1, 2. Кимләр тәрәфиндән һагсызлыгла үзләшә биләрик? Изаһ един.

 ИСА МӘСИҺ дул гадын һагда бир мәсәл данышмышды. Бу гадын дәфәләрлә һакимин јанына ҝедиб онун үчүн әдаләти бәргәрар етмәсини истәјирди. Исанын шаҝирдләри үчүн бу гадынын вәзијјәтини баша дүшмәк чәтин дејилди. Чүнки о дөврдә садә халг тез-тез һагсызлығын гурбаны олурду (Лука 18:1—5). Бизим дә һагсызлыгла үзләшдијимиз анлар олур. Буна ҝөрә дә бу гадынын һиссләри бизә дә танышдыр.

² Јашадығымыз дүнјада гәрәз, бәрабәрсизлик, зүлмкарлыг ади һал алыб. Буна ҝөрә дә кимсә бизимлә әдаләтсиз даврананда тәәҹҹүбләнмирик (Ваиз 5:8). Амма диндашларымыз тәрәфиндән бу ҹүр рәфтар ҝөрәндә бу бизә чох пис тәсир едир. Сөзсүз, һәгигәтә гаршы чыхан инсанлардан фәргли олараг, баҹы-гардашлар бизимлә биләрәкдән әдаләтсиз давранмырлар. Онлар садәҹә гејри-камилдирләр. Әлејһдарларынын һагсызлығына Исанын неҹә јанашмасындан чох шеј өјрәнә биләрик. Әҝәр бизә һагсызлыг едән әлејһдарларымыза сәбирлә даврана билириксә, мәҝәр диндашларымыза гаршы даһа сәбирли олмалы дејилик? Биз истәр јығынҹагда, истәрсә дә јығынҹагдан кәнарда һагсызлыгла үзләшәндә Јеһова буна неҹә јанашыр? Башымыза ҝәләнләрә нәзәр јетирир?

3. Әдаләтсизликлә үзләшмәјимиз Јеһованы нараһат едир? Нәјә ҝөрә белә демәк олар?

³ Инсанларын бизимлә рәфтары Јеһова үчүн ваҹиб мәсәләдир. О, «әдаләти севир» (Зәб. 37:28). Иса бизи әмин едир ки,  Јеһова «тез бир заманда... әдаләти бәрпа едәҹәк» (Лука 18:7, 8). Үстәлик, Аллаһ тезликлә бүтүн әзабларымыза сон гојаҹаг вә даһа һеч вахт әдаләтсизликлә үзләшмәјәҹәјик (Зәб. 72:1, 2).

4. Јеһова бу ҝүн бизә неҹә көмәк едир?

⁴ Салеһлијин һөкм сүрәҹәји ҝүнү ҝөзләдијимиз мүддәтдә Јеһова бизә һагсызлыға таб ҝәтирмәјә көмәк едир (2 Бут. 3:13). Мәсәлән, О бизә әдаләтсизлијә мәруз галанда башымыза проблем ачмамаг үчүн нә етмәли олдуғумузу өјрәдир. Оғлунун мүкәммәл нүмунәси васитәсилә пис рәфтара таб ҝәтирмәјин јолуну ҝөстәрир. Һәмчинин белә анларда көмәјимизә чатаҹаг фајдалы мәсләһәтләр верир.

ҺАГСЫЗЛЫГЛА ҮЗЛӘШӘНДӘ ДАВРАНЫШЫНЫЗА ДИГГӘТ ЈЕТИРИН

5. Һагсызлыгла үзләшәндә давранышымыза нәјә ҝөрә диггәт јетирмәлијик?

⁵ Һагсызлыгла үзләшәндә инсан мәјус олур, гәлб раһатлығыны итирир (Ваиз 7:7). Јеһованын Әјјуб вә Һәбгуг кими садиг хидмәтчиләри дә бу ҹүр һиссләр јашамышдылар (Әјј. 6:2, 3; Һәб. 1:1—3). Белә һиссләр кечирмәк тәбиидир. Амма һагсызлыгла үзләшәндә давранышымыза фикир вермәлијик, һиссләрә гапылыб ағылсызлыг етмәмәлијик.

6. Абсаламын һәрәкәтиндән һансы ибрәти ҝөтүрүрүк? (Һәмчинин шәклә бахын.)

