1. Нәјә ҝөрә чохлары чашгынлыг ичиндәдир?

БУ ҜҮН чохлу динләр вә онларын сајсыз-һесабсыз голлары вар. Һамысы да Аллаһа дүзҝүн ибадәт етдијини дүшүнүр. Елә буна ҝөрә дә чохлары чашгынлыг ичиндәдир. Онларда белә суал јараныр: «Аллаһ бүтүн динләрдән разыдыр, јохса бир һәгиги дин вар?» Бәс бир Јеһованын Шаһиди кими, өзүмүз шәхсән әминик ки, өјрәтдикләримиз һәгигәтдир вә ибадәтимиз Аллаһа мәгбулдур? Буна неҹә әмин ола биләрик? Ҝәлин бәзи сүбутлары арашдыраг.

2. Һәвари Булусун һәгигәтә әминлији нәјә әсасланырды? (1 Салоникилиләрә 1:5).

² Һәвари Булусун һәгигәтә ҝүҹлү әминлији вар иди. (1 Салоникилиләрә 1:5 ајәсини охујун.) Онун бу әминлији һиссләрә әсасланмырды. О, Аллаһын Кәламыны дәриндән мүталиә едирди. «Мүгәддәс Јазылардакы һәр кәлмә»нин Аллаһдан олдуғуна инанырды (2 Тим. 3:16). Бәс Булус мүталиәнин сајәсиндә нәләр өјрәнди? О, Исанын Мәсиһ олдуғуна даир данылмаз сүбутлар тапды. Амма јәһуди дин хадимләри бу сүбутлара мәһәл гојмурду. Онлар Аллаһа ибадәт етдикләрини десәләр дә, Аллаһын нифрәт етдији ишләр ҝөрүрдүләр (Тит. 1:16). Онлар Аллаһын Кәламындан өзләринә сәрф едәни сечирдиләр. Онлардан фәргли олараг, Булус Аллаһын Кәламына «бүтүнлүклә» әмәл едирди вә ону инсанлара өјрәдирди (Һәв. 20:27).

3. Һәгигәтдә олдуғумуза әмин олмаг үчүн бүтүн суалларын ҹавабыны билмәлијик? (« Јеһованын сајаҝәлмәз мөһтәшәм ишләри вә фикирләри» адлы чәрчивәјә бахын.)

³ Бәзиләринин фикринҹә, һәгиги дин бүтүн суаллара ҹаваб  вермәлидир, һәтта Мүгәддәс Китабла әлагәси олмајан суаллара да. Мәҝәр бу, мүмкүндүр? Мәсәлән, ҝөтүрәк Булусун нүмунәсини. О, мәсиһиләри тәшвиг етмишди ки, «һәр шејин доғру олуб-олмадығыны» јохласынлар. Бунунла јанашы, демишди ки, о өзү дә чох шеји анламыр (1 Салон. 5:21). Буну онун сөзләриндән ҝөрмәк олар. О демишди ки, инди билијимиз мәһдуддур, «чүнки һал-һазырда биз, санки, метал ҝүзҝүјә бахыб орада думанлы сурәтләр ҝөрүрүк» (1 Кор. 13:9, 12). Бизим кими, Булусун да баша дүшмәдији шејләр вар иди. Амма о, Јеһова һаггында әсас һәгигәтләри билирди вә бу, онун һәгигәтдә олдуғуна әмин олмасы үчүн кифајәт иди.

4. Һәгигәти тапдығымыза әминлијимизи неҹә ҝүҹләндирә биләрик вә бу мәгаләдә нә һагда данышаҹағыг?

⁴ Һәгигәти тапдығымыза әминлијимизи неҹә ҝүҹләндирә биләрик? Бунун үчүн билмәлијик ки, Иса һансы ибадәт тәрзини өјрәтмишди вә Јеһованын Шаһидләринин ибадәти буна ујғундур, ја јох. Бу мәгаләдән өјрәнәҹәјик ки, Аллаһа дүзҝүн ибадәт едән инсанлар 1) бүтпәрәстлик етмир, 2) Јеһованын адына еһтирамла јанашыр, 3) Аллаһын Кәламындакы һәгигәти севир вә 4) бир-бирини һәрарәтлә севир.

5. Аллаһа дүзҝүн ибадәтлә бағлы Иса Мәсиһ һансы нүмунәни гојмушду вә онун өјрәтдикләринә неҹә әмәл едә биләрик?

