1. Һәвари Булус јығынҹаг хидмәтчиләринә неҹә јанашырды?

 ЈЫҒЫНҸАГ хидмәтчиләри јығынҹагда чох ваҹиб ишләри ҝөрүрләр. Һәвари Булус бу садиг гардашларын ҝөрдүјү ишләри чох гијмәтләндирирди. Мәсәлән, Филиппи јығынҹағына јаздығы мәктубда о, ағсаггалларла јанашы јығынҹаг хидмәтчиләрини дә хүсуси саламламышды (Филип. 1:1).

2. Јығынҹаг хидмәтчиси олан Луис гардаш өз хидмәти барәдә нә дејир?

² Ҝәнҹ вә ја јашлы олмасындан асылы олмајараг, вәфтиз олунмуш гардашлар јығынҹаг хидмәтчиси кими хидмәт етмәкдән севинҹ дујурлар. Мәсәлән, Деван гардаш јығынҹаг хидмәтчиси тәјин олунанда 18 јашы вар иди. Луис гардаш исә 50 јашларында иди. Луис гардаш дејир: «Јығынҹагдакы баҹы-гардашларыма хидмәт етмәкдән бөјүк севинҹ дујурам. Онлар һәмишә мәнә мәһәббәтлә јанашыблар. Инди мән дә хидмәтимлә онлара мәһәббәтими ҝөстәрә биләрәм». Онун бу сөзләри бир чохларынын һиссләрини әкс етдирир.

3. Бу мәгаләдә һансы суаллары мүзакирә едәҹәјик?

³ Әҝәр сиз дә вәфтиз олунмуш гардашсынызса, јығынҹаг хидмәтчиси олмағы гаршыныза мәгсәд гоја биләрсиниз? Сизи буна нә тәшвиг етмәлидир? Мүгәддәс Китабдакы һансы тәләбләрә ҹаваб вермәлисиниз? Мәгаләдә бу суаллары мүзакирә едәҹәјик. Амма илк өнҹә, ҝәлин ҝөрәк јығынҹаг хидмәтчисинин мәсулијјәтинә нәләр дахилдир.

ЈЫҒЫНҸАГ ХИДМӘТЧИСИНИН МӘСУЛИЈЈӘТЛӘРИНӘ НӘЛӘР ДАХИЛДИР?

4. Јығынҹаг хидмәтчиләринин һансы мәсулијјәтләри вар? (Һәмчинин шәклә бахын.)

⁴ Јығынҹаг хидмәтчиләри ағсаггаллара јығынҹагда ҝөрүлән  бир чох ишләрдә көмәк етмәк үчүн мүгәддәс руһ васитәси илә тәјин олунмуш гардашлардыр. Бәзи јығынҹаг хидмәтчиләри тәблиғчиләр үчүн кифајәт гәдәр саһәләрин вә нәшрләрин олмасыны тәмин едирләр. Бәзиләри ибадәт евинин тәмизлијинә вә гуллуг ҝөстәрилмәсинә ҹавабдеһдир, диҝәрләри исә јығынҹаға ҝәләнләрә хидмәт едирләр, аудио-видео аваданлыглары идарә едирләр вә диҝәр ваҹиб ишләри ҝөрүрләр. Ән әсасы исә одур ки, јығынҹаг хидмәтчиләри руһән јеткин инсанлардыр. Онлар Јеһованы севирләр вә Онун салеһлик нормаларына ујғун јашајырлар. Һәмчинин онлар диндашларына дәрин мәһәббәт бәсләјирләр (Мәт. 22:37—39). Вәфтиз олунмуш гардаш јығынҹаг хидмәтчиси олмаг үчүн нә едә биләр?

5. Гардаш јығынҹаг хидмәтчиси олмаг үчүн нә етмәлидир?

⁵ Мүгәддәс Китабда јығынҹаг хидмәтчиси олмаг истәјәнләр үчүн тәләбләр јазылыб (1 Тим. 3:8—10, 12, 13). Әҝәр сиз јығынҹаг хидмәтчиси олмаг истәјирсинизсә, Мүгәддәс Китабдакы бу тәләбләри арашдырын вә онлара ујғун ҝәлмәк үчүн әлиниздән ҝәләни един. Амма әввәлҹә сиз өзүнүздән сорушмалысыныз: «Мән нә үчүн јығынҹаг хидмәтчиси олмаг истәјирәм?»

