1. Нәјә әминик вә нәјә ҝөрә?

 ДҮНЈАДАКЫ вәзијјәтә баханда ганыныз гаралыр? Үмуми ҝөтүрсәк, аилә бағлары зәифләјиб, инсанлар даһа гәзәбли, даһа агрессив вә даһа худбин олублар. Чохларынын һакимијјәтә етибары галмајыб. Амма елә бунларын өзү вәзијјәтин јахшылашаҹағына әминлијимизи артырыр. Чүнки инсанларын «ахырзаманда» бу ҹүр олаҹаглары илә бағлы пејғәмбәрлик дәгигликлә јеринә јетир (2 Тим. 3:1—5). Сәмими-гәлбли истәнилән инсан бу пејғәмбәрлијин јеринә јетдији илә разылашаҹаг. Бу пејғәмбәрлик Иса Мәсиһин Аллаһын Падшаһлығынын Падшаһы кими һакимијјәт сүрмәјә башладығыны сүбут едир. Бу, Аллаһын Падшаһлығы илә бағлы чохсајлы пејғәмбәрликләрдән садәҹә биридир. Сон илләрдә јеринә јетән диҝәр пејғәмбәрликләри арашдырмаг бизим иманымызы даһа да мөһкәмләндирәҹәк.

2. Бу мәгаләдә һансы пејғәмбәрликләри арашдыраҹағыг вә бунун сајәсиндә нә өјрәнәҹәјик? (Үз габығындакы шәклә шәрһ верин.)

² Бу мәгаләдә 1) Аллаһын Падшаһлығынын нә заман гурулдуғуну мүәјјән етмәјә көмәк едән пејғәмбәрлији, 2) Иса Мәсиһин ҝөјдә Падшаһлыгда һакимијјәт сүрмәјә башладығыны ҝөстәрән пејғәмбәрликләри вә 3) Падшаһлығын дүшмәнләринин неҹә мәһв олаҹағы илә бағлы пејғәмбәрликләри арашдыраҹағыг. Бу пејғәмбәрликләр пазлын һиссәҹикләри кими бир-бирини тамамлајараг Јеһованын заман  хәттиндә һансы дөврдә јашадығымызла бағлы ајдын шәкил јарадыр.

3. Дәнјал 7:13, 14 ајәләриндәки пејғәмбәрлик Аллаһын Падшаһлығынын Падшаһы илә бағлы бизә һансы әминлији верир?

³ Дәнјал 7:13, 14 ајәләриндәки пејғәмбәрлик бизи әмин едир ки, Иса Мәсиһ Аллаһын Падшаһлығынын мүкәммәл Һөкмдарыдыр. Бүтүн халглардан олан инсанлар она бөјүк мәмнунијјәтлә гуллуг едәҹәк вә о башга бир падшаһла әвәз едилмәјәҹәк. Һәмчинин «Дәнјал» китабында пејғәмбәрлик олунур ки, Иса Мәсиһ једди дөврүн сонунда тахта чыхаҹаг. Бәс бу вахты мүәјјән етмәк мүмкүндүр?

4. Дәнјал 4:10—17 ајәләри Исанын Падшаһ кими һакимијјәт сүрмәјә башладығы вахты мүәјјән етмәјә неҹә көмәк едир? (Һәмчинин һашијәјә бахын.)

⁴ Дәнјал 4:10—17 ајәләрини охујун. «Једди дөвр» дејиләндә 2520 ил нәзәрдә тутулур. Һәмин дөвр бабиллиләр Јерусәлимдә Јеһованын тахтында отуран сонунҹу падшаһы девирәндә башлады, бу исә ерамыздан әввәл 607-ҹи илдә баш вермишди. Ерамызын 1914-ҹү илиндә Јеһова Иса Мәсиһи, јәни «гануни саһиби» Падшаһлығын Падшаһы тәјин едәндә једди дөвр сона чатды * (Һизг. 21:25—27).

5. «Једди дөвр»лә бағлы пејғәмбәрлији арашдырмағымыз нәјә ҝөрә ваҹибдир?

⁵ Бу пејғәмбәрлији арашдырмағымыз нәјә ҝөрә ваҹибдир? «Једди дөвр»лә бағлы пејғәмбәрлији баша дүшмәјин сајәсиндә Јеһованын Өз вәдләрини вахтында јеринә јетирдијинә әмин олуруг. Јеһова тәјин етдији вахтда Падшаһлығы гурдуғу кими, диҝәр пејғәмбәрликләри дә конкрет тәјин етдији вахтда јеринә јетирәҹәк. Бәли, Јеһованын ҝүнү «ҝеҹикмәјәҹәк!» (Һәб. 2:3).

