1. Нәјә ҝөрә јашлы инсанлардан чох шеј өјрәнә биләрик?

 ҺӘЈАТДА ваҹиб гәрарлар вермәк үчүн һәр биримизин нәсиһәтә еһтијаҹы вар вә бу нәсиһәтләрин чохуну ағсаггаллардан, јеткин мәсиһиләрдән ала биләрик. Әҝәр онлар биздән јашҹа чох бөјүкдүрләрсә, онларын көһнә фикирли олдугларыны дүшүнүб вердикләри мәсләһәти гулагардына вурмамалыјыг. Јеһова истәјир ки, биз бөјүкләрдән нәләрсә өјрәнәк. Онлар јашҹа биздән бөјүк олдугларына ҝөрә һәјатда тәҹрүбә, дәрракә, һикмәт газанмаг үчүн даһа чох имканлары олуб (Әјј. 12:12).

2. Бу мәгаләдә нәји арашдыраҹағыг?

² Мүгәддәс Китабын јазылдығы дөврдә Јеһова јаша долмуш мөмин инсанлар васитәсилә халгыны руһландырырды вә онлара јол ҝөстәрирди. Бу мөмин инсанларын сырасында Муса пејғәмбәр, Давуд падшаһ вә һәвари Јәһја да вар иди. Онлар фәргли дөврләрдә, фәргли мүһитләрдә јашамышдылар. Һәјатларынын сонларына јахын бу мөмин кишиләр ҝәнҹләрә мүдрик мәсләһәтләр вермишди. Онларын һамысы Аллаһа итаәт етмәјин дәјәрини вурғуламышды. Јеһова бу мүдрик мәсләһәтләри бизим үчүн горујуб сахлајыб. Ҝәнҹ вә ја јашлы олмағымыздан асылы олмајараг бу мәсләһәтләрә нәзәр јетирмәк һәр биримизә фајда ҝәтирә биләр (Ром. 15:4; 2 Тим. 3:16). Ҝәлин бу үч мөмин кишинин сон нәсиһәтләрини нәзәрдән кечирәк вә ҝөрәк онларын сөзләриндән нә өјрәнә биләрик.

«УЗУН ЗАМАН ЈАШАМАҒЫНЫЗ МӘҺЗ ОНДАН АСЫЛЫДЫР»

3. Муса пејғәмбәр Јеһованын јолунда һансы ишләри ҝөрмүшдү?

³ Муса пејғәмбәр бүтүн өмрүнү Јеһоваја хидмәтә һәср етмишди. О, пејғәмбәр, һаким, башчы вә тарихчи олмушду. Муса пејғәмбәр һәјатда зәнҝин тәҹрүбә газанмышды. О, исраиллиләри Мисир әсарәтиндән чыхармышды. Јеһованын бир чох  мөҹүзәсинә шәхсән шаһид олмушду. Јеһова Мусаја Мүгәддәс Китабын илк 5 бөлмәсини, 90-ҹы мәзмуру вә еһтимал ки, 91-ҹи мәзмуру јаздырмышды. Ҝөрүнүр, «Әјјуб» китабыны да Муса пејғәмбәр јазмышды.

4. Муса пејғәмбәр кимләри руһландырмышды вә нәјә ҝөрә?

⁴ Муса пејғәмбәр өлүмүндән әввәл, 120 јашында оланда бүтүн Исраил халгыны топлајыб, онлара өз ҝөзләри илә ҝөрдүјү шејләри хатырладыр. Пејғәмбәри динләјәнләрдән бәзиләри ҝәнҹ јашларында Јеһованын ҝөстәрдији бир чох әламәтин, мөҹүзәнин, о ҹүмләдән Мисирә гаршы чыхардығы һөкмләрин шаһиди олмушду (Чых. 7:3, 4). Исраиллиләр ики јерә ајрылмыш Гырмызы дәнизин арасы илә кечмишдиләр вә фиронун ордусунун мәһвини ҝөзләри илә ҝөрмүшдүләр (Чых. 14:29—31). Сәһрада оларкән Јеһованын гајғысыны, мүдафиәсини дујмушдулар (Ган. 8:3, 4). Инди исә бу халг Вәд едилмиш дијара дахил олмаг үзрә иди. Муса пејғәмбәр өлүмүндән әввәл сон имкандан истифадә едиб онлары руһландырды a.

