1, 2. Бир гардаш руһани ҹәһәтдән зәиф олдуғуну неҹә баша дүшдү вә бунунла бағлы нә тәдбир ҝөрдү?

РОБЕРТ адлы бир гардаш јенијетмә јашында вәфтиз олмушду. Амма ибадәт онун һәјатында әсас јери тутмурду. О дејир: «Мән һәмишә нүмунәви олмаға чалышырдым. Лакин мәни идарә едән әглим јох, һиссләрим иди. Кәнардан руһани ҹәһәтдән јеткин инсан кими ҝөрүнүрдүм. Ҝөрүшләри бурахмырдым, илдә бир нечә дәфә көмәкчи өнҹүл кими хидмәт едирдим. Амма дејәсән, нәјисә нәзәрдән гачырмышдым».

² Роберт проблемин нәдә олдуғуну јалныз аилә гурандан сонра баша дүшдү. О вә јолдашы тез-тез Мүгәддәс Китаб мөвзулары әтрафында бир-биринә суаллар верирдиләр. Јолдашы руһани ҹәһәтдән јеткин инсан олдуғу үчүн суалларын ҹавабыны асанлыгла тапырды. Роберт исә, адәтән, чашыб галыр, суаллара ҹаваб верә билмирди. О дејир: «Мәнә елә ҝәлирди ки, һеч нә билмирәм. Өз-өзүмә фикирләшдим: “Әҝәр аиләмә руһани ҹәһәтдән башчылыг етмәк истәјирәмсә, нәсә еләмәлијәм”». О, ләнҝимәдән һәрәкәтә кечди. Роберт дејир: «Мән Мүгәддәс Китабы чохлу-чохлу арашдырмаға башладым. Артыг бејнимдә үмуми шәкил јаранмышды, Мүгәддәс Китабы баша дүшмәјә башламышдым. Ән ваҹиби исә Јеһоваја даһа јахын олмушдум».

3. а) Роберт гардашын һадисәсиндән нә өјрәндик? б) Бу мәгаләдә һансы ваҹиб суаллары нәзәрдән кечирәҹәјик?

 ³ Роберт гардашын һадисәсиндән ваҹиб бир дәрс ҝөтүрүрүк. Мүгәддәс Китабдан мүәјјән билијимизин олмасы, мүнтәзәм јығынҹаг ҝөрүшләринә ҝәлмәјимиз вә тәблиғә чыхмағымыз бизим руһани ҹәһәтдән јеткин олдуғумуза дәлаләт етмир. Ола билсин, биз мүәјјән дәрәҹәдә тәрәгги етмишик, амма өзүмүзү тәһлил едәндә ҝөрә биләрик ки, руһани ҹәһәтдән һәлә дә өз үзәримиздә ишләмәлијик (Филип. 3:16). Мәгаләдә бунунла бағлы ваҹиб мәгамлары нәзәрдән кечирәҹәјик: 1) Руһани ҹәһәтдән јеткин инсан олуб-олмадығымызы неҹә мүәјјән едә биләрик? 2) Руһани дүшүнҹәли инсан олмаг вә бу саһәдә ирәли ҝетмәк үчүн нә етмәлијик? 3) Руһани дүшүнҹәли инсан олмаг ҝүндәлик һәјатымызда бизә неҹә көмәк едә биләр?

4. Ефеслиләрә 4:23, 24 ајәләриндәки мәсләһәт кимләрә аиддир?

⁴ Инсан Јеһова Аллаһа хидмәт етмәјә башлајанда һәјатынын һәр бир саһәсинә тәсир едән көклү дәјишикликләр едир. Тәбии ки, вәфтиз олмагла бу просес битмиш сајылмыр. Мүгәддәс Китабын «даима дүшүнҹә тәрзинизи јениләшдирмәлисиниз» сөзләри буну тәсдиг едир (Ефес. 4:23, 24). Һеч биримиз камил олмадығымыз үчүн бу мәсләһәти тәтбиг едәрәк дәјишмә просесини давам етдирмәлијик. Илләрлә Јеһоваја хидмәт едән мәсиһиләр белә, руһани ҹәһәтдән мөһкәм галмаг үчүн даима өз үзәрләриндә чалышмалыдырлар (Филип. 3:12, 13).

5. Һансы суалларын ишығында өзүмүзү тәһлил едә биләрик?