6. а) Мәсиһин ҝөзәҝөрүнмәз һакимијјәтинин ҝөрүнән сүбутлары һансылардыр? б) Вәһј 6:2—8 ајәләриндәки пејғәмбәрлик бу сүбуту неҹә тәсдиг едир?

⁶ Јерүзү хидмәтинин сонларына јахын Иса Мәсиһ дүнјада баш верәҹәк бәзи һадисәләри пејғәмбәрлик етмишди. Бунун сајәсиндә давамчылары онун ҝөјдә һакимијјәтә башладығыны биләҹәкдиләр. Мәсәлән, о, мүһарибәләрин, аҹлығын, зәлзәләләрин олаҹағыны демишди. Иса һәмчинин пејғәмбәрлик етмишди ки, «ҝаһ бурада, ҝаһ орада... хәстәликләр», јахуд епидемијалар олаҹаг. Тәзәликҹә олан COVID-19 пандемијасы буна бир нүмунәдир. Бу һадисәләр Мәсиһин һүзурунун әламәтинин бир һиссәсидир (Мәт. 24:3, 7; Лука 21:7, 10, 11). Иса Мәсиһ ҝөјләр һәјатына дириләндән тәхминән 60 ил сонра һәвари Јәһјаја вәһј вермишди. Һәмин вәһјдә ҝәләҹәкдә бу һадисәләрин баш верәҹәјини бир даһа вурғуламышды. (Вәһј 6:2—8 ајәләрини охујун.) Бүтүн бу һадисәләр 1914-ҹү илдә Иса һакимијјәтә башлајандан бәри баш верир.

7. Нәјә ҝөрә Иса Падшаһ оланда јер үзүндә вәзијјәт писләшди?

⁷ Нәјә ҝөрә Иса Мәсиһ Падшаһ оланда дүнјада вәзијјәт писләшди? Вәһј 6:2 ајәсиндә ваҹиб бир нүанс вурғуланыр. Тахта чыхан кими Исанын өһдәсинә дүшән илк иш мүһарибә етмәк олду. О киминлә вурушду? Иблис вә онун ҹинләри илә. Вәһј 12-ҹи фәслә әсасән, Шејтан мәғлуб олду вә ҹинләри илә бирликдә ҝөјдән јер үзүнә  атылды. Шејтан бүтүн гәзәбини бәшәријјәтин үзәринә төкдү, беләҹә, јер үзүндә чохлу бәлалар баш верди (Вәһј 12:7—12).

8. Падшаһлыгла бағлы пејғәмбәрликләрин јеринә јетдијини ҝөрмәк бизә неҹә көмәк едир?

⁸ Бу пејғәмбәрликләри арашдырмағымыз нәјә ҝөрә ваҹибдир? Дүнјада баш верән һадисәләр вә инсанларын давранышынын ҝөзәчарпан дәрәҹәдә писләшмәси Исанын артыг падшаһлыг етдијини ҝөстәрир. Буна ҝөрә дә киминсә худбин, залым даврандығыны ҝөрәндә ганымыз гаралмамалыдыр; унутмамалыјыг ки, бунунла Мүгәддәс Китабдакы пејғәмбәрликләр јеринә јетир. Падшаһлыг һакимијјәт сүрүр! (Зәб. 37:1). Үстәлик, Армаҝеддон јахынлашдыгҹа дүнјадакы вәзијјәт даһа да писләшәҹәк (Марк 13:8; 2 Тим. 3:13). Јеһоваја шүкүрләр олсун ки, баш верән бәлаларын сәбәбини баша дүшмәјә бизә көмәк едир.

9. Дәнјал 2:28, 31—35 ајәләриндә сонунҹу дүнја гүдрәти неҹә тәсвир олунуб вә о нә вахтдан мөвҹуддур?

⁹ Дәнјал 2:28, 31—35 ајәләрини охујун. Биз бу пејғәмбәрлијин һазырда јеринә јетдијини ҝөрүрүк. Навуходоносорун рөјасы «заманын сонунда», Мәсиһ тахта чыхандан сонра баш верәҹәк һадисәләрә ишарә едирди. Исанын јер үзүндәки дүшмәнләринә Мүгәддәс Китабда пејғәмбәрлик олунан сонунҹу дүнја гүдрәти дә дахилдир. О, «дәмирлә ҝил»ин гарышығындан олан ајагларла тәсвир олунур. Бу дүнја гүдрәти артыг сијаси аренададыр. О нә заман јараныб? Биринҹи Дүнја мүһарибәси заманы Бөјүк Британија илә Бирләшмиш Штатлар сых әмәкдашлыг гурду вә Инҝилтәрә-Америка иттифагы  јаранды. Бунунла да бу дүнја гүдрәти пејда олду. Һәмчинин Навуходоносорун рөјасында бу дүнја гүдрәтини диҝәрләриндән фәргләндирән ән азы ики мәгам вурғуланмышды.

