ҺӘР һәфтә фәрди мүталиә етмәк сизә чәтин, дарыхдырыҹы ҝәлир? Һәрдән бу һамымыза чәтин олур. Амма ҝәлин мүнтәзәм етдијимиз диҝәр шејләр барәдә дә дүшүнәк. Мәсәлән, душ гәбул етмәк. Бу, вахт вә ҝүҹ тәләб етсә дә, нәтиҹәдә тәравәт тапырыг, раһатланырыг. Ејнилә Мүгәддәс Китабы мүталиә едәндә «Аллаһын сөзү илә јујунуб» тәмизләнирик вә руһани ҹәһәтдән тәравәт тапырыг (Ефес. 5:26). Ҝәлин бизә көмәк едәҹәк бәзи мәсләһәтләр нәзәр салаг.

• Ҹәдвәл тәртиб един. Мүгәддәс Китабын мүталиәси даһа ваҹиб шејләрин сырасындадыр (Филип. 1:10). Мәсиһи буна ҹидди јанашмалыдыр. Мүталиә етмәји унутмамаг үчүн тәртиб етдијиниз ҹәдвәли ҝөрүнән јерә, мәсәлән, сојудуҹунун гапысына јапышдыра биләрсиниз. Бундан әлавә, мүталиә вахтынызын јахынлашдығыны сизә хатырлатмасы үчүн електрон ҹиһазынызда зәнҝли саат гурмаг олар.

• Өз вәзијјәтинизи нәзәрә алын. Һансы үсулла мүталиә едәндә диггәтинизи ҹәмләмәк сизә даһа асан олур: бир дәфәјә бир саат вахт ајырмаг, јохса бир нечә дәфәјә аз-аз мүталиә етмәк. Өз вәзијјәтинизи сиз даһа јахшы билирсиниз. Одур ки, ҹәдвәлинизи буна ујғун гурун. Әҝәр һәмин вахта ҝәләндә өзүнүзү һәвәссиз һисс етсәниз, һеч олмаса, ҹәми 10 дәгигә мүталиә едә биләрсиниз? Аз да олса мүталиә етмәк һеч етмәмәкдән даһа јахшыдыр. Мүталиәјә башлајандан сонра, ола билсин, давам етмәјә һәвәсиниз јаранаҹаг (Филип. 2:13).

• Мөвзулары әввәлҹәдән сечин. Әҝәр мүталиә етмәјә отуруб сонра мөвзу сечсәниз, ола билсин, вахтыныздан сәмәрәли истифадә етмәјәҹәксиниз (Ефес. 5:16). Чалышын мүталиә етмәк истәдијиниз мәгаләләрин вә мөвзуларын сијаһысыны тутасыныз. Нә вахт ағлыныза суал ҝәлсә, ону бир јерә гејд един. Һәр дәфә мүталиә едиб гуртарандан сонра арашдырмаг истәдијиниз мөвзуларын сијаһысына башгаларыны да әлавә едә биләрсиниз.

• Дәјишикликләр етмәјә һазыр олун. Ҹәдвәлинизи елә гурун ки, лазым ҝәләндә дәјишиклик едә биләсиниз. Нә вахт, нә гәдәр вә нәји мүталиә етмәјиниздән чох мүталиәни мүнтәзәм етмәјиниз ваҹибдир.

Мүнтәзәм мүталиәнин бизә бөјүк фајдасы вар. Бунун сајәсиндә Јеһоваја јахынлашырыг, һәјатда дүзҝүн гәрарлар вермәји өјрәнирик вә тәравәт тапырыг (Јуш. 1:8).