1, 2. а) Мәһәббәт вә иман бир-бири илә неҹә бағлыдыр? б) Бу мәгаләдә һансы суаллары нәзәрдән кечирәҹәјик?

БИЗ Аллаһы севирик, «чүнки әввәлҹә Аллаһ бизи севди» (1 Јәһ. 4:19). Онун мәһәббәтинин бир тәзаһүрү садиг хидмәтчиләринә мүкафат верәҹәјинә даир вәдидир. Аллаһа мәһәббәтимиз артдыгҹа, иманымыз да ҝүҹләнир. Амма сөһбәт јалныз Онун варлығына имандан ҝетмир. Биз һәмчинин Јеһованын Өз севимли бәндәләринә мүтләг мүкафат верәҹәјинә инанмалыјыг. (Ибраниләрә 11:6 ајәсини охујун.)

² Хидмәтчиләринә мүкафат вермәк Јеһова Аллаһа чох хошдур. Јеһованын Ону ҹидд-ҹәһдлә ахтаранлара мүкафат вердијинә ахырадәк иман етмириксә, иманымыз камил ола билмәз, чүнки «иман үмид едилән шејләрин мүтләг јеринә јетәҹәјинә әминликдир» (Ибр. 11:1). Бәли, иман дејәндә Аллаһын Өз садиг бәндәләринә мүкафат верәҹәјинә әминлик дә нәзәрдә тутулур. Ҝәлин ҝөрәк Аллаһдан мүкафат алаҹағымыза үмид етмәк бизә неҹә көмәк едир? Јеһова кечмишдә јашамыш хидмәтчиләринә неҹә мүкафат верирди вә буҝүнкү хидмәтчиләринә неҹә мүкафат верир?

3. Мәлаки 3:10 ајәсиндә Јеһова нә вәд едир?

³ Јеһова Аллаһ вәфалы хидмәтчиләринә мүкафат вермәји Өзүнә борҹ билир. Мәһз бу сәбәбдән О, хидмәтчиләрини Ондан мүкафат алмаға сәсләјир. Мүгәддәс Китабда дејилир: «Бујурун, Мәни... сынајын, — дејир ордулар Аллаһы Јеһова, — ҝөрүн ҝөјләрин гапыларыны сизин үчүн ачырам, ја јох, башыныздан бәрәкәт төкүрәм, ја јох» (Мәл. 3:10). Бу чағырыша һај вермәклә Јеһованын тәклифини гијмәтләндирдијимизи ҝөстәрмиш оларыг.

4. Исанын Мәтта 6:33 ајәсиндә вердији вәдә инанмаға һансы әсасымыз вар?

⁴ Иса Мәсиһ давамчыларына сөз вермишди ки, Падшаһлығы һәр шејдән үстүн тутсалар, Аллаһ онлары көмәксиз гојмајаҹаг. (Мәтта 6:33 ајәсини охујун.) Бу әминлик Исада һарадан иди? О, әмин иди ки, Мүгәддәс Китабда јазылдығы кими Јеһованын вәдләри һеч вахт пуча чыхмыр (Әшј. 55:11). Јеһоваја үрәкдән иман етдијимизи әмәлдә ҝөстәрсәк, әмин ола биләрик ки, О да вердији нөвбәти сөзүн үстүндә дураҹаг: «Сәни һеч вахт атмарам, һеч вахт тәрк етмәрәм» (Ибр. 13:5). Аллаһын бу вәди Исанын Падшаһлығы һәр шејдән үстүн тутанлара вердији вәдә етибарымызы артырыр.

5. Нәјә ҝөрә Исанын Бутруса вердији ҹаваб иманымызы мөһкәмләндирир?