⁵ Иса Мәсиһ Аллаһы чох севирди. Ҝөјдә оланда да, јердә оланда да јалныз вә јалныз Она ибадәт едирди (Лука 4:8). Иса шаҝирдләринә дә буну өјрәтмишди. Нә Иса, нә дә онун шаҝирдләри ибадәтдә сурәтләрдән истифадә етмирди. Аллаһ ҝөзәҝөрүнмәздир, буна ҝөрә дә инсанларын дүзәлтдији һеч бир шеј Онун ҹалалына тај ола  билмәз! (Әшј. 46:5). Бәс инсанларын мүгәддәс сајдыглары кәсләрин иконаларыны дүзәлдиб, онлара дуа етмәси һаггында нә демәк олар? Аллаһын Төвратда вердији он әмрдән икинҹиси бу иди: «Өзүнүз үчүн нә јухарыда — сәмада, нә ашағыда — јердә, нә дә јердәки суларда олан шејләрин һеч биринин бүтүнү вә ја сурәтини дүзәлтмәјин. Онлара сәҹдә гылыб ситајиш етмәјин» (Чых. 20:4, 5). Аллаһы разы салмаг истәјән инсан бу сөзләри ајдын баша дүшүр.

6. Бу ҝүн Јеһованын Шаһидләри Аллаһа ибадәтдә кимләрин нүмунәсини изләјир?

⁶ Бу ҝүн тарихчиләр дә тәсдиг едир ки, илк мәсиһиләр јалныз вә јалныз Аллаһа ибадәт едирди. Мәсәлән, «Христиан килсәсинин тарихи» китабында дејилир ки, «һәмин мәсиһиләрә ибадәтдә иконалардан истифадә етмәк тәклиф олунса иди, онлар буну гәти шәкилдә рәдд едәрдиләр» («History of the Christian Church»). Бу ҝүн дә Јеһованын Шаһидләри илк мәсиһиләрин гојдуғу нүмунәни изләјир. Онлар мүгәддәсләрин, јахуд мәләкләрин иконасына ситајиш етмирләр, һеч Исаја да дуа етмирләр. Һәмчинин онлар дөвләт рәмзләринә дә тәзим етмирләр. Ким нә дејирсә, десин Јеһованын Шаһидләри Исанын нөвбәти сөзләринә әмәл етмәјә гәти гәрарлыдыр: «Аллаһын Јеһоваја сәҹдә гыл» (Мәт. 4:10).

7. Јеһованын Шаһидләри илә диҝәр динләр арасында һансы кәскин фәрг вар?

⁷ Бу ҝүн инсанлар харизматик килсә хадимләринин ардынҹа ҝедир. Онлара о гәдәр вурғундурлар ки, аз гала, ситајиш етсинләр. Онларын мәхсус олдуглары килсәјә ҝедирләр, китабларыны алырлар. Онларын өзләринә вә ја дәстәкләдији тәшкилатлара күлли мигдарда ианә едирләр. Бәзиләри онларын һәр сөзүнү ганун кими гәбул едир. Бәлкә дә, Исаны ҝөрсәјдиләр, һеч белә ҹанфәшанлыг етмәздиләр. Онлардан фәргли олараг, Аллаһын һәгиги хидмәтчиләри һеч бир инсанын ардынҹа ҝетмир. Дүздүр, биз рәһбәрлик едән гардашлара һөрмәтлә јанашырыг. Амма Исанын да дедији кими, биз бир-биримизә гардаш олдуғумузу унутмуруг (Мәт. 23:8—10). Биз һеч кими, нә дини, нә дә сијаси лидерләри илаһиләшдирмирик. Һәмчинин онларын мәгсәдләрини дә дәстәкләмирик. Әксинә, битәрәф галырыг вә дүнјанын ишләринә гарышмырыг. Бунунла да биз диҝәр динләрдән кәскин шәкилдә фәргләнирик (Јәһ. 18:36).

8. Һарадан билирик ки, Јеһова Онун адыны уҹалтмағымызы вә һамыја бәјан етмәјимизи истәјир?

⁸ Дуаларынын бириндә Иса демишди: «Ата, Өз адыны уҹалт». Јеһова да ҝөјләрдән белә ҹаваб вермишди: «Уҹалтмышам, јенә дә уҹалдаҹағам» (Јәһ. 12:28). Иса јер үзүндәки хидмәти бојунҹа Аллаһын адыны уҹалтмышды (Јәһ. 17:26). Демәли, давамчылары да Јеһованын адыны бөјүк фәхрлә чәкмәли вә бу ады инсанлара бәјан етмәлидирләр.

9. Биринҹи әсрдәки мәсиһиләр Аллаһын адына еһтирамла јанашдыгларыны неҹә ҝөстәрирди?

⁹ Биринҹи әсрдә мәсиһи јығынҹағы јаранандан чох кечмәмиш Аллаһ диҝәр халглара нәзәр салды вә «Өз адыны дашыјан бир халг тәшкил» етди (Һәв. 15:14). Илк мәсиһиләр Аллаһын адыны бөјүк фәхр һисси илә чәкирдиләр вә ону башгаларына да бәјан едирдиләр. Онлар Мүгәддәс Јазылары гәләмә аланда, еләҹә дә тәблиғ едәндә Аллаһын адыны ҝениш истифадә едирдиләр *. Бунунла  да сүбут едирдиләр ки, Аллаһын адыны дашыјан јеҝанә халгдырлар (Һәв. 2:14, 21).

