нә һагсызлыг, нә дә ағры олаҹаг (Вәһј 21:4). Еһтијаҹ дујдуғумуз шејләрин дәрдини чәкмәјәҹәјик, чүнки һәр шеј бол олаҹаг (Зәб. 72:16; Әшј. 54:13). Ҝөрүн бизи гаршыда неҹә ҝөзәл һәјат ҝөзләјир!

19. Јеһова бизи индидән нәјә һазырлајыр?

¹⁹ О вахта гәдәр исә Јеһова бизи Онун рәһбәрлији алтында олаҹаг һәјата һазырлајыр. О, пис вәрдишләримизин өһдәсиндән ҝәлмәјә вә јахшы хүсусијјәтләр инкишаф етдирмәјимизә көмәк едир. Буна ҝөрә дә тәслим олмајын, руһдан дүшмәјин! Ән ҝөзәл ҝүнләр һәлә гаршыдадыр! Бу парлаг ҝәләҹәк ҝәләнә гәдәр ҝәлин Јеһованын Өз ишини тамамламасыны сәбирлә вә һәвәслә ҝөзләмәјә давам едәк!