1, 2. а) Әшија 60:22 ајәсиндә јазыланлар бу ҝүн неҹә јеринә јетир? б) Бу ҝүн Јеһованын тәшкилатында һансы тәләбат вар?

«ӘН КИЧИЈИНДӘН мин нәфәр, ән балаҹасындан гүдрәтли халг төрәјәҹәк» (Әшј. 60:22). Бу пејғәмбәрлик бизим дөврүмүздә јеринә јетир. Нәјә ҝөрә буну белә әминликлә дејирик? Чүнки 2015-ҹи хидмәт илиндә 8 220 105 тәблиғчи Падшаһлыг һагда хош хәбәри тәблиғ едирди. Бу пејғәмбәрлијин сон һиссәси үзәриндә һәр бир мәсиһи дүшүнмәлидир, чүнки сәмави Атамыз Јеһова демишди: «Мән Јеһова вахты јетишәндә бу иши сүрәтләндирәҹәјәм». Вахт ҝөзләмир, буна ҝөрә дә һәр биримиз үчүн ҝөрүләси чох иш вар. Бу ишин сүрәтләнмәси бизә неҹә тәсир едир? Бир тәблиғчи кими әлимиздән ҝәләни едирик? Бир чох баҹы-гардашымыз өнҹүл вә ја көмәкчи өнҹүл кими хидмәт едир. Чохлу сајда мүждәчи тәблиғчиләрә еһтијаҹ олан әразиләрә көчүр вә ја башга теократик ишләрдә иштирак едир. Онлардакы бу һазырлыг руһу бизи чох севиндирир.

² Падшаһлығын иши сүрәтләндикҹә бу иши ирәли апаран инсанлара еһтијаҹ да артыр. Һәр ил тәхминән 2000 јығынҹаг јараныр. Әҝәр һәр јени јығынҹагда беш ағсаггал олмалыдырса, демәли, һәр ил 10 000 јығынҹаг хидмәтчиси ағсаггал олмалыдыр. Бу да о демәкдир ки, минләрлә гардаш јығынҹаг хидмәтчиси олмаг үчүн  тәләб олунан хүсусијјәтләрә јијәләнмәлидир. Бәли, һәр биримиз, гардашлар да, баҹылар да Рәббин ишиндә чох чалышмалыдыр (1 Кор. 15:58).

3, 4. Гаршыныза һансы руһани мәгсәдләри гоја биләрсиниз?

³ 1 Тимутијә 3:1 ајәсини охујун. Бу ајәдә «ҹан атмаг» кими тәрҹүмә олунан јунан сөзү әл узадыб инсандан узагда олан бир шеји тутмаг мәнасыны верир. Бу сөзү истифадә етмәклә һәвари Булус вурғуламышды ки, руһани ҹәһәтдән ирәли ҝетмәк үчүн ҝүҹ сәрф етмәк лазымдыр. Тәсәввүр един, бир гардаш јығынҹаг хидмәтчиси олмаг истәјир. О баша дүшүр ки, бунун үчүн руһани кејфијјәтләрә јијәләнмәлидир. Илк нөвбәдә о, јығынҹаг хидмәтчиси үчүн тәләбләрә ҹаваб вермәјә ҹан атыр. Јығынҹаг хидмәтчиси оландан сонра исә вар ҝүҹү илә чалышыр ки, ағсаггаллар үчүн тәләбләрә ҹаваб версин.

⁴ Ејнилә, өнҹүл вә бејтелли кими хидмәт етмәк, Ибадәт евләринин тикинтисиндә көнүллү кими иштирак етмәк истәјән баҹы-гардашлар да мәгсәдләринә чатмаг үчүн әлләриндән ҝәләни етмәлидирләр. Ҝәлин ҝөрәк Мүгәддәс Јазылар һәр биримизи Јеһованын ишиндә ирәли ҝетмәјә неҹә тәшвиг едир.

5. Ҝәнҹләр Падшаһлыг ишинә неҹә төһфә верә биләрләр?