5. Ганунун тәкрары 30:19, 20 ајәләриндә Муса пејғәмбәрин халга сон сөзү нә олмушду?

⁵ Муса пејғәмбәр нә демишди? (Ганунун тәкрары 30:19, 20 ајәләрини охујун.) Исраил халгыны ҝөзәл ҝәләҹәк ҝөзләјирди. Онлар Јеһованын вәд етдији дијарда узун өмүр сүрә биләрдиләр. О әразијә сөз ола билмәзди! Ора чох ҝөзәл, барлы-бәһәрли дијар иди. Муса һәмин дијары тәсвир едәрәк демишди: «Јеһова... өзүнүзүн инша етмәдијиниз бөјүк, ҝөзәл шәһәрләри, зәһмәтини чәкмәдијиниз һәр ҹүр наз-немәтлә долу евләри, газмадығыныз һовузлары, салмадығыныз үзүмлүкләри, зејтунлуглары» сизә бәхш едәҹәк (Ган. 6:10, 11).

6. Нәјә ҝөрә Аллаһ диҝәр халгларын Исраили ишғал етмәсинә изин верди?

⁶ Һәмчинин Муса исраиллиләрә хәбәрдарлыг да вермишди. Демишди ки, бу ҝөзәл дијарда һәмишә јашамаг истәјирләрсә, онда Аллаһын ганунларына итаәт етмәлидирләр. Онлары һәјаты сечмәјә тәшвиг етмишди. Буну Јеһоваја гулаг асмагла, Она бағлы галмагла едә биләрдиләр. Амма исраиллиләр Јеһованын итаәтиндән чыхдылар. Нәтиҹәдә, Јеһова ашшурлулара, сонралар исә бабиллиләрә онлары ишғал едиб әсир апармаға изин верди (2 Пад. 17:6—8, 13, 14; 2 Салн. 36:15—17, 20).

7. Муса пејғәмбәрин нәсиһәтиндән нә өјрәнирик? (Һәмчинин шәклә бахын.)

⁷ Нә өјрәнирик? Итаәткарлыг һәјат газандырыр. Вәд едилмиш дијарын астанасында олан исраиллиләр кими биз дә Јеһованын вәд етдији јени дүнјанын астанасындајыг. Чох тезликлә бүтүн дүнја ҹәннәтә чевриләҹәк (Әшј. 35:1; Лука 23:43). Орада нә Иблис, нә дә онун ҹинләри олаҹаг (Вәһј 20:2, 3). Инсанлары Јеһовадан узаглашдыран јалан динләр дә олмајаҹаг (Вәһј 17:16). Табелијиндә олан инсанлара зүлм верән инсан һөкумәтләринин изи-тозу галмајаҹаг (Вәһј 19:19, 20). Јеһова Ҹәннәтдә һеч бир инсанын үсјан етмәсинә изин вермәјәҹәк (Зәб. 37:10, 11). Дүнјанын һәр ҝушәсиндә јашајан инсанлар Јеһованын адил ганунларына итаәт едәҹәк. Буна ҝөрә дә һәр јердә сүлһ вә бирлик олаҹаг. Һәр кәс бир-бирини севәҹәк, бир-биринә етибар едәҹәк (Әшј. 11:9). О ҝүнүн јетишмәсини бөјүк һәсрәтлә ҝөзләјирик. Јеһованын итаәтиндә галсаг, биз ҹәннәтдә нәинки јүзилликләр, әбәдијјән јашајаҹағыг (Зәб. 37:29; Јәһ. 3:16).

8. Әбәди һәјат вәди хүсуси тәјинатлы мүждәчи олан бир гардаша неҹә көмәк етмишди? (Јәһуда 20, 21).

 ⁸ Әҝәр Јеһованын әбәди һәјатла бағлы вәдини ағлымызда мөһкәм сахласаг, һансы сынагла үзләшириксә үзләшәк, Јеһоваја бағлы гала биләҹәјик. (Јәһуда 20, 21 ајәләрини охујун.) Һәмчинин бу вәд бизә зәифликләримизлә мүбаризә апармаға ҝүҹ верә биләр. Африкада узун мүддәт хүсуси тәјинатлы мүждәчи кими хидмәт едән бир гардашын ҹисмани зәифлији вар иди. О дејир: «Әбәди јашамаг имканымын тәһлүкә алтында олдуғуну баша дүшәндә өз зәифлијимлә мүбаризә апармаға даһа әзмли олдум вә Јеһоваја бу барәдә һәрарәтлә дуа еләдим. Бундан сонра Она тәмиз виҹданла гуллуг едә билдим».