⁵ Һәвари Бутрус бир дәфә Исадан сорушмушду: «Биз һәр шеји гојуб сәнин ардынҹа ҝәлдик. Бунун әвәзиндә нә алаҹағыг?» (Мәт. 19:27). Бу суалына ҝөрә Иса Бутруса ирад тутмады, әксинә, шаҝирдләринә сөз верди ки, вердикләри гурбанларын әвәзиндә мүкафат алаҹаглар. Исаја садиг галан  һәвариләрин вә бир сыра диҝәр давамчыларынын мүкафаты ҝөјдә онунла бирҝә һакимијјәт сүрмәк олаҹаг. Анҹаг онун давамчылары бу ҝүн дә бол-бол мүкафат алырлар. Иса Мәсиһ демишди: «Мәним адым уғрунда евләрини, баҹы-гардашыны, атасыны, анасыны, ушагларыны вә торпагларыны гојуб ҝәлән бундан јүзгат артығыны алаҹаг вә әбәди һәјата говушаҹаг» (Мәт. 19:29). Иса сөз вермишди ки, онун ардынҹа ҝедән инсанлар вердикләри гурбанлардан гат-гат артыг немәт алаҹаг. Мәҝәр иман јолунда тапдығымыз ата, ана, гардаш, баҹы вә өвладлар Падшаһлыг уғрунда вердијимиз гурбанлардан дәјәрли дејил?!

6. Нәјә ҝөрә Јеһова хидмәтчиләринә мүкафат вәд едир?

⁶ Јеһова хидмәтчиләринә мүкафат вәд етмәклә онлара сынаглар гаршысында мөһкәм дајанмаға көмәк едир. Аллаһа сәдагәтлә хидмәт едән мәсиһиләр һәм бу ҝүн Ондан бол немәт алыр, һәм дә ҝәләҹәкдәки даһа бөјүк немәтләри үмидлә ҝөзләјир (1 Тим. 4:8). Јеһованын «Ону ҹидд-ҹәһдлә ахтаранлара мүкафат вердијинә» әминлик бизә иманда мөһкәм галмаға ҝүҹ верир (Ибр. 11:6).

7. Һансы мәнада үмид ҝәми лөвбәри кимидир?

⁷ Дағүстү вәзиндә Иса демишди: «Севинин вә шадланын, чүнки ҝөјдә сизи бөјүк мүкафат ҝөзләјир, ахы сиздән әввәл пејғәмбәрләри дә белә тәгиб етмишләр» (Мәт. 5:12). Һәм ҝөјдә јашамаг үмиди, һәм дә јер үзүндәки ҹәннәтдә әбәди һәјат мүкафаты севиниб шадланмаг үчүн әсл сәбәбдир (Зәб. 37:11; Лука 18:30). Һарада јашамаға үмид етмәјимиздән асылы олмајараг, үмидимиз «бизим үчүн мөһкәм вә сарсылмаз ҝәми лөвбәри кимидир» (Ибр. 6:17—20). Фыртына заманы лөвбәр ҝәмини јериндә мөһкәм сахладығы кими, мүкафат алаҹағымыза үмид дә бизә Јеһованын јолунда дәјанәтли олмаға көмәк едир, чәтинликләрә дөзмәјә ҝүҹ верир.

8. Үмидимиз нараһатчылығымызы неҹә азалдыр?

⁸ Аллаһын Кәламына әсасланан үмидимиз нараһатчылығы азалтмаға көмәк едир. Аллаһын вәдләри бир мәлһәм кими нараһат гәлбимизин ағрысыны јүнҝүлләшдирир. Биләндә ки, гајғы јүкүмүзү Јеһоваја верәндә О, бизә дајаг олур раһатлыг тапырыг (Зәб. 55:22). Там әмин ола биләрик ки, Аллаһ «хаһиш етдијимиз, дүшүндүјүмүз һәр бир шејдән гат-гат артығыны етмәјә гадир»дир (Ефес. 3:20). Диггәт јетирдинизсә, ајәдә дејилмир, садәҹә артығыны етмәјә, дејилир «гат-гат артығыны етмәјә гадир»!

9. Јеһовадан мүкафат алмаг үчүн нә етмәлијик?