НӘ ҮЧҮН ЈЫҒЫНҸАГ ХИДМӘТЧИСИ ОЛМАГ ИСТӘЈИРСИНИЗ?

6. Баҹы-гардашларыныза хидмәт етмәјә сизи нә тәшвиг етмәлидир? (Мәтта 20:28; һәмчинин шәклә бахын.)

⁶ Бизим үчүн ән мүкәммәл өрнәк олан Иса Мәсиһин ҝөрдүјү ишләрин архасында Атасына вә инсанлара бәсләдији мәһәббәт дурурду. Бу мәһәббәт ону чохлу ишләр ҝөрмәјә вә башгаларына тәвазөкарлыгла хидмәт етмәјә тәшвиг едирди. (Мәтта 20:28 ајәсини охујун; Јәһ. 13:5, 14, 15.) Әҝәр сизи дә јығынҹаг хидмәтчиси олмаға тәшвиг едән мәһәббәтдирсә, онда Јеһова сизә бол немәтләр верәҹәк вә бу мәгсәдинизә чатмаг үчүн көмәк едәҹәк (1 Кор. 16:14; 1 Бут. 5:5).

7. Нәјә ҝөрә мәсулијјәтләрә ҹан атмағын архасында худбин нијјәт дурмамалыдыр?

⁷ Бу дүнјада инсанлар диггәти өзләринә ҹәмләјирләр вә ҝөз өнүндә олмаға чалышырлар ки, онлара пәрәстиш етсинләр. Јеһованын тәшкилатында исә белә дејил. Исанын  мәһәббәтини өрнәк ҝөтүрән гардаш башгалары үзәриндә ағалыг етмәјә ҹан атмыр вә ја өзүн башгаларындан үстүн тутмур. Әҝәр бу ҹүр әһвали-руһијјәдә олан бири јығынҹаг хидмәтчиси тәјин олунсајды, Јеһованын халгынын гајғысына галмаг үчүн ҝөрүлән бәзи ишләри јеринә јетирмәзди. Чүнки бу ҹүр ишләри ҝөрмәји өзүнә сығышдырмазды (Јәһ. 10:12). Јеһова тәкәббүрлү вә худбин инсанларын ҝөрдүјү ишләрә хејир-бәрәкәт вермир (1 Кор. 10:24, 33; 13:4, 5).

8. Иса һәвариләринә һансы мәсләһәти вермишди?

⁸ Бәзән Исанын достлары да мәсулијјәтләрә дүзҝүн нијјәтдән ирәли ҝәлмәјәрәк ҹан атырдылар. Нүмунә үчүн Јагубла Јәһјанын һадисәсини јадымыза сала биләрик. Онлар Исаја демишдиләр ки, Падшаһлыгда онлар үчүн хүсуси јер ајырсын. Иса онларын дүзҝүн дүшүнҹәдә олмадығыны гејд етди. О, 12 һәварисинә белә деди: «Аранызда бөјүк олмаг истәјән гуллуғунузда дурмалыдыр, биринҹи олмаг истәјән һамыныза нөкәрчилик етмәлидир» (Марк 10:35—37, 43, 44). Дүзҝүн нијјәтдән ирәли ҝәләрәк мәсулијјәтләрә ҹан атан гардашлар јығынҹаг үчүн әсл һәдијјәләрдир (1 Салон. 2:8).

ДИНДАШЛАРЫНЫЗА ХИДМӘТ ЕТМӘК ИСТӘЈИНИЗИ НӘ АРТЫРА БИЛӘР?

9. Башгаларына хидмәт етмәк истәјинизи неҹә артыра биләрсиниз?

⁹ Сөзсүз ки, сиз Јеһованы севирсиниз вә диндашларыныза хидмәт етмәк истәјирсиниз. Амма, ола билсин, јығынҹаг хидмәтчиләриндән тәләб олунан әлавә мәсулијјәтләри үзәринизә ҝөтүрмәк истәмирсиниз. Мәсулијјәтләрә ҹан атмаг истәјинизи неҹә артыра биләрсиниз? Баҹы-гардашлара хидмәт етмәјин ҝәтирдији севинҹ барәдә дүшүнүн. Иса демишди: «Вермәк алмагдан даһа чох хошбәхтлик ҝәтирир» (Һәв. 20:35). О бу принсипә әсасән јашајырды. Иса башгаларына хидмәт етмәкдән севинҹ дујурду. Ејни севинҹи сиз дә јашаја биләрсиниз.