10. а) Дәнјалын пејғәмбәрлијиндә Инҝилтәрә-Америка иттифагы неҹә дәгиг тәсвир олунуб? б) Һансы тәһлүкәдән өзүмүзү ҝөзләмәлијик? (« Ҝилин тәсиринә дүшмәјин!» адлы чәрчивәјә бахын.)

¹⁰ Биринҹи мәгам одур ки, Инҝилтәрә-Америка иттифагы өнҹәки дүнја гүдрәтләриндән фәргли олараг, гызыл вә ҝүмүш кими мөһкәм металларла јох, дәмир вә ҝилин гарышығы илә тәсвир олунуб. Ҝил «бәшәр өвладыны», јәни ади инсанлары тәмсил едир (Дән. 2:43, һаш.). Бу ҝүн ачыг-ајдын ҝөрүнүр ки, халгын сечкиләрә тәсири, онларын инсан һүгугларынын мүдафиәси үзрә һәрәкатлар, күтләви митингләр вә һәмкарлар иттифагы тәшкил етмәси бу дүнја гүдрәтинин өз истәдији кими фәалијјәт ҝөстәрмәсинә мане олур.

11. Инҝилтәрә-Америка дүнја гүдрәтинин һөкмранлыға башламасы ахырзаманда јашадығымыза даир иманымызы неҹә мөһкәмләндирир?

¹¹ Икинҹиси, нәһәнҝ һејкәлин ајаглары илә тәсвир олунан Инҝилтәрә-Америка иттифагы Мүгәддәс Китаб пејғәмбәрлијинә әсасән, сонунҹу дүнја гүдрәтидир. Ондан сонра һеч бир дүнја гүдрәти ҝәлмәјәҹәк. Аллаһын Падшаһлығы Армаҝеддонда диҝәр инсан һөкумәтләри илә јанашы, ону да мәһв едәҹәк * (Вәһј 16:13, 14, 16; 19:19, 20).

12. Дәнјалын нәһәнҝ һејкәллә бағлы пејғәмбәрлијини арашдырмағымыз нәјә ҝөрә ваҹибдир?

¹² Бу пејғәмбәрлији арашдырмағымыз нәјә ҝөрә ваҹибдир? Дәнјалын пејғәмбәрлији сүбут едир ки, биз заманын сонунда јашајырыг. О, тәхминән 2500 ил өнҹә пејғәмбәрлик етмишди ки, Бабил империјасындан сонра даһа дөрд дүнја гүдрәти Аллаһын халгы үзәриндә һакимијјәт сүрәҹәк. Үстәлик, Инҝилтәрә-Америка дүнја гүдрәти онларын сонунҹусу олаҹаг. Биз бундан тәсәлли тапырыг вә үмидимиз јараныр ки, тезликлә Аллаһын Падшаһлығы бүтүн инсан һөкумәтләрини јерли-дибли мәһв едәҹәк вә бүтүн дүнјаны идарә етмәјә башлајаҹаг (Дән. 2:44).

13. Вәһј 17:9—12 ајәләриндә гејд олунан «сәккизинҹи падшаһ» вә «он падшаһ» нәји тәмсил едир вә бу пејғәмбәрлик неҹә јеринә јетиб?

¹³ Вәһј 17:9—12 ајәләрини охујун. Биринҹи Дүнја мүһарибәсинин ҝәтирдији фәлакәт Мүгәддәс Китабда ахырзаманла бағлы башга бир пејғәмбәрлијин јеринә јетмәсинә сәбәб олду. Дүнја лидерләри бәшәријјәтдә сүлһ јаратмаг нијјәти илә 1920-ҹи илин јанвар ајында Милләтләр Ҹәмијјәтини тәсис етдиләр. 1945-ҹи илин октјабрында о, Бирләшмиш Милләтләр Тәшкилаты (БМТ) илә әвәз олунду. Бу тәшкилат «сәккизинҹи падшаһ» адланыр; амма о, дүнја гүдрәти дејил. Онун ҝүҹү вә сәлаһијјәти ону дәстәкләјән һөкумәтләрдән асылыдыр. Мүгәддәс Китабда һәмин һөкумәтләр символик мәнада «он падшаһ» адланыр.

14, 15. а) Бөјүк Бабиллә бағлы Вәһј 17:3—5 ајәләриндә нә ачыгланыр? б) Јалан динин тәрәфдарлары һансы аддымы атыр?