⁹ Аллаһдан мүкафат алмаг истәјириксә, Она үрәкдән иман етмәли вә ҝөстәришләринә бојун әјмәлијик. Муса пејғәмбәр Исраил халгына демишди: «Аллаһыныз Јеһованын сизә ирс олараг верәҹәји дијарда Јеһова сизә хејир-бәрәкәт верәҹәк, амма јалныз о шәртлә ки, һәр шејдә Аллаһыныз Јеһованын сөзүнә гулаг асыб бу ҝүн сизә чатдырдығым бүтүн бу әмрләрә дәгигликлә әмәл едәсиниз. Аллаһыныз Јеһова вәд етдији кими, сизә хејир-бәрәкәт верәҹәк» (Ган. 15:4—6). Аллаһа сәдагәтлә хидмәт етдијиниз тәгдирдә Ондан немәт алаҹағыныза әминлијиниз нә дәрәҹәдә ҝүҹлүдүр? Буна инанмаға там әсасыныз вар.

10, 11. Јеһова Јусифә неҹә мүкафат верди?

¹⁰ Мүгәддәс Китаб бизим хејримиз үчүн јазылыб. Орада Аллаһын Өз садиг бәндәләринә мүкафат вердијинә даир чохлу нүмунәләр вар (Ром. 15:4). Бу нүмунәләрин сырасында Јусифин һадисәсини мисал ҝәтирмәк олар. Гардашларынын мәкрли планы вә ағасынын арвадынын һагсыз давранышы  нәтиҹәсиндә о, Мисирдә зиндана дүшүр. Амма Јусифин зинданда олмасы Јеһова үчүн манеә дејилди, О, орада да онун јанында иди. «Јеһова мәһәббәт ҝөстәриб Јусифи тәк гојмурду... Јеһова Јусифлә иди. Әлини һансы ишә атырдыса, Јеһова ону аванд едирди» (Јар. 39:21—23). Һәјатынын бу чәтин анларында Јусиф сәбирлә Јеһовадан көмәк ҝөзләјирди.

¹¹ Илләр сонра Мисир падшаһы Јусифи зиндандан чыхарды вә бу тәвазөкар гулу јүксәк вәзифәјә тәјин етди, Јусиф дөвләтдә икинҹи адам олду (Јар. 41:1, 37—43). Сонра онун ики оғлу доғулду. «Јусиф: “Аллаһ бүтүн дәрдләрими вә ата евими мәнә унутдурду”, — дејиб илкинин адыны Мәнәссә гојду. “Башым бәлалар чәкән бу өлкәдә Аллаһ мәни бәһәрли етди”, — дејәрәк икинҹи оғлунун адыны Әфраим гојду» (Јар. 41:51, 52). Сәдагәтинә ҝөрә Јеһова Аллаһ Јусифә мүкафат верди. Бунун нәтиҹәсиндә һәм исраиллиләр, һәм дә Мисир халгы аҹлыгдан гуртулду. Јусиф исә, өз нөвбәсиндә, баша дүшүрдү ки, бүтүн бу немәтләри она верән Јеһовадыр (Јар. 45:5—9).

12. Исаја сынаглар гаршысында дөзүмлү олмаға нә көмәк етмишди?

¹² Иса Мәсиһ дә мүхтәлиф сынаглар гаршысында Аллаһа садиг галмышды вә буна ҝөрә мүкафат алмышды. Бәс ону бу гәдәр дөзүмлү едән нә иди? Мүгәддәс Китаб бу суала белә ҹаваб верир: «О, гаршыда ону ҝөзләјән севинҹә ҝөрә рүсвајчылыға мәһәл гојмајыб ишҝәнҹә дирәјиндә чәкдији әзаблара дөздү» (Ибр. 12:2). Сөзсүз ки, Аллаһын адыны уҹалтмаг Исаја мәмнунлуг ҝәтирирди. О һәмчинин Јеһованын ризасыны газанараг вә Онун тәрәфиндән чохлу шәрәфли мөвгеләрә уҹалдылараг мүкафат алды. Аллаһын Кәламында дејилдији кими Иса «Аллаһын тахтынын сағында әјләшди». Башга бир ајәдә исә јазылыб: «Аллаһ ону даһа јүксәк мөвгејә уҹалтды вә она бүтүн адлардан үстүн бир ад бәхш етди» (Филип. 2:9).

