1, 2. Вәфтиз заманы нәләр јашаныр вә бу мәгаләдә нәји арашдыраҹағыг?

 НӘ ВАХТСА вәфтиз олунан кәсләри изләмисиниз? Бу баҹы-гардашлар вәфтиздән әввәл онлара үнванланан ики суала әминликлә ҹаваб верирләр. Аилә үзвләри, достлары онларла фәхр едир. Онлар судан чыханда алгыш сәсләри әтрафа јајылыр, сималарындан севинҹ һисси дујулур. Һәр һәфтә орта һесабла минләрлә инсан өзүнү Јеһоваја һәср едиб вәфтиз олунур.

² Әҝәр сиз дә вәфтиз олунмаг барәдә дүшүнүрсүнүзсә, демәли, «Јеһованы ахтаран» бири кими, бу гаранлыг дүнјада бәрг вуранлардансыныз (Зәб. 14:1, 2). Ҝәнҹ вә ја јашлы олмағыныздан асылы олмајараг, бу мәгалә мәһз сизә үнванланыб. Артыг вәфтиз олунмуш кәсләр дә Јеһоваја әбәдијјән хидмәт етмәк әзмләрини мөһкәмләндирмәлидир. Јеһоваја хидмәт етмәјимизин бир чох сәбәбләри вар. Ҝәлин онлардан үчүнә нәзәр салаг.

3. Нәјә ҝөрә Јеһованын хидмәтчиләри һагг-әдаләти вә салеһлији севирләр? (Зәбур 119:128, 163).

³ Јеһова халгына әмр етмишди ки, «һагг-әдаләти» севсинләр (Зәк. 8:19). Иса да давамчыларына салеһлијә ҹан атмағы бујурмушду (Мәт. 5:6). Бу о демәкдир ки, инсан Аллаһын ҝөзүндә дүзҝүн, јахшы, тәмиз олан шејләри етмәји үрәкдән истәјир. Бәс сиз һагг-әдаләти вә салеһлији севирсиниз? Әминик ки, севирсиниз. Чүнки сиз јалан-јанлыш, пис олан һәр шејә нифрәт едирсиниз. (Зәбур 119:128, 163 ајәләрини охујун.) Билирсиниз ки, јалан данышмаг бу дүнјанын һөкмдары олан Шејтана хас хүсусијјәтдир (Јәһ. 8:44;  12:31). Онун мәгсәдләриндән бири Јеһованын мүгәддәс адыны бәднам етмәкдир. О, Әдән бағындакы үсјандан бәри Аллаһымыз һагда јаланлар јајыр, Јеһованы инсанлардан јахшы нә исә ҝизләдән худбин, надүрүст Һөкмдар кими гәләмә верир (Јар. 3:1, 4, 5). О, Јеһова һагда јајдығы јаланларла инсанларын зеһнини вә үрәјини зәһәрләмәјә давам едир. Шејтан һаггын тәрәфини тутмајан инсанлары һәр ҹүр пис әмәлә сөвг едир (Ром. 1:25—31).

4. Јеһова «һагг Аллаһы» олдуғуну неҹә сүбут едир? (Һәмчинин шәклә бахын.)

⁴ Јеһова «һагг Аллаһы»дыр вә Ону севәнләрә сәхавәтлә һәгигәти өјрәдир (Зәб. 31:5). Бунунла О, Шејтанын јаланларынын тәсири алтына дүшмүш инсанлары азад едир. О һәмчинин хидмәтчиләринә дүрүст, салеһ олмағы өјрәдир. Беләҹә, онларын өзүнәһөрмәт һисси артыр вә гәлб раһатлығы тапырлар (Мәс. 13:5, 6). Јәгин, Мүгәддәс Китабы арашдыранда сиз дә бунун шаһиди олмусунуз. Өјрәндиниз ки, Јеһоваја хидмәт бүтүн бәшәријјәт вә шәхсән сизин үчүн ән јахшы јолдур (Әшј. 48:17). Буна ҝөрә дә Аллаһын тәләб етдији салеһлији һәр шејдән үстүн тутмаға гәрар вердиниз (Мәт. 6:33). Истәјирсиниз ки, һәгигәт үзә чыхсын вә Шејтанын Јеһова барәдә јајдығы фикирләрин јалан олдуғу һамыја бәлли олсун. Бәс буну неҹә едә биләрсиниз?