10. Иса башгаларына хидмәт етмәјин она севинҹ ҝәтирдијини неҹә ҝөстәрди? (Марк 6:31—34).

¹⁰ Ҝәлин Исанын башгаларына хидмәт етмәкдән севинҹ дујдуғуну ҝөстәрән бир һадисәјә бахаг. (Марк 6:31—34 ајәләрини охујун.) Бир дәфә Иса вә һәвариләри чох јорулмушдулар. Онлар динҹәлмәк үчүн сакит бир јерә јолландылар, амма ҹамаат гачыб Исаҝили габаглады. Онлар истәјирдиләр ки, Иса онлара тәлим версин. Иса ҹамаата «јох» дејә биләрди. Чүнки о вә һәвариләри «һәтта јемәк јемәјә дә» маҹал тапмамышдылар. Јахуд Иса бир-ики тәлими онлара изаһ едиб јола сала биләрди. Амма инсанлары севдији үчүн «Иса онлара чох шеј өјрәтмәјә башлады». О, ҝүн батанадәк ҹамааты өјрәтди (Марк 6:35). Иса буну борҹ һиссиндән ирәли ҝәләрәк јох, ҹамаата јазығы ҝәлдији үчүн етди. О, инсанлары өјрәтмәк истәјирди, чүнки онлары севирди. Башгаларына хидмәт етмәк Исаја бөјүк севинҹ ҝәтирирди.

11. Иса она гулаг асанлара һансы әмәли көмәји ҝөстәрди? (Һәмчинин шәклә бахын.)

¹¹ Иса ҹамаата тәлим вермәклә кифајәтләнмәди. О, һәм дә онларын физики еһтијаҹларынын гајғысына галды. Иса ҹамааты мөҹүзәви шәкилдә гида илә тәмин етди вә јемәји пајламағы шаҝирдләринә тапшырды (Марк 6:41). Беләҹә о, шаҝирдләринә башгаларына хидмәт етмәји өјрәтди. Һәмчинин Иса ҝөстәрди ки, бу ҹүр практики ишләр ҝөрмәк чох ваҹибдир. Бу ҝүн јығынҹаг хидмәтчиләри дә буна бәнзәр ишләр ҝөрүрләр. Бир тәсәввүр един, Исанын мөҹүзәви шәкилдә тәгдим етдији јемәји пајлајандан сонра ҹамаатын јејиб дојдуғуну ҝөрән һәвариләр неҹә севинмишдиләр  (Марк 6:42). Бу, Исанын башгаларынын рифаһыны өзүнкүндән үстүн тутдуғуну ҝөстәрән јеҝанә һадисә дејил. О бүтүн јер үзү һәјаты боју инсанлара хидмәт етмишди (Мәт. 4:23; 8:16). Инсанлара тәлим вермәк вә онларын еһтијаҹларынын гајғысына галмаг Исаја севинҹ ҝәтирирди. Сизин дә јығынҹаг хидмәтчиси олмагда мәгсәдиниз башгаларына хидмәт етмәк олса, бу сизә бөјүк севинҹ ҝәтирәҹәк.

12. Нәјә ҝөрә дүшүнмәмәлијик ки, јығынҹаға хидмәт етмәк үчүн лазыми габилијјәтләримиз јохдур?

¹² Әҝәр һеч бир габилијјәтинизин олмадығыны дүшүнүрсүнүзсә, руһдан дүшмәјин. Шүбһәсиз, сизин јығынҹаға фајда ҝәтирәҹәк хүсусијјәтләриниз вар. Дуа едиб Булусун 1 Коринфлиләрә 12:12—30 ајәләриндә јаздығы сөзләр үзәриндә дүшүнмәк сизә фајда ҝәтирә биләр. Булусун сөзләри ајдын ҝөстәрир ки, Јеһованын һәр бир хидмәтчиси кими сизин дә јығынҹагда ваҹиб вә дәјәрли јериниз вар. Әҝәр һал-һазырда јығынҹаг хидмәтчиси олмаг үчүн тәләбләрә ҹаваб вермирсинизсә, руһдан дүшмәјин. Әксинә, Јеһоваја вә баҹы-гардашлара хидмәт етмәк үчүн әлиниздән ҝәләни един. Әмин олун ки, ағсаггаллар сизә һәр һансы бир тапшырыг верәндә габилијјәтләринизи нәзәрә алаҹаглар (Ром. 12:4—8).