⁵ Руһани ҹәһәтдән тәрәгги етмәк вә бу саһәдә мөһкәм галмаг үчүн өзүмүзү тәһлил етмәлијик вә бу заман өзүмүзә гаршы дүрүст олмағы да унутмамалыјыг. Нөвбәти суаллар, јашымыздан асылы олмајараг, һәр биримизә бу ишдә көмәк едә биләр: Руһани дүшүнҹәли инсан олмаға чалышдығымы нә ҝөстәрир? Мәсиһә хас хүсусијјәтләрә јијәләнирәмми? Ибадәт ҝөрүшләриндәки әһвали-руһијјәм вә давраныш тәрзим руһани вәзијјәтим барәдә нә дејир? Етдијим сөһбәтләр мәгсәдләрим һагда нә дејир? Фәрди мүталиә, ҝејим, хариҹи ҝөркәм, мәсләһәтә мүнасибәт саһәсиндә өзүмдә нәји мүшаһидә едирәм? Нәфсим мәни сынајанда неҹә давранырам? Бир мәсиһи кими јеткинләшмәјә давам едирәм? (Ефес. 4:13). Бу суаллара вердијимиз ҹаваблар руһани инкишафымызын һансы мәрһәләдә олдуғуну ҝөстәрәҹәк.

6. Руһани ҹәһәтдән һансы вәзијјәтдә олдуғумузу даһа неҹә јохлаја биләрик?

⁶ Руһани ҹәһәтдән һансы вәзијјәтдә олдуғумузу мүәјјән етмәк үчүн, бәзән, бизә башгаларынын көмәји лазым ҝәлир. Булусун јаздыгларына әсасән, ҹисмани дүшүнҹәли инсан һәјат тәрзинин Аллаһы разы салмадығыны баша дүшмүр. Руһани дүшүнҹәли инсан исә Аллаһын нөгтеји-нәзәрини баша дүшүр вә дәрк едир ки, Аллаһ ҹисмани дүшүнҹәли инсанын һәјат тәрзини гәбул етмир (1 Кор. 2:14—16; 3:1—3). Мәсиһин дүшүнҹәсинә саһиб олан ағсаггаллар ҹисмани дүшүнҹәнин әламәтләрини дәрһал сезә билирләр. Әҝәр онлар биздә бу проблеми ҝөрүб мәсләһәт верәрләрсә, онларын көмәјини гәбул едәҹәјикми? Белә давранарыгса, руһани ҹәһәтдән инкишаф етмәк истәдијимизи ҝөстәрәҹәјик (Ваиз 7:5, 9).

7. Нәјә ҝөрә Мүгәддәс Китабы јахшы билмәк руһани дүшүнҹәли инсан олмаг үчүн кифајәт дејил?

⁷ Руһани дүшүнҹәли инсан олмаг үчүн Мүгәддәс Китабы јахшы билмәк кифајәт дејил. Сүлејман падшаһ Јеһова һагда зәнҝин елмә саһиб иди. Онун јаздығы ҝөзәл кәлмәләр Аллаһын Кәламына дахил едилиб. Амма бу гәдәр билији олан инсан ахырда мөминлијини горуја билмәјиб Аллаһын јолундан дөндү (1 Пад. 4:29, 30; 11:4—6). Бундан белә нәтиҹә чыхарырыг ки, биз Мүгәддәс Китабдан елм алмагла јанашы, руһани ҹәһәтдән бөјүмәјә давам етмәлијик (Кол. 2:6, 7). Бәс бу ишдә бизә нә көмәк едәр?

8, 9. а) Бизә руһани ҹәһәтдән бөјүмәјә нә көмәк едә биләр? б) Мүталиә едәндә мәгсәдимиз нә олмалыдыр? (Мәгаләнин әввәлиндәки шәклә бахын.)

 ⁸ Һәвари Булус биринҹи әсрдәки мәсиһиләри «јеткинлијә доғру ирәлилә»мәјә чағырырды (Ибр. 6:1). Булусун мәсләһәтинә әмәл етмәк үчүн биз һансы аддымлары атмалыјыг? Бу саһәдә бизә көмәк едәҹәк ваҹиб амилләрдән бири «Аллаһын мәһәббәтиндән ајрылмајын» китабыны мүталиә етмәкдир. Бу китабы әввәлдән-ахыра гәдәр арашдырмагла Мүгәддәс Китаб принсипләрини һәјатда тәтбиг етмәји өјрәнә биләрик. Китабы артыг өјрәниб гуртаранлара төвсијә едәрдик ки, иманларыны мөһкәмләндирмәјә көмәк едәҹәк башга нәшрләри арашдырсынлар (Кол. 1:23). Мүталиәмиз сәмәрәли олсун дејә, охудугларымыздан нәтиҹә чыхармалы вә өјрәндикләримизин бизә неҹә аид олдуғуну баша дүшмәк үчүн Јеһовадан көмәк истәмәлијик.

