1, 2. Јеһованын хидмәтчиләри нәләрлә мүбаризә апармалы олур?

ИЛК мөмин инсан, Һабилдән тутмуш бу ҝүнә кими Аллаһын садиг хидмәтчиләри өз иманларыны горумаг үчүн вурушублар. Һәвари Булус ибрани мәсиһиләрә јазмышды ки, онлар Јеһова Аллаһын рәғбәтини газанмаг вә хејир-дуасыны алмаг үчүн «бөјүк мүбаризәдә әзијјәтләрә гатлашараг дөзүм» ҝөстәрибләр (Ибр. 10:32—34). О, мәсиһиләрин апардығы мүбаризәни јунан јарышларында гачыш, ҝүләш вә бокс кими идман нөвләриндә ҝедән мүбаризәјә бәнзәтмишди (Ибр. 12:1, 4). Бу ҝүн биз һәјат уғрунда ҝедән јарышда иштирак едирик вә бу јолда дүшмәнләримиз фикримизи јајындырмаға, бизи бүдрәтмәјә, јыхмаға, севинҹимизи вә мүкафатымызы әлимиздән алмаға чалышырлар.

² Биз, илк өнҹә, Шејтан вә онун дүнјасына гаршы вурушуруг (Ефес. 6:12). Бу дүнјанын тәлимләринә, фәлсәфәсинә ујмамаг, әхлагсызлығын, сигаретин, спиртли ичкиләрин вә наркотикин гулу олмамаг үчүн мүбаризә апармаг ваҹибдир. Биз һәмчинин, зәифликләримизлә вә руһ дүшкүнлүјү илә мүбаризә  апармалыјыг (2 Кор. 10:3—6; Кол. 3:5—9).

3. «Рәгибимизә» галиб ҝәлмәк үчүн Јеһова бизә нәјин васитәсилә тәлим верир?

³ Белә ҝүҹлү «рәгибләрә» галиб ҝәлмәк мүмкүндүр? Бәли! Анҹаг бунун үчүн, неҹә дејәрләр, савашмаг лазымдыр. Булус боксчуну нәзәрдә тутараг јазмышды: «Јумруғу елә атырам ки, зәрбәм боша чыхмасын» (1 Кор. 9:26). Биз боксчу кими «рәгибимизлә» вурушмалы, мүбаризә апармалыјыг. Бу дөјүшдә галиб ҝәлмәк үчүн Јеһова бизә тәлим верир вә көмәк едир. О, бизә Кәламы васитәсилә һәјативаҹиб мәсләһәтләр верир. Јеһова бизә Мүгәддәс Китаба әсасланмыш нәшрләр, јығынҹаг ҝөрүшләри вә топлантылар васитәсилә дә көмәк едир. Бәс сиз өјрәндикләринизә әмәл едирсиниз? Әҝәр етмирсинизсә, онда санки зәрбәниз боша чыхыр, јәни «рәгибинизә» јетәринҹә мүгавимәт ҝөстәрмирсиниз.

4. Пислијә мәғлуб олмамаг үчүн нә етмәлијик?

⁴ Биз һәмишә ајыг-сајыг олмалыјыг, чүнки «рәгибимиз» ҝөзләмәдијимиз анда вә ҝүҹүмүз түкәнәндә үстүмүзә һүҹум чәкә биләр. Мүгәддәс Китаб бизи хәбәрдар едир: «Пислијә мәғлуб олма, пислијә јахшылыгла галиб ҝәл» (Ром. 12:21). «Пислијә мәғлуб олма» ифадәси ҝөстәрир ки, биз пислијә галиб ҝәлә биләрик. Бунун үчүн исә мүбаризә апармаг ҝәрәкдир. Амма мүбаризәни дајандырсаг, Шејтан, онун дүнјасы вә гејри-камил тәбиәтимиз бизә галиб ҝәләҹәк. Гојмајын Шејтан сизи руһдан салыб бу дөјүшдә мәғлуб етсин! (1 Бут. 5:9).

5. а) Аллаһын хејир-дуасыны алмаг үчүн апардығымыз мүбаризәдә мәтин олмаға бизә нә көмәк едә биләр? б) Бу мәгаләдә кимләрин нүмунәсини нәзәрдән кечирәҹәјик?

