1. Нәјә ҝөрә Јеһованы ән маһир Дулусчу адландырмаг олар?

ЛОНДОНДА 2010-ҹу илин нојабр ајында XVIII әсрә аид сахсы ҝүлдан сатыша чыхарылыр. Чиндә һазырланмыш бу габ тәхминән 70 милјон доллара сатылыр. Чох мараглыдыр, дулусчу ади, уҹуз ҝил парчасындан нәфис, баһалы бир әшја дүзәлдир. Амма Јеһова ән маһир Дулусчудур. Һеч бир дулусчу Она тај ола билмәз. Алтынҹы јарадылыш ҝүнүнүн сонунда Јеһова торпагдан, башга сөзлә, ҝилдән камил инсан јаратды вә она өз Јараданынын кејфијјәтләрини әкс етдирмәк баҹарығы верди (Јар. 2:7). Торпагдан дүзәлән бу камил инсан, јәни Адәм һаглы олараг «Аллаһын оғлу» адланды (Лука 3:38).

2, 3. Биз төвбә едән исраиллиләрдән нәдә нүмунә ҝөтүрә биләрик?

² Анҹаг Адәм Јараданына үсјан едәндә оғуллуг һаггыны итирди. Буна бахмајараг, Адәмин өвладларындан ибарәт «бөјүк шаһидләр булуду» Јеһованын һакимијјәтинин тәрәфини тутду (Ибр. 12:1). Онлар Јараданларына итаәт етмәклә ҝөстәрдиләр ки, онларын Атасы вә Дулусчусу Јеһовадыр, Шејтан јох (Јәһ. 8:44). Бу садиг инсанларын Јеһоваја сәдагәти бизә Әшија пејғәмбәрин төвбә етмиш исраиллиләрлә бағлы дедији сөзләри хатырладыр: «Еј Јеһова, Атамыз Сәнсән, биз ҝилик, Сәнсә дулусчумуз,  биз Сәнин әлләринин ишијик» (Әшј. 64:8).

³ Бу ҝүн дә Јеһоваја руһа вә һәгигәтә ујғун ибадәт едәнләр Онун кечмишдәки хидмәтчиләри кими итаәткар олмаға чалышырлар. Онлар үчүн Јеһоваја Ата дејә мүраҹиәт етмәк вә Она Дулусчу кими итаәт етмәк бөјүк шәрәфдир. Бәс сиз Јеһованын әлиндә јумшаг ҝил олмаг, јәни Онун истәдији шәклә дүшмәјә јарарлы ҝил олмаг истәјирсиниз? Һәр бир баҹыја вә гардаша һәлә үзәриндә иш ҝедән, Аллаһын һазырда шәкил вердији бир габ кими бахырсыныз? Бу саһәдә дүзҝүн нөгтеји-нәзәрә саһиб олмаг үчүн ҝәлин Јеһованын Дулусчу кими ҝөрдүјү ишин үч саһәсинә нәзәр салаг: О, шәкил вермәк, јәни формалашдырмаг истәдији инсанлары нәјә әсасән сечир, онлары нәјә ҝөрә формалашдырыр вә буну неҹә едир?

4. Јеһова формалашдырдығы инсанлары нәјә әсасән сечир? Нүмунәләр чәкин.

⁴ Јеһова инсанлара баханда диггәтини онларын заһиринә јох, дахилинә, үрәјинә ҹәмләјир. (1 Ишмуил 16:7б ајәсини охујун.) Аллаһ мәсиһи јығынҹағыны тәшкил едәндә буну ајдын шәкилдә нүмајиш етдирди. О, инсан нөгтеји-нәзәриндән дәјәрсиз сајылан кәсләри Өзүнә вә Оғлуна ҹәлб етди (Јәһ. 6:44). Белә инсанлардан бири күфр данышан, Аллаһын халгыны тәгиб едән вә чох азғын адам олан Шаул адлы фәриси иди (1 Тим. 1:13). Үрәкләри арашдыран Јеһова Аллаһ Шаула јарарсыз ҝил кими бахмырды (Мәс. 17:3). Әксинә, Аллаһ ҝөрүрдү ки, ондан ҝөзәл бир «габ» дүзәлтмәк олар. Ҝөрүрдү ки, Шаул «халглара, о ҹүмләдән һөкмдарлара вә Исраил оғулларына» шәһадәт вермәк үчүн сечилмиш аләт ола биләр (Һәв. 9:15). Јеһова һәмчинин вахтилә ички дүшкүнү, оғру вә әхлагсыз олан инсанлара нәзәр салыб онларын шәрәфли истифадә үчүн јарарлы «габ» ола биләҹәјини ҝөрмүшдү (Ром. 9:21; 1 Кор. 6:9—11). Һәмин инсанлар Аллаһын Кәламындан билик алдыгҹа вә өјрәндикләринә иман етдикҹә Јеһованын онлары формалашдырмасына јол вермишдиләр.