13, 14. Јеһова Онун јолунда чәкдијимиз зәһмәтә неҹә јанашыр?

¹³ Јеһова Онун јолунда чәкдијимиз зәһмәти јүксәк гијмәтләндирир. Өзүмүздә әминсизлик һисс едәндә О, бизи баша дүшүр. Мадди сыхынты јашајанда вә сағламлығымыза ҝөрә истәдијимиз гәдәр хидмәт едә билмәјәндә бизә шәфгәт ҝөстәрир. Әмин ола биләрик ки, Јеһова Аллаһ хидмәтчиләринин Она садиг галмаг үчүн чәкдији зәһмәти унутмур. (Ибраниләрә 6:10, 11 ајәләрини охујун.)

¹⁴ Һәмчинин унутмајын ки, «дуалары ешидән» Јеһова Аллаһа һәр заман үз тута биләрик вә дуаларымыз һеч вахт ҹавабсыз галмајаҹаг (Зәб. 65:2). «Мәрһәмәтли Ата вә һәр ҹүр тәсәлли Аллаһы» олан Јеһова бизә мәнәви ҹәһәтдән ҝүҹ верәҹәк вә Онунла мүнасибәтләримизи горумаг үчүн бәзи һалларда диндашларымыз васитәсилә көмәк едәҹәк (2 Кор. 1:3). Биз дә башгаларына шәфгәт ҝөстәрәндә Јеһоваја хош ҝедир. «Мәсәлләр» китабында дејилир: «Фағыра лүтф еләјән Јеһоваја борҹ верир, Аллаһ да она әвәзини верәр» (Мәс. 19:17; Мәт. 6:3, 4). Бу ајәдән ҝөрүндүјү кими кимсә дарда олан инсана тәмәннасыз әл тутанда Јеһова буну Она едилмиш јахшылыг кими гәбул едир вә Өзүнү һәмин инсана борҹлу билир. О сөз верир ки, бу јахшылығын әвәзини верәҹәк.

15. Сиз һансы мүкафаты алмаг үмидилә јашајырсыныз? (Мәгаләнин әввәлиндәки шәклә бахын.)

¹⁵ Мәсһ олунмуш мәсиһиләр адил һаким олан Иса Мәсиһин вәд етдији салеһлик таҹыны алмаг үмиди илә јашајырлар (2 Тим. 4:7, 8). Јер үзүндә әбәди јашамаға үмид  едәнләр дә Аллаһын ҝөзүндә дәјәрлидирләр. Исанын «башга гојунлар» адландырдығы милјонларла давамчысы бу мүкафаты алаҹаглары ҝүнү һәсрәтлә ҝөзләјир. Онда онлар «әмин-аманлығын боллуғундан һәзз алаҹаглар» (Јәһ. 10:16; Зәб. 37:11).

16. 1 Јәһја 3:19, 20 ајәләриндәки сөзләр бизә неҹә раһатлыг верир?

¹⁶ Ола билсин, һәрдән Јеһованын јолунда ҝөрдүјүмүз ишләрин дәјәрсиз олдуғуну вә ја Онун бизим гурбанлардан разы галмадығыны дүшүнүрүк. Һәтта өзүмүзү һеч бир мүкафата лајиг билмирик. Анҹаг ҝәлин унутмајаг ки, «Аллаһ үрәјимиздән бөјүкдүр вә һәр шеји билир». (1 Јәһја 3:19, 20 ајәләрини охујун.) Мәсиһинин етдији гурбанлар өз ҝөзүндә чох хырда ҝөрүнсә дә, Јеһова имандан вә мәһәббәтдән ирәли ҝәләрәк едилән бүтүн гурбанлары гијмәтләндирир (Марк 12:41—44).

17. Бу ҝүн Јеһова бизә һансы немәтләри бәхш едиб?