5. Һагг-әдаләтин вә салеһлијин тәрәфини тутдуғунузу неҹә ҝөстәрә биләрсиниз?

⁵ «Мән Шејтанын јаланларыны рәдд едирәм, һәгигәтин тәрәфини тутурам. Мәним Һөкмдарым Јеһовадыр вә Онун ҝөзүндә доғру оланы етмәк истәјирәм». Јәгин, бу сөзләр сизин дә һиссләринизи тәсвир едир. Бәс бу ҹүр дүшүндүјүнүзү неҹә ҝөстәрә биләрсиниз? Өзүнүзү дуада Јеһоваја һәср етмәк вә вәфтиз олунмагла. Һаггы вә салеһлији севмәк сизи вәфтиз олунмаға тәшвиг едәҹәк.

6. Зәбур 45:4 ајәсиндә Иса Мәсиһи севмәјимизин һансы сәбәбләри јазылыб?

⁶ Нәјә ҝөрә Иса Мәсиһи севирик? Зәбур 45:4 ајәсиндә бунун бәзи сәбәбләри јазылыб. (Ајәни охујун.) Иса тәвазөкар иди, һәгигәтин, салеһлијин тәрәфини тутурду. Әҝәр сиз дә һәгигәти, салеһлији севирсинизсә, демәли, Иса Мәсиһи дә севирсиниз. Иса һәгигәти ҹәсарәтлә мүдафиә едирди (Јәһ. 18:37). Бәс Иса инсанлары тәвазөкар олмаға неҹә тәшвиг едирди?

7. Исанын тәвазөкарлығында ән чох нә хошунуза ҝәлир?

 ⁷ Иса инсанлары тәвазөкарлыға өз нүмунәси илә тәшвиг едирди. О, шәрәфи өзүнә јох, һәмишә Атасына верирди (Марк 10:17, 18; Јәһ. 5:19). Онун бу ҹүр тәвазөкарлығы сизә неҹә тәсир едир? Јәгин, бу сизи ону севмәјә, онун ардынҹа ҝетмәјә тәшвиг едир. Бәс Иса нә үчүн тәвазөкар иди? Чүнки о, лүтфкар Атасыны севирди, онун нүмунәсини изләјирди (Зәб. 18:35; Ибр. 1:3). Иса Јеһованын хүсусијјәтләрини мүкәммәл шәкилдә әкс етдирирди. Бу бизи она даһа да јахынлашдырыр.

8. Нәјә ҝөрә Иса кими Падшаһымыз олдуғу үчүн севинирик?

⁸ Биз Падшаһымыз Иса Мәсиһи чох севирик. Чүнки о, мүкәммәл һөкмдардыр. Јеһова Өзү она тәлим кечиб вә Падшаһ тәјин едиб (Әшј. 50:4, 5). Исанын фәдакар мәһәббәти барәдә бир дүшүнүн (Јәһ. 13:1). О, бир Падшаһ кими, севҝијә лајигдир. Иса ону севәнләри өз досту адландырмышды вә демишди ки, онлар өз мәһәббәтләрини онун әмрләринә әмәл етмәклә ҝөстәрирләр (Јәһ. 14:15; 15:14, 15). Јеһованын Оғлунун досту олмаг бөјүк шәрәфдир!

9. Иса Мәсиһин вәфтизи илә давамчыларынын вәфтизи арасында һансы охшарлыг вар?