5, 6. Јеһованын маһир Дулусчу олдуғуна әминлијимиз саһәмиздәки инсанлара вә баҹы-гардашлара мүнасибәтимизә неҹә тәсир етмәлидир?

⁵ Әминик ки, Јеһова үрәкләри охумаға гадирдир вә Өзүнә ҹәлб етдији инсанлары сечәркән јанылмыр. Буна ҝөрә дә нә саһәмиздә јашајан инсанлары, нә дә јығынҹагдакы баҹы-гардашлары мүһакимә етмәмәлијик. Ҝәлин Мајкл адлы бир кишинин нүмунәсинә бахаг. О дејир: «Јеһованын Шаһидләри гапымы дөјәндә онлара сајмазјана јанашырдым, һеч үзләринә дә бахмырдым. Өзүмү чох кобуд апарырдым. Сонралар бир аилә илә таныш олдум. Онларын давранышы мәни валеһ едирди. Бир ҝүн өјрәндим ки, сән демә, онлар Јеһованын Шаһидијмиш. Јеримдә донуб галдым. Онларын давранышы мәни тәшвиг етди ки, Јеһованын Шаһидләринә нәјә ҝөрә гәрәзли јанашдығымы ҝөтүр-гој едим. Тезликлә анладым ки, мәним Јеһованын Шаһидләринә мүнасибәтим фактлара јох, ешитдикләримә әсасән формалашыб». Јеһованын Шаһидләрини јахындан танымаг үчүн Мајкл Мүгәддәс Китабы өјрәнмәјә башлајыр. Бир мүддәт сонра о, Јеһованын Шаһиди олур вә өнҹүл хидмәтинә башлајыр.

⁶ Јеһованы Дулусчумуз кими гәбул едириксә, бу, диндашларымыза мүнасибәтдә дә өзүнү бүрузә верәҹәк. Аллаһын ҝөзүндә баҹы-гардашларымыз һазыр «габ» дејилләр, онларын үзәриндә һәлә иш ҝедир. Бәс сиз онлара бу ҹүр јанашырсыныз? Аллаһ инсанын дахили варлығыны вә Устадынын әлиндән чыхандан сонра нәтиҹәдә неҹә бир «габ» олаҹағыны ҝөрүр. Беләликлә, Јеһова инсанлара мүсбәт тәрәфдән јанашыр, диггәтини онларын мүвәггәти гүсурларына  ҹәмләмир (Зәб. 130:3). Биз дә Јеһовадан нүмунә ҝөтүрәрәк диндашларымыза бу ҹүр јанашмалыјыг. Баҹы-гардашлара руһани ҹәһәтдән тәрәгги етмәјә көмәк етсәк, Дулусчумуз олан Аллаһла әмәкдашлыг етмиш оларыг (1 Салон. 5:14, 15). «Инсан тимсалында һәдијјә» олан ағсаггаллар бу саһәдә нүмунә олмалыдырлар (Ефес. 4:8, 11—13).

7. Нәјә ҝөрә Јеһованын тәрбијәсини гијмәтләндирирсиниз?

⁷ Јәгин кимдәнсә бу ҹүр сөзләр ешитмисиниз: «Өзүм валидејн олмајынҹа валидејн тәрбијәсинин гәдрини билмирдим». Илләр кечдикҹә инсан тәрбијәјә башга тәрәфдән бахмаға башлајыр, ону мәһәббәтин ифадәси кими гәбул едир. (Ибраниләрә 12:5, 6, 11 ајәләрини охујун.) Јеһова да мәһәббәтдән ирәли ҝәләрәк биз өвладларына сәбирлә тәрбијә верир, јәни формалашдырыр. О, бизим һикмәтли вә хошбәхт олмағымызы, Ону бир Ата кими севмәјимизи истәјир (Мәс. 23:15). Биз әзаб чәкәндә О, үрәкағрысы кечирир. Аллаһ истәмир ки, биз Адәмдән мирас алдығымыз ҝүнаһа ҝөрә, Онун гәзәбинә лајиг инсанлар кими мәһв олаг (Ефес. 2:2, 3).