⁵ Ҝәнҹләр Јеһованын ишиндә чох шеј едә биләрләр, чүнки онларын ҝүҹү кифајәт гәдәрдир. (Мәсәлләр 20:29 ајәсини охујун.) Мәсәлән, Бејтелдә хидмәт едән бәзи ҝәнҹ мәсиһиләр Мүгәддәс Китабын вә она әсасланмыш нәшрләрин чап вә ҹилдләмә ишиндә чалышырлар. Бир чохлары ибадәт евләринин тикинтисиндә вә тәмири ишиндә зәһмәт чәкирләр. Диҝәрләри тәбии фәлакәтдән зәрәрчәкмишләрә јардым ҝөстәрән тәҹрүбәли мәсиһиләрә көмәк едирләр. Чох сајда ҝәнҹ өнҹүл исә өз дилиндә вә ја әҹнәби дилдә хош хәбәри тәблиғ едир.

6—8. а) Бир ҹаван гардаш хидмәтә мүнасибәтини неҹә дәјишди вә нәтиҹәси нә олду? б) Јеһованын ҝөзәл Аллаһ олдуғуну неҹә дадыб ҝөрә биләрик?

⁶ Чох еһтимал ки, сиз Аллаһа ҹан-дилдән хидмәт етмәјин ваҹиблијини баша дүшүрсүнүз. Амма, ола билсин, сиз дә Аарон адлы гардашын кечирдији һиссләри јашајырсыныз. О, мәсиһи аиләсиндә бөјүсә дә, ибадәт ҝөрүшләри вә тәблиғ иши она ҹансыхыҹы ҝәлирди. Аарон Аллаһа хидмәтдән севинҹ дујмаг истәјирди, амма алынмырды. Бәс вәзијјәти дүзәлтмәк үчүн о нә етди?

⁷ Аарон мүнтәзәм олараг руһани ишләрлә мәшғул олмаға башлады: һәр ҝүн Мүгәддәс Китабы охујур, јығынҹаг ҝөрүшләринә һазырлашыр вә шәрһ верирди. О, һәмчинин дуаја хүсуси өнәм вермәјә башлады. Онун Јеһоваја мәһәббәти артдыгҹа руһани ҹәһәтдән инкишаф едирди. Сонралар Аарон өнҹүл хидмәтинә башлајыр, тәбии фәлакәтдән зәрәрчәкмишләрә көмәк ишиндә иштирак едир вә башга өлкәдә тәблиғ етмәјә ҝедир. Һал-һазырда о, ағсаггалдыр вә Бејтелдә хидмәт едир. Ҝәлин ҝөрәк Аарон өз һәјаты барәдә нә дејир. «Мән даддым вә ҝөрдүм, Јеһова неҹә ҝөзәлдир. Јеһова мәнә о гәдәр немәтләр бәхш едиб ки, өзүмү Онун гаршысында борҹлу һисс едирәм. Бу, мәни Онун јолунда даһа чох иш ҝөрмәјә тәшвиг едир вә нәтиҹәдә, даһа да чох немәт алырам».

⁸ Мәзмурчу јазмышды: «Јеһованы ахтаранлар һеч бир немәтдән корлуг чәкмәз». (Зәбур 34:8—10 ајәләрини  охујун.) Доғрудан да, Јеһова Онун јолунда ҹан гојан инсанлары һеч вахт көмәксиз гојмур. Јеһоваја вар ҝүҹүмүзлә хидмәт едәндә Онун неҹә ҝөзәл Аллаһ олдуғуну шәхсән ҝөрүрүк. Она бүтүн варлығымызла ибадәт едәндә мисилсиз хошбәхтлик дадырыг.

9, 10. Сәбирлә ҝөзләмәк нәјә ҝөрә ваҹибдир?

