1, 2. а) Нәјә ҝөрә бу ҝүн һәтта Аллаһын хидмәтчиләри дә нараһатчылыг кечирирләр? (Мәгаләнин әввәлиндәки шәклә бахын.) б) Бу мәгаләдә нә барәдә данышылаҹаг?

ЈАШАДЫҒЫМЫЗ зәманә чох ағыр зәманәдир. Шејтан Иблис һирсиндән алышыб јаныр, «нәрилдәјән шир кими ҝәзиб удмаға адам ахтарыр» (1 Бут. 5:8; Вәһј 12:17). Буна ҝөрә һәтта Аллаһын хидмәтчиси олан бизләр дә һәрдән нараһатлыг, тәлаш, горху кими һиссләр кечиририк. Аллаһын гәдимдә јашамыш мөмин бәндәләринин дә, мәсәлән, Давуд падшаһын да әзаб чәкдији анлар олуб (Зәб. 13:2). Һәвари Булус да бүтүн јығынҹагларын фикрини чәкдијини јазмышды (2 Кор. 11:28). Бәс дәрин нараһатчылыг кечирәндә сакитлик тапмаға бизә нә көмәк едә биләр?

² Сәмави Атамыз Јеһова кечмишдәки хидмәтчиләринин дадына чатырды. О, бизә дә чәтин анларымызда көмәк етмәјә, раһатлыг вермәјә һазырдыр. Мүгәддәс Китабда дејилир: «Бүтүн гајғыларынызы Онун үзәринә гојун, чүнки О, гајғынызы чәкир» (1 Бут. 5:7). Бәс буну неҹә едәк? Бунун дөрд јолу вар: Аллаһа үрәкдән дуа етмәк, Мүгәддәс Китабы охујуб үзәриндә дүшүнмәк, Аллаһдан мүгәддәс руһ диләмәк вә етибарлы бир инсана һиссләримиз барәдә данышмаг. Бу мәгаләдә бу үсуллар нәзәрдән кечириләҹәк. Мүзакирә боју өз  вәзијјәтинизи тәһлил едиб һансы үсулун сизин үчүн практики олдуғуну мүәјјән етмәјә чалышын.

3. Гајғы јүкүмүзү Јеһоваја неҹә верә биләрик?

³ Нараһатлығы азалтмаг үчүн биринҹи аддым Јеһова Аллаһа дуа етмәкдир. Нараһатлыг, һәјәҹан, тәлаш кечирәндә үрәјинизи мәһәббәтли Атамыза ачыб бошалдын. Давуд пејғәмбәр Аллаһа јалварыб демишди: «Пәрвәрдиҝара, дуамы ешит». Сонра ејни мәзмурда о јазмышды: «Сән гајғы јүкүнү Јеһоваја вер, О, сәнә дајаг олар» (Зәб. 55:1, 22). Әҝәр әлиниздән ҝәләни етсәниз дә, проблеми һәлл едә билмәмисинизсә, һәрарәтлә дуа един. Нараһат олмагла һеч нәји дәјишән дејилсиниз, дуанын исә сизә бөјүк көмәји дәјә биләр. Јәгин сизә мараглыдыр, дуа нараһатчылығы азалтмаға неҹә көмәк едә биләр? (Зәб. 94:18, 19).

4. Нараһатчылыг кечирәндә дуа етмәк нәјә ҝөрә ваҹибдир?

⁴ Филиппилиләрә 4:6, 7 ајәләрини охујун. Јеһова Аллаһ үрәкдән ҝәлән дуалары, бәндәләринин дурмадан етдији јалварышлары ҹавабсыз гојмур. О, гәлб раһатлығы верәрәк үрәјимизи вә фикирләримизи нараһатчылыгдан азад едир. Онун хидмәтчиләринин чоху буну өз үзәриндә һисс едиб. Онлар нараһатлыгларыны Аллаһа данышараг әвәзиндә инсан ағлындан үстүн олан раһатлығы тапмышлар. Сиз дә бу раһатлығы тапа биләрсиниз. Бәли, Аллаһын сүлһү гаршылашдығыныз истәнилән проблемдән ҝүҹлүдүр. Јеһова вәд едир: «Тәлаша дүшмә, сәнин Аллаһын Мәнәм. Сәнә гүввәт верәҹәјәм, сәнә көмәк едәҹәјәм» (Әшј. 41:10). Әмин ола биләрик ки, Аллаһ бу вәдинә садигдир.