8, 9. Јеһова бу ҝүн бизи неҹә өјрәдир вә ҝәләҹәкдә неҹә өјрәдәҹәк?

⁸ Биз Аллаһын гәзәбинә лајиг инсанлар оланда биздә Она аҹыг ҝедән, һәтта, белә десәк, һејвани кејфијјәтләр вар иди. Анҹаг Јеһова бизи формалашдырды, биз дәјишиб гузу кими олдуг (Әшј. 11:6—8; Кол. 3:9, 10). Буна ҝөрә дә Јеһованын бу ҝүн бизи формалашдырдығы мүһити руһани ҹәннәт адландырмаг олар. Биз шәр дүнјада јашасаг да, өзүмүзү әмин-аманлыгда һисс едирик. Һәтта валидејн мәһәббәтиндән мәһрум инсанлар да бу мүһитдә севилдикләрини һисс едирләр (Јәһ. 13:35). Бурада һәр биримиз севмәји өјрәнмишик. Ән ваҹиби исә, биз Јеһованы танымышыг вә Онун ата севҝисини өз үзәримиздә һисс едирик (Јаг. 4:8).

⁹ Јени дүнјада руһани ҹәннәтин немәтләрини тамлығы илә дадаҹағыг. О заман биз Аллаһын Падшаһлығынын идарә етдији һәрфи ҹәннәтдә јашајаҹағыг. Бүтүн јер үзүнүн ҹәннәтә чевриләҹәји һәмин дөврдә Јеһова бизи формалашдырмаға давам едәҹәк вә елә бир тәлим верәҹәк ки, инди тәсәввүрүмүзә белә ҝәтирә билмәрик (Әшј. 11:9). Бундан башга, Јеһова бизим зеһнимизи, бәдәнимизи камил шәклә салаҹаг вә беләҹә биз Онун тәлимләрини там гаврајаҹаг, ирадәсини мүкәммәл сурәтдә иҹра едә биләҹәјик. Одур ки ҝәлин бундан сонра да Јеһоваја итаәт едәк вә бунунла да ҝөстәрәк ки, Онун бизи формалашдырмасына Ата мәһәббәтинин тәзаһүрү кими бахырыг (Мәс. 3:11, 12).

10. Иса маһир Дулусчу Јеһова кими сәбирли вә мәһарәтли олдуғуну неҹә ҝөстәрмишди?

¹⁰ Маһир дулусчу кими, Јеһова да гаршысындакы «ҝилин» нөвүнә, кејфијјәтинә бәләддир вә О буну нәзәрә алараг «ҝилә» шәкил верир. (Зәбур 103:10—14 ајәләрини охујун.) Јеһова бизә фәрди јанашыр, зәиф ҹәһәтләримизи, мәһдуд имканларымызы вә руһани инкишафымызын дәрәҹәсини нәзәрә алыр. Аллаһын гејри-камил инсанлара мүнасибәтини Иса Мәсиһин нүмунәсиндән ҝөрмәк олар. Мәсәлән, о, һәвариләринин чатышмајан ҹәһәтләрини ҝөрәндә, хүсусилә дә онлар мөвге үстүндә мүбаһисә едәндә онлара неҹә јанашмышды? Әҝәр сиз һәвариләрин гызғын мүбаһисәләринин шаһиди олсајдыныз, онлара һәлим, јумшаг ҝил кими баха биләрдиниз? Иса онлара мүсбәт тәрәфдән бахырды. О әмин иди ки, мүлајимликлә, сәбирлә верилән мәсләһәт вә өзүнүн гојдуғу һәлимлик нүмунәси онлары дәјишәҹәк (Марк 9:33—37; 10:37, 41—45; Лука 22:24—27). Иса дириләндән сонра һәвариләр мүгәддәс  руһ алдылар вә артыг диггәтләрини ад-сан, мәнсәб газанмаға јох, алдыглары тапшырыға ҹәмләмишдиләр (Һәв. 5:42).

