Залина адлы вәфтиз олунмамыш тәблиғчи гадынын башына белә бир әһвалат ҝәлмишди. Бир ҝүн о, евинин јанында паспорт тапыр. Паспортун ичиндә дебет картлары вә бөјүк мәбләғдә пул олур. О, бу барәдә әринә хәбәр верир. Әри дә онун кими вәфтиз олунмамыш тәблиғчи иди.

Онлар чох касыб јашајырдылар, үстәлик борҹлары да вар иди. Буна бахмајараг, пулу паспортун ичиндә ҝөстәрилән үнвана чатдырмаг гәрарына ҝәлирләр. Паспорту итирән киши вә онун аиләси мат-мәәттәл галыр. Залинајла һәјат јолдашы дејирләр ки, онлары дүрүст давранмаға Мүгәддәс Китабдан өјрәндикләри тәшвиг едиб. Онлар фүрсәтдән истифадә едиб бу аиләјә Јеһованын Шаһидләри һагда данышыр вә бир нечә әдәбијјат верир.

Бу јахшылығынын әвәзиндә аилә Залинаја пул вермәк истәјир, амма о ҝөтүрмүр. Нөвбәти ҝүн паспорту итирән кишинин һәјат јолдашы онлара ҝәлир вә аиләсинин адындан миннәтдарлыг әламәти олараг она брилјант гашлы үзүк ҝәтирир вә тәкид едир ки, Залина бу һәдијјәни гәбул етсин.

Јәгин бу ҹүтлүјүн ҝөстәрдији дүрүстлүк чохларыны тәәҹҹүбләндирир. Бәс Јеһова Аллаһы неҹә? О бу әр-арвадын дүрүстлүјүнә нә дәрәҹәдә дәјәр верир? Үмумијјәтлә, дүрүст олмаға дәјәрди?

Бу суаллара ҹаваб тапмаг чәтин дејил. Чүнки мәсиһиләр әминдирләр ки, Аллаһ Онун ҝөзәл хүсусијјәтләрини тәзаһүр етдирән инсанлары брилјантдан, гызылдан вә дүнјанын бүтүн ләл-ҹаваһиратындан үстүн тутур. Јеһова Аллаһын дәјәр мејары илә әксәр инсанларын дәјәр мејары арасында дағлар гәдәр фәрг вар (Әшј. 55:8, 9). Аллаһын хидмәтчиләри үчүнсә, Онун хүсусијјәтләрини әкс етдирмәк хәзинәјә бәрабәрдир.

Буна сүбут кими Мүгәддәс Китабда бәсирәт вә һикмәт барәдә јазыланлары ҝәтирмәк олар. Мәсәлләр 3:13—15 ајәләриндә јазылыб: «Хошбәхт о кәсдир ки, һикмәт тапыб, о кәсдир ки, бәсирәтә наил олуб. Һикмәт газанмаг ҝүмүш газанмагдан јахшыдыр, бу газанҹ гызылдан сәрфәлидир. О, мәрҹанлардан гијмәтлидир, арзуладығын шејләрдән һеч бири она тај ола билмәз». Ҝөрүндүјү кими Јеһова Аллаһын ҝөзүндә бу ҹүр хүсусијјәтләр гыр-гызылдан, даш-гашдан дәјәрлидир.

Бәс дүрүстлүк барәдә дә ејни шеји демәк олар?

Јеһова дүрүст Аллаһдыр, О, һеч вахт јалан данышмыр (Тит. 1:2). Һәвари Булус Аллаһын руһунун тәсири илә биринҹи әсрдә јашајан ибрани мәсиһиләрә јазмышды: «Биздән өтрү һәмишә дуа един, чүнки виҹданымызын тәмиз олдуғуна әминик, ахы һәр саһәдә дүрүст олмаг истәјирик» (Ибр. 13:18).

Иса Мәсиһ дә дүрүстлүкдә ҝөзәл нүмунәдир. Мәсәлән, бир дәфә баш каһин Гајафа она демишди: «Сәни вар олан Аллаһа анд верирәм, сөјлә, Аллаһын Оғлу Мәсиһ сәнсән?» Бахмајараг ки, буна ҝөрә ону Аллаһа күфр етмәкдә иттиһам едиб өлдүрә биләрдиләр, Иса дүрүст давранды, Мәсиһ олдуғуну инкар етмәди (Мәт. 26:63—67).

Бәс бизим һаггымызда нә демәк олар? Тәсәввүр един, әлинизә белә бир фүрсәт дүшүб: һәгигәтин јарысыны ҝизләтмәклә вә ја һәгигәти тәһриф етмәклә ҝәлир әлдә едә биләрсиниз. Бу вәзијјәтдә нә едәҹәксиниз, дүрүст давранаҹагсыныз?

Дүзүнү десәк, худбин вә пулпәрәст инсанларын јашадығы бу дүнјада дүрүст олмаг  елә дә асан дејил (2 Тим. 3:2). Бир чохлары мадди бөһраны вә ишсизлији бәһанә ҝәтирәрәк оғурлуға, кәләкбазлыға вә саир надүрүст һәрәкәтләрә әл атыр. Бу дүшүнҹә тәрзи о дәрәҹәдә ҝениш јајылыб ки, чохлары башга ҹүр пул газанмағын мүмкүн олмадығыны дүшүнүр. Тәәссүф ки, һәтта бәзи мәсиһиләр белә, һарам газанҹа әл атараг баҹы-гардашлар арасында газандыглары тәмиз ада ләкә ҝәтирибләр (1 Тим. 3:8; Тит. 1:7).