5. Аллаһын Кәламы бизә неҹә гәлб раһатлығы верә биләр?

⁵ Гәлб раһатлығы тапмағын икинҹи јолу Мүгәддәс Китабы охујуб үзәриндә дүшүнмәкдир. Мүгәддәс Китабдакы һикмәтли мәсләһәтләр сизә тәлаша дүшмәмәјә вә нараһатлығы азалтмаға көмәк едә биләр. Унутмајын ки, бу китабда Јараданымызын һикмәтли кәламлары јазылыб, буна ҝөрә дә о, бизә көмәк етмәјә вә ҝүҹ вермәјә гадирдир. Ҝеҹә-ҝүндүз Аллаһымызын кәлмәләри үзәриндә дүшүнмәк вә Онун мәсләһәтләрини һәјатымызын һансы саһәләриндә тәтбиг едә биләҹәјимиз барәдә фикирләшмәк бизә еһтијаҹ дујдуғумуз ҝүҹү верәҹәк. Буна ҝөрә дә Јеһова бизә мәсләһәт ҝөрүр ки, горхуб тәлаша дүшмәмәк, ҹәсарәтли вә мөһкәм олмаг үчүн Онун Кәламыны охујаг (Јуш. 1:7—9).

6. Исанын сөзләри сизә неҹә көмәк едә биләр?

⁶ Мүгәддәс Китабда Иса Мәсиһин сөјләдији тәсәлли сөзләри јазылыб. Онун дилиндән чыхан кәлмәләр инсанлара тәравәт ҝәтирирди. Инсанлар Исанын јанына ахышырды, чүнки о, нараһат үрәкләри сакитләшдирир, тагәтсиз голлары ҝүҹләндирир вә пәришан гәлбләрә тәсәлли верирди. (Мәтта 11:28—30 ајәләрини охујун.) О, инсанлара Аллаһа јахынлашмаға көмәк едир, онларын мәнәви вә физики тәләбатларыны нәзәрә алырды (Марк 6:30—32). Иса бу ҝүн дә давамчыларына тәравәт верир. О, ону мүшајиәт едән һәвариләрә көмәк етдији кими, сизә дә көмәк едәҹәк. Бунун үчүн Исанын сизин јанынызда олмасына еһтијаҹ јохдур. О, сәмави Падшаһлығын Падшаһы кими бу ҝүн дә давамчыларына шәфгәт ҝөстәрир. Буна ҝөрә дә әмин ола биләрсиниз ки, нараһатчылыг кечирәндә о,  көмәјинизә ҝәләҹәк, дара дүшәндә имдадымыза чатаҹаг. Бәли, Исанын сөзләри сизә сакитлик бәхш етмәјә, үмид вә ҝүҹ вермәјә гадирдир (Ибр. 2:17, 18; 4:16).

7. Аллаһын мүгәддәс руһу бизә неҹә көмәк едә биләр?

⁷ Иса вәд етмишди ки, сәмави Атамыз Ондан мүгәддәс руһ диләјәнләрин әлини бош гајтармајаҹаг (Лука 11:10—13). Бу руһун бәһрәси нараһатлығы азалтмаг үчүн чох ҝүҹлү васитәдир. Бу бәһрәјә дахил олан ҝөзәл хүсусијјәтләр Күлли-Ихтијар Јеһова Аллаһын варлығыны әкс етдирир. (Галатијалылара 5:22, 23 ајәләрини охујун; Кол. 3:10.) Өзүнүздә мүгәддәс руһун бәһрәсини јетишдирсәниз, инсанларла мүнасибәтиниз јахшылашаҹаг. Бунун сајәсиндә, нараһатчылыг јарадан бир чох вәзијјәтләрин гаршысы алынаҹаг. Ҝәлин ҝөрәк руһун бәһрәси бизә неҹә көмәк едир.