⁹ Ола билсин, гаршыныза гојдуғунуз руһани мәгсәдә чатана гәдәр вахт лазым олсун, одур ки, сәбирлә ҝөзләјин (Мик. 7:7). Мәсулијјәт алмағыныз вә ја вәзијјәтин јахшылыға доғру дәјишмәси узун чәксә дә, әмин олун ки, Јеһова Өз садиг хидмәтчисинә һәмишә дајаг олур. Бу саһәдә Ибраһим пејғәмбәрдән чох шеј өјрәнә биләрик. Јеһова она сөз вермишди ки, оғлу олаҹаг, амма Исһаг доғулана гәдәр Ибраһим пејғәмбәр узун илләр ҝөзләмәли олду. Бүтүн бу вахт әрзиндә онун сәбри түкәнмәди вә Јеһоваја иманы зәифләмәди (Јар. 15:3, 4; 21:5; Ибр. 6:12—15).

¹⁰ Ҝөзләмәк елә дә асан иш дејил (Мәс. 13:12). Вахт чох узун чәкдији үчүн инсан мәјус ола биләр, анҹаг мәјуслуға гапылмамалыјыг, әкс һалда руһдан дүшәҹәјик. Јахшы оларды ки, мәгсәдимизә чатана гәдәр руһани ҹәһәтдән јеткин инсан олмаға чалышаг. Ҝәлин бунун үч үсулуну нәзәрдән кечирәк.

11. Өзүмүздә һансы хүсусијјәтләр јетишдирмәлијик вә нәјә ҝөрә?

¹¹ Өзүнүздә руһани кејфијјәтләр јетишдирин. Аллаһын Кәламыны охујуб охудугларымызын үзәриндә дүшүнмәклә өзүмүздә һикмәт, анлајыш, инсаф, билик, дүшүнҹә  вә сағлам дүшүнҹә кими кејфијјәтләр јетишдирә биләрик. Мәсул гардашларда бу хүсусијјәтләрин олмасы мүтләгдир (Мәс. 1:1—4; Тит. 1:7—9). Мүгәддәс Китаба әсасланан нәшрләри охумагла Јеһованын мүәјјән мәсәләләрә мүнасибәтини өјрәнә биләрик. Бунун сајәсиндә бир чох саһәләрдә Јеһованы разы салан гәрарлар верә биләҹәјик, мәсәлән, башгалары илә јола ҝетмәк, пул, әјләнҹә вә ҝејим кими мәсәләләрдә.

12. Мәсиһи етибарлы инсан олдуғуну неҹә сүбут едә биләр?

¹² Етибар газанын. Һәр бир мәсиһи, истәр гардаш олсун, истәр баҹы она верилән тапшырығы ҹанла-башла јеринә јетирмәлидир. Вали Нәһәмја Аллаһын халгы арасындан мүәјјән вәзифәләри иҹра етмәк үчүн инсанлар сечмәли иди. О, неҹә инсанлары сечди? Аллаһдан горхан вә етибарлы адамлары (Нәһ. 7:2; 13:12, 13). Бу ҝүн дә «нөкәрбашыдан... сәдагәт тәләб олунур» (1 Кор. 4:2). Унутмајын, јахшы ишләр һеч вахт ҝөздән јајынмыр. (1 Тимутијә 5:25 ајәсини охујун.)

13. Һагсызлыгла үзләшәндә Јусифдән неҹә нүмунә ҝөтүрә биләрсиниз?

¹³ Гој Јеһова сизи сафлашдырсын. Кимсә сизинлә һагсыз давранарса, нә едәрсиниз? Ола билсин, мәсәләни дәрһал јолуна гојмаг истәјәҹәксиниз. Анҹаг һәрдән өзүнүзү мүдафиә етмәк вәзијјәти ҝәрҝинләшдирә биләр. Јусифин гардашлары онунла пис рәфтар едирдиләр, амма о, онлара гаршы кин сахламырды. Сонралар Јусифә бөһтан атыб һагсыз јерә зиндана салмышдылар. Лакин о, бүтүн бу чәтинликләрдә Јеһоваја архаланырды. Нәтиҹәдә «Аллаһын сөзү ону сафлашдырды» (Зәб. 105:19). Јусифин башына ҝәләнләр онда сонралар алдығы тәјинатда лазым олан ҝөзәл кејфијјәтләр јетишдирди (Јар. 41:37—44; 45:4—8). Сиз дә һагсызлыгла үзләшмисинизсә, дуа едиб Јеһовадан һикмәт диләјин, һәлимликлә давранын, сакит данышын вә Јеһовадан ҝүҹ истәјин. О, мүтләг сизә көмәк едәҹәк. (1 Бутрус 5:10 ајәсини охујун.)