Хошбәхтликдән, мәсиһиләрин әксәријјәти, Иса Мәсиһи өрнәк алырлар. Онлар үчүн Аллаһа хас хүсусијјәтләр дүнјанын бүтүн вар-дөвләтиндән, наз-немәтиндән дәјәрлидир. Елә бу сәбәбдән ҝәнҹ мәсиһиләр мәктәбдә әла гијмәт алмаг үчүн фырылдаг ишләтмирләр (Мәс. 20:23). Дүздүр, һәр дүрүст давранан адама Залинанын вәзијјәтиндә олдуғу кими һәдијјә вермирләр. Амма әсас одур ки, дүрүст давранан инсан Аллаһын ҝөзүндә уҹалыр вә виҹданы тәмиз олур. Бу исә һәр шејдән дәјәрлидир.

Роман адлы бир мәсиһинин һәјаты буна әјани сүбутдур. О дејир: «Мәсиһи олмаздан әввәл бөјүк бир ширкәтдә ишләјирдим. Ширкәтин саһиби дөвләтә верҝи өдәмәмәк үчүн ҝәлирин кичик бир гисми барәдә һесабат верирди. Мүдир олдуғум үчүн верҝи аудиторунун буна ҝөз јуммасы үчүн онунла данышыб мәсәләни “јолуна гојмаг” мәним бојнума дүшүрдү. Буна ҝөрә дә надүрүст инсан кими танынырдым. Һәгигәти өјрәнәндән сонра бу иши ҝөрмәкдән имтина етдим, бахмајараг ки, маашым чох јүксәк иди. Сонра мән өз ширкәтими ачдым. Ширкәти дәрһал рәсми гејдијјатдан кечирдим вә илк ҝүндән бүтүн верҝиләри өдәјирдим» (2 Кор. 8:21).

Роман дејир: «Инди әввәлкиндән икигат аз газанырам. Буна ҝөрә дә аиләми доландырмаг бир аз чәтиндир. Буна бахмајараг, мән хошбәхтәм. Јеһованын гаршысында виҹданым тәмиздир. Оғулларымын һәр икисинә јахшы нүмунә гоја билирәм. Јығынҹагда мүәјјән мәсулијјәтләрим вар. Һәм верҝи аудиторларынын, һәм дә иш гурдуғум инсанларын јанында дүрүст инсан адыны газанмышам».

Јеһова Аллаһ алдығы тәлими дүрүстлүк кими ҝөзәл хүсусијјәтлә бәзәјән инсанлары чох севир (Тит. 2:10). Давуд падшаһ Аллаһдан илһам алараг әминликлә демишди: «Ҹаванлығымдан бәри, бу гоҹа јашымадәк, нә салеһ адамын атылдығыны, нә дә өвладларынын чөрәк диләндијини ҝөрмәмишәм» (Зәб. 37:25).

Мөмин гадын Рутун әһвалаты бу сөзләрин һәгигилијини тәсдиг едир. Гајынанасы Наимә јашлы олса да, Рут сәдагәт ҝөстәриб ону атмады, онунла бирҝә Исраилә көчдү. Орада Рут Јеһова Аллаһа раһат ибадәт едә биләрди (Рут 1:16, 17). О, дүрүст инсан иди вә зәһмәтлә башаг јығараг Төвратда касыблар үчүн верилән гануна әмәл едирди. Јеһова Руту вә Наимәни корлуг чәкмәјә гојмады. Сонралар Давуд да Јеһованын бу лүтфүнү дадмышды (Рут 2:2—18). Јеһова Руту јалныз мадди ҹәһәтдән тәмин етмәклә кифајәтләнмәмишди, она бөјүк шәрәф нәсиб етмишди: Давуд падшаһ, һәтта вәд олунмуш Мәсиһ онун нәслиндән иди (Рут 4:13—17; Мәт. 1:5, 16).

Јеһованын бәзи хидмәтчиләри һәтта ән зәрури еһтијаҹларыны өдәмәк үчүн кифајәт гәдәр пул газана билмирләр. Буна бахмајараг, онлар ағыр зәһмәтә гатлашыб виҹданла ишләјирләр, асан јолла пул газанмаг үчүн надүрүстлүјә әл атмырлар. Бунунла онлар Јеһованын бүтүн ҝөзәл хүсусијјәтләрини,  һәмчинин дүрүстлүјү пулдан, вардан үстүн тутдугларыны ҝөстәрирләр (Мәс. 12:24; Ефес. 4:28).

Рут кими, бүтүн мәсиһиләр әминдирләр ки, Јеһова онлара көмәк едәҹәк. Онлар нөвбәти вәди Верәнә үрәкдән инанырлар: «Сәни һеч вахт атмарам, һеч вахт тәрк етмәрәм» (Ибр. 13:5). Јеһова Аллаһ дәфәләрлә сүбут едиб ки, еһтијаҹ ичиндә олса да, һәр заман дүрүст давранан хидмәтчиләрини көмәксиз гојмајаҹаг. О сөз вердији кими, хидмәтчиләринин зәрури еһтијаҹларыны өдәјир (Мәт. 6:33).

Инсанлар брилјант вә диҝәр баһалы шејләрә дәјәр верирләр. Амма сәмави Атамызын ҝөзүндә дүрүстлүк вә диҝәр ҝөзәл хүсусијјәтләр дүнјанын бүтүн даш-гашларындан гат-гат дәјәрлидир!