8—12. Мүгәддәс руһун бәһрәси бизә нараһатчылығы азалтмаға вә нараһатчылыг јарадан вәзијјәтләрдән гачмаға неҹә көмәк едир?

⁸ «Мәһәббәт, севинҹ, сүлһ». Јәгин мүшаһидә етмисиниз ки, башгалары илә һөрмәтлә даврананда нараһатчылыг аз олур. Јәни бир-биримизә гардашлыг мәһәббәти, нәвазиш вә һөрмәт ҝөстәрәндә нараһатчылыг ҝәтирән вәзијјәтләр, демәк олар ки, јаранмыр (Ром. 12:10).

⁹ «Сәбир, хејирхаһлыг, јахшылыг». Ефеслиләрә 4:32 ајәсиндә верилән мәсләһәтә әмәл етмәк бизә баҹы-гардашларла арамызда јахшы мүнасибәт гурмаға көмәк едир. Орада дејилир: «Бир-биринизә гаршы хејирхаһ, шәфгәтли олун,.. бир-биринизи үрәкдән бағышлајын». Бунунла да нараһатчылыға сәбәб олан вәзијјәтләрин гаршысыны алмыш олуруг. Һәмчинин гејри-камиллик уҹбатындан јаранан проблемләри даһа раһат һәлл едә билирик.

¹⁰ «Иман». Бу ҝүн инсанларда нараһатчылыға сәбәб, чох вахт, пул вә доланышыг мәсәләси олур (Мәс. 18:11). Амма Јеһова Аллаһын бизим гејдимизә галдығына иман етмәк бу нараһатчылығы азалдыр, ја да үмумијјәтлә гаршысыны алыр. Бу неҹә баш верир? Һәвари Булусун «нәјиниз варса, она гане олун» мәсләһәтинә әмәл едәндә биз доланышыға ҝөрә һәддән артыг нараһат олмуруг. Бу мәсләһәти верәндән сонра Булус демишди: «Чүнки Аллаһ дејиб: “Сәни һеч вахт атмарам, һеч вахт тәрк етмәрәм”. Буна ҝөрә дә биз ҹәсарәтлә дејирик: “Јеһова дајағымдыр, әсла горхмарам. Инсан мәнә нә едә биләр?!”» (Ибр. 13:5, 6).

¹¹ «Мүлајимлик, өзүнә һаким олмаг». Сизҹә, бу хүсусијјәтләри тәзаһүр етдирмәјин һансы фајдасы вар? Бу хүсусијјәтләр бизи, шәхсән бизә нараһатчылыг јарадан һәрәкәтләрдән сахлаја биләр. Һәмчинин кин, һирс, гәзәб, гышгырыг вә тәһгир кими мәнфи хүсусијјәтләрин гаршысыны ала биләр (Ефес. 4:31).

¹² Әслиндә, Аллаһын әлинин гүдрәтинә инанмаг вә бүтүн гајғыларымызы Онун үзәринә гојмаг үчүн тәвазөкар олмаг лазымдыр (1 Бут. 5:6, 7). Тәвазөкар олсаг, Јеһова бизә дајаг олаҹаг вә көмәјимизә чатаҹаг (Мик. 6:8). Физики вә әгли габилијјәтләринизә, емосионал ҝүҹүнүзүн имканларына реал бахсаныз, чох еһтимал ки, һәддән артыг нараһат олмајаҹаг вә Јеһова Аллаһа бел бағлајаҹагсыныз.

13. Иса «һеч вахт... нараһат олмајын» сөзләри илә нә демәк истәјирди?