14, 15. а) Нәјә ҝөрә тәблиғ үсулларымыза һәмишә диггәт јетирмәлијик? б) Инсанлара хош хәбәри чатдырмаг үчүн һансы дәјишикликләри едә биләрсиниз? (Мәгаләнин әввәлиндәки шәклә вә « Хидмәтин мүхтәлиф үсулларындан истифадә един» адлы чәрчивәјә бахын.)

¹⁴ Һәвари Булус Тимутијә мәсләһәт ҝөрмүшдү: «Өзүнү Мүгәддәс Јазылары ҹамаат гаршысында охумаға, өјүд-нәсиһәт вә тәлим вермәјә һәср ет... Өзүнә вә вердијин тәлимә һәмишә диггәт јетир» (1 Тим. 4:13, 16). Булус бу мәсләһәти верәндә Тимути тәҹрүбәли мүждәчи иди. Амма о, хидмәтдә уғурлу олмаг истәјирдисә, вердији тәлимә һәмишә диггәт јетирмәли иди. Тимути дүшүнмәмәли иди ки, даим ејни тәрздә, ејни шеји данышмагла инсанлары һәгигәтә ҝәтирә биләҹәк. Инсанларын үрәјинә јол тапмаг үчүн о, онларын тәләбатыны нәзәрә алараг тәлим вермәли иди. Падшаһлығын мүждәчиләри олан бизләр дә ејни ҹүр давранмалыјыг.

¹⁵ Ев-ев тәблиғ едәндә јәгин сиз дә фикир вермисиниз ки, инсанлары евдә тапмаг олмур. Һәрдән исә биналара ҝирмәк үмумијјәтлә мүмкүн дејил. Әҝәр сизин дә әразидә бу ҹүр чәтинликләр варса, тәблиғ үсулларынызы дәјишин.

16. Иҹтимаи јерләрдә тәблиғи неҹә сәмәрәли етмәк олар?

¹⁶ Хош хәбәри јајмағын ән јахшы үсулларындан бири иҹтимаи шаһидликдир. Бир чох Јеһованын Шаһиди тәблиғин бу нөвүндә ҝөзәл нәтиҹәләр әлдә едиб. Онлар дәмир јол вағзалында, дајанаҹагларда, базарларда, паркларда вә саир иҹтимаи јерләрдә тәблиғ едирләр. Инсанларла сөһбәтә башламаг үчүн хәбәрләрдән сөз ачмаг,  ушагларыны тәрифләмәк, ишлә бағлы суал вермәк олар. Сөһбәт давам едәрсә, диггәти Мүгәддәс Китаба јөнәлдиб инсанын фикрини сорушмаг олар. Адәтән, бу ҹүр сөһбәтләр Мүгәддәс Китабы арашдырмагла нәтиҹәләнир.

17, 18. а) Иҹтимаи јерләрдә шаһидлик етмәк сизә чәтиндирсә, нә едә биләрсиниз? б) Давуддакы әһвали-руһијјә сиздә олса, хидмәтдә һансы нәтиҹәни әлдә едәҹәксиниз?

¹⁷ Бәс әҝәр сизә иҹтимаи јерләрдә тәблиғ етмәк чәтиндирсә, нә едә биләрсиниз? Нју–Јоркдан олан Еди адлы өнҹүл гардаш иҹтимаи јерләрдә инсанларла сөһбәт етмәјә чәкинирди. Анҹаг вахт кечдикҹә о ҹәсарәтләнди. Она нә көмәк етди? Еди дејир: «Аиләви ибадәт заманы арашдырма апарыб инсанларын етиразына вә ја сөјләдији һансыса фикрә ҹаваб тапмаға чалышырыг. Һәмчинин баҹы-гардашлардан мәсләһәт истәјирик». Инди Еди бу хидмәт нөвүнү чох севир.