⁶ Һагсызлыгла үзләшәндә бәзән јанлыш олараг мәсәләни өзүмүз һәлл етмәјә чалышырыг. Амма белә едәндә гаш дүзәлдән јердә ҝөз чыхара биләрик. Давудун оғлу Абсаламы јадымыза салаг. Онун атабир гардашы Әмнун баҹысы Тамары зорламышды вә Абсалам буна бәрк гәзәбләнмишди. Мусанын ганунуна әсасән Әмнун бу әмәлинә ҝөрә өлүмә лајиг иди (Лав. 20:17). Дүздүр, Абсаламын гәзәбләнмәси баша дүшүләндир, амма мәсәләни өзүнүн һәлл етмәсинә ихтијары јох иди (2 Ишм. 13:20—23, 28, 29).

7. Һагсызлыгла үзләшмәси мәзмурчуја әввәл-әввәл неҹә тәсир етмишди?

⁷ Һагсызлыг төрәдәнләрин ҹәзасыз галдығыны ҝөрәндә биздә белә бир фикир јарана биләр: «Дүзҝүн давранмағымын нә хејри вар?» Бир мәзмурчу мүшаһидә етмишди ки, шәр әмәл саһибләри салеһләрә зүлм верир, өзләри исә шад-хүррәм јашајырлар. О демишди: «Пис адамлар беләдир, һәр  ишләри аванд олур» (Зәб. 73:12). Мәзмурчу ҝөрдүјү һагсызлыглара ҝөрә о гәдәр фикир чәкирди ки, һәтта Јеһоваја ибадәт етмәјин бир хејри олдуғуна аз гала инамыны итирмишди. О демишди: «Буну дәрк етмәјә чалышанда бәрк нараһат олдум» (Зәб. 73:14, 16). О һәтта белә бир шеји етираф етмишди: «Фәгәт мәним ајагларым аз гала сапмышды, ајагларым аз галмышды сүрүшсүн» (Зәб. 73:2). Буна бәнзәр бир шеј Алберто a гардашла да баш вермишди.

8. Үзләшдији һагсызлыг бир гардаша неҹә тәсир етмишди?

⁸ Бәзи гардашлар јанлыш олараг Албертону јығынҹағын һесабындан пул оғурламагда иттиһам етмишдиләр. Нәтиҹәдә, Алберто мәсулијјәтләрини, үстәлик, јығынҹагда бу мәсәлә барәдә ешидәнләрин јанында һөрмәтини итирди. О дејир: «Гәзәбли, аҹыглы, һирсли идим». Кечирдији изтираб онун Јеһова илә мүнасибәтләрини дә зәифләтди. О һәтта беш ил гејри-фәал олду. Бу һадисә ҝөстәрир ки, һагсызлыгла үзләшәндә гәзәбли галмаг нәләрә ҝәтириб чыхара биләр.

ҺАГСЫЗЛЫГЛА ҮЗЛӘШӘНДӘ ИСАДАН НҮМУНӘ ҜӨТҮРҮН

9. Иса һансы һагсызлыгларла үзләшмишди? (Һәмчинин шәклә бахын.)

⁹ Һагсызлыға дөзмәкдә Иса Мәсиһ бизә  камил нүмунә гојуб. Һәм аиләси, һәм дә кәнардакылар онунла һагсыз рәфтар едирди. Иманына шәрик олмајан доғмалары Исаны дәли адландырды, дин хадимләри ону ҹинләрлә әлбир олмагда иттиһам етди, Рома әсҝәрләри ону әлә салды, ишҝәнҹә верди вә ахырда өлдүрдү (Марк 3:21, 22; 14: 55; 15:16—20, 35—37). Амма о бүтүн бу һагсызлыглара дөздү, һеч вахт әвәз чыхмады. Онун нүмунәсини неҹә изләјә биләрик?

10. Иса Мәсиһ һагсызлыглара неҹә таб ҝәтирирди? (1 Бутрус 2:21—23).

¹⁰ 1 Бутрус 2:21—23 ајәләрини охујун b. Исанын гојдуғу камил нүмунә һагсызлыгла гаршылашанда дүзҝүн давранмағымыза көмәк едә биләр. Иса сусмағын да, данышмағын да вахтыны билирди (Мәт. 26:62—64). Барәсиндә дејилән һәр сахта иттиһама ҹаваб вермирди (Мәт. 11:19). Ҹаваб вермәк лазым ҝәләндә исә онун әлејһинә чыханлары һеч вахт тәһгир етмирди вә ја һәдәләмирди. О, тәмкинини горујурду, чүнки «өзүнү адил Һакимә тапшырырды». Иса әмин иди ки, Јеһова һәр шеји ҝөрүр вә мәсләһәт билдији вахтда бүтүн һагсызлыглара сон гојаҹаг.