13. Јығынҹаг хидмәтчиләри үчүн тәләбләрә ҹаваб вермәк нәјә ҝөрә чәтин дејил?

¹³ Ҝәлин јығынҹаг хидмәтчиси олмаға ҹан атмаға сизә көмәк едәҹәк даһа бир сәбәбә бахаг. Тәләбләрин әксәријјәтинә бүтүн мәсиһиләр ҹаваб вермәлидир. Әслиндә, бүтүн мәсиһиләр Јеһоваја јахынлашмалы, вермәјин ҝәтирдији севинҹи дујмалы вә өз һәјат тәрзләри илә башгаларына нүмунә гојмалыдырлар. Бәс гардаш башгаларына хидмәт етмәк үчүн конкрет нә едә биләр?

НӘЛӘР ЕДӘ БИЛӘРСИНИЗ?

14. «Ҹидди олмаг» нә демәкдир? (1 Тимутијә 3:8—10, 12).

¹⁴ Ҝәлин 1 Тимутијә 3:8—10, 12 ајәләриндә јазылан бәзи тәләбләри нәзәрдән кечирәк. (Ајәләри охујун.) Јығынҹаг хидмәтчиси ҹидди олмалыдыр. Бу ифадәни һәмчинин «һөрмәтә лајиг» вә ја «ләјагәтли» кими дә тәрҹүмә етмәк олар. Бу о демәк дејил ки, сиз һеч вахт ҝүлмәмәлисиниз вә ја зарафат етмәмәлисиниз (Ваиз 3:1, 4) Сиз мәсулијјәтләринизә ҹидди јанашмалысыныз. Әҝәр етибарлы инсан кими  танынсаныз, јығынҹагдакы баҹы-гардашларын һөрмәтини газанаҹагсыныз.

15. «Икиүзлү» вә «һарам газанҹ һәриси олмамаг» нә демәкдир?

¹⁵ «Икиүзлү олмамаг» о демәкдир ки, сәмими, дүрүст вә етибара лајиг олмалысыныз. Сиз сөзүнүзүн үстүндә дурмалысыныз вә башгаларыны алдатмамалысыныз (Мәс. 3:32). «Һарам газанҹ һәриси олмамаг» о демәкдир ки, сиз иш вә пул мәсәләләриндә дүрүст олмалысыныз. Диндашларынызла јахын мүнасибәтләриниздән һәрисликлә пул газанмаг үчүн истифадә етмәмәлисиниз.

16. а) «Шәраб дүшкүнү олмамаг» нә демәкдир? б) «Тәмиз виҹданлы олмаг» нә демәкдир?

¹⁶ «Шәраб дүшкүнү олмамаг» о демәкдир ки, сиз спиртли ичкиләрдә һәдди ашмамалы вә һәддән артыг чох ичән бири кими танынмамалысыныз. «Тәмиз виҹданлы олмаг» о демәкдир ки, сиз Јеһованын нормаларына ујғун јашамалысыныз. Онда камил олмасаныз да, Јеһова илә јахын мүнасибәтләриниз сизә сүлһ бәхш едәҹәк.

17. Јарарлы олуб-олмадығы сынанан гардаш етибара лајиг олдуғуну неҹә ҝөстәрә биләр? (1 Тимутијә 3:10; һәмчинин шәклә бахын.)