«УҒУР ГАЗАНАРСАН»

9. Давудун һәјатда һансы чәтинликләри олмушду?

⁹ Давуд бөјүк падшаһ иди. О һәм дә мусигичи, шаир, дөјүшчү вә пејғәмбәр иди. Онун чохлу чәтинликләри олмушду. Давуд она пахыллыг едән Талут падшаһын уҹбатындан бир нечә ил гачаг һәјаты јашамышды. Падшаһ оландан сонра исә оғлу Абсалам һакимијјәти әлә кечирмәк истәдији үчүн о, јенә гачмалы олмушду. Чәтинликләринә вә зәифликләринә бахмајараг, Давуд һәјатынын сонуна гәдәр Јеһоваја садиг галмышды. Јеһова онун һаггында белә демишди: «О, Мәним үрәјимҹәдир». Буна ҝөрә Давудун нәсиһәтинә гулаг асмаға дәјәр! (Һәв. 13:22; 1 Пад. 15:5).

10. Давуд нәјә ҝөрә оғлу вә вариси Сүлејмана нәсиһәт вермишди?

¹⁰ Мәсәлән, ҝәлин Давудун оғлу вә хәләфи Сүлејмана вердији мәсләһәтә нәзәр салаг. Јеһова сечдији бу ҝәнҹ оғлана тапшырмышды ки, халгын ибадәт едә билмәси үчүн мәбәд тиксин (1 Салн. 22:5). Сүлејманы гаршыда чәтинликләр ҝөзләјирди. Бәс Давуд она һансы өјүд-нәсиһәти верди? Ҝәлин бахаг.

11. 1 Падшаһлар 2:2, 3 ајәләринә әсасән Давуд Сүлејмана һансы нәсиһәти верди вә бунун дүзҝүн нәсиһәт олдуғуну нә ҝөстәрди? (Һәмчинин шәклә бахын.)

¹¹ Давуд падшаһ нә демишди? (1 Падшаһлар 2:2, 3 ајәләрини охујун.) О, оғлуна сөјләмишди ки, әҝәр Јеһоваја итаәт етсә, ишләри аванд олаҹаг. Белә дә олду, Сүлејман узун илләр һәјатда бөјүк уғурлар газанды (1 Салн. 29:23—25). О, әзәмәтли мәбәд тикди. Һәмчинин Сүлејман Мүгәддәс Китабын бәзи бөлмәләрини јазыб, бәзиләринә исә онун сөзләри дахил едилиб. Онун һикмәти вә вар-дөвләти дилләр әзбәри олду (1 Пад. 4:34). Анҹаг Давудун дедији кими, Сүлејман јалныз Јеһоваја итаәт етдији тәгдирдә уғур газанаҹагды. Тәәссүфләр олсун ки, гоҹа вахтларында Сүлејман башга аллаһлара ибадәт етмәјә башлады. О, Јеһованын рәғбәтини итирди. Сүлејман өлкәни салеһликлә,  әдаләтлә идарә едә билмәк үчүн Јеһованын вердији һикмәтдән мәһрум олду (1 Пад. 11:9, 10; 12:4).

12. Давуд падшаһын нәсиһәтиндән нә өјрәнирик?

¹² Нә өјрәнирик? Итаәткарлыг уғур газандырыр (Зәб. 1:1—3). Дүздүр, Јеһова Сүлејмана вердији вар-дөвләти, шан-шөһрәти бизә дә верәҹәјинә сөз вермәјиб. Лакин Аллаһа итаәт етсәк, О, дүзҝүн гәрарлар гәбул етмәјимиз үчүн бизә һикмәт верәҹәк (Мәс. 2:6, 7; Јаг. 1:5). Јеһованын вердији принсипләр бизә иш, тәһсил, әјләнҹә вә пул мәсәләсиндә бәләдчилик едә биләр. Ондан ҝәлән өјүд-нәсиһәтә гулаг ассаг, бир чох бәладан һифз олунаҹағыг (Мәс. 2:10, 11). Һәмчинин мөһкәм достлуглар гураҹағыг вә аиләмиз хошбәхт олаҹаг.

13. Кармен уғура апаран јолу неҹә тапды?