11. Данышығымызы нәзарәтдә сахламағын һансы јоллары вар? (Һәмчинин шәкилләрә бахын.)

¹¹ Кимсә бизимлә пис рәфтар едәндә Иса Мәсиһдән нүмунә ҝөтүрәрәк нә дедијимизә фикир вермәлијик. Бәзән мәсәлә елә хырда олур ки, она садәҹә ҝөз јуммаг олар. Бәзән исә ән јахшысы, сусмагдыр, чүнки данышсаг, вәзијјәти даһа да ағырлашдыра биләрик (Ваиз 3:7; Јаг. 1:19,  20). Елә дә олур ки, киминсә һагсызлыгла үзләшдијини ҝөрәндә, јахуд иманымызы мүдафиә етмәли оланда данышмаг лазым ҝәлир (Һәв. 6:1, 2). Бу заман сөзүмүзү мүмкүн гәдәр сакит вә һөрмәтҹил тәрздә демәлијик (1 Бут. 3:15) c.

12. Өзүмүзү «адил Һакимә» неҹә тапшыра биләрик?

¹² Бундан әлавә, Исадан нүмунә ҝөтүрәрәк өзүмүзү «адил Һакимә» тапшырмалыјыг. Кимсә бизи нәдәсә иттиһам едәндә, јахуд бизимлә пис даврананда әминик ки, Аллаһ һәр шеји ҝөрүр вә әввәл-ахыр һәр шеји јолуна гојаҹаг. Бу әминлик һагсыз рәфтара дөзмәјә көмәк едир. Мәсәләни Јеһованын өһдәсинә бурахдығымыз үчүн үрәјимиздә кинә, гәзәбә дә јер галмыр. Әкс һалда, мәсәләјә кәскин реаксија верәрик, севинҹимизи итирәрик вә Јеһова илә мүнасибәтләримизә хәләл ҝәләр (Зәб. 37:8).

13. Һагсызлыға сәбирлә таб ҝәтирмәјә бизә нә көмәк едә биләр?

¹³ Нә гәдәр ки гејри-камилик, Исанын нүмунәсини мүкәммәл шәкилдә изләмәјимиз мүмкүн дејил. Һәрдән сөздә вә әмәлдә сәһвләрә јол веририк, сонра да бунун пешманчылығыны чәкирик (Јаг. 3:2). Бундан әлавә, бәзи һагсызлыглар бизә емосионал вә ја физики ҹәһәтдән елә јара вурур ки, бүтүн өмрүмүз боју бунун әзијјәтини чәкмәли олуруг. Әҝәр сиз дә бу ҹүр вәзијјәтлә үзләшмисинизсә, әмин олун ки, Јеһова нәләр јашадығынызы ҝөрүр. Иса да сизин һиссләринизи баша дүшүр, чүнки һагсызлыға мәруз галмағын нә демәк олдуғуну јахшы билир (Ибр. 4:15, 16). Јеһова Исанын камил нүмунәси илә јанашы, бизә һагсызлыға гатлашмаға көмәк едән фајдалы мәсләһәтләр дә вериб. Ҝәлин «Ромалылара» китабындан бизә көмәји дәјәҹәк ики ајәјә нәзәр јетирәк.

«АЛЛАҺЫН ГӘЗӘБИНӘ ЈЕР ВЕРИН»

14. «Аллаһын гәзәбинә јер верин» дејиләндә нә нәзәрдә тутулур? (Ромалылара 12:19).

¹⁴ Ромалылара 12:19 ајәсини охујун. Һәвари Булус мәсиһиләри «Аллаһын гәзәбинә јер вер»мәјә сәсләмишди. Буну неҹә едә биләрик? Јеһованын мәсәләни мәсләһәт билдији вахтда вә тәрздә һәлл етмәсини ҝөзләмәклә. Һагсыз рәфтара мәруз галмыш Ҹон адлы бир гардаш дејир: «Мәсәләни өз билдијим кими һәлл етмәмәк үчүн өзүмү ҝүҹлә сахлајырдым. Ромалылара 12:19 ајәси Јеһованы сәбирлә ҝөзләмәјимә көмәк етди».