¹⁷ «Јарарлы олуб-олмадығы сынанмыш» о демәкдир ки, сиз ишләринизә гаршы мәсулијјәтли вә етибара лајиг олдуғунузу сүбут етмәлисиниз. Буна ҝөрә дә ағсаггаллар сизә тапшырыг верәндә онларын дедикләринә вә тәшкилатдан ҝәлән ҝөстәришләрә дәгигликлә әмәл един. Әмин олун ки, тапшырығынызын нәдән ибарәт олдуғуну вә ону нә вахт битирмәли олдуғунузу дәгиг билирсиниз. Әҝәр һәр тапшырығынызын өһдәсиндән лајигинҹә ҝәлсәниз, баҹы-гардашлар сизин инкишафынызы ачыг-ајдын ҝөрәҹәкләр. Әзиз ағсаггаллар, вәфтиз олунмуш гардашлара тәлим кечин. (1 Тимутијә 3:10 ајәсини охујун.) Јығынҹағынызда 10—14 вә ја даһа кичик јашларда олан вәфтиз олунмуш гардашлар вар? Онлар шәхси мүталиәјә вә јығынҹаға һазырлашмаға вахт ајырырлар? Јығынҹагларда мүтәмади шәрһ верирләр? Тәблиғдә иштирак едирләр? Онда онлара јашларына вә вәзијјәтләринә ујғун тапшырыглар верин. Беләҹә, бу ҝәнҹ гардашларын «јарарлы олуб-олмадығыны» сынаја биләҹәксиниз. Јашлары чатанда исә чох јәгин ки, онлар јығынҹаг хидмәтчиси олмаға һазыр олаҹаглар.

18. «Гүсурсуз олмаг» нә демәкдир?

¹⁸ «Гүсурсуз олмаг» о демәкдир ки,  сизә гаршы әсаслы ҹидди иттиһам ирәли сүрүлмәмәлидир. Әлбәттә, бәзән мәсиһиләр һагсыз јерә иттиһам олунурлар. Иса Мәсиһи дә һагсыз јерә иттиһам етмишдиләр вә о демишди ки, онун шаҝирдләри дә белә вәзијјәтләрлә үзләшәҹәкләр (Јәһ. 15:20). Амма сиз дә Иса кими дүзҝүн даврансаныз, онда јығынҹагда јахшы ад газанаҹагсыныз (Мәт. 11:19).

19. «Тәк бир гадынла евли олмаг» нә демәкдир?

¹⁹ «Тәк бир гадынла евли» олмалысыныз. Әҝәр евлисинизсә, никаһыныз Јеһованын әзәли нијјәтинә ујғун олмалыдыр. Јәни бир киши бир гадынла евли олмалыдыр (Мәт. 19:3—9). Мәсиһи киши һеч вахт ҹинси әхлагсызлыға јол вермәмәлидир (Ибр. 13:4). Амма ондан башга шеј дә тәләб олунур. Сиз һәјат јолдашыныза садиг олмалысыныз вә башга гадынлара јерсиз диггәт ҝөстәрмәмәлисиниз (Әјј. 31:1).

20. Киши аиләсини јахшы идарә етдијини неҹә ҝөстәрә биләр?

²⁰ Ушагларынызы вә ев әһлинизи јахшы идарә етмәлисиниз. Әҝәр сиз аилә башчысысынызса, мәсулијјәтләринизә ҹидди јанашын. Мүнтәзәм аиләви ибадәт кечирин. Аилә үзвләринизин һәр бири илә хидмәтә чыхын. Өвладларыныза Јеһова илә јахын мүнасибәт гурмаға көмәк един (Ефес. 6:4). Аиләсини јахшы идарә едән киши ҝөстәрир ки, о, јығынҹағын да гајғысына гала биләҹәк. (1 Тимутијә 3:5 ајәси илә әлагәләндирин.)

21. Јығынҹаг хидмәтчиси олмаг үчүн нә едә биләрсиниз?

²¹ Әзиз гардашлар, әҝәр һәлә дә јығынҹаг хидмәтчиси дејилсинизсә, хаһиш едирик, дуа един вә бу мәгаләни диггәтлә охујун. Јығынҹаг хидмәтчиләри үчүн тәләбләри арашдырын вә онлара ујғун ҝәлмәк үчүн әлиниздән ҝәләни един. Јеһованы вә баҹы-гардашлары нә гәдәр чох севдијиниз барәдә дүшүнүн. Диндашларыныза хидмәт етмәк истәјинизи артырын (1 Бут. 4:8, 10). Руһани аиләнизә хидмәт етмәјин севинҹини дадын. Гој Јеһова сизә јығынҹаг хидмәтчиси олмаг мәгсәдинизә чатмаға көмәк етсин! (Филип. 2:13).