10. Јеһованын Шаһидләринин Аллаһын адыны дашыјан халг олдуғуну нә сүбут едир?

¹⁰ Бәс Јеһованын Шаһидләри неҹә? Онларын Аллаһын адыны дашыјан халг олдуғуну демәк олар? Ҝәлин бунун сүбутларыны арашдыраг. Бир чох дин хадими Аллаһын адыны ҝизләтмәк үчүн әлләриндән ҝәләни едиб. Онлар Мүгәддәс Китаб тәрҹүмәләриндән Аллаһын адыны чыхарыб, бәзиләри дини ҝөрүшләрдә Аллаһын адыны чәкмәји гадаған едиб *. Ҝөз габағындадыр ки, јалныз Јеһованын Шаһидләри Аллаһын адына лазымынҹа еһтирам бәсләјир. Диҝәр динләрдән фәргли олараг, биз әлимиздән ҝәләни едирик ки, һамы Аллаһын адыны билсин. Бунунла да дашыдығымыз ада — Јеһованын Шаһидләри адына лајиг давранырыг (Әшј. 43:10—12). Мүгәддәс Китабын диҝәр тәрҹүмәләриндән Аллаһын ады чыхарылдығы һалда, биз «Јени Дүнја Тәрҹүмәси»ндә бу ады һәмин јерләрдә бәрпа етмишик вә 240 милјондан чох нүсхәсини нәшр етмишик. Бундан әлавә, миндән чох дилдә Мүгәддәс Китаба әсасланан нәшрләр дәрҹ едирик вә онларын һамысында Јеһованын ады ҝениш истифадә олунур!

11. Илк мәсиһиләр һәгигәти севдикләрини неҹә ҝөстәрирдиләр?

¹¹ Иса Мәсиһ Аллаһ һаггында вә Онун  нијјәти барәдә һәгигәти севирди. О, бу һәгигәтә ујғун јашајырды вә инсанлара да ону бәјан едирди (Јәһ. 18:37). Исанын биринҹи әсрдәки давамчылары да һәгигәти үрәкдән севирди (Јәһ. 4:23, 24). Һәтта һәвари Бутрус мәсиһи иманыны «һәгигәт јолу» адландырмышды (2 Бут. 2:2). Һәгигәти севдикләринә ҝөрә онлар һәгигәтә зидд олан дини инанҹлары, инсан адәт-әнәнәләрини вә фикирләрини гәбул етмирдиләр (Кол. 2:8). Ејнилә бу ҝүн дә Јеһованын әсл хидмәтчиләри «һәгигәт јолунда» јеримәјә чалышыр. Бунун үчүн бүтүн инанҹларыны вә һәјат тәрзләрини Аллаһын Кәламына ујғунлашдырырлар (3 Јәһ. 3, 4).

12. Рәһбәрлик Шурасы ҝөрәндә ки, һансыса изаһата дүзәлиш етмәк лазымдыр нә едир вә буну етмәкдә мәгсәд нәдир?

¹² Бу ҝүн Јеһованын Шаһидләри Мүгәддәс Китабы там баша дүшдүкләрини иддиа етмирләр. Олуб ки, онлар тәлимләрин изаһатында, јахуд јығынҹағын тәшкилиндә һансыса јанлышлыға јол верибләр. Бу, тәәҹҹүблү дејил, чүнки Мүгәддәс Китабда да дејилдији кими, Аллаһын халгы һәгигәти вахт кечдикҹә даһа јахшы анлајыр (Кол. 1:9, 10). Јеһова һәгигәти тәдриҹән ачыглајыр, она ҝөрә дә һәгигәти баша дүшәнә гәдәр сәбир ҝөстәрмәлијик (Мәс. 4:18). Рәһбәрлик Шурасы ҝөрәндә ки, бәзи тәлимләрин изаһатына вә ја тәшкилати мәсәләләрә дүзәлиш етмәк лазымдыр, буну ләнҝимәдән едир. Бир чох христиан мәзһәбләри нәләрисә дәјишәндә буну өз үзвләрини разы салмаг вә ја дүнја илә ајаглашмагдан өтрү едирләр. Јеһованын Шаһидләринин етдији дәјишикликләрин мәгсәди исә бизи Јеһоваја даһа да јахынлашдырмаг вә Иса Мәсиһин өјрәтдији кими ибадәт етмәкдир (Јаг. 4:4). Бу дәјишикликләри она ҝөрә етмирик ки, инсанларын фикри дәјишиб вә она ујғунлашмаг истәјирик. Бу дәјишикликләри Аллаһын Кәламыны даһа јахшы баша дүшдүјүмүз үчүн едирик. Биз һәгигәти севирик! (1 Салон. 2:3, 4).