15. Мәсәләни Јеһованын өһдәсинә бурахмаг нәјә ҝөрә ән јахшы һәлл јолудур?

¹⁵ Мәсәләни Јеһованын һәлл етмәсини ҝөзләмәк бизим хејримизәдир. Белә етсәк, проблеми өзүмүз һәлл етмәјә чалышаркән јаранан стрес вә мәјуслугдан азад олаҹағыг. Јеһова бизә көмәк әли узадыр. О, бир нөв бизә белә дејир: «Бу иши Мәним өһдәмә бурах, Мән Өзүм бунунла мәшғул олаҹағам». Әҝәр биз Јеһованын «әвәзини Өзүм верәҹәјәм» вәдинә етибар едириксә, онда мәсәләнин үстүндән кечә биләҹәјик. Чүнки Јеһованын бу мәсәләни ән јахшы тәрздә һәлл едәҹәјинә әминик. Бајаг ады чәкилән Ҹон гардаша да мәһз бу көмәк етмишди. О дејир: «Әҝәр Јеһованы ҝөзләсәм, О, проблемими мәндән гат-гат јахшы һәлл едәҹәк».

«ПИСЛИЈӘ ЈАХШЫЛЫГЛА ГАЛИБ ҜӘЛ»

16, 17. Дуа «пислијә јахшылыгла» галиб ҝәлмәјә неҹә көмәк едир? (Ромалылара 12:21).

¹⁶ Ромалылара 12:21 ајәсини охујун. Булус мәсиһиләри һәм дә пислијә јахшылыгла  галиб ҝәлмәјә сәсләјирди. Иса да Дағүстү вәзиндә демишди: «Дүшмәнләринизи һәмишә севин вә сизи тәгиб едәнләр үчүн һәмишә дуа един» (Мәт. 5:44). О, мәһз белә давранырды. Јәгин, Исанын Рома әсҝәрләри тәрәфиндән дирәјә мыхланаркән чәкдији әзаб барәдә дүшүнмүсүнүз. Амма онун һәмин вахт нә гәдәр ағры чәкдијини, һәмчинин неҹә алчалдыҹы рәфтара, һагсызлыға дөздүјүнү һеч биримиз ахыра гәдәр дәрк едә билмәрик.

¹⁷ Иса һагсызлыға јенилмәди. О, әсҝәрләри ләнәтләмәди, әксинә, онлар үчүн дуа едиб деди: «Ата, онлары бағышла, чүнки нә етдикләрини билмирләр» (Лука 23:34). Бизимлә пис даврананлар үчүн дуа едәндә бу, һирсимизи, гәзәбимизи сојуда вә һәтта онлара мүнасибәтимизи дәјишә биләр.

18. Дуа Албертоја вә Ҹона үзләшдикләри һагсызлыға таб ҝәтирмәјә неҹә көмәк етди?

¹⁸ Мәгаләдә ады чәкилән ики гардаш дуанын сајәсиндә һагсызлыға таб ҝәтирә билдиләр. Алберто дејир: «Мәнә гаршы һагсызлыг едән гардашлар үчүн дуа етдим. Дәфәләрлә Јеһовадан хаһиш етдим ки, мәнә едилән һагсызлыға ҝөрә гәзәбли галмамағыма көмәк етсин». Нә хош ки, Алберто гардаш јенидән Јеһоваја сәдагәтлә хидмәт едир. Ҹон дејир: «Мәни инҹидән гардаша ҝөрә дәфәләрлә дуа етмишәм. Бунун сајәсиндә она мүһакимә етмәдән објектив јанаша билдим. Бу дуалар мәнә гәлб раһатлығы да тапмаға көмәк етди».

19. Бу дүнјанын сону ҝәләнәдәк нә етмәлијик? (1 Бутрус 3:8, 9).

¹⁹ Һәлә билмирик, бу дүнјанын сону ҝәләнә гәдәр һансы һагсызлыгларла үзләшәҹәјик. Башымыза нә ҝәлирсә ҝәлсин, ҝәлин дуа едиб Јеһовадан көмәк истәмәјә һеч вахт сон гојмајаг. Һәмчинин пис рәфтарла үзләшәндә Иса кими давранаг вә Мүгәддәс Китаб принсипләринә әмәл етмәјә давам едәк. Әҝәр белә етсәк, Јеһовадан немәтләр алаҹағымыза әмин ола биләрик. (1 Бутрус 3:8, 9 ајәләрини охујун.)