⁵ Бу дөјүшдә галиб ҝәлмәк үчүн нәјин уғрунда мүбаризә апардығымызы һәмишә јадда сахламалыјыг. Биз Јеһова Аллаһын рәғбәтини газанмаг вә хејир-дуасыны алмаг истәјирик вә буна наил олмаг үчүн Ибраниләрә 11:6 ајәсиндә јазылан сөзләри унутмамалыјыг: «Аллаһа јахынлашан адам Онун варлығына вә Ону ҹидд-ҹәһдлә ахтаранлара мүкафат вердијинә инанмалыдыр». «Ҹидд-ҹәһдлә ахтармаг» кими тәрҹүмә олунан јунан сөзү вар ҝүҹү илә чалышмаг, бүтүн ҝүҹү сәфәрбәр етмәк мәнасыны дашыјыр (Һәв. 15:17). Мүгәддәс Китабда Аллаһын хејир-дуасыны алмаг үчүн вар ҝүҹүнү сәфәрбәр едән инсанларын ады чәкилир. Мәсәлән, Јагуб, Рәһилә, Јусиф вә Булус онлары емосионал вә физики ҹәһәтдән тагәтдән салан вәзијјәтләрлә үзләшсәләр дә, сүбут етмишдиләр ки, инсан гәтијјәтли олса, Аллаһын хејир-дуасыны артыгламасы илә алаҹаг. Ҝәлин ҝөрәк бу инсанлардан неҹә нүмунә ҝөтүрә биләрик.

6. Јагубу гәтијјәтли едән нә иди вә о, һансы мүкафаты алды? (Мәгаләнин әввәлиндәки шәклә бахын.)

⁶ Һәзрәти Јагуб мүбариз вә гәтијјәтли инсан иди, чүнки Аллаһы севирди, руһани дәјәрләри үстүн тутурду вә Аллаһын, сөз вердији кими, онун нәслинә немәтләр бәхш едәҹәјинә әмин иди (Јар. 28:3, 4). Буна ҝөрә дә о, тәхминән 100 јашы оланда мәләклә чарпышмышды, әлиндән ҝәләни етмишди ки, Аллаһдан хејир-дуа алсын. (Јарадылыш 32:24—28 ајәләрини охујун.) Доғруданмы Јагуб мәләклә чарпышаҹаг гәдәр ҝүҹлү иди? Хејр. Садәҹә, о, әзмли инсан иди вә бу чәтинлијин гаршысында ҝери чәкилмәк фикри јох иди! Елә бу гәтијјәтинә ҝөрә о, мүкафат алды. Аллаһ  онун адыны дәјишиб Исраил (мәнасы: «Аллаһла чарпышан», јахуд «Аллаһ чарпышыр») гојду. Јагуб һәр биримизин ҹан атдығы мүкафаты алды, Аллаһын разылығыны вә хејир-дуасыны газанды.

7. а) Рәһиләни үзән нә иди? б) Мүбаризә апармаға она нә ҝүҹ верирди вә нәтиҹәдә о, һансы хејир-дуаны алды?

⁷ Јагубун севимли һәјат јолдашы Рәһилә Јеһованын онун әринә вердији вәди јеринә јетирәҹәји ҝүнү ҝөрмәји чох арзулајырды. Амма бир әнҝәл вар иди. Рәһилә сонсуз иди. Һәмин дөврдә ушағын олмамасы бөјүк дәрд иди. Әлаҹы онун әлиндә олмајан бу дәрдин гаршысында Рәһилә мүбаризә апармаг үчүн гүввәни вә мәнәви ҝүҹү һарадан тапды? О, үмидини итирмирди, дурмадан дуа едирди. Јеһова Рәһиләнин фәрјадыны ешидиб она өвлад нәсиб етди. Буна ҝөрә Рәһилә демишди: «Вар ҝүҹүмлә чарпышыб... үстүн ҝәлдим» (Јар. 30:8, 20—24).

8. Јусиф һансы сынагла үзләшди вә бизә һансы нүмунә гојду?

⁸ Јагубла Рәһиләнин гәтијјәти онларын оғлу Јусифә дә сирајәт етмишди. Иманы сынананда бу хүсусијјәт она көмәк етмишди. Јусифин 17 јашы оланда һәјатынын гара ҝүнләри башлады. Гардашлары пахыллыгдан ону көләлијә сатдылар. Сонралар о, Мисирдә наһагдан илләрлә зиндан әзабы чәкди (Јар. 37:23—28; 39:7—9, 20, 21). Амма Јусиф руһдан дүшмәди, гәлбиндә кин сахламады. О, бүтүн диггәтини Јеһова Аллаһла мүнасибәтләринә ҹәмләмишди (Лав. 19:18; Ром. 12:17—21). Јусифдән нүмунә ҝөтүрәрәк һәр биримиз, һәм ушаглығы ағыр кечән, һәм дә чыхылмаз кими ҝөрүнән проблемләр јашајанлар мүбариз вә гәтијјәтли олмалыдырлар. Әмин ола биләрик ки, тәслим олмасаг, Јеһованын хејир-дуасыны алаҹағыг. (Јарадылыш 39:21—23 ајәләрини охујун.)