⁹ Исанын шаҝирдләринә вердији әмрләрдән бири дә вәфтиз олунмаг әмри иди (Мәт. 28:19, 20). О өзү бу саһәдә нүмунә гојмушду. Дүздүр, онун вәфтизи шаҝирдләринин вәфтизиндән фәргләнирди, амма охшар ҹәһәтләри дә вар иди. (« Исанын вәфтизи вә давамчыларынын вәфтизи. Һансы фәргли ҹәһәтләри вар?» адлы чәрчивәјә бахын.) Иса вәфтиз олунмагла өзүнү Атасынын ирадәсини јеринә јетирмәјә һәср етдијини ҝөстәрди (Ибр. 10:7). Ејнилә, Мәсиһин давамчылары да вәфтиз олунанда һамынын гаршысында ҝөстәрирләр ки, өз һәјатларыны Јеһова Аллаһа һәср едибләр. Артыг онларын һәјатларынын амалы өз истәкләрини јох, Јеһованын ирадәсини јеринә јетирмәкдир. Онлар Устадларынын нүмунәсини изләјирләр.

10. Нәјә ҝөрә Исаны севирик вә бу мәһәббәт бизи нәјә тәшвиг едир?

¹⁰ Сиз Исанын Јеһованын јеҝанә Оғлу олдуғуну вә ону бизим үзәримизә Падшаһ гојдуғуну гәбул етмисиниз. Һәмчинин өјрәнмисиниз ки, Иса тәвазөкардыр вә Јеһованын хүсусијјәтләрини мүкәммәл шәкилдә әкс етдирир. О, аҹлары дојурурду, руһдан дүшәнләрә тәскинлик верирди, хәстәләри сағалдырды (Мәт. 14:14—21). Үстәлик, онун индики дөврдә јығынҹаглары неҹә идарә етдијини дә ҝөрүрсүнүз (Мәт. 23:10). Баша дүшүрсүнүз ки, ҝәләҹәкдә Аллаһын Падшаһлығынын Падшаһы кими, о даһа бөјүк ишләр ҝөрәҹәк. Бәс Исаны севдијинизи неҹә ҝөстәрә биләрсиниз? Онун нүмунәсини изләмәклә (Јәһ. 14:21). Бунун бир јолу өзүнүзү Јеһоваја һәср едиб, вәфтиз олунмагдыр.

11. Вәфтиз олунмаг истәмәјинизин ән башлыҹа сәбәби нәдир?

¹¹ Вәфтиз олунмаг истәмәјинизин ән башлыҹа сәбәби нәдир? Иса Јеһованын һансы әмринин ән бөјүк олдуғуну ачыглајараг белә демишди: «Аллаһын Јеһованы бүтүн гәлбинлә, бүтүн варлығынла, бүтүн ағлынла вә вар ҝүҹүнлә сев» (Марк 12:30). Сиз дә Јеһованы бу ҹүр севирсиниз?

12. Нәјә ҝөрә Јеһованы севирсиниз? (Һәмчинин шәклә бахын.)

¹² Јеһованы севмәк үчүн о гәдәр сәбәб вар ки! Мәсәлән, «һәјат мәнбәји» Одур, «һәр бир ҝөзәл пај вә һәр бир камил  немәт» Јеһовадандыр (Зәб. 36:9; Јаг. 1:17). Үмумијјәтлә, бизә зөвг верән һәр бир јахшы шеј сәхавәтли Аллаһымыз Јеһованын бәхшишидир.

13. Нәјә ҝөрә фидјә мөһтәшәм әнамдыр?