⁹ Мүталиә едәндә мәгсәдимиз Јеһованы разы салмаг вә Онун ганунлары илә јашамаг арзусуну аловландырмаг олмалыдыр (Зәб. 40:8; 119:97). Биз мүталиә етмәклә јанашы руһани инкишаф јолунда бизә мане олан һәр шејә «јох» демәји дә өјрәнмәлијик (Тит. 2:11, 12).

10. Ҝәнҹләр руһани ҹәһәтдән бөјүмәк үчүн нә етмәлидирләр?

¹⁰ Нөвбәти суалымыз ҝәнҹләрә үнванланыб: әзиз ҝәнҹләр, гаршыныза руһани мәгсәдләр гојмусунуз? Адәтән, рајон топлантысында Бејтелдән ҝәлән гардаш топланты башламаздан әввәл вәфтиз олмаға һазырлашанларла сөһбәт едир вә онлара руһани мәгсәдләри барәдә суаллар верир. Чох вахт онларын арасында чохлу ҝәнҹләр олур. Бу ҝәнҹләрин вердији ҹавабдан ајдын ҝөрүнүр ки, онлар Јеһованын јолунда һансы иши ҝөрмәк истәдикләрини конкрет билирләр: бәзиләри тамвахтлы хидмәтдә (әввәлки ады таммүддәтли хидмәт) иштирак етмәк истәјир, бәзиләринин исә мәгсәди тәблиғчиләрә тәләбат олан әразијә көчмәк олур. Амма бәзиләри билмир бу суала нә ҹаваб версин. Бәлкә онлар руһани мәгсәдләр гојмағын ваҹиб олмадығыны дүшүнүрләр?! Ҝәнҹләрә мәсләһәт ҝөрәрдик ки, өзләринә нөвбәти суаллары версинләр: јығынҹаға вә тәблиғә нәјә ҝөрә ҝедирәм, валидејнләрими разы салмаг үчүн? Јеһова илә јахын дост олмаг үчүн Онунла шәхси мүнасибәт гурурам? Тәбии ки, руһани мәгсәдләр гојмаг мәсләһәти јалныз ҝәнҹләрә аид дејил. Руһани ҹәһәтдән јеткинләшмәк истәјән һәр бир мәсиһи гаршысына илаһи мәгсәдләр гојмалыдыр (Ваиз 12:1, 13).

11. а) Бизә руһани ҹәһәтдән бөјүмәјә даһа нә көмәк едә биләр? б) Бу саһәдә кимдән нүмунә ҝөтүрә биләрик?

¹¹ Руһани ҹәһәтдән ирәли ҝетмәк үчүн әввәлҹә һансы саһәдә зәиф олдуғумузу мүәјјән етмәли вә вәзијјәти дүзәлтмәк үчүн аддымлар атмалыјыг. Бу чох мүһүм мәсәләдир, һәтта дејәрдик, өлүм-дирим мәсәләсидир (Ром. 8:6—8). Әлбәттә, руһани дүшүнҹәли инсан олмаг, камил олмаг демәк дејил. Руһани ҹәһәтдән ирәли ҝетмәк үчүн Јеһова бизә Өз мүгәддәс руһуну верир. Амма биз дә өз тәрәфимиздән нә исә етмәлијик. Рәһбәрлик Шурасынын үзвү олмуш Ҹон Барр гардаш бир нечә ил бундан габаг Лука 13:24 ајәси илә бағлы белә сөзләр демишди: «Чохлары дар гапыдан ҝирә билмәјиб, чүнки өзләрини руһани ҹәһәтдән мөһкәмләндирмәк үчүн кифајәт гәдәр чалышмајыблар». Ҝәлин тәслим олмајаг, хејир-дуа алана гәдәр мәләклә ҝүләшән Јагуб пејғәмбәрдән нүмунә ҝөтүрәк (Јар. 32:26—28). Мүгәддәс Китабы неҹә мүталиә етдијимизә дә диггәт јетирмәлијик. Дүздүр, орада чохлу мараглы һадисәләр вар, амма еһтијатлы олмалыјыг ки, ону садәҹә әјләнҹәли бир роман кими охумајаг. Аллаһын Кәламыны мүталиә едәндә бизә фајда ҝәтирән руһани инҹиләр ахтармалыјыг.