9. Аллаһын хејир-дуасыны алмаг истәјириксә, Јагуб, Рәһилә вә Јусифдән неҹә нүмунә ҝөтүрә биләрик?

⁹ Јәгин сиз дә иманынызы сынајан проблем јашајырсыныз. Ола билсин, әдаләтсизликлә, гәрәзли мүнасибәтлә, истеһза илә үзләширсиниз. Јахуд да кимсә пахыллығындан сизи наһагдан иттиһам едир. Әлинизи јана салмајын. Јагуба, Рәһиләјә, Јусифә севинҹини итирмәмәјә нә көмәк етмишди? Руһани дәјәрләрә үстүнлүк вердикләри үчүн Аллаһ онлары гүввәтләндирмиш вә хејир-дуа вермишди. Бу инсанлар тәслим олмурдулар вә дуаларына ујғун јашајырдылар. Бу Шејтан дүнјасынын ахыр ҝүнләриндә јашадығымыз үчүн ҝәләҹәјә үмидимиздән мөһкәм јапышмалыјыг. Бу, олдугҹа ваҹибдир! Јеһова Аллаһын разылығыны газанмаг үчүн ҹаныныза ҹәфа вермәјә, неҹә дејәрләр, савашмаға һазырсыныз?

10, 11. а) Аллаһын хејир-дуасыны алмаг үчүн нә илә мүбаризә апармалы олуруг? б) Нәјин көмәјилә дүзҝүн сечим едә вә бизи јајындыран шејләрин өһдәсиндән ҝәлә биләрик?

¹⁰ Һәрдән Аллаһын хејир-дуасыны алмаг үчүн, сөзүн әсл мәнасында, мүбаризә апармалы олуруг. Кимимиз зәиф ҹәһәтләримизлә савашырыг, кимимиз вар ҝүҹүмүзлә чалышырыг ки, хидмәтә һәвәсимиз сөнмәсин, кимимиз исә хәстәлик вә ја тәнһалыгла мүбаризә апарырыг. Бизи инҹидән, бизә гаршы ҝүнаһ едән инсаны бағышламаг да һәрдән бир мүбаризә ола биләр. Јеһова Аллаһа нечә ил хидмәт етмәјимиздән асылы олмајараг, һәр биримиз хидмәтимизи чәтинләшдирән  амилләрлә мүбаризә апарырыг. Амма унутмајын, Јеһова садиг хидмәтчиләрини мүкафатсыз гојмур.

¹¹ Дүзҝүн сечим етмәк вә һәгигәт јолунда галмаг үчүн бәзән дишимизлә-дырнағымызла мүбаризә апармалы олуруг, хүсусән дә, хаин үрәјимиз бизи башга сәмтә апаранда (Әрм. 17:9). Әҝәр нәјинсә сизә, ҹүзи дә олса, мәнфи тәсир етдијини һисс едирсинизсә, јалварыб Јеһовадан мүгәддәс руһ истәјин. Дуа вә мүгәддәс руһ сизә дүзҝүн давранмаға ҝүҹ верәҹәк вә нәтиҹәдә Јеһованын хејир-дуасыны алаҹагсыныз. Дуаныза ујғун давранын. Мүгәддәс Китабы һәр ҝүн охујун, мүнтәзәм олараг фәрди мүталиә илә мәшғул олун, аиләви ибадәт кечирин. (Зәбур 119:32 ајәсини охујун.)

12, 13. Ики ҝәнҹ мәсиһијә ҝүнаһлы арзуларла мүбаризә апармаға нә көмәк етмишди?

¹² Мүгәддәс Китаб, Аллаһын руһу вә нәшрләримиз бир чохларына ҝүнаһлы арзулара галиб ҝәлмәјә көмәк едиб. «Ојанын!» журналынын 2003-ҹү ил 8 декабр сајында дәрҹ олунан «Ҝүнаһлы арзуларла неҹә мүбаризә апара биләрсән?» адлы мәгалә бир јенијетмә гардашымыза ҝүҹлү тәсир бағышламышды. О дејир: «Мән пис фикирләрлә мүбаризә апарырам. Бу мәгаләдә чохларынын мәним кими ҝүнаһлы арзуларла әмәлли-башлы  мүбаризә апардығы барәдә охујанда, тәк олмадығымы һисс етдим». Бу гардаша һәмчинин «Ојанын!» журналынын 2003-ҹү ил 8 октјабр сајында јерләшән «Гејри-әнәнәви ҹинси әлагәјә Аллаһ неҹә јанашыр?» адлы мәгалә дә көмәк етмишди. Журналда дејилирди ки, бәзиләри үчүн дахилдә ҝедән мүбаризә ҹисмә батан тикан кимидир. (2 Кор. 12:7). Онлар тәмиз галмаг үчүн мүбаризә апарырлар вә ҝәләҹәјә үмидлә бахырлар. Гардаш дејир: «Мән белә нәтиҹәјә ҝәлдим ки, гаршыма һәр ҝүн садиг галмағы мәгсәд гојсам, баҹараҹағам. Јеһоваја миннәтдарам ки, тәшкилаты васитәсилә бизә бу дүнјада јашадығымыз һәр ҝүн гәләбә чалмаға көмәк едир».