¹⁸ Хош хәбәри тәблиғ етмәк үчүн өзүнүздә лазыми баҹарыглар јетишдирсәниз вә әминликлә данышсаныз, сиздәки инкишаф ајдын ҝөрүнәҹәк. (1 Тимутијә 4:15 ајәсини охујун.) Үстәлик, бунунла сиз Давуд пејғәмбәр кими, сәмави Атанызын адыны уҹалдаҹагсыныз. Давуд демишди: «Һәр заман Јеһоваја шүкүр едәрәм, дилим даим Она алгыш дејәр. Көнлүм Јеһова илә өјүнәр, һәлимләр ешидиб севинәр» (Зәб. 34:1, 2). Сизин бу ҹүр хидмәт етмәјиниз сајәсиндә, сәмими гәлбли инсанлар һәгиги ибадәтдә сизә гошулаҹаг.

19. Мүәјјән чәтинликләри олса да, нәјә ҝөрә һәр бир мәсиһинин севинмәјә сәбәби вар?

¹⁹ Давуд пејғәмбәр гошдуғу нәғмәдә демишди: «Бүтүн ишләрин Сәни уҹалдар, еј Јеһова, садиг бәндәләрин Сәни мәдһ едәр. Падшаһлығынын ҹалалындан данышар, гүдрәтин һаггында сөз ачарлар, инсанлара гүдрәтли ишләрини, Падшаһлығынын ҹаһ-ҹалалыны танытмаг үчүн» (Зәб. 145:10—12). Бу ајәләрдә Јеһова Аллаһын бүтүн садиг хидмәтчиләринин һиссләри әкс олунур. Амма елә баҹы-гардашларымыз вар ки, хәстә вә ја јашлы олдуглары үчүн истәдикләри гәдәр хидмәт едә билмирләр. Онлара демәк истәјирик ки, сиз һәр дәфә сизә гуллуг едән инсанлара вә тибб ишчиләринә Јеһова Аллаһ һаггында данышанда Онун адыны уҹалдырсыныз. Иманына ҝөрә һәбсдә јатан диндашларымыз, сиз дә имканыныз јол вердији гәдәр инсанлара тәблиғ едәндә Јараданымызын үрәјини севиндирирсиниз (Мәс. 27:11). Ејни сөзләр аилә үзвләри иманда олмаса да, руһани ишләрдә фәал олан баҹы-гардашлара да аиддир (1 Бут. 3:1—4). Вәзијјәт нә гәдәр чәтин олса да, һәр биримиз Аллаһа шәрәф ҝәтирә вә руһани ҹәһәтдән тәрәгги едә биләрик.

20, 21. Биз һәм тәблиғдә, һәм дә јығынҹагда инсанлара неҹә көмәк едә биләрик?

²⁰ Әмин олун ки, руһани ҹәһәтдән тәрәгги етмәјә чалышсаныз, Јеһова сизи мүкафатсыз гојмајаҹаг. Ола билсин, тәблиғдә даһа чох иштирак етмәк, һәгигәти ахтаран инсанлара Аллаһын ҝөзәл хәбәрини чатдырмаг үчүн һәјатынызда мүәјјән дәјишикликләр етмисиниз. Сизин руһани ҹәһәтдән бу ҹүр тәрәгги етмәјиниз вә фәдакарлығыныз диндашларыныза да бөјүк фајда ҝәтирир. Јығынҹағын рифаһы үчүн чәкдијиниз зәһмәти ҝөрәндә, баҹы-гардашларын сизә мәһәббәти вә миннәтдарлығы артаҹаг, онлар сизә дајаг олаҹаглар.

²¹ Һәр биримиз, һәм илләрлә Јеһоваја хидмәт едәнләр, һәм дә бу јола ҹәми бир нечә ај габаг гәдәм гојанлар, руһани ҹәһәтдән тәрәгги етмәлијик. Бәс тәҹрүбәли мәсиһиләр јениләрә руһани ҹәһәтдән ирәли ҝетмәјә неҹә көмәк едә биләрләр? Буну нөвбәти мәгаләдән өјрәнәҹәјик.