¹³ Јеһованын бизә вердији ән мөһтәшәм әнам фидјә гурбанлығыдыр. Белә демәјә һансы әсасымыз вар? Ҝәлин Јеһова илә Онун Оғлу арасындакы мүнасибәтләр барәдә дүшүнәк. Иса демишди ки, «Атам мәни севир», мән дә Атамы севирәм (Јәһ. 10:17; 14:31). Онларын арасындакы сых мүнасибәт милјард илләр әрзиндә ҝет-ҝедә даһа да мөһкәмләнирди (Мәс. 8:22, 23, 30). Бир дүшүнүн, Јеһоваја Оғлунун әзаб чәкәрәк өлдүјүнү ҝөрмәк неҹә ағыр иди. Јеһова һәм сизи, һәм дә бәшәријјәти о гәдәр севир ки, әбәди јашамағыныз үчүн Өз јеҝанә Оғлуну гурбан верди (Јәһ. 3:16; Гал. 2:20). Јеһованы севмәјимиз үчүн бундан бөјүк сәбәбимиз ола билмәз.

14. Һәјатда гаршыныза гоја биләҹәјиниз ән јахшы мәгсәд нәдир?

¹⁴ Јеһова һагда даһа чох өјрәндикҹә Она олан мәһәббәтиниз дә артыб. Тәбии ки, сиз Онунла һәм инди, һәм дә әбәдијјән јахын олмаг истәјирсиниз. Бу мүмкүндүр. О сизи тәшвиг едир ки, Онун көнлүнү шад едәсиниз (Мәс. 23:15, 16).  Буну тәкҹә сөзләринизлә јох, әмәлләринизлә дә ҝөстәрә биләрсиниз. Һәјат тәрзиниз Јеһованы һәгигәтән дә севдијинизи ҝөстәрәҹәк (1 Јәһ. 5:3). Бу, һәјатда гаршыныза гоја биләҹәјиниз ән јахшы мәгсәддир.

15. Јеһованы севдијинизи неҹә ҝөстәрә биләрсиниз?

¹⁵ Јеһованы севдијинизи неҹә ҝөстәрә биләрсиниз? Илк өнҹә, өзүнүзү Јеһоваја һәср етмәк үчүн тәкликдә хүсуси дуа едирсиниз (Зәб. 40:8). Сонра исә вәфтиз олунмагла һәср олундуғунузу һәр кәсин гаршысында әјан едирсиниз. Мәгаләнин әввәлиндә арашдырдығымыз кими, вәфтиз чох ваҹиб бир аддымдыр, һәјатымызын дөнүш нөгтәсидир. Сиз јени бир һәјата башлајырсыныз. Артыг өзүнүз үчүн јох, Јеһова үчүн јашајырсыныз (Ром. 14:8; 1 Бут. 4:1, 2). Вәфтиз чох ҹидди бир аддымдыр, амма бу аддым сизин үчүн ән јахшы һәјата гапы ачыр. Неҹә?

16. Зәбур 41:12 ајәсинә әсасән, Јеһова һәјатыны Она хидмәтә һәср едәнләри неҹә мүкафатландырыр?

¹⁶ Јеһова чох сәхавәтлидир. Сиз Она нә версәниз дә, әвәзиндә О сизә һәмишә даһа артығыны верәҹәк (Марк 10:29, 30). Әҝәр һәјатынызы Јеһоваја хидмәтә һәср етсәниз, һәтта бу шәр дүнјада белә, О сизә ән мәналы, долғун һәјат бәхш едәҹәк. Бу һәлә башланғыҹдыр. Вәфтизлә башлајан сәјаһәтинизин сону јохдур. Сиз севимли Атаныза әбәдијјән хидмәт едә биләрсиниз. Сәмави Атанызла араныздакы севҝи ҝет-ҝедә даһа да артаҹаг. Јеһова вар олдуғу мүддәтдә сиз јашајаҹагсыныз, јәни әбәдијјән. (Зәбур 41:12 ајәсини охујун.)

17. Јеһоваја Онда олмајан нә верә биләрсиниз?