¹³ Ҝәлин Бирләшмиш Штатлардан олан бир баҹынын да нүмунәсинә бахаг. О јазмышды: «Сизә миннәтдарам ки, бизә дүз вахтында вә лазым олан руһани гиданы чатдырырсыныз. Һәрдән мәнә елә ҝәлир ки, бу мәгаләләр сырф мәним үчүн јазылыб. Узун илләрдир Јеһованын нифрәт етдији бир шејә мејиллә мүбаризә апарырам. Бәзән тәслим олуб мүбаризәни дајандырмаг истәјирәм. Билирәм, Јеһова мәрһәмәтли вә бағышлајан Аллаһдыр, амма бу мејлимә ҝөрә вә гәлбимин дәринлијиндә бу шеји севдијимә ҝөрә дүшүнүрдүм ки, О, мәнә көмәк етмәз. Бу мүбаризә һәјатымы ағырлашдырмышды... “Ҝөзәтчи гүлләси” журналынын 2013-ҹү ил 15 март сајында дәрҹ олунан “Јеһованы таныјан үрәјә саһибсәнми?” адлы мәгаләни охујанда баша дүшдүм ки, әслиндә, Јеһова мәнә көмәк етмәк истәјир».

14. а) Булус апардығы мүбаризә барәдә нә демишди? б) Зәифликләримизлә мүбаризәдә нәјин сајәсиндә галиб ҝәлә биләрик?

¹⁴ Ромалылара 7:21—25 ајәләрини охујун. Булус зәифликләрлә вә пис арзуларла мүбаризә апармағын нә дәрәҹәдә чәтин олдуғуну шәхсән билирди. Анҹаг о әмин иди ки, дуа едиб Аллаһа сығынмагла вә Мәсиһин фидјә гурбанлығына иман етмәклә бу дөјүшдә галиб ҝәлә биләр. Биз дә зәифликләримизлә мүбаризә апарсаг, гәләбә чала биләрик. Бунун үчүн Булусдан нүмунә ҝөтүрүб өзүмүзә јох, Аллаһа ҝүвәнмәлијик вә фидјәјә иман етмәлијик.

15. Јеһова бизә садиг галмаға вә дөзүм ҝөстәрмәјә неҹә көмәк едә биләр?

¹⁵ Һәрдән Јеһова мүәјјән вәзијјәтдә неҹә давранаҹағымызы ҝөрмәк истәјир. Мәсәлән, өзүмүз вә ја аилә үзвләримиздән кимсә ағыр хәстәлијә тутуларса, ја да әдаләтсизликлә үзләшәрсә, неҹә давранаҹағыг? Биз садиг галмаг, севинҹимизи вә руһани таразлығымызы итирмәмәк үчүн Јеһовадан ҝүҹ истәсәк, Она ҝүвәндијимизи ҝөстәрәҹәјик (Филип. 4:13). Һәм Булусун дөврүндә, һәм дә бизим ҝүнләрдә бир чох инсанын һадисәси сүбут едир ки, дуанын сајәсиндә ҝүҹ әлдә едиб мүбаризәни давам етдирә биләрик.

16, 17. Сиз нәјә гәтијјәтлисиниз?

¹⁶ Шејтанын арзусу одур ки, биз мәғлуб олуб әлимизи јана салаг. Амма сиз «јахшы шејдән икиәлли јапышын» (1 Салон. 5:21). Инанын, сиз Шејтана, онун дүнјасына вә ҝүнаһлы арзулара галиб ҝәлә биләрсиниз. Анҹаг буну өз ҝүҹүнүзлә јох, Аллаһын гүдрәтинә архаланмагла едә биләрсиниз (2 Кор. 4:7—9; Гал. 6:9).

¹⁷ Савашын, чарпышын, мүбариз вә гәтијјәтли олун! Әмин олун, Мәлаки 3:10 ајәсиндә јазылдығы кими, Јеһова Аллаһ башыныздан бәрәкәт төкәҹәк.