13. Һәгиги мәсиһиләрдә әсас һансы хүсусијјәт вар иди вә Јеһованын Шаһидләри бу хүсусијјәти неҹә тәзаһүр етдирир?

¹³ Биринҹи әсрдәки мәсиһиләрин чохлу ҝөзәл хүсусијјәти вар иди. Амма онлары фәргләндирән әсас хүсусијјәт мәһәббәт иди. Иса Мәсиһ демишди: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:34, 35). Дүнјанын һарасында јашамаларындан асылы олмајараг бу ҝүн дә Јеһованын Шаһидләри арасында мәһәббәт вә бирлик вар вә диҝәр динләрдән фәргли олараг, онларын бир-биринә мәһәббәти милли, ирги вә сосиал сәрһәдләри ашыр. Биз бу ҹүр мәһәббәти јығынҹагларда вә бөјүк топлантыларда ҝөрүрүк. Бу исә бизи бир даһа әмин едир ки, Јеһоваја Онун бәјәндији шәкилдә ибадәт едирик.

14. Колослулара 3:12—14 ајәләринә әсасән, бир-биримизи һәрарәтлә севдијимизи неҹә ҝөстәрә биләрик?

¹⁴ Аллаһын Кәламы бизи тәшвиг едир ки, бир-биримизи һәрарәтлә севәк (1 Бут. 4:8). Биз дә бир-биримизи бағышламагла вә бир-биримизин сәһвләринә гаршы сәбирли олмагла бу ҹүр мәһәббәт ҝөстәририк. Һәмчинин биз јығынҹагда һәр кәсә, һәтта хәтримизә дәјән инсана гаршы да гонагпәрвәрлик ҝөстәрмәјә вә әлиачыг олмаға чалышырыг. (Колослулара 3:12—14 ајәләрини охујун.) Доғрудан да, бу ҹүр мәһәббәт әсл мәсиһиләри фәргләндирән башлыҹа ҹәһәтдир.

15. Биз һансы саһәләрдә биринҹи әсрдәки мәсиһиләрин ибадәтлә бағлы гојдуғу нүмунәни изләјирик?

¹⁵ Биз ибадәтимизин диҝәр саһәләриндә дә  биринҹи әсрдәки мәсиһиләрин нүмунәсини изләјирик. Мәсәлән, тәшкилатымызын структуру мәсәләсиндә. О вахт олдуғу кими, бу ҝүн дә сәјјар нәзарәтчиләр, ағсаггаллар вә јығынҹаг хидмәтчиләри вар (Филип. 1:1; Тит. 1:5). Һәмчинин ҹинси мүнасибәт, никаһ, ганын мүгәддәслији вә төвбә етмәјән ҝүнаһкарын јығынҹагдан кәнар едилмәси мәсәләләринә дә мүнасибәтимиз мәһз биринҹи әсрдә гојулан нүмунәјә әсасланыр (Һәв. 15:28, 29; 1 Кор. 5:11—13; 6:9, 10; Ибр. 13:4).

16. Ефеслиләрә 4:4—6 ајәләриндән һансы нәтиҹәјә ҝәлирик?

¹⁶ Иса Мәсиһ демишди ки, чох адам онун давамчысы олдуғуну дејәҹәк, амма һеч дә һамысы онун әсл давамчысы олмајаҹаг (Мәт. 7:21—23). Һәмчинин Аллаһын Кәламында јазылыб ки, ахырзаманда бир чохлары «үздән өзләрини мөмин ҝөстәрәҹәк» (2 Тим. 3:1, 5). Амма Аллаһын разы галдығы јалныз бир иман, бир дин вар. Аллаһын Кәламында бу, ачыг-ајдын јазылыб. (Ефеслиләрә 4:4—6 ајәләрини охујун.)

17. Бу ҝүн кимләр Исанын ардынҹа ҝедир вә һәгиги диндәдир?

¹⁷ Бу ҝүн кимләрин доғру јолда олдуғуну демәк олар? Биз сизинлә сүбутлары арашдырдыг. Иса Мәсиһин вә илк мәсиһиләрин Аллаһа неҹә ибадәт етдијинә нәзәр салдыг. Буна ҝөрә дә ҹаваб ајдындыр: Јеһованын Шаһидләри. Биз чох хошбәхтик ки, Јеһованын халгынын арасындајыг. Јеһова һаггында вә Онун нијјәти барәсиндә һәгигәти билирик. Одур ки, ҝәлин белә бир ҝүҹлү әминликлә һәгигәтдән бәрк-бәрк јапышаг.