¹³ Мозамбикдә јашајан Кармен баҹы али тәһсили уғурун ачары һесаб едирди. О, университетә дахил олуб мемарлыг үзрә тәһсил алыр. Баҹы бөлүшүр: «Орада өјрәндикләрим хошума ҝәлирди. Амма бу бүтүн вахтымы вә ҝүҹүмү алырды. Саат 07:30-дан 18:00-а гәдәр дәрсдә олурдум. Јығынҹаглара ҝетмәк чәтин олурду вә руһани ҹәһәтдән ҝет-ҝедә зәифләјирдим. Үрәјимин дәринлијиндә баша дүшүрдүм ки, ики ағаја гуллуг едирәм» (Мәт. 6:24). Кармен өз вәзијјәти илә бағлы дуа етди, нәшрләримиздән ахтарыш апарды. Баҹы сөзүнә давам едир: «Һәм јеткин гардашларын, һәм дә анамын вердији мәсләһәтләр сајәсиндә гәрара ҝәлдим ки, университетдән чыхыб Јеһоваја тамвахтлы хидмәт едим. Бу мәнә һәјатда ән дүзҝүн гәрарлар вермәјә көмәк етди вә мән пешман дејиләм».

14. Мусанын вә Давудун вердији нәсиһәтин мәғзи нә иди?

¹⁴ Һәм Муса пејғәмбәр, һәм дә Давуд падшаһ Јеһованы севирди вә Она итаәт етмәјин ваҹиблијини баша дүшүрдү. Һәјатларынын сонуна јахын һәр икиси инсанлары тәшвиг етмишди ки, онлардан нүмунә ҝөтүрүб Јеһоваја садиг галсынлар. Бу мөмин инсанларын икиси дә ваҹиб хәбәрдарлыг вермишди: Аллаһдан узаглашан инсан һәм Онун разылығыны, һәм дә Ондан ҝәлән немәтләри итирәҹәк. Муса пејғәмбәрлә Давуд падшаһын мәсләһәти бу ҝүн бизим үчүн дә дәјәрлидир. Әсрләр сонра Јеһованын диҝәр  бир хидмәтчиси дә Аллаһа садиг галмағын ваҹиблијини вурғуламышды.

БУНДАН «БӨЈҮК ХОШБӘХТЛИК ОЛА БИЛМӘЗ»

15. Һәвари Јәһја нәләрин шаһиди олмушду?

¹⁵ Јәһја Иса Мәсиһин севимли һәвариси иди (Мәт. 10:2; Јәһ. 19:26). О, Исанын хидмәти боју онунла әмәкдашлыг етмишди, ҝөстәрдији мөҹүзәләри ҝөзләри илә ҝөрмүшдү вә чәтин анларда Исаја садиг галмышды. Јәһја Исанын едамына вә дирилмәсинә дә шаһид олмушду. Она биринҹи әсрдә мәсиһи јығынҹағынын бөјүдүјүнү, һәмчинин мүждәнин «сәма алтында јашајанларын һамысына» тәблиғ едилдијини ҝөрмәк нәсиб олмушду (Кол. 1:23).

16. Јәһјанын мәктубларындан кимләр фајдаланыб?

¹⁶ Узун өмүр сүрмүш Јәһја һәјатынын сонларына јахын Аллаһын Кәламынын мүәјјән бөлмәләрини јазмышды. Мәсәлән, о, «Иса Мәсиһдән ҝәлән» мөһтәшәм «вәһји» гәләмә алмышды (Вәһј 1:1). Һәмчинин Аллаһын илһамы илә өз адыны дашыјан Мүждә вә үч мәктуб јазмышды. О, үчүнҹү мәктубуну руһани өвлады кими ҝөрдүјү Гај адлы садиг мәсиһијә үнванламышды (3 Јәһ. 1). Һәмин вахтларда Јәһјанын руһани өвлады кими јанашдығы чохлу башга мәсиһиләр дә вар иди. Бу садиг, јашлы инсанын јаздыглары Исанын бүтүн давамчыларыны та бу ҝүнәдәк руһландырыр.

17. 3 Јәһја 4 ајәсинә әсасән инсана нә бөјүк хошбәхтлик ҝәтирир?