¹³ Мәтта 6:34 ајәсиндә Иса Мәсиһ бизә мәсләһәт ҝөрүр: «Һеч вахт... нараһат олмајын». (Ајәни охујун.) Ола билсин, бу мәсләһәтә әмәл етмәк чәтин ҝөрүнә биләр. Бәс «һеч вахт... нараһат олмајын» сөзләри илә Иса нә демәк истәјирди? Әлбәттә,  о, демәк истәмирди ки, Аллаһа хидмәт едән инсанлар һеч вахт нараһатчылыг кечирмәјәҹәк. Артыг јухарыда дејилдији кими Давуд падшаһ да, һәвари Булус да вахташыры нараһатчылыг кечирибләр. Бу сөзләрлә Иса давамчыларына баша салмаг истәјирди ки, һәддән артыг нараһат олмаг проблеми һәлл етмир. Һәр ҝүнүнүн өз чәтинлији вар, буна ҝөрә дә кечмишә вә ја ҝәләҹәјә ҝөрә нараһат олмагла вәзијјәти даһа да ҝәрҝинләшдирмәк лазым дејил. Бәс Исанын мәсләһәтинә әмәл етмәк бизә нараһатчылығы азалтмаға неҹә көмәк едә биләр?

14. Кечмиш ҝүнаһлара ҝөрә нараһатлығы неҹә азалтмаг олар?

¹⁴ Бәзән инсанын раһатлығыны әлиндән алан кечмиш ҝүнаһлары вә сәһвләри олур. Инсан кечмишдә, һәтта узун илләр әввәл төрәтдији әмәлә ҝөрә әзаб чәкә биләр. Давуд падшаһа һәрдән елә ҝәлирди ки, тәгсирләри башындан ашыр. О демишди: «Гәлбимин сызылтысындан фәған едирәм» (Зәб. 38:3, 4, 8, 18). Бу вәзијјәтдә Давуд неҹә давранса, даһа јахшы оларды? Ҝәлин ҝөрәк о нә етди. О, Аллаһын мәрһәмәтинә вә әфвинә сығынды. Давуд әмин иди ки, Јеһова ону бағышлајыб, буна ҝөрә дә јазмышды: «Хош о кәсин һалына ки, асилији бағышланыр». (Зәбур 32:1—3, 5 ајәләрини охујун.)

15. а) Бу ҝүн јашадығымыз проблемләрә ҝөрә нараһат оланда нә етмәлијик? б) Нараһатчылығы азалтмаг үчүн һансы аддымлары атмалыјыг? (« Нараһатчылығы азалтмаға көмәк едән аддымлар» адлы чәрчивәјә бахын.)

¹⁵ Бизи нараһат едән шејләрдән бири дә бу ҝүн јашадығымыз проблемләрдир. Мәсәлән, Давуд 55-ҹи мәзмуру јазанда өлүм горхусу илә јашајырды (Зәб. 55:2—5). Бунунла белә, о јол вермәди ки, бу горху онун Јеһоваја етибарыны сарсытсын. О, проблемләри барәдә Јеһоваја һәрарәтлә дуа едирди. Ејни заманда нараһатлыг јарадан бу проблемләри һәлл етмәк үчүн конкрет аддымлар атырды (2 Ишм. 15:30—34). Биз дә Давуд кими давранмалыјыг. Нараһатчылығын бизи әзмәсинә јол вермәмәлијик, әксинә, вәзијјәти јүнҝүлләшдирмәк үчүн әлимиздән ҝәләни етмәлијик. Сонра исә мәсәләни Јеһованын өһдәсинә бурахмалыјыг.

16. Аллаһын адынын мәнасы иманымызы неҹә мөһкәмләндирир?

¹⁶ Һәрдән исә ҝәләҹәкдә нә исә пис бир шејин олаҹағыны фикирләшиб әсассыз јерә нараһат олуруг. Һәлә баш вермәмиш һадисәләрә ҝөрә нараһат олмаға дәјмәз. Чүнки, чох вахт, вәзијјәт дүшүндүјүмүз гәдәр дә пис олмур. Һәмчинин јадда сахламалыјыг ки, һәр шеј Јеһованын нәзарәти алтындадыр, буна ҝөрә дә гајғыларымызы Онун үзәринә гојмалыјыг. Јеһованын адынын мәнасыны јадымыза салаг: «Олмасына сәбәб олур» (Чых. 3:14). Бу сөзләр бизи әмин едир ки, О, хидмәтчиләри илә бағлы бүтүн нијјәтләрини јеринә јетирмәјә гадирдир. Там әмин ола биләрик ки, Јеһова садиг бәндәләрини мүкафатсыз гојмајаҹаг вә онлара кечмишә, бу ҝүнә вә ҝәләҹәјә ҝөрә кечирдикләри нараһатчылығы азалтмаға көмәк едәҹәк.