12, 13. а) Ромалылара 15:5 ајәсиндәки сөзләрин бизим үзәримиздә јеринә јетмәси үчүн нә едә биләрик? б) Бутрусун гојдуғу нүмунә вә вердији мәсләһәт бизә неҹә көмәк едә биләр? ҹ) Руһани ҹәһәтдән бөјүмәк үчүн һәр биримиз нә етмәлијик? (« Руһани ҹәһәтдән јеткинләшмәјә көмәк едән аддымлар» адлы чәрчивәјә бахын.)

¹² Руһани ҹәһәтдән бөјүмәк үчүн вар  ҝүҹүмүзлә чалышсаг, мүгәддәс руһ бизә дүшүнҹә тәрзимизи дәјишмәјә көмәк едәҹәк. Бу көмәјин сајәсиндә биз ҝет-ҝедә Мәсиһ кими дүшүнмәји өјрәнәҹәјик (Ром. 15:5). Мүгәддәс руһ, һәмчинин бизә гәлбимиздән ҹисмани арзулары чыхарыб, јерини Аллаһы разы салан хүсусијјәтләрлә долдурмаға көмәк едәҹәк (Гал. 5:16, 22, 23). Әҝәр фикримизин мадди шејләрә, ҹисмани арзулара ҹәмләндијини һисс едәриксә, тәслим олмамалыјыг, Јеһовадан дөнә-дөнә мүгәддәс руһ истәмәлијик. Јеһова бизә дүшүнҹәмизи дүзҝүн истигамәтә јөнәлтмәјә көмәк едәҹәк (Лука 11:13). Мисал кими, һәвари Бутрусу јадымыза сала биләрик. Бәзән о да јеткин мәсиһијә хас олмајан шәкилдә давранырды (Мәт. 16:22, 23; Лука 22:34, 54—62; Гал. 2:11—14). Амма Бутрус тәслим олмады. Јеһованын көмәји илә о, тәдриҹән Мәсиһ кими дүшүнмәји өјрәнди. Биз дә буну баҹарарыг.

¹³ Елә Бутрусун өзү сонралар мәктубунда мәсиһиләрә ирәли ҝетмәјә көмәк едән хүсусијјәтләри садаламышды. (2 Бутрус 1:5—8 ајәләрини охујун.) Вар ҝүҹүмүзлә чалышыб өзүмүздә тәмкин, дөзүм, гардашлыг севҝиси кими хүсусијјәтләр јетишдирсәк, руһани дүшүнҹәли инсан олмаг истигамәтиндә ирәли ҝетмиш оларыг. Һәр ҝүн өзүмүздән соруша биләрик: «Руһани ҹәһәтдән бөјүмәк үчүн бу ҝүн нә едә биләрәм?»

14. Руһани дүшүнҹәли инсан олмаг мәсиһинин һәјатына неҹә тәсир едир?

¹⁴ Руһани дүшүнҹәли инсан олдуғумуз, бизим мәктәбдәки вә ишдәки давранышымызда, данышығымызда, еләҹә дә ҝүндәлик гәрарларымызда өзүнү бүрузә верир. Гәрарларымыздан Мәсиһин изләри илә ҝетдијимиз ҝөрүнмәлидир. Руһани дүшүнҹә бизи Јеһова илә мүнасибәтләримизә зәрәр ҝәтирәҹәк давранышлардан горујаҹаг. Нәфсин сынағына дүшәндә бу дүшүнҹә бизи нәфси боғмаға сөвг едәҹәк. Һәмчинин гәрар верәндә дајаныб бу суалларын үзәриндә дүшүнмәлијик: Мүгәддәс Китабын һансы принсипи мәнә дүзҝүн гәрар вермәјә көмәк едә биләр? Мәсиһ мәним јеримдә олсајды, нә едәрди? Һансы гәрары версәм, Јеһоваја хош ҝедәр? Гәрар вермәздән әввәл буну етмәк биздә вәрдиш һалыны алмалыдыр. Ҝәлин өзүмүзү мәшг етдирмәк үчүн бир нечә вәзијјәти нәзәрдән кечирәк. Бу вәзијјәтләрин һәр бириндә дүзҝүн гәрар вермәјә көмәк едән Мүгәддәс Китаб принсипи ҝәтириләҹәк.

15, 16. Мәсиһин дүшүнҹәсинә саһиб олмаг бизә а) һәјат јолдашы вә б) дост сечәндә неҹә көмәк едә биләр?

¹⁵ Һәјат јолдашы сечәндә. Бу вәзијјәтдә тәтбиг едә биләҹәјимиз принсип 2 Коринфлиләрә 6:14, 15 ајәләриндә јерләшир. (Ајәләри охујун.) Һәвари Булус бу ајәләрдә ачыг-ајдын вурғулајыр ки, руһани дүшүнҹәли инсанла ҹисмани дүшүнҹәли инсан арасында һеч бир ортаглыг ола билмәз. Бу принсип һәјат јолдашы сечәндә бизә неҹә көмәк едә биләр?