¹⁷ Сиз һәср олунмагла, вәфтиз олунмагла сәмави Атаныза чох дәјәрли бир шеј вермәк шәрәфинә саһиб олурсунуз. О сизә индијә гәдәр јахшы шејләр вериб, хош анлар бәхш едиб. Бунун әвәзиндә, сиз ҝөјүн вә јерин Саһибинә Онда олмајан бир шеј верә биләрсиниз: өз ирадәнизлә Она сәдагәтлә хидмәт етмәји сечә биләрсиниз (Әјј. 1:8; 41:11; Мәс. 27:11). Бундан ҝөзәл һәјат јолу вар? Шүбһәсиз ки, Јеһоваја мәһәббәт вәфтиз олунмаг үчүн ән јахшы сәбәбдир.

18. Өзүнүзә һансы суаллары верә биләрсиниз?

¹⁸ Вәфтиз олунаҹагсыныз? Бу суала анҹаг сиз ҹаваб верә биләрсиниз. Амма өзүнүздән сорушун: «Нәји ҝөзләјирәм?» (Һәв. 8:36). Ҝәлин арашдырдығымыз үч сәбәби јадымыза салаг. Биринҹиси, сиз һаггы вә салеһлији севирсиниз. Өзүнүздән сорушун: «Һәр кәсин һәгигәти сөјләјәҹәји ҝүнүн ҝәлмәсини һәсрәтлә ҝөзләјирәм?» Икинҹиси, сиз Иса Мәсиһи севирсиниз. Өзүнүздән сорушун: «Мән Аллаһын Оғлунун Падшаһым олмасыны вә онун нүмунәсини изләмәк истәјирәм?» Үчүнҹүсү, сиз һәр шејдән әввәл, Јеһованы севирсиниз. Өзүнүздән сорушун: «Мән Јеһоваја хидмәт етмәклә Онун көнлүнү шад етмәк истәјирәм?» Әҝәр бу суаллара «бәли» дејә ҹаваб верирсинизсә, нәјә ҝөрә вәфтиз олунмајасыныз? Нәји ҝөзләјирсиниз? (Һәв. 16:33).

19. Нәјә ҝөрә вәфтиз олунмаға тәрәддүд етмәмәлисиниз? Нүмунә чәкин (Јәһја 4:34).

¹⁹ Әҝәр вәфтиз олунмаға тәрәддүд едирсинизсә, Исанын чәкдији бир мәсәл һагда дүшүнүн. (Јәһја 4:34 ајәсини охујун.) Иса Атасынын ирадәсини јеринә јетирмәји јемәјә бәнзәтмишди. Нәјә ҝөрә? Јемәк бизим үчүн фајдалыдыр. Ејнилә, Иса билирди ки, Јеһованын тапшырыгларыны иҹра етмәк бизим хејримизәдир. Јеһова биздән һеч вахт зәрәримизә олан бир шеји истәмәз. Бәс Јеһова вәфтиз олунмағымызы истәјир? Бәли (Һәв. 2:38). Она ҝөрә дә әмин ола биләрсиниз ки, вәфтиз олунмаг әмринә табе олмаг сизә фајда ҝәтирәҹәк. Јахшы јемәји јемәјә тәрәддүд етмирсинизсә, вәфтиз олунмаға нијә тәрәддүд едирсиниз?

20. Нөвбәти мәгаләдә нә һагда данышаҹағыг?

²⁰ Нәји ҝөзләјирсиниз? Чохлары белә дејир: «Һәлә һазыр дејиләм». Дүздүр, өзүнү Јеһоваја һәср едиб, вәфтиз олунмаг һәјатда верә биләҹәјиниз ән ваҹиб гәрардыр. Она ҝөрә дә бу аддымы атмаздан әввәл вахт ајырыб јахшыҹа дүшүнмәк вә һазыр олмаг үчүн чалышмаг лазымдыр. Бәс бу аддымы атмағы үрәкдән истәјирсинизсә, һазыр олмаг үчүн индидән нә едә биләрсиниз? Нөвбәти мәгаләдә бу суалын ҹавабыны нәзәрдән кечирәҹәјик.