17, 18. Сәмими үнсијјәт нараһатлығы арадан галдырмаға неҹә көмәк едир?

¹⁷ Нараһатчылығы арадан галдырмаға көмәк едән дөрдүнҹү амил етибарлы бир инсана һиссләримиз барәдә данышмагдыр. Һәјат јолдашымыз, јахын достумуз вә ја јығынҹаг ағсаггаллары бизә һиссләримизи баша дүшмәјә көмәк едә биләр. Мәсәлләр 12:25 ајәсиндә јазылыб: «Ниҝаранчылыг үрәји сыхар, хош сөз көнлү шад едәр». Сәмими үнсијјәт бизә нараһатчылығымызын сәбәбини баша дүшмәјә вә сакитләшмәјә көмәк едә биләр. Мүгәддәс Китабда дејилир: «Мәсләһәтсиз нијјәт боша чыхар, мәсләһәт верән чох оларса, уғур олар» (Мәс. 15:22).

¹⁸ Јеһова Аллаһ јығынҹаг ҝөрүшләри васитәсилә дә нараһатчылығымызы азалтмаға көмәк едир. Бурада бизи дүшүнән, бир-бирини руһландырмаға ҹан атан баҹы-гардашларла үнсијјәт етмәк имканымыз вар (Ибр. 10:24, 25). Баҹы-гардашларла руһландырыҹы үнсијјәт бизә ҝүҹ верә вә истәнилән нараһатчылығын өһдәсиндән ҝәлмәјә көмәк едә биләр (Ром. 1:12).

19. Јеһова илә мүнасибәтиниз сизә неҹә ҝүҹ верир?

¹⁹ Канадада јашајан бир ағсаггал гајғы јүкүнү Јеһоваја вермәјин нә дәрәҹәдә ваҹиб олдуғуну өз тәҹрүбәсиндән ҝөрмүшдү. О, мүәллим ишләјирди вә иш јериндә чох стресс јашајырды, үстәлик, невроз хәстәлијиндән әзијјәт чәкирди. Билирсиниз, бу гардаша нә көмәк етди? О дејир: «Јеһова илә мүнасибәтләрими мөһкәмләндирмәк мәнә емосионал проблемләрин өһдәсиндән ҝәлмәјә ҝүҹ верирди. Чәтин анларда достларын вә баҹы-гардашларын дәстәји дә олдугҹа ваҹибдир. Кечирдијим һиссләри һәјат јолдашымла бөлүшүрдүм. Ағсаггаллар вә рајон нәзарәтчиси мәнә вәзијјәтә Јеһованын ҝөзләри илә бахмаға көмәк етди. Мән һәмчинин һәкимә мүраҹиәт етдим. Ҝүндәлик ҹәдвәлимдә дәјишиклик етдим, истираһәтимә фикир вермәјә вә идманла мәшғул олмаға башладым. Вахт кечдикҹә вәзијјәти идарә етмәји өјрәндим. Вәзијјәт мәним гүввәм хариҹиндә оланда проблеми Јеһованын өһдәсинә бурахырам».

20. а) Гајғыларымызы Јеһованын үзәринә гојмаг үчүн нә етмәлијик? б) Нөвбәти мәгаләдә нә барәдә данышылаҹаг?

²⁰ Бу мәгаләдән өјрәндик ки, нараһатчылығын өһдәсиндән ҝәлмәк үчүн Аллаһа һәрарәтлә дуа етмәк, Мүгәддәс Китабы охујуб үзәриндә дүшүнмәк, өзүмүздә руһун бәһрәсини јетишдирмәк, етибарлы инсана үрәјимизи ачмаг вә баҹы-гардашларла хош үнсијјәт етмәк лазымдыр. Јеһованын хидмәтчиләринә мүкафат вермәк вәди бизә чәтинликләрә дөзмәјә ҝүҹ верир (Ибр. 11:6). Нөвбәти мәгалә бу мөвзуја һәср олунуб.