11. Давуд јумшаг «ҝил» олдуғуну неҹә ҝөстәрмишди вә биз ондан неҹә нүмунә ҝөтүрә биләрик?

¹¹ Јеһова хидмәтчиләрини, әсас етибарилә, Кәламы, мүгәддәс руһу вә мәсиһи јығынҹағы васитәсилә формалашдырыр. Мүгәддәс Китабы охујанда, үзәриндә дүшүнәндә вә Јеһовадан охудугларымыза әмәл етмәк үчүн көмәк истәјәндә Кәлам бизи формалашдырыр. Давуд јазмышды: «Јатағымда Сәни јада салырам, ҝеҹәләр Сәни дүшүнүрәм» (Зәб. 63:6). О һәмчинин демишди: «Мәнә нәсиһәт верән Јеһоваја шүкүрләр олсун! Ҝеҹәләр үрәјим дә мәни ислаһ едир» (Зәб. 16:7). Давуд имкан верирди ки, Аллаһын мәсләһәти, һәтта төһмәти белә, варлығынын дәринлијинә нүфуз етсин, ән ҝизли фикирләрини вә һиссләрини формалашдырсын (2 Ишм. 12:1—13). Һәлим вә итаәткар олмаг истәјән инсанлар үчүн Давуд ҝөзәл нүмунәдир. Бәс сиз Аллаһын Кәламы үзәриндә дүшүнүрсүнүз, онун варлығынызын дәринлијинә нүфуз етмәсинә јол верирсиниз? Бәлкә, бу саһәдә сизә бир аз чалышмаг лазымдыр? (Зәб. 1:2, 3).

12, 13. Јеһова мүгәддәс руһу вә јығынҹаг васитәсилә бизи неҹә формалашдырыр?

¹² Мүгәддәс руһ бизи мүхтәлиф јолларла формалашдыра биләр. Мәсәлән, бизә көмәк едә биләр ки, Мәсиһә бәнзәр шәхсијјәт олаг. Бу шәхсијјәтин сәҹијјәви ҹәһәти исә Аллаһын руһунун бәһрәсидир (Гал. 5:22, 23). Руһун бәһрәсинә дахил олан хүсусијјәтләрдән бири мәһәббәтдир. Биз Аллаһы севирик вә Она итаәт етмәк, Онун әлиндә формалашмаг истәјирик, чүнки Онун әмрләринин хејримизә олдуғуна әминик. Мүгәддәс руһ бизә һәмчинин бу дүнја илә мүбаризә апармаға вә онун руһуна гаршы дурмаға ҝүҹ верир (Ефес. 2:2). Һәвари Булус ҝәнҹ оланда јәһуди дин хадимләринин тәкәббүрү она да сирајәт етмишди. Лакин сонралар о јазмышды: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13). Ҝәлин һәвари Булус кими, һәмишә  Аллаһдан мүгәддәс руһ диләјәк. Јеһова һәлим инсанларын сәмими хаһишләрини һеч вахт ҹавабсыз гојмур (Зәб. 10:17).

¹³ Јеһова бизи һәмчинин мәсиһи јығынҹағы вә ағсаггаллар васитәсилә формалашдырыр. Мәсәлән, ағсаггаллар биздә руһани ҹәһәтдән проблем ҝөрәндә көмәк етмәјә чалышырлар вә бу заман онлар инсан мүдриклијинә әсасланмырлар (Гал. 6:1). Онлар тәвазөкарлыг ҝөстәриб дуада Аллаһдан һикмәт вә дәрракә истәјирләр. Сонра дуаларына мүвафиг олараг Аллаһын Кәламындан вә нәшрләримиздән истифадә едиб вәзијјәтимизлә бағлы арашдырма апарырлар. Бу арашдырма сајәсиндә бизә фајдалы олан фикирләри тапырлар. Ағсаггаллар сизә мүәјјән мәсәләдә, мәсәлән, ҝејимлә бағлы мәсләһәт верәндә буну неҹә гәбул едирсиниз? Бу мәсләһәтә Аллаһын мәһәббәтинин ифадәси кими бахырсыныз? Белә етсәниз, јумшаг «ҝил» олдуғунузу ҝөстәрәҹәксиниз вә Јеһоваја сизи формалашдырмаға имкан вермиш олаҹагсыныз.