¹⁷ Һәвари Јәһја нә демишди? (3 Јәһја 4 ајәсини охујун.) Јәһја баҹы-гардашларын итаәткарлығынын она хошбәхтлик ҝәтирдијини јазмышды. О, үчүнҹү мәктубуну јазан вахт јығынҹагда бәзиләри јалан тәлимләр јајыр вә парчаланма јарадырдылар. Бунунла белә, «һәгигәт јолунда» јеримәкдән ваз кечмәјәнләр дә вар иди. Онлар Јеһоваја итаәт едир вә «Онун әмрләринә ујғун» јашајырдылар (2 Јәһ. 4, 6). Бу садиг мәсиһиләр һәм Јәһјанын, һәм дә Јеһованын үрәјини севиндирирди (Мәс. 27:11).

18. Јәһјанын сөзләриндән нә өјрәнирик?

¹⁸ Нә өјрәнирик? Садиглик хошбәхтлик ҝәтирир (1 Јәһ. 5:3). Мәсәлән, Јеһованын гәлбини севиндирдијимизи билмәк бизә севинҹ ҝәтирир. Јеһова ҝөрәндә ки, биз тамаһа үстүн ҝәлиб Онун әмрләринә бағлы галырыг, чох севинир (Мәс. 23:15). Ҝөјдәки мәләкләр дә буна севинир (Лука 15:10). Биз өзүмүз дә диндашларымызын сынаглара рәғмән садиг галдығыны, нәфсә үстүн ҝәлдикләрини  ҝөрәндә севинирик (2 Салон. 1:4). Шејтан дүнјасы мәһв оланда да Јеһоваја садиг галдығымыза ҝөрә бөјүк хошбәхтлик дујаҹағыг.

19. Рејчел баҹы башгаларына һәгигәти өјрәтмәк барәдә нә демишди? (Һәмчинин шәклә бахын.)

¹⁹ Һәгигәти башгалары илә бөлүшәндә хүсусилә севинҹ дујуруг. Доминикан Республикасында јашајан Рејчел баҹы дејир ки, ибадәт етдијимиз ҝөзәл Аллаһ барәдә инсанлара өјрәтмәк сөзлә ифадә олунмајаҹаг гәдәр бөјүк шәрәфдир. Баҹы өз руһани өвладлары барәдә белә дејир: «Шаҝирдләримин Јеһоваја мәһәббәтләринин ҝүнү-ҝүндән артдығыны, Она етибар етмәјә башладыгларыны вә Јеһованы разы салмаг үчүн һәјатларында дәјишиклик етдикләрини ҝөрәндә севинҹим јерә-ҝөјә сығмыр. Дујдуғум севинҹин јанында онлары өјрәтмәк үчүн чәкдијим зәһмәт вә вердијим гурбанлар нәдир ки?!»

САДИГ ИНСАНЛАРЫН СОН СӨЗЛӘРИНДӘН НӘТИҸӘ ЧЫХАРЫН

20. Муса пејғәмбәр, Давуд падшаһ вә һәвари Јәһја илә һансы ортаг ҹәһәтләримиз вар?

²⁰ Муса пејғәмбәрин, Давуд падшаһын вә һәвари Јәһјанын јашадығы дөвр бизим дөврүмүздән тамамилә фәргләнир. Амма онларла ортаг ҹәһәтләримиз чохдур. Онлар вар олан Аллаһа ибадәт едирди, биз дә едирик. Онлар кими биз дә Јеһоваја дуа едирик, Она ҝүвәнирик вә јол ҝөстәрмәси үчүн Она үз тутуруг. Бу мөмин инсанлар кими биз дә әминик ки, Јеһова Она итаәт едәнләрә бол-бол немәтләр бәхш едир.

21. Мусанын, Давудун вә Јәһјанын аһыл јашда вердикләри мәсләһәтләрә әмәл етсәк, һансы немәтләри алаҹағыг?

²¹ Ҝәлин бу мөмин јашлы кишиләрин сон сөзләринә гулаг асыб Јеһованын әмрләринә итаәт едәк. Онда һәр ишимиздә уғур газанаҹағыг. Һәмчинин «узун заман», јәни әбәдијјән јашајаҹағыг (Ган. 30:20). Еләҹә дә бизи севән сәмави Атамызы разы салдығымыз үчүн хошбәхтлик дујаҹағыг. Аллаһымыз башымыздан ҝөзләдијимиздән, һәтта тәсәввүр етдијимиздән дә артыг немәтләр төкәҹәк (Ефес. 3:20).