¹⁶ Дост сечәндә. Бу вәзијјәтә 1 Коринфлиләрә 15:33 ајәсиндәки принсипи ҝәтирмәк олар. (Ајәни охујун.) Тәбии ки, руһани дүшүнҹәли мәсиһи онун Аллаһла мүнасибәтләрини корлаја биләҹәк инсанларла јолдашлыг етмәјәҹәк. Бәс бу принсипи башга вәзијјәтләрдә, мәсәлән, сосиал шәбәкәләрдән истифадә едәндә вә ја Интернетдә танымадығымыз адамлар тәрәфиндән онлајн ојунлар ојнамаға дәвәт аланда неҹә тәтбиг етмәк олар?

17—19. Руһани дүшүнҹәјә саһиб олмаг бизә а) пуч шејләрин далынҹа гачмамаға, б) гаршымыза илаһи мәгсәдләр гојмаға вә ҹ) сүлһпәрвәр олмаға неҹә көмәк едә биләр?

 ¹⁷ Руһани ҹәһәтдән бөјүмәјимизә әнҝәл олан ишләр. Һәвари Булус Ибраниләрә 6:1, 2 ајәләриндә мәсиһиләрә нәсиһәтамиз сөзләр јазмышды. (Ајәләри охујун.) Бу нәсиһәтә әсасән, биз «өлүмә апаран» һансы ишләрдән узаг дурмалыјыг? Бура Јеһованын ҝөзүндә өлү, бош вә фајдасыз олан бүтүн ишләр дахилдир. Бу принсип һәјатда гаршылашдығымыз бир чох суаллара ҹаваб тапмаға көмәк едә биләр. Мәсәлән: «Бу мәшғулијјәт “өлүмә апаран” ишләрә дахилдир? Асан пул газандыран бу тәклифи гәбул едим, етмәјим? Нәјә ҝөрә ислаһатчы һәрәкатлара гошулмамалыјам?»

¹⁸ Илаһи мәгсәдләр. Иса Мәсиһин дағүстү вәзиндә вердији мәсләһәтләр гаршымыза дүзҝүн мәгсәдләр гојмаға көмәк едә биләр (Мәт. 6:33). Әлбәттә ки, руһани дүшүнҹәли инсан илаһи мәгсәдләрә ҹан атаҹаг. Ајәдәки принсипин көмәји илә мәгсәдләрлә бағлы нөвбәти суаллара ҹаваб тапа биләрик: «Орта мәктәби битирәндән сонра али тәһсил алым, алмајым? Бу иш тәклифини гәбул едим, етмәјим?»

¹⁹ Наразылыг јарананда. Һәвари Булусун Ромадакы мәсиһиләрә јаздығы мәсләһәт бизә наразылыг јаранан вахт неҹә көмәк едә биләр? (Ром. 12:18). Тәбии ки, Мәсиһин давамчысы олдуғумуз үчүн биз «һамы илә сүлһдә олмаға» чалышырыг. Бәс киминләсә арамызда наразылыг јарананда неҹә давранырыг? Гаршы тәрәфин фикрини нәзәрә алмаг бизә чәтин ҝәлир? Јохса һәмишә сүлһпәрвәр инсан кими давранмаға чалышырыг? (Јаг. 3:18).

20. Нәјә ҝөрә руһани дүшүнҹәли инсан олмаг истәјирсиниз?

²⁰ Јухарыда ҝәтирилән бир нечә нүмунәдән ҝөрдүк ки, Мүгәддәс Китаб принсипләри бизә руһани дүшүнҹәли инсана хас гәрарлар вермәјә неҹә көмәк едә биләр. Руһани дүшүнҹәјә саһиб оларыгса, һәр ҝүнүмүз хошбәхт вә мәналы кечәр. Мәгаләнин әввәлиндә һаггында бәһс етдијимиз Роберт гардаш дејир: «Јеһова илә јахын достлуг мүнасибәти гурандан сонра мән һәм јахшы әр, һәм дә јахшы ата ола билдим. Бу, мәнә дәрин мәмнунлуг вә хошбәхтлик ҝәтирди». Биз дә әлимиздән ҝәләни едиб руһани ҹәһәтдән јеткинләшмәјә чалышсаг, ејни немәтләри дадарыг. Беләҹә, биз бу ҝүн мәналы һәјат сүрәр, ҝәләҹәкдә исә «әсл һәјат»ы јашајарыг (1 Тим. 6:19).