14. Јеһованын бир Дулусчу кими үзәримиздә сәлаһијјәти олса да, ирадә азадлығымыза неҹә һөрмәт едир?

¹⁴ Аллаһын инсаны неҹә формалашдырдығыны билмәк бизә диндашларымызла јахшы мүнасибәтдә олмаға көмәк едир. Һәмчинин бунун сајәсиндә тәблиғ етдијимиз, еләҹә дә дәрс кечдијимиз инсанлара дүзҝүн јанашырыг. Гәдимдә дулусчу ҝилдән нәсә дүзәлтмәздән әввәл мүәјјән һазырлыглар ҝөрүрдү, ҝили даш-кәсәкдән, зир-зибилдән тәмизләјирди. Јеһова да дәјишмәк истәјән инсанлары формалашдырмаг үчүн онлары һазырлајыр. О, инсанларын ирадә азадлығына һөрмәтлә јанашыр, онлары зорла дәјишдирмир. Бәндәләринә адил ганунларыны ачыглајыр ки, өзләри өзләрини пис вәрдишләрдән вә кејфијјәтләрдән тәмизләсинләр.

15, 16. Мүгәддәс Китабы өјрәнәнләр неҹә ҝөстәрә биләрләр ки, Јеһованын онлары формалашдырмасыны истәјирләр? Нүмунә чәкин.

¹⁵ Ҝәлин Австралијада јашајан Тесси адлы баҹынын нүмунәсинә бахаг. Онунла дәрс кечән баҹы дејир: «Тесси Мүгәддәс Китабы јахшы гаврајырды. Анҹаг о, руһани ҹәһәтдән елә дә инкишаф етмирди. Һеч јығынҹаға да ҝәлмирди. Буна ҝөрә дә чохлу дуа етдикдән сонра дәрси дајандырмаг гәрарына ҝәлдим. Нөвбәти дәфә дәрс кечәндә она бу гәрарым барәдә демәк истәјирдим, лакин ҝөзләмәдијим бир шеј баш верди, Тесси үрәјини мәнә ачды. Деди ки, өзүнү ријакар һесаб едир, чүнки гумар ојнајыр. Амма буну тәрҝитмәк гәрарына ҝәлиб».

¹⁶ Бундан гыса мүддәт сонра, јолдашларынын ону әлә салмағына бахмајараг, Тесси јығынҹаға ҝәлмәјә, өзүндә мәсиһи кејфијјәтләри јетишдирмәјә башлады. Баҹы дејир: «Бир гәдәр сонра Тесси вәфтиз олду, сонра исә ушаглары балаҹа олса да, өнҹүл кими хидмәт етмәјә башлады». Ҝөрүндүјү кими, Мүгәддәс Китабы өјрәнән инсанлар Јеһованы разы салмаг үчүн һәјат тәрзләрини дәјишәндә Јеһова онлара јахынлашыр вә онлардан гијмәтли габлар дүзәлдир.

17. а) Јеһованын бир Дулусчу кими һансы хүсусијјәти хошунуза ҝәлир? б) Нөвбәти мәгаләдә һансы суаллары мүзакирә едәҹәјик?

¹⁷ Ҝүнү бу ҝүн дә бәзи сахсы габлары әллә дүзәлдирләр. Бизим Дулусчумуз да шәхсән Өз әлләри илә үзәримиздә сәбирлә ишләјир, мәсләһәтләрилә бизи формалашдырыр вә буна неҹә мүнасибәт ҝөстәрәҹәјимизи изләјир. (Зәбур 32:8 ајәсини охујун.) Јеһованын шәхсән сизинлә марагландығыны ҝөрүрсүнүз? Онун гајғыкеш әлләринин сизә шәкил вердијини һисс едирсиниз? Әҝәр еләдирсә, онда нөвбәти суаллар ортаја чыхыр: һансы хүсусијјәтләр сизә бир ҝил кими јумшаг галмаға көмәк едә биләр? Бәрк ҝил олмамаг үчүн һансы кејфијјәтләри өзүнүздән кәнар етмәлисиниз? Ушагларын дүзҝүн формалашмасында валидејнләр Јеһова илә неҹә әмәкдашлыг едә биләр? Нөвбәти мәгаләдә бу суаллар арашдырылаҹаг.