¹⁴ Вәһј 17:3—5 ајәләрини охујун. Һәвари Јәһја вәһјдә фаһишә адланан «Бөјүк Бабили» ҝөрүр. Бөјүк Бабил јалан динин дүнја империјасыны тәмсил едир. Бу вәһјдән нә мәлум олур? Узун мүддәтдир ки, јалан динләр дүнјанын сијаси гүввәләри илә сых әмәкдашлыг едирләр вә онларын ишләрини дәстәкләјирләр. Амма  тезликлә «он падшаһ», јәни бу сијаси гүввәләр јалан динә һүҹум едиб ону мәһв едәҹәкләр. Бу фикри онларын үрәјинә Јеһова гојаҹаг (Вәһј 17:1, 2, 16, 17).

¹⁵ Бөјүк Бабилин сонунун јахынлашдығыны һарадан билирик? Бу суала ҹаваб вермәк үчүн ҝәлин гәдим Бабил шәһәрини јадымыза салаг. Фәрат чајы шәһәрин бөјүк гисмини горујурду. «Вәһј» китабында Бөјүк Бабилин милјонларла тәрәфдары ону горујан «сулара» бәнзәдилир (Вәһј 17:15). Амма орада һәмчинин гејд олунур ки, бу сулар гурујаҹаг, јәни јалан динин дүнја империјасы тәрәфдарларынын бөјүк гисмини итирәҹәк (Вәһј 16:12). Бу ҝүн бу пејғәмбәрлик јеринә јетир. Чохлу сајда инсан јалан дини тәшкилатлары тәрк едиб вә проблемләринин һәлли үчүн башга јерләрә үз тутмаға башлајыблар.

16. БМТ вә Бөјүк Бабиллә бағлы пејғәмбәрлији баша дүшмәјин бизә һансы фајдасы вар?

¹⁶ Бу пејғәмбәрликләри арашдырмағымыз нәјә ҝөрә ваҹибдир? Бирләшмиш Милләтләр Тәшкилатынын мејдана чыхмасы вә јалан динин тәрәфдарларынын азалмасы ахырзаманда јашадығымызы бир даһа сүбут  едир. Јалан динин мәҹази суларынын гурудуғу дејилсә дә, онун бирдәфәлик мәһви бу јолла олмајаҹаг. Әввәлдә гејд олундуғу кими, Јеһова «он падшаһын», јәни БМТ-ни дәстәкләјән дүнја һөкумәтләринин үрәјинә Өз фикрини иҹра етмәји гојаҹаг. Онларын јалан дини мәһв етмәси гәфил баш верәҹәк, бу, бүтүн дүнја үчүн ҝөзләнилмәз олаҹаг * (Вәһј 18:8—10). Бөјүк Бабилин мәһви бүтүн дүнјаны сарсыдаҹаг вә бәлкә дә, мүәјјән чәтинликләрә сәбәб олаҹаг. Амма Аллаһын халгынын севинмәси үчүн ән азы ики сәбәби олаҹаг. Аллаһын әзәли дүшмәни олан јалан дин бирдәфәлик мәһв олаҹаг, бизим исә бу шәр дүнјадан гуртулмағымыза бир аддым галаҹаг! (Лука 21:28).

17, 18. а) Иманымызы неҹә мөһкәмләндирә биләрик? б) Нөвбәти мәгаләдә нәји мүзакирә едәҹәјик?

¹⁷ Дәнјал пејғәмбәрлик етмишди ки, «һәгиги елм чохалаҹаг». Бу, һәгигәтән дә, беләдир! Дөврүмүзә аид пејғәмбәрликләр артыг бизә ајдындыр (Дән. 12:4, 9, 10). Бу пејғәмбәрликләр елә дәгигликлә јеринә јетир ки, адамын үрәјиндә Јеһоваја вә Онун Кәламына гаршы дәрин еһтирам ојаныр (Әшј. 46:10; 55:11). Беләликлә, бундан сонра да иманынызы ҝүҹләндирин. Бунун үчүн Мүгәддәс Китабы дәриндән мүталиә един вә башгаларына да Јеһованын рәғбәтини газанмаға көмәк един. Јеһова Она там бел бағлајанлары һифз едәҹәк вә онлара «түкәнмәз сүлһ» бәхш едәҹәк (Әшј. 26:3).

¹⁸ Нөвбәти мәгаләдә ахырзаманда мәсиһи јығынҹағы илә бағлы јеринә јетән пејғәмбәрликләри арашдыраҹағыг. Өјрәнәҹәјимиз кими, диҝәр пејғәмбәрликләрлә јанашы, бу пејғәмбәрликләр дә ахырзаманда јашадығымызы сүбут едир. Һәмчинин һакимијјәтдә олан Падшаһымыз Иса Мәсиһин садиг давамчыларына рәһбәрлик етдијинә даир бариз сүбутлары арашдыраҹағыг.