¹⁷ Һәтта Шејтан дүнјасынын бу кешмәкешли ҝүнләриндә дә Јеһова Өз хидмәтчиләринә немәтләр бәхш едир. О, Өз халгына елм верир вә әмин-аманлыг бәхш едир (Әшј. 54:13). Јеһова Аллаһ бу ҝүн бизә ҝөзәл немәт вериб, Иса Мәсиһин сөз вердији кими бизи иман баҹы-гардашларымыздан ибарәт бөјүк вә бејнәлхалг аиләнин үзвү едиб (Марк 10:29, 30). Јеһова Ону ҹидд-ҹәһдлә ахтаранлара даһа бир немәт, гәлб раһатлығы вериб, мәмнунлуг вә хошбәхтлик нәсиб едиб (Филип. 4:4—7).

18, 19. Јеһованын хидмәтчиләри Ондан алдыглары немәтләрә неҹә јанашырлар?

¹⁸ Јеһованын дүнјанын мүхтәлиф јерләриндә јашајан хидмәтчиләри Ондан чохлу немәтләр алдыгларыны тәсдиг едә биләрләр. Мәсәлән, Алманијада јашајан Бјанка дејир: «Чәтин анларымда мәнә көмәк етдији вә һәр ҝүн јанымда олдуғу үчүн Јеһоваја нә гәдәр шүкүр етсәм, аздыр. Дүнја аҹынаҹаглы вәзијјәтдәдир. Амма Јеһоваја хидмәт етдијим үчүн Онун ганадлары алтында өзүмү тәһлүкәсизликдә һисс едирәм. Онун јолунда нәјисә гурбан верәндә О, әвәзиндә мәнә јүз гат артыг јахшылыг едир».

¹⁹ Ҝәлин ҝөрәк Канадада јашајан вә спина бифида (онурға бејнинин инкишаф гүсуру) хәстәлијиндән әзијјәт чәкән 70 јашлы Пола баҹы нә дејир: «Хәстәлијимә ҝөрә чох һәрәкәт едә билмәсәм дә, бу о демәк дејил ки, хидмәтдә дә аз иштирак етмәлијәм. Хидмәтин мүхтәлиф нөвләриндә иштирак едирәм, мәсәлән, телефонла вә гејри-рәсми шәкилдә тәблиғ едирәм. Өзүм үчүн бир блокнот тутмушам. Ораја ајәләри вә нәшрләримиздән мүәјјән фикирләри јазырам. Онлары вахташыры охујуб руһланырам. Блокнотун адыны “дар ҝүнүн јарағы” гојмушам. Әҝәр ҝөзүмүзү Јеһованын вәдләринә диксәк, мәнфи һиссләр тез өтүб кечәҹәк. Һәр чәтинликдә Јеһова бизә көмәк етмәјә һазырдыр». Ола билсин, сизин вәзијјәтиниз Бјанкајла Поланын вәзијјәтиндән фәрглидир. Амма јахшы оларды ки, Јеһованын сизә вә таныдығыныз инсанлара вердији мүкафатлар барәдә дүшүнәсиниз. Јеһованын бу ҝүн вердији вә ҝәләҹәкдә верәҹәји немәтләр барәдә дүшүнмәјин чох мүсбәт тәсири вар.

20. Јеһоваја ҹан-дилдән хидмәт етсәк, нәјә үмид едә биләрик?

²⁰ Һеч вахт јаддан чыхармајын, Јеһова үрәкдән етдијиниз дуалары ҹавабсыз гојмајаҹаг. Әмин ола биләрсиниз ки, «Аллаһын ирадәсини јеринә јетириб Онун вәд етдији шеји» алаҹагсыныз (Ибр. 10:35, 36). Ҝәлин индән сонра да иманымызы мөһкәмләндирәк вә Јеһоваја ҹан-дилдән хидмәт едәк. О да, өз нөвбәсиндә, бизә ҝөзәл мүкафат верәҹәк. (Колослулара 3:23, 24